豪華午餐 Shabu-Shabu

話說上回展覽會期間雖然做到昏天暗地, 但係就得到唔錯嘅 feedback, 總公司為咗慰勞我地 team, 專誠叫美國同事帶獎金比我地食餐好, 咁就當然唔駛客氣啦! 因為要就晒成 team, 所以決定食 lunch, 亦即係唔去得遠。諗起公司附近有幢大廈成日經過, 水牌上有幾間唔同專題嘅日本料理, 就提議一試! 我地選咗間食 Shabu-shabu 嘅, 環境唔錯之餘, 價錢亦比意料中平。我要咗一個"和牛火鍋定食"(和牛即係日本牛肉, 通常唔註明嘅只會係美國牛肉), 女友就要咗個"雜錦刺身飯"。雖然我晌日本已經食過好幾次牛肉火鍋, 但用"紙"做個大鍋都係第一次! 好喇, 昆布湯水滾之後, 跟住嘅前菜, 蒸蛋, 沙律, 雜菜同手打烏冬陸續上場, 最後先排到主角"和牛"。一見啲牛肉就知係好嘢, 又新鮮色澤又靚, 雖然只得六片, 但其實每一片都好大件, 牛味十足勁好味道!