2009年12月31日星期四

2009年最後の日

起身返工、同事團年、工司收早、相機維修、"第尾"据扒、LCC、教堂倒數、告別09、2010、收發短訊、巴士罰企、返到屋企。That's it!

2009年12月30日星期三

磨菇炒肉片

晚會一完就極速離開,因為老闆娘等埋我開飯。點知一出藝穗會門口開始落雨,仲愈落愈大,到地鐵站時個身已經濕咗三成。天雨路滑,竟然用咗一個半鐘先返到屋企,好彩一到步就可以開餐。是晚菜單係「磨菇炒肉片」+「雙丸炒白菜仔」。

"今夜只因您"悼念晚會

雖然事隔六年,但晚會上依舊見到一張又一張熟悉嘅面孔,不離不棄地一同懷念著您這個香港的傳奇... 梅姐,祝您在那遙遠的地方,可以忘記人間是非,永遠開心、快樂!每年晚會完結總會落雨,究竟係巧合定係妳比回應我地呢?

2009年12月29日星期二

黃少姐 大日子

彼此嘅愛情故事同樣係由公司相識、發展到結合。互相見證住對方嘅相識到結合嘅過程,最後大家都得到一個幸福嘅結局,實屬難得。所以唯有放棄重睇 梅姐 "Mui Music Show"嘅機會,同 老闆娘 齊齊盛裝出席婚宴。

2009年12月28日星期一

災區善後

放工嘅節目就係返屋企繼續災區善後,為爭取時間,是日晚餐以簡單為原則「煎蛋餅」配「牛扒拉麵」。埋單總結損失比意料中少,不幸中之大幸!

2009年12月27日星期日

黑色聖誕

處理災區到天光先訓落床,小睡三個鐘就要準備返學,好彩 熊貓拳 上門幫手之餘又車我返公司拎功課,果然好兄弟!今日又係用英文做 presentation,老實講我覺得今日表現比上次差,但係 feedback 又比上次好喎,真奇怪?! 放學後到又一城出席 老闆娘 親戚嘅婚宴,輕輕一撞部相機又壞埋,年尾黑仔到呢... #_#

2009年12月26日星期六

聖誕水災

基本上整個聖誕假期每日都有做功課,分別在於時間長短。到交功課前一日當然要全力以赴,訓醒覺食完愛心午餐之後就返公司,一直戰鬥到夜晚十一點幾。期間 老闆娘 出嚟一齊食個晚飯,再幫手準備 powerpoint,一切好似幾順利,點知返到屋企先係高潮所在... 洗衣機去水位塞咗,由廚房水浸濕到出個廳,幾個紙皮箱濕到出水,OMG!

2009年12月25日星期五

繼續燒烤

緊接第二日嘅 BBQ 聚會。由於人數少,只有返嚟地球過聖誕嘅 Wing E 同 GG,所以重新開放天台。是晚燒烤嘅牛扒、豬扒、雞翼由 老闆娘 一手包辦。

2009年12月24日星期四

長途燒烤

今日公司補假,一早起身等 倉務主管 嚟補貨,之後齊齊去食晏。而日期一改再改嘅 BBQ 終於成事,人數仲急升一倍至十四個,所以唔可以上天台要留响花園燒。契媽 一家由頭帶到尾,全程燒足六個鐘,厲害厲害!雖然 牛叔 事件未淡化,希望今晚熱熱鬧鬧可以幫佢放鬆一下心情啦!

2009年12月23日星期三

Merry X'mas 09

冬至+聖誕晚餐

成個董事局嘅成員都係忙人,所以夾啱時間就一次慶祝晒兩個節日。今次仲成功游說 董事長夫人,被免咗十個人二十個餸嘅驚嚇場面再現!

2009年12月22日星期二

芝士焗鮮茄牛脷螺絲粉

四出食過節飯之後,今晚決定同 老闆娘 倆個自己留响屋企靜靜地造冬,是日晚餐「芝士焗鮮茄牛脷螺絲粉」。

2009年12月21日星期一

公司派對

今日公司休假半日攪 X'mas party,無厘頭地被欽點為隊長,好彩不負眾望咁贏咗個估歌仔比賽,有一大張金牛同大家分。話時話,今日有自助餐食之餘仲人人有一份禮物收,算係近年少有咁大手筆!

2009年12月20日星期日

一路好走

今日係 牛叔 辦白事嘅日子,應 契媽 要求,返學校交完 layout 之後,就同 老闆娘 齊齊到"世界"幫手。三個兒女都長大成人,亦非常孝順 契媽,牛叔 可以放心,一路好走。

2009年12月19日星期六

排隊造節

"冬至"將至,又係時候排隊造節。第一站係 麗晶姑媽,一如往時,份量每每過多實際人數,離開時大家總會一袋二袋三袋咁拎走...

2009年12月18日星期五

無酒精啤酒

小富婆車人 轉咗新工,為咗答謝我地一路以來嘅支持同鼓勵,今晚請咗 怪獸 同我地到灣仔"King Ludmig Beerhall"食德國菜。整體食物質素唔錯,"咸豬手"同"德國賜拼盤"都好味道。最驚喜應該係無酒精啤酒,完全滿足咗 老闆娘 想飲酒又怕出酒癩嘅願望。

2009年12月17日星期四

Fusion 炒麵

老闆娘 再次發揮小宇宙,替我準備咗一個融合意大利粉+日本簥麥麵嘅「Fusion 炒麵」做午餐,勁呀!

2009年12月16日星期三

又有相睇

放工前收到電話有相簿嘅第二稿睇,見時間許可就即晚趕過去。唔睇由自可,一睇就笑到唔停得口,國內設計師竟然亂咁將相片放大縮細,真係唔改好過改。剛巧有準備咗張相想補上出,尺寸當然 fit 到爆,佢老細見到都笑笑口話早知俾個 file 我自己做。我地笑住答"係架,你不如俾個 file 我地自己做啦!"... 結果當然個老細係即時扮儍行開咗啦,XDDD!

今夜只因您 ’09

Anita 悼念晚會
地點:藝穗會天台 (中環下亞厘畢道2號天台)
時間:8:00 pm 悼念晚會
費用:免費開放予公眾人士參加

如有查詢,請聯絡歌迷會: (852) 25562695

2009年12月15日星期二

酒樓外賣

差不多成個月無返老家開飯,又係時候浦一浦頭。枱上有三碟味道極濃嘅餸菜,董事長夫人 聲稱係隔鄰師奶合力之作... 但我覺得似係酒樓外賣囉,究竟邊個比人呃先?

2009年12月14日星期一

白菜仔肉片炒麵

難得唔駛太夜收工,老闆娘 當然把握機會玩下煮飯仔。是日晚餐「白菜仔肉片炒麵」。

2009年12月13日星期日

力奇 大日子

頻頻撲撲

全日頻頻撲撲,就好似今日途經香港公園影到嘅蝴蝶一樣。起身先準備好功課,跟手趕到紅棉道觀禮,影完相同 Ah E 極速落金鐘食個 tea。之後趕返公司 print layout,再飛車返 HKPU 上堂。落堂後會合 老闆娘 又趕返過灣仔買碟,之後上到酒樓先停一停。雖然全晚食物同安排都乏善足陳,不過見到十幾年老朋友成家立室確係開心。兄弟,Happy Wedding!

2009年12月12日星期六

無良業主

難得訓到十點幾先自然醒,起身梳洗之後就開始做功課。夜晚出席完 LCC 之後過咗太子行街,見到 Zero 第一個家"寵物醫院"俾無良業主迫遷,用大量圍板阻路之餘,再用大喇叭不斷大聲廣播替其趕客... 希望佢地快快搵到新地方啦。

2009年12月11日星期五

豪食火鍋

今日有一筆橫財,所以決定請 熊貓拳 同 奇異陳 飽餐一頓,豪食"稻香"火鍋。熊貓拳 叫到一枱海鮮,可惜好睇唔好食,幾百銀就咁白白浪費咗... 雖然係橫財,但咁樣食咗成隻金牛真係好唔抵,熊先生係時候學下節儉喇!

2009年12月10日星期四

韓式鴛鴦粉絲

今晚返第二堂 Dreanweaver,放學時間比上一堂更夜,好係想殺咗個"阿傻"!老闆娘 堅持等我一齊食飯,最後返到屋企差不多成十二點,真係辛苦晒!是日晚餐,「韓式鴛鴦粉絲」+「肉鬆炒蛋」+「清炒菜心」。

2009年12月9日星期三

玩見工

老闆娘 今日身痕玩見工,面試前約咗我食午飯,之後仲上我公司探舊同事,擾攘一輪!

2009年12月8日星期二

菜圃肉鬆炒飯

出得街食 lunch 多,今日決定留响公司食 老闆娘 嘅「菜圃肉鬆炒飯」。因為 黃少姐 好事近,夜晚集齊久違了嘅 8A team 攪火鍋飯局,順便收炸彈。

MUI MUSIC SHOW 慈善夜

「芳心薈」 獲得「香港商業電台」的全力支持,提供了「梅艷芳Mui Music Show」母帶,並重新錄製,讓這從未發行過的珍貴演出得以公開重現,讓ANITA的歌迷,她的好朋友及每一位曾聽她音樂的香港人,在這紀念日子裡一同重溫。為延續 梅艷芳 小姐樂善好施的精神,門票收益扣除活動支出後,將全數撥捐「樂施會」。

日期:2009年12月29日 (星期二)
時間:7:30 pm
地點:香港九龍灣國際展覽中心3樓演講廳
門票:HK$150.00 - 不設劃位 (會員 / 非會員同價)

詳情:Click Here

2009年12月7日星期一

兒童聖誕禮物包

公司一年一度籌備嘅慈善活動,一如往年,各同事捐出一堆聖誕禮物作為兒童聖誕禮物包之用!

2009年12月6日星期日

Moodboard

今日要做 Moodboard presentation,因為屋企部 notebook 太弱,返學前要趕到公司埋尾。收到電話本 12R 相簿有樣板睇,買完兒童院嘅聖誕禮物之後就上去眅眅,整體比意料真好喎!

2009年12月5日星期六

尋書之旅

功課量多到吃不消,樣樣由零開始畫都唔係辦法,襯住今日有盲公竹,一於上深圳一轉買參考書。行行覆行行,半日過後收獲八大本書加十三張DVD,前後用咗成八百蚊人仔... 嚴重出血中!

2009年12月4日星期五

燒魂夜

原定計劃係到 飛鷹基地 攪火鍋派對,臨收工前又改去食"燒魂",女人真善變。由於打算食宵夜時段,所以 OT 到九點先出發,到步後仲等咗成粒鐘,差啲掉頭走。成物比意料中好,海鮮都算新鮮,大家可以一試。太盡慶關係,一行四人要坐的士返屋企,今餐大出血呀!

Anita 欣賞會 '09

Anita 欣賞會 ’09
時間:7:30 pm
地點:富豪東方酒店 - 九龍城沙浦道30-38號
   (包括茶點招待)

購票請於以下時間:
日期 : 2009年12月5日(星期六)
時間 : 3:00 – 7:00pm
地點 : 歌迷會會址
查詢電話:(852) 25562695

2009年12月3日星期四

宵夜定晚飯?

今晚放工要過灣仔上堂學 Dreamweaver,由七點學到成十點,返到屋企已經十一點半。老闆娘 堅持等埋我先食晚飯,最終等我買車仔檔外賣,晚飯變宵夜。

2009年12月2日星期三

契媽廚房

雖然自己心情都唔好,但失去多年老伴嘅契媽更需要人關心,所以放工之後趕入青衣晚飯。

2009年12月1日星期二

Zero 再見

今日係 Zero 火化嘅日子,我地選擇到"寵之天國"親手送佢最後一程。工作人員安排下,再次見到 Zero,一個沉睡而安祥嘅樣子、一身柔軟嘅毛髮如惜,就如平日伴著我地身邊一樣。忍著傷痛輕輕一按,火一著,往後再夢中相見!數小時候親手取回 Zero 骨灰,興 董事長夫婦 晚飯後,再帶返屋企好好安放,等佢可以繼續守護 飛鷹基地!

2009年11月30日星期一

人間有情

連日收到各方親友以不同形式嘅關懷同慰問,在此要多謝大家嘅關心!雖然事出突然,我地心情亦尚未平服,但既然不幸事情已經發生咗,我地會堅強面對,大家唔駛太擔心!

2009年11月29日星期日

占士波 大日子


Jenny & James, Happy Wedding!

贈慶...

平日起身開門時,二樓總會聽到 Zero 興奮嘅腳步聲,期待著我地出現... 唔想繼續觸景傷情,決定返學前同 老闆娘 一齊出球場見下朋友透下氣。下午茶後返學校交待功課,放學後再與 老闆娘 會合,直到七點半再分道揚鑣。雖然心情惡劣唔想出席任何喜慶活動,但係與 占士波 相交十多年,最後於 老闆娘 遊說下,決定一個人出席其婚宴。

2009年11月28日星期六

痛...

仍然記得當發現 Zero 倒地不起時,老闆娘 於身邊一直嚎哭,我同自己講一定要冷靜... 冷靜先可以好好處理 Zero 身後事... 冷靜先可以好好安慰老闆娘... 冷靜到望住冰冷嘅 Zero 都毫無感覺,冷血一樣。直到半夜 Zero 被接走,所有事要決定已經決定、要處理已經處理之後,心就開始痛... 痛得一發不可收拾... 痛得心如刀割... 痛!

2009年11月26日星期四

參觀大陸廠

今日要上大陸廠參觀,整個行程十分輕鬆,變相放咗半日假。十一點先到對方香港 office 參觀,出發前到餐廳食晏,之後該老闆親自揸車上大陸廠,完成後再直接車我到屋企門口,正!老闆娘 要OT,所以今晚決定出街開飯。返到屋企發見 Zero 偷食朱古力粉,真係比佢激到跳起!

2009年11月25日星期三

百搭麵

尋日為咗睇展覽早收工,所以今晚要 OT 補數。Zero 今日响屋企自己玩大食會,竟然食晒餐枱上面嘅餅乾、小食、茶葉、維他檸檬茶...等等,有無攪錯!激到 老闆娘 打比我話無心機煮飯,需則話無心機,不過碗「百搭麵」都一樣咁 OK 喎!

2009年11月24日星期二

一地布虎

終於抽到時間,响展期最後幾日到訪朋友仔嘅展覽。打小人用嘅布製"紙老虎"公仔一地多係,估唔到個感覺又幾特別喎!其實幾年前已經擁有一隻,現存公司枱面作闢邪之用,都 OK work 架!XDDD

2009年11月23日星期一

口齒伶俐

今日收到風話要我代表自己 team 做一個 presentation。要一次過對住幾十人講英文都仲未試過,諗起都已經有啲緊張,希望到時順順利利,口齒伶俐啦!

2009年11月22日星期日

生日火鍋

重覆上星期動作,一覺訓醒就同 老闆娘 趕返公司將第二份功課埋尾。完成咗一份十五頁嘅 powerpoint 同一張大 board 之後就趕去釘裝,分別係今日無空住個肚返學。放學後約咗 tennis team 火鍋飯局,等咗大半個月,班忙人終於集齊可以替我地慶祝生日喇!力奇 當然唔放過機會,順便派埋張喜帖俾大家啦。

2009年11月21日星期六

朱古力曲奇

繼續簡而清嘅星期六行程,訓醒、食晏、返公司做功課。不過今次 老闆娘 係一齊到公司,幫手做 powerpoint,我就畫、畫、畫。夜晚買"大家樂"外賣,覺得食物有小小貨不對辨,所以相都費事影低。都係尋晚 老闆娘 自製嘅朱古力曲奇正啲!

2009年11月20日星期五

企鵝 Zero

食完晚飯之後 老闆娘 又開始玩整餅仔,留响廚房玩到零晨。期間 Zero 陪伴左右,見屋企見天寒地凍,嘗試幫佢著衫保暖。可惜隻衰仔唔領情,擺出一副扮無知嘅可憐樣,之後再扮企鵝... 足足笑咗我地十幾分鐘!

芝麻什菌撈韓國粉絲

放工後留响公司做功課到八點幾,之後趕返屋企食 老闆娘 嘅新煮意。「芝麻什菌撈韓國粉絲」是也!

2009年11月19日星期四

金沙骨公仔麵

由朝開會開到晚,離開公司已經八點幾,打消咗行街街嘅念頭。返到屋企晚餐已準備好,是日精選為「金沙骨公仔麵」+「煎香草豬肉腸」+「清炒芥蘭菜」。

2009年11月18日星期三

芋頭炆臘味

小休兩日之後再開始另一份功課,今日就四出報價攞資料。明知得個"報"字唔會真係做,所以報價嘅時候十分唔好意思,覺得自己好似元整古電話咁!是晚 老闆娘 有新嘗試,"芋頭炆臘味",好味!

2009年11月17日星期二

三人火鍋

今日上 China office 開會,順便同隔鄰部門主管 阿桑 食歡送飯。夜晚 倉務主管 買定餸入 飛鷹基地,點貨之餘兼同我地攪個"三人火鍋"慶祝生日。

2009年11月16日星期一

味精蒸肉餅

近期少咗返老家開餐,今晚見有時間即時安排啦!隔鄰屋師奶知道我地會出現,好有心咁準備咗一個餸請我地食(就係右下角嘅"味精蒸肉餅")... "好味"到食咗兩啖已經想倒咗佢!

2009年11月15日星期日

終於完成

一覺訓醒就同 老闆娘 趕返公司將份功課埋尾,趕呀趕呀,完成咗一份四十頁嘅 powerpoint 同一張大 board 之後就趕去釘裝,跟手空住個肚飛返學校。放學後第一時間約 老闆娘 食個 tea 叉一叉電,夜晚就出席 特警馬克 替我地慶祝嘅生日飯。

2009年11月14日星期六

齊齊趕功課

全日行程簡而清,訓醒、食晏、返公司做功課。黃昏時段 老闆娘 到公司打氣兼幫手,夜晚齊齊買"大食代"外賣又一餐。

2009年11月13日星期五

黑色星期五

黑色星期五可以做乜?做功課囉!後日就要交第一份完整嘅功課,做落先知比意料中難處理,連累到 老闆娘 等我等到差不多十一點先有飯開...

2009年11月12日星期四

豬扒炒麵

大逃殺事件得到証實,雖然比傳聞中輕手,但始終唔係好消息,氣氛依舊。大公司瘦身大勢所向,最佳自保方法還不是增加自己响工司嘅存在價值,各位懶同事共勉之!是日愛心晚餐「豬扒炒麵」。

2009年11月11日星期三

白色恐佈包圍

瘦身傳聞倒數日子,全公司上下都被一團白色恐佈包圍,死氣沉沉。收工時間無人願意多留一分鐘,六點鐘已經一半以上同事收咗工。知道 牛叔 情況唔樂觀,趕到醫完探病後拉大隊陪 契媽 晚飯,希望可以開解一下。

2009年11月10日星期二

南瓜炒牛柳絲

大假完畢,又要重新投入工作。今日同事們請食 lunch 補祝生日,多謝晒!夜晚就返屋企食住家飯,「南瓜炒牛柳絲」+「Saba」。

2009年11月9日星期一

停不了的生日飯

原先諗住最後一日大假留响屋企休息一下,不過如意算盤打唔響,全日四圍走。首先 倉務主管 一早入嚟點貨,完成後約埋 神秘人 到元朗食台灣牛肉麵,補祝 老闆娘 同我嘅生日。之後元朗精華遊兩個鐘,攞住幾大袋戰利品返屋企。坐低一陣,董事長夫婦 駕到,又忙一輪。今日係 董事長 正日生日,事先準備定一個生日蛋榚當下午茶,夜晚再應主人家要求到大排檔慶祝!順利返到屋企已經十一點...。

董事長 生日快樂!


祝 老如松柏,身體健康!

2009年11月8日星期日

老闆娘 生日快樂!


Dinner @ Lawry's The Prime Rib

神秘約會

今日係 老闆娘 生日嘅大喜日子,可惜要返學聽新 project briefing,唔可以安排一整日嘅慶祝活動!既然逺嘅地方去唔到,唯有夜晚食餐好!知道 老闆娘 對上次 大編輯 攪婚宴嘅扒房念念不忘,所以靜靜雞訂好枱,再安排好生日蛋糕,來一個驚喜!

2009年11月7日星期六

家族燒烤大會

又到十一月之星嘅生日聚會時間,為咗方便一家大細,是日開放 飛鷹基地 天台部份舉行家族燒烤大會。所有食物由 老闆娘 同 二少奶 自家泡製,不含味精!主角中嘅主角當然係 董事長,所有仔仔女女、孫仔狗仔都到齊為佢慶祝。下午茶期間 Zero 更表演偷食一大包豬肉乾贈慶,真開心!

2009年11月6日星期五

人在港心在泰

一覺訓醒人在港心在泰,如果唔駛趕返香港可以玩多兩日就好喇!起身掃地、洗衫、淋花、清行李,唔經唔覺又無咗半日。下晝嘗試閉關做功課,但係唔成功,老闆娘 就忙住準備聽日 BBQ 嘅食物。夜晚約咗 高豬&肥莊 請食生日飯,多謝晒!