Chotto 等等...

屋企部機"神神地", 各位讀者等等啦, 我會儘快 update 埋啲相架喇!

I'm back!

朝早七點幾起身, 八點落樓食早餐。我揀咗A餐"豬什米粉", 賣相唔錯但味精重咗少少。到齊人之後, check out 上車返廠, 繼續開會! 可能個早餐份量少, 到咗十點幾竟然有女同事話肚餓?! 但係一點鐘就食晏, 兩頭唔到岸食咩好呢? 就係"麥記"喇! 我咁為食, 當然叫埋一份啦, 要咗個"麥香雞+海鮮湯"。我第一次晌大陸食麥記, 個麥香雞比香港辣, 海鮮湯就似合味道杯麵囉...XDD! 基於大家想爭取時間, lunch 繼續留晌廠叫外賣, 今次我就要咗個"三絲炒公仔麵", 味道一般啦, 全程最差就係呢餐。一切順利, 四點就散會, 可以早啲返落香港。坐廠車去到羅湖都只係五點幾,下一站去邊? 咁早返又有司機肯載我, 當然係玩 surprise, 返公司接女友放工啦!

I'm in China~

今日同幾個同事上咗生產商嘅深圳廠房, 舉行一個兩日一夜嘅會議, 主要係硏究公司旗下一個產品, 可以下調成本嘅空間有幾多? 第一次自己搭火車上羅湖, 場面比想像中混亂, 好彩有同事 貓芙蓮 晌月台等埋我, 唔係實搵唔到集合地點。八點幾等齊人就上安排好嘅廠車, 再坐多成粒鐘先到, 地點係"龍華市"。十點半鐘準時開會, 因為唔想晒時間, 所以食晏都只留晌廠叫外賣, 我叫咗個"辣排骨蒸飯"套餐, 食物質素又比意料中好喎。之後就落咗生產線參觀成件產品嘅制作流程, 聽下講解影下相, 跟手就返上 office 繼續戰鬥。五點幾鐘有咗個大綱, 交低建議比廠跟進, 第二日先睇結果。散會之後坐埋廠車到酒店都只係六點, 一致決定齊齊休息一陣先食晚飯。由於唔識路, 為安全計大家乖乖留晌酒店嘅中菜廳醫肚就算, 無四圍走。中菜廳有兩層, 以食海鮮為主, 晌二樓開位之後可以落一樓睇辦訂菜。又真係好多款式, 鮑參翅肚有, 晚飯小菜都有, 全層放到自助餐一樣, 豐檢由人! 款式太多唔數喇, 遲啲睇相啦。食飽飽之後就返上房, 同女友傾陣電話, 再睇下電視睇下書, 出奇地十二點左右就訓咗喇!

返大陸開會

哈哈~ 聽朝一早要返大陸開會呀, 後日先返香港, 唔知今次會唔會有特別嘢寫呢?

"童夢戲劇匯演"

難得星期日唔打波, 一於陪 董事長 同 董事長夫人 飲下午茶。下午茶真係平好多架, 又叫粉麵又叫點心又叫燒味, 連埋茶錢四個人都只係一百蚊左右。之後分道揚標, 佢地拍拖行街街, 我就同女友上倉補貨比客。夜晚就入咗沙田大會堂睇"童夢戲劇匯演"。個節目係四個短劇組成, 由四間唔同嘅中小學演出。而其中一個劇由女友妹妹負責編劇同導演, 所以伯母帶同十多個親友奉場。完場後剩低一行七人去食飯, 食飽飽之後我就先送女友同伯母去搭車, 跟住自己至閃。時間唔覺唔覺咁過, 返到屋企己經十一點幾喇!

超迷你旅行團

由於聽日 book 唔到場, 所以呢個星期嘅週日網球聚會改咗今日。雖然天色幾好又無落雨, 但係天氣就非常之焗, 唔追波企晌道都會流汗, 成身癡立立。打完波沖返個靚涼之後去接女友, 再 join 返大家齊齊食晚飯。我地上咗朗豪坊食"魚米之家", 價錢食物 OK 啦。食完六條友仲一層一層慢慢咁行落七樓睇體育用品, 好耐無試過一班朋友行商場, 感覺好似去緊旅行... XDD。而呢班遊客最後一站係行返過火車站果邊間"石磨坊"食甜品, 之後就各自歸家喇!

這是我心裡對白(2) - SK

致：蘋果娛樂編輯及記者朋友們
我係關淑怡，其實只係一件小事，今日我無意之間睇過您地關於勁歌金曲之報導，我明白本地娛樂新聞需要報導一D比較特別既話題，但係我唔想因為一張不經意地連橫快怕之下才出現既相，而令到大眾誤會以為我做出一D不雅行為，當時我只係剛剛張開手想Hug張韶涵，並無其他意思，其實我都接受過正統教育，絕對唔會對歌迷及任何人做出這種不雅行為，Do me this favour la! 我好累啦！ 請手下留情啦！多謝各位記者朋友們對我的支持！
OH！各位攝記朋友們，下次請再幫我拍靚D吖！登靚D吖！我會感激不盡……
Shirley Kwan

*"爛生果報"又作娛聞, 今次係屈 SK 做粗口手勢, 以上係 SK 晌 forum 嘅回應。其實個記者知唔知個手勢應該點做? 係豎起中指手背向人呀, 佢唔識就要對住塊鏡望住自己練習一吓啦~ 成件事都真係"超低能, 勁攪笑"囉!

煮飯仔時間

話說尋晚睇完 HoCC 之後返咗公司跟手尾, 返都屋企都已經成點鐘, 所以今日成十一點先起身! 執咗一陣屋, 上完網之後就叫醒女友, 我就換衫出發過女友屋企。等咗好耐車呀, 所以過到去女友已經晌街市買完餸等我。會合之後同佢食咗個 tea, 跟手就返屋企準備玩煮飯仔。今晚嘅美食就係好味到震嘅"榣柱肉碎五穀菜飯+粟米什菌芋絲", 女友好有心機煮咗好耐架, 我當然要負責洗碗支持吓啦!

HoCC - 新城好友音樂會

因為今晚一早撲咗飛同女友去睇 HoCC, 所以就放棄去勁歌睇 SK 喇。去到會展會場先知原來自己坐第四行咁前喎, 當然要影吓相啦。其實今次 HoCC 個音樂會有好多嘉賓, 我地最想睇當然係 明哥, 另一個係 方大同, 佢 唱 live 都真係唔錯! 咁主角 HoCC 表現都唔差架, 佢唱咗好多其他嘉賓嘅歌, 都唱得有紋有路。佢都有唱自己首新歌"幽默感", 我都幾受佢最近試唱 jazz, 唱得 OK 架!

知足常樂

今日收到 肥蟹 電話約食飯, 原來已經有幾個月無過見面, 又係時候聚一聚。可惜聽晚本少爺要去睇"HoCC & 明哥"演唱會, 下回預約請早啦! 同佢傾咗一陣, 聽到佢話好忙好攰, 要大陸香港兩頭走。 Well, 咁 肥蟹 你想回復早排日日望天打掛, 定而家咁忙得嚟係有返啲存在價值先?! 知足常樂呀, 加油啦朋友仔!

"Hey You" - Madonna

"Hey You" produced by Pharrell Williams & Madonna

Hey you, don't you give up
It's not so bad
There's still the chance for us
Hey you, just be yourself
Don't be so shy
There's reasons why it's hard

[Chorus 1]
Keep it together, we'll* make it alright
Our celebration is going on tonight
Poets and prophets would** envy what we do
This could be good, hey you
(*The first time it's sung, it's "you'll")
(** The third time it's sung, it's "will")

Hey you, open your heart
It's not so strange
You've got to change this time
Hey you, remember this
None of it's real including the way you feel

Save your soul, little sister
Save your soul, little brother
Hey you, save yourself
Don't rely on anyone else

[Chorus 2]
First love yourself
Then you can love someone else
If you can change someone else
Then you have saved someone else
But you must first love yourself
Then you can love someone else
If you can change someone else
Then you have saved someone else
But you must first

Hey you, there on the fence
You've got a choice
One day, it will make sense
Hey you, first love yourself
Or if you can't
Try to love someone else

[Chorus 1, Chorus 2]

打波先嚟落雨...

"打波先嚟落雨...", 所以今日大部份時間就只可以乖乖地留晌屋企。而屋企永遠有執唔完嘅嘢, 執執復執執, 唔覺唔覺就成五點幾, 即時換衫飛落荃灣等女友, 因為夜晚約咗我私人助理 小文 食飯。晌幾個幫過我手嘅人裡面, 小文 就最生性同幫到手, 就算而家唔係打我工, 只要有需要佢就會自動出手架喇! 今晚由 小文 請食馬來西亞菜, 味道唔錯。點解要佢請? 無架, 佢話耐無見我地好想請食飯, 所以就爭俾錢囉... Okay, 大個仔搵到錢喇, 我就一句 thank you 唔同你爭啦!

Free download Madonna's new song - "Hey You"

Inspired by Live Earth, Madonna has written a new song titled "Hey You" which is available exclusively on MSN, free of charge, for seven days. "Hey You" was produced by Pharrell Williams and Madonna and recorded in London. Madonna will perform "Hey You" as one of the headliners for Live Earth U.K., joining the Red Hot Chili Peppers, Genesis, the Beastie Boys and other performers at Wembley Stadium in London on July 7, as part of the 24-hour, seven-continent Live Earth concert series.

As the exclusive online destination for Live Earth, MSN is pleased to offer this song in conjunction with Madonna and is proud to donate 25 cents for each of the first 1 million downloads to the Alliance for Climate Protection, in support of Live Earth.

Information fom MSN, free download MP3 HERE.

坐順風車

今日收工時, 新同事個男友揸車接放工, 所以我地有順風車坐。而女友就順便將最近收集到嘅玩具成箱車晒返屋企, 原來都唔少架!

開心煮飯仔

今日 董事長 同 董事長夫人 走咗去旅行, 所以女友同我決定夜晚返屋企玩煮飯仔。放工去到 supermarket 都已經七點幾, 傾吓講吓買完就成八點, 只好放棄唔煮咁多款餸啦。返到上樓煮落米, 就輪到大廚出手, 完成品就係"西蘭花炒牛肉+叮叮豉油雞"喇, 真係幾好味架~ XDD

巨大士多啤梨

今日有新同事請食 tea, 就係 Citysuper 嘅特大士多啤梨, 價錢唔平架，成舊水一盒先得果十幾粒。一粒有幾巨大，對比下隔離架"閃電王"你就知喇！夜晚約咗 叮噹 食飯, 話時話呢餐飯都約咗成三個月先成事, 究竟係因為佢忙定我忙呢?!

蜘蛛俠3(Spider-Man 3)

導演: Sam Raimi
主演: Tobey Maguire, Kirsten Dunst, James Franco, Thomas Haden Church
片種: 動作科幻

蜘蛛俠於公園談情時，不幸纏上外太空不明物質，慢慢更受其控制。最初是外表的轉變，由紅色戰衣變成了黑色，其後漸漸心智亦受蠶食。同時間蜘蛛俠內外受敵，除了好友哈里為報父仇而不停追殺蜘蛛俠外, 殺蜘蛛俠叔父的 Sandman 及力量比蜘蛛俠更強的 Venom 也對蜘蛛俠亦步亦趨！另一方面，愛情路上周旋在舊愛 Mary Jane 及新歡 Gwen Stacy 之間，到底蜘蛛俠如何戰勝心魔，挽回他至親及至愛的人？

*興之所至, 即日發起睇戲+飯局, 最後四人成團, 有 闊少, 阿姨, 女友同我。今集嘅主題係講"選擇", 當蜘蛛仔晌一連串問題纏繞之下, 會如何決定方向? 當正與邪, 好與壞, 新與舊, 愛與恨同時出現, 應該點決擇?!

Happy Mother's Day!

祝願所有母親永遠都幸福快樂 !

又一對新人

今日係"蕃薯公主"同"濂駙馬"嘅大喜日子, 祝兩位恩恩愛愛, 白頭到老! 一對新人夜晚晌"映月樓"設宴, 球會佔成咗兩張半枱, 全晚話題離唔開下次輪到邊一對?! 哈哈, 數一數原來呢個球會都串合咗唔少情侶喎! 飲完仲有下場, 就係趕去會合女友同 雞肥 慶祝生日。星期六晚四圍都爆場, 好彩最後一刻搵到間環境唔錯嘅 cafe, 唔係 大編輯 隨時要晌公園同佢女友齊齊切雪糕蛋糕喇~ Hohoho!

蝗蟲部隊出動

今日約咗 Tennis Team 晚飯, 但臨時有急事要上一上倉, 所以六點晌公司即閃。上到倉攪掂晒已經七點幾, 同女友趕返出尖咀都成八點, 不過趕到去"譚魚頭"都仲未齊人。第一次晌呢間食, 雖然我地唔係食火鍋, 但係啲小菜都唔錯喎。今晚一如已往, 得六個人但叫到一枱都係, 前前後後有成十樣嘢都食晒, 呢班蝗蟲部隊, 勁! 最厲害係我地食咗成千蚊, 但係就有十張 HK$50 現金券晌手, 即係放低一半就可以走人喇~ XDD

免費午餐

參加咗公司嘅"大傻瓜"計劃, 所以今日又有免費午餐食! 其實個計劃係將一啲唔同部門, 唔同資歷嘅同事組合一齊, 由公司比錢舉辦各種聯誼活動, 增加大家對公司嘅歸屬感。今餐係食日本烤肉, 味道同賣相都唔錯架!

大陸即日來回

尋日下晝, 女友臨時收到通知要今日上大陸開會, 仲要去到"官窟"咁遠... 雖然一萬個唔願意, 但係又推唔到要局住上。原先仲要過一晚夜, 但一班同事群情洶湧, 最後公司屈服, 六點鐘 book 咗架車送大家到黃江各自歸家。我就當然預早晌最快見到佢嘅上水火車站 stand by 等佢啦!

The day after...

尋日忙咗一日, 女友攰到請咗半日假休息, 我就晌公司到下半晝先進入返作戰狀態。今次好朋友嘅大事, 有幸可以出一分力, 又做兄弟又做司儀, 雖然忙足一日都無計啦! 全日天公造美, 唔止天朗氣清, 各樣安排好嘅流程都暢順, 可能 梅姐 真係默默咁晌天上面保佑呢對夫婦! 我唔係第一次幫手做兄弟, 但係第一次女友同時做姊妹; 亦唔係第一次幫手做司儀, 但係第一次有個咁短時間就夾嘅好拍黨! 至於 大佬 今次嘅好意, 我完全收到晒, 仲有問題的話我會自動搵你架喇。

Mission Complete!

非常任務完成, 婚禮圓滿結束!

大佬, 我祝福你~

哈哈~ 時間過得好快呀, 幾個鐘之後就係大佬嘅大日子, 在此同女友
祝福佢同阿嫂:

親密愛人、天長地久 ; 百年好合、永結同心!

放心啦, 聽日我地一班兄弟會盡力幫你奪得美人歸架喇!

陪你倒數

今日係一個小特別日子, 原本諗住放工二人世界食餐好嘅慶祝吓... 點知公司部電腦唔聽話, 攪到成八點幾先收得工。落到街計一計時間, 最後決定今晚食餐普普通通嘅先啦, 擇日重賽。既然係咁, 快快食完就送女友返屋企, 等大家早啲訓, 可以叉足電應付後日嘅重任! 唔知後日果兩位主角而家係咩心情呢? 又開心又緊張?! XDD~

"八婆"真係全世界都有

今日比個晌美國負責外文翻譯嘅同事辣著咗, 成個下畫都輕微冒煙~~~! 我都知譯九個國家嘅文字係需要時間, 公司標準係兩個星期, 而佢譯咗成三個星期未有我先出 email 追, 都算係咁啦! 點知仲未譯好之餘, 仲出個水蛇春咁長嘅 email 話我用錯 format 所以要咁耐! 喂, 好明顯係佢放完假唔記得咗譯啦, 而家驚出唔切稿就想屈我呀, 無病呀八婆! 如果唔係要以大局為重, 我實同佢對質, 睇吓邊個啱!

尖沙咀"金都"

見好耐無行過百利商場, 今日收工就過去行吓。去到見到都嚇一跳, 同當年興盛時期比較真係差好遠, 個場差不多一半係"吉"舖。而最驚奇嘅係, 現存嘅舖頭最少有一半係同結婚有關嘅, 有租婚紗、做禮服、做晚裝、攝錄、訂花球、贈品... 等等, 變咗迷你"金都商場"?! 今日都有件事鬆一口氣, 就係份MC稿。正當我同女司儀頭痕緊點樣執靚份初稿嘅時候, 大佬自動報到, 更送上MC稿一份! 睇完正正就係我地需要嘅指引, 講得嘅資料一目了然。家陣女司儀執緊稿, 聽日再聯絡吓先!

就快十項全能

今日公司又開會, 宣報咗一啲新方向, 各同事要照顧嘅範疇又多咗, 即係變相工作量都會加埋! 會上當然即時怨聲載道, 新同事就嚇到木面, 舊同事就即時黑面。Well, 既然負責嘅嘢愈來愈廣泛, 不如快快幫我地改 title 做 Project Designer 啦, 轉工時都方便啲。收工落旺角攞恤衫, 訂做果然係特別 fit 身, 加埋呢件衫我嘅兄弟裝就齊套喇! 之後過咗廟街食好味道"豬骨粥+炒米+籮白糕+炒菜", 全部加埋盛惠五十大洋仲有找添呀!

悠閒的一天

之前幾個公眾假期都排滿晒約會, 所以今日決定唔約人, 悠悠閒閒過返日。訓醒覺之後, check email, 知道有客幫襯, 所以就上咗倉攞貨。之後再直接上女友屋企, 最近都好少下晝嘅時間上去, 所以女友決定親自下廚, 唔叫外賣。時間剛剛好, 入到去"蕃茄餐肉炒飯"已經煮好, 跟住一面撐枱腳一面睇 Madonna 演唱會, yeah! 到咗六點幾, 知道 董事長 同 董事長夫人 咁啱晌附近探朋友, 所以就約埋一齊食晚飯喇! 食完時間尚早, 再行吓 super market 先送女友返屋企, 之後再返埋自己屋企都唔駛十一點。相對平日乜都趕, 今日絕對悠閒啦~ XD

DLS 波友聚會

下星期又有波友結婚喇, 今次對新人係"蕃薯公主"同"濂駙馬"。沿用上次嘅方式, 一班波友約咗尋晚(4/30)出嚟, 先打波、後晚飯、再派帖。其實近年已經好少同佢地打波, 一來要拍拖, 二來成日都 OT 時間就唔啱。佢地各自本身都有同其他街外朋友打, 又有參加比賽, 怕且尋晚最屎波都係我喇, 哈哈~! 由於耐無見, 成班傾到唔願走, 最後有人話要趕尾班地鐵先肯走。點知一樣趕唔切, 得返入籃田方向有車咋! 最後咪唯有先出旺角, 再轉通宵小巴囉!