2010年2月28日星期日

返學大整蠱

今日返學時間完全係大整蠱,分三節時間,12:00-13:00、16:00-16:30、20:30-21:30,每節相隔三至四個鐘,同食藥差不多!由於屋企廚房要換水龍頭,第一節缺席。第二節準時到,但係同 Miss 傾到五點幾先放學,之後與同學食個 tea 打一打底。第三節係 representation,因為之前個 B Sir 無再教,由另一個 J Sir 重新俾多一次分。已經早到一個鐘希望有得早到早走,可惜所有同學都超時,最後十一點幾先走得。返到屋企已經無晒胃口,所以 老闆娘 臨時煮咗個麵當晚餐(宵夜)就算喇!

2010年2月27日星期六

狗不可以亂摸

新年期間第二次開放 飛鷹基地,是日訪客為 老闆娘 舊同學。由於有兩名飛機王臨時缺席,所以 老闆娘 決定親自下廚宴客,有「臘味飯」+「蜜糖金沙骨」+「冬菇芋絲炆黃牙白」+「煎豆腐炸菜肉餅」。不可不提係今日有人客多手亂摸 Donald 個身,因而俾 Donald 輕輕咬咗一口以示警告... 所以老狗係唔可以亂摸架!

2010年2月26日星期五

老鴨湯火鍋

話說我尋日發現美國有個咗 job 資料錯誤,如果唔即時更正就做唔切貨。當美國同事們你推我讓之制,竟然有人寫咗句"marketing ALWAYS brings trouble"...嘩,大件事!雖然錯不在我,為免大戰一觸即發,唯有OT 做好晒啲稿同 PDF,再加多兩個解決方案比美國,希望息事寧人!亦因為咁,去到"老三火鍋"已經而遲到咗一個半鐘頭,好彩大家都無詐形。"老鴨湯底"OK,不過剩飲時有啲咸,最好留返半碗湯邊食邊飲,豉油都唔駛點呀!

2010年2月25日星期四

芋絲炆排骨

全日都唔算太忙,有時間可以偷雞做下功課,所以七點幾先走。返到屋企剛剛好開飯,今晚有新菜式「芋絲炆排骨」+「回鍋肉炒蛋」,好味道!

2010年2月24日星期三

開工大吉

悠長假期終於結束,正式回歸辦公室。𢭃過開工利是,放眼一望,在座唔夠一半同事,估計三月頭先會齊將。積咗十幾日嘅 job,清下 email 清下枱已經七點幾,拿拿聲返歸食住家飯。是日晚餐「日式餃子炒烏冬」。

2010年2月23日星期二

外婆,再見!

最後一日假期,主要時間都係處理 外婆 身後事。先到醫院認領遺體,作告別儀式後,再即場做咗一個小法事,就轉載去柴灣火化場。接住做第二場法事,拜祭後將遺體推入房做後期處理,下次再見將會係於"省善真堂"上位嘅時候。

2010年2月22日星期一

董事局 Wii 大戰

最後兩日假期,原先打算閉關做功課,點知 卓言仔 打嚟問可唔可以上佢屋企食飯同陪佢玩 Wii,因為話聽日開學。哈哈,試問邊好意思推卻一個四歲小朋友嘅邀請呢?最後集齊所有 董事局 成員,食完 pizza 就齊齊 Wii Fit 大作戰。睇倒 老闆娘 同大家嘅開心樣,似乎 飛鷹基地 好快都會出現一部 Wii...XDDD

2010年2月21日星期日

中西日星馬泰菜

前後幾日都未能解決 iMac 上網問題,忍唔住打電話去"網上痕"熱線投訴,擾攘咗半個鐘終於有解決辦法,就係直接去門市迫佢更新客戶資料。由於論文功課了無寸進,如非必要都唔想九哩遠趕返學校。最終都係留响屋企攪 iMac,只係扥同學代為通知 Miss 個進度。老闆娘 剛煮好「肉骨茶」,我又攪掂部電腦,外母一家又到齊,開飯!因為大姨仔聽日返台灣,所以有個"北海道牛奶蛋榚"做甜品,全晚中西日星馬泰食品有齊,勁!

2010年2月20日星期六

虎年初七

今日係 飛鷹基地 農曆年期間第一次對外開放嘅日子,即係 Tennis team + Design 1st 嘅 "BBQ 團拜"。起身打掃下間屋,之後出街市食晏兼買定燒烤食品,因為知道班友仔一定會遲到。終於 張氏 一家三口準時三點幾到步外,其他人五點後先陸續出現,最遲嘅成七點幾先到... 要人地成一家大細等多成兩個幾鐘,過意得去嘛?! 其實萬眾期待嘅 闊少 都有意外,由準時變遲大到。不過佢今次好有交帶咁每半個鐘報告一次情況,再加上第一次攜眷出席,大家都會睇諒佢嘅!遲開波當然就遲收爐,好在現場前後有三部私家車唔怕夜,最後大家玩到十二點幾盡慶而歸!

2010年2月19日星期五

虎年初六

屋企太多嘢令自己分心,決定返公司靜靜地做功課。途經旺角站與 炸彈家族 一聚,四點幾先返到公司。夜晚會合 老闆娘 ,上 契媽 屋企拜年兼食開年飯。之後當然又食又拎,幾乎將所有「咖哩雞」全部打包!XDDD

二少奶 生曰快樂!

祝你今年 隨心所欲、身體健康,卓言仔 聽教聽話!^_^

2010年2月18日星期四

虎年初五

老闆娘 尋晚玩過龍,一起身就頭痛,最後請病假無返工。起身食完晏,再陪 老闆娘 去睇醫生。天寒地凍,成個人都以龜速轉動,腦筋遲鈍下份論文原地踏步無進展。夜晚即興會合 董事長夫婦 同過氣 明星婆婆 拜年兼食晚飯,之後返到屋企再煮多個「黑糖湯丸」做甜品。

2010年2月17日星期三

虎年初四

老闆娘 開始返工,屋企凍到長期响雪櫃一樣,唔願離開張床。落床之後安裝部 iMac,先發覺忘記密碼唔能夠 online,所以有部份 application 裝唔到,唯有等一等再請教高人。夜晚 老闆娘 收工後,買埋"家鄉龜"同"漢堡王"到"熊屋",再續第二回 Wii 大戰至十一點先打道回府。

2010年2月16日星期二

虎年初三

與熊大戰至晨早六點半結束,叫醒兩位女士齊齊歎個早茶先散會。八點左右返到屋企就沖涼訓覺,响六度低溫之下,老闆娘 訓到成五點都唔肯離開張床。夜晚返外家出席"火鍋團拜",不過食物全部為長者而設,最後要返屋企再食糖水先飽飽。半夜收到虎年第一個好消息,闊少 終於守得雲開,蜜運成功!衷心祝福呢位視如兄弟嘅"伴郎",期待著見証你地開花結果!^_^

不要驚動愛情 - 高皓正 / 鄭秀文

作曲: 歐陽業俊 填詞: 高皓正

很想輕撫你 所以避開你
寧願用距離 去令你好奇
迴避過眼神 先偷偷喘氣
吩咐手臂 放在原地
傳聞浪漫太快 愛戀都走得快
才會遲遲未步向你 說一世愛護你

情太過洶湧像深海 而我卻會忍耐
但求來日你醒過來 這份情像翅膀打開
還沒有相戀別意外 神教會我等待
待情流像細水 才去承諾你 拿一生兌換愛

很心急擁抱 所以在禱告
求甜蜜以前 帶著你慢步
遊歷過旅途 等一天終老
生老病死 一起細數
原來慢慢靠近 更珍惜這一吻
而我停留是為了你 要給予你護蔭

情太過洶湧像深海 而我卻會忍耐
但求來日你醒過來 這份情像翅膀打開
還沒有相戀別意外 神教會我等待
待情流像細水 才去承諾你 拿一生兌換愛

能為愛戀學習按奈 情信寄進心內
但求能學會倚靠神 愛被馴服過更精采
連地老天荒亦不更改 時間永遠等待
等你情願那天 才去承諾你
無止境那份愛 我用沈默叫醒愛情 
你用期待做你反應 繼續行近直至開始愛

2010年2月15日星期一

虎年初二

全日主要都係女家親戚團拜,一條直路由深水埗開始、太子、旺角、途經"潮特"時停一停站、油麻地、最後返外家。晚飯後返到屋企 熊貓拳 率先嚟拜年,齊齊外出食過宵夜之後,就到"熊屋"通宵 Wii 大戰!

2010年2月14日星期日

虎年初一

大年初一加情人節,可惜心情未平服。今日最大難題係仲應唔應該比"利是"親朋?知詢過長輩認為"利是"可以派,但到處團拜年可免則免...最後決定只派"利是"比親戚及非常要好嘅朋友,並取消新年期間所有家訪。拜年程序跟往年一樣,先到麗晶、再到青衣、最後返老家。路經商場想起今日為情人節,決定買一個 "Bear in snow" 造型嘅情人節蛋榚同成個 董事局 分享!董事長夫人 發功放滿一枱美食,有蝦、有魚、有雞、有菜、有湯、有鮑魚,再加湯圓同我地嘅蛋榚,全家人都大滿足!

2010年2月13日星期六

外婆,一路好走!

為迎接新年,起身後忙過不停。打掃屋企、陪姨甥仔食晏、準備團年飯...等等!可惜 董事長夫人 到步時帶來一個壞消息,原來今日收到老人院電話, 外婆 因為急性肺炎,半夜送咗入醫院。正當大家打算提早開飯趕出醫院嘅時候,收到另一個電話話情況唔太樂觀...二話不說,即時叫咗兩部的士飛車去醫院...可惜途中再收到護士電話通知 外婆 已經仙遊。到達醫院,護士特准所有親人包括小童到病床見最後一面,所以可以齊齊整整一家人送別 外婆!雖然唔捨得,但見到 外婆 遺容安詳,總算有點安慰,畢竟已經八十八高齡。離開醫院之後已經九點幾,隨意搵咗一間小酒家繼續餘下嘅團年飯,之後各自歸家。

親愛的外婆,家中各人安好,不用掛念,一路好走!

2010年2月12日星期五

造節第二回合

農曆年假正式開始,起身開始嚟個熱身小掃除,約埋同樣已經收爐嘅 熊貓拳,到舊墟"漢興"食"咸牛肉公仔麵"。到"瘋宅"攞部 iMac 返屋企,之後繼續中掃除。夜晚過咗 麗晶姑媽 屋企造節。

2010年2月11日星期四

2010年2月10日星期三

iMac is coming

籌備已久嘅 "iMac go home" 行動決定今日出手。收工後先會合 老闆娘 到"金裝奶佬"開餐,可惜味道差、起菜慢,已被 bad list。之後去到"瘋宅"發現預留比我嘅 iMac 比另一名 sales 賣走咗,好在佢地即時補到鑊可以農曆年前返到另一部新機。咁就俾多次機會佢等多兩日啦,話晒呢庋買有現金回贈加大量贈品嘛! 

2010年2月9日星期二

法力無邊

條"髮力毛鞭"實在太長,襯未過年決定修一修剪。老闆娘 先到 salon 做 highlight,我就遲一個鐘到,但都仲係人山人海。最尾成十一點先攪掂,拿拿聲就近搵間茶餐廳醫肚就算。

2010年2月8日星期一

倉務日

又係清大假日子,起身做一陣功課之後,等埋 倉務總管 到步就一齊食完晏,之後就開始點倉。

2010年2月7日星期日

造節第一回合

年近歲晚,每個週未都有得"節"要造,今日放學後第一回合係 何文田姨媽。大大細細成二十幾三十人,開晒飯廳客廳都唔夠位坐。兩邊枱各有十幾個餸,場面震撼。埋尾仲有蛋撻同生日蛋糕,真係見到幾靚都食唔落呀!

2010年2月6日星期六

泰國人海南雞

完咗 LCC 之後,夜晚過咗花墟睇花,兼幫襯推車檔食咗幾隻"焗鵪春蛋"。行完到咗"泰國人海南雞",第一次食都算OK,不過炒河比較好味。順便以$198買咗兩張"海南雞劵",咁新年就唔駛捱貴雞喇!

2010年2月5日星期五

精裝年夜飯

時勢未見好,已住幾十圍嘅"大龍鳳"年夜飯不復見,各部門都要食自己。今年响尖東"好彩"連開九席,全晚前前後後都有成二萬幾獎金獎品,不過不失啦。最失望反而係食物質索同服務態度,點解可以比同集團嘅"彩雲軒"差幾皮嘅?

2010年2月4日星期四

Team building

公司失驚無神攪咗個 team building,所有香港同大陸同事無一幸免。晨早八點到羅湖轉公司車,十點正式開波玩到食晏。如我所料齊齊食外賣,好彩手快搶到"真功夫"蒸飯,因為飯後同事話"老麥"超難食。飯後繼續"建大廈",詢眾要求下上台分享當年如何協辦與 SK 嘅"神秘約會",之後所有人合作畫咗一幅五十呎嘅大畫,準時六點散場。其後坐嘅大巴响公路發生小車禍,悶到落車影咗幾張亡命公路快相,返到香港已經差八點幾。

2010年2月3日星期三

阿媽靚湯

好多大陸廠趕收爐,所以有可能提早完成嘅 job 都會做,無形中又日日都要 OT。約咗返老家食飯,六點已經話走,最後七點都走唔到,真正趕到差不多成八點半。 好彩返到去有"阿媽靚湯"平衡一下個人先無咁躁。

2010年2月2日星期二

雜丸鮑魚汁撈麵

今日要 OT、又要處理好多其他事,心情有八個差。老闆娘 心情亦唔見得係好,所以大家都想簡簡單單就一餐。一碗「雜丸鮑魚汁撈麵」+「清炒菜心」就兩份分。

2010年2月1日星期一

煎雞尾飽

農曆新年前最後一日大假,主要任務都係繼續大掃除。期間去過大埔食"咖哩雞飯",同去過粉嶺哥爾夫球場旁嘅 榮昌茶座 食"煎雞尾飽"做下午茶。夜晚就到咗比領匯破壞到不似商場嘅屋村食港式日本位麵。

無聊通告

網主忙到心浮氣燥,思覺失調!暫停更新至思路回服正常為止... 可能一陣、一日、一星期、一個月... 唔知幾耐!多謝收看!!