沖涼用品

因為要買沖涼用品比 Hero，所以返屋企前去 shopping，順便試下間新開嘅"酸辣粉"專門店。味道都唔錯，下次可以再試下佢地嘅蕃薯粉。

豉汁排骨油麥菜

日日都出街食，今日決定早返少少歸家食住家飯。是日晚餐「豉汁排骨油麥菜」。

速戰速決

老闆娘 再次棄舊迎新，現任公司最後一日，之後新地步係葵青區。夜晚約咗 董事長夫婦 ，為求速戰速決早早歸家做功課，再到佢地新寵"麗閣地荗菜館"開飯。

又準備轉工

老闆娘 又準備轉工，倒數最後兩日，現任同事堅持約我齊齊食 farewell 飯。盛情難卻，唯有介紹到自家地方天文台道"老正興"，至少價錢合理之餘，又可以坐幾耐都得。

富貴粉麵餐廳

舊同事 車人 同 熱褲 生日飯局。第一次上 iSquare 開餐，地方九曲十三彎，行得人都有點煩。最後落腳於一間中式粉麵餐廳，中上嘅價錢配合還可以嘅品質，埋單時要位位一百，講到底仍然覺得貴！

正宗潮州菜

今晚同新家庭中醫 盧醫師 晚飯，到山林道食正宗潮州菜。可能 董事長夫婦 識得酒樓經理，所以樣樣餸菜都好對辦，味道不錯！

油渣麵腸粉

一堆 TF 殺到，忙到正餐都唔多想食。是日宵夜，推車檔「油渣麵」+「豬腸粉」。

董事局飯局

董事局內個個都係忙人，所以一次過慶祝母親節同補祝 卓言仔 五歲生日。先各自到飛鷹基地集合，擇下芒果、玩下狗、打下 Wii，夜晚就到 董事長夫人 最愛嘅大排檔開餐。

面書大解放

公司早上發通告，由今日開始 IT 開放權限兩個月，所有同事都可以上到 Facebook。收到通知後大部份同事都一試，係可以 login 不過就龜速，咁上嚟做乜？收工同 老闆娘 到"吉仔"開餐，兩個人幾乎要用一條紅衫魚... 似乎"吉仔"都只係適合幫襯下午茶餐。

旺角南豐

今日 老闆娘 又去玩面試下晝無返工，所以放工後有時間陪我到旺角行街買CD。之後到久違嘅"南豐"開餐，驚見場面都頗冷清...，話晒都幫襯咗十幾年，希望佢撐得住啦！

超甜杯榚

又要返工喇，感覺好似無放過假一樣。成九點先收工，搵間茶餐廳快快食完就返屋企。返到去未夠喉，再 KO 埋兩個 Cupcake 做甜品，不過甜過頭有少少失望。

練奶格仔餅

今日要上山掃同見下班契親戚，功課迫於無奈休息一天。雖然由太子、旺角、樂富、銅鑼灣一路無停行程緊密，但晚飯前仍成功抽空同 二少夫婦 去 shopping，老闆娘 繼續成為大贏家。其後返俱樂部會合 董事長夫婦 同玩到落湯雞一樣嘅 卓言仔，集齊 董事局成員 同 Uncle Ken 食埋晚飯先散場。返到屋企附近車仔檔見到罕有嘅"練奶格仔餅"，一時口痕又多兩樣宵夜。XDDD

搶頭啖湯

功課尚未完成，但要返學校比 Miss 睇睇個進度，焗住要出街。放學後順道同 高豬 慶祝生日，响旺角"萬發食館"食小菜。食完去咗買"Cup Cake"，臨坐車走前再到"廟街"食糖水。之後竟然意悠未盡，搶咗 聾貓權 嘅頭啖湯，上咗 飛鷹基地 Ｗii 大戰到成點鐘。

免費自助餐

傳聞今年高層各分花紅分到笑，所以今日請晒全個部門去酒店食自助午餐，當復活節禮物。一個鐘當然唔夠時間食，高層默許之下，由十二點半食到成兩點幾先返公司。

死黨飯局

今晚係久違咗嘅死黨飯局，闊少、力奇同我各自冷落另一半，同 Ah E 一行四人飯聚三個半鐘。近排比份論文迫咗埋場，今晚可以抖抖氣。地點係尖咀"Pizza Express"，食物水準同環境都唔錯，嘻嘻哈哈就坐到餐廳打烊。飯後同 闊少 慢步到佐敦坐車，傾多陣計之餘，最緊要係等近期缺少運動嘅我可以齊齊減下肥。

保險飯局

今晚約咗 保險B 食飯，聚一聚之餘，順便 review 下張保單有無細節需要加減。順帶一提，晚飯嘅尖咀"星加坡餐廳"，食物質數真係每況愈下，幾乎食到一半想停口。

無事出街小破財

終於今日收工時間唔一樣，放工時要夾時間先可以齊齊走。返到屋企煮飯實在太夜，都係出街食方便。路過久違嘅"公和"，咁就呢度開餐啦。平日收工好少行街，呢幾日不停咁四圍行，老闆娘 終於開齋買咗個手袋。

忽冷忽熱

今日開始各自出門口，放工都有等埋一齊走。不過天氣忽冷忽熱，攪到個人好似有少少作病咁，所以晚餐清清地食港式粉麵就算："三寶河"+"油菜"+"淨雲吞"。

各自各返工

第二日齊齊出門口，目標係我可以準時返到公司，但結果趕到 老闆娘 氣都咳。最後決定聽日開始各自各返工，咁就唔怕將來會因為返工時間而嘈交。收工後約埋行咗一陣街，食埋"譚仔米線"就返歸。

金沙角大排檔

起身後繼續努力，可惜只得些微進展。下畫返 HKPU 同 Miss 傾功課，放學後約咗大忙人 大編輯夫婦 到沙角大排檔聚一聚。呢餐飯由聖誕約到新年足足三個幾月先成事，約到我都想放棄。講返呢個大排檔嘅食物同價錢 OK，環境又夠晒草根，已經約定下次同一地點再聚，希望呢次唔駛等三個月啦下！XDD