Merry X'mas 2010

老闆娘 生日快樂！

「梅艷芳海報集」

在尖沙咀區遍尋不穫的「梅艷芳海報集」，夜半於家中最近的便利店碰上。二話不說，手起錢落，買！

江湖救急

今日歸隱內地嘅 忍者龜 突然傳來短信，原來係為咗江湖救急，可惜我全日被困會議室，愛莫能助！是日晚餐「餐肉雲吞辛辣麵」。

逃獄英雄

今日上到 China office 開會，所以五點半左右已經返到屋企，竟然發現小狗 Hero 自己偷走出籠。咁短時間就學識逃獄，真係估佢唔到！是日晚餐「草菇青瓜炒肉片」。

沖涼用品

因為要買沖涼用品比 Hero，所以返屋企前去 shopping，順便試下間新開嘅"酸辣粉"專門店。味道都唔錯，下次可以再試下佢地嘅蕃薯粉。

玩呀玩呀

老闆娘 同我一樣都要 OT，為爭取時間照顧 Hero，到隔鄰村茶餐廳食過快飯後火速歸家。返到屋企 老闆娘 同 Hero 玩呀玩呀，玩到唔知時間，終於人狗齊齊玩到攰勁打呵欠！XDDD

粟米餐肉金菇蝦子炆米

天朗氣清，終於都打得成波喇！食完個快速下午茶之後返學校傾 layout，傾到成六點幾先放學。返屋企前到附近十蚊店買咗玩具同迷彩狗帶比 Hero，果然帶上後十分型仔。是日晚餐「粟米餐肉金菇蝦子炆米」。

Hero go home

無錯，佢就係當選嘅黑色小狗，今日起將命名為 Hero Lam/林英雄！可能比人救起前曾經被人嚇過，基本上 Hero 好怕陌生人，我地接佢返屋企途中已經兩次驚到賴臭臭。不過佢都幾聰明，返到屋企幫佢抺乾淨個身安頓好之後，唔駛半個鐘已經習慣咗個環境，無再驚同震。一雙藍眼睛加上長期擺出憂鬱嘅眼神，溝死女無難度！XDDD

8964 Wallpaper

Today wallpaper, welcome to share!!!

血染的風采 - 梅艷芳

誰是英雄

今日決定咗收養邊隻狗仔，想知邊個係 my Hero，過多幾日就知喇！

神像無間道

老闆娘 今日返新工, 變咗葵涌工廠妹。呢幾日因為紀念六四攪到好混亂，不過轉兩轉之後, 個"神像"反而提早到達維園, 似唔似玩緊"無間道"?

候選佳麗 No.2 & 3

今日公司部 G5 打柴，好彩重搶救得到，不過就要借屍還魂換另一個殼連底版。放工後到旺角睇候選佳麗二、三號"烏咀狗兄弟"，雖然樣係好得意，但係體質比較差，好擔心會養唔大呀，都係諗清楚先。

蒜泥蒸扇貝

難得抽到時間打波，點知出到球場先落兩，吹漲！快快同波友食個下午茶後返學，傾完功課就歸家去。是日豊富晚餐「愛心藥材湯」+「蒜泥蒸扇貝」+「節瓜炒肉片」。

"朋友號"無電

好耐無見 聾貓拳，一於齊齊出城食個快樂火鍋。坐上 朋友號 出發，即時打電話到"龍成金記"訂定枱同留搶手招牌菜。到步時橫風橫雨，一個箭步入酒家。食飽飽攞 朋友號 時先發現唔記得熄車尾燈，全車無晒電開唔郁。救助於 的士佬 用過江龍都無起色，最後要叫車房出車，返到屋企已經係凌晨。

候選佳麗 No.1

老闆娘 心思思想養一隻小狗代替 Zero 保衛家園，經義工介紹下，放工後到西貢與第一隻候選佳麗會面。黑色小狗剛見面時全身抖震，感覺很怕陌生人。可能曾經被遺棄，所以性格有點怕事，不過相處半小時後已經好安心咁訓到我地身邊，就睇下最後會唔會入選啦！

豉汁排骨油麥菜

日日都出街食，今日決定早返少少歸家食住家飯。是日晚餐「豉汁排骨油麥菜」。

速戰速決

老闆娘 再次棄舊迎新，現任公司最後一日，之後新地步係葵青區。夜晚約咗 董事長夫婦 ，為求速戰速決早早歸家做功課，再到佢地新寵"麗閣地荗菜館"開飯。

又準備轉工

老闆娘 又準備轉工，倒數最後兩日，現任同事堅持約我齊齊食 farewell 飯。盛情難卻，唯有介紹到自家地方天文台道"老正興"，至少價錢合理之餘，又可以坐幾耐都得。

一等再等

製作公司所送嘅結婚相薄一改再改，今晚又有更新版睇。內地人嘅眼光同做法令人匪而所思，上次有問題嘅地方改好之後，無問題嘅地方佢又手多多改埋，想點先？原本好地地可以收貨，家陣又要重新做過等過，頂！　

CHICAGO Musical

放學後會合 老闆娘 趕到演藝，睇佢期待已久嘅"CHICAGO"音樂劇。雖然相比"CATS"，舞台比較簡潔，演員數目亦較小，但絕對值到一看。完場時碰到 譚校長，趁機影一張合照留念，he's so nice & friendly。

又一個雀巢

倉務主管 晨早到基地補貨，順道帶來元朗手信牛腩同雲吞，由於 老闆娘 好夢正甜，只好由我出手煮餐午飯慰勞下 倉務主管。下晝打掃花園時地下發現一個雀巢，當中尚有雀蛋一隻。為拯救小生命，即時轉移到上三樓露台，希望雀爸雀媽飛過時發現可以帶佢走。晚飯時間以電影 "Watchman" 餸飯，內容略帶血腥，整體比預期中沉悶。

住家男人

老闆娘 一早起身又痾又嘔，唯有退出"聾貓深圳吃喝之旅"，擇日重賽。全日扮演住家男人，煮粥、打掃、洗花園一腳踢。趁住 老闆娘 訓到不醒人事就到超市入貨，路經小酒家發現超抵食外賣，是日晚餐只需二十，正！

富貴粉麵餐廳

舊同事 車人 同 熱褲 生日飯局。第一次上 iSquare 開餐，地方九曲十三彎，行得人都有點煩。最後落腳於一間中式粉麵餐廳，中上嘅價錢配合還可以嘅品質，埋單時要位位一百，講到底仍然覺得貴！

正宗潮州菜

今晚同新家庭中醫 盧醫師 晚飯，到山林道食正宗潮州菜。可能 董事長夫婦 識得酒樓經理，所以樣樣餸菜都好對辦，味道不錯！

法式海鮮螺絲粉

老闆娘 煮意大發，是日私家午餐飯盒，「法式海鮮螺絲粉」。

油渣麵腸粉

一堆 TF 殺到，忙到正餐都唔多想食。是日宵夜，推車檔「油渣麵」+「豬腸粉」。

粟米雜椒炒牛柳

新課程第二堂，連續睇十幾個不同公司嘅 Branding Kit，睇到眼花撩亂。放學乖乖返屋企，是日晚餐「粟米雜椒炒牛柳」+「煎德國雜腸」。

董事局飯局

董事局內個個都係忙人，所以一次過慶祝母親節同補祝 卓言仔 五歲生日。先各自到飛鷹基地集合，擇下芒果、玩下狗、打下 Wii，夜晚就到 董事長夫人 最愛嘅大排檔開餐。

面書大解放

公司早上發通告，由今日開始 IT 開放權限兩個月，所有同事都可以上到 Facebook。收到通知後大部份同事都一試，係可以 login 不過就龜速，咁上嚟做乜？收工同 老闆娘 到"吉仔"開餐，兩個人幾乎要用一條紅衫魚... 似乎"吉仔"都只係適合幫襯下午茶餐。

旺角南豐

今日 老闆娘 又去玩面試下晝無返工，所以放工後有時間陪我到旺角行街買CD。之後到久違嘅"南豐"開餐，驚見場面都頗冷清...，話晒都幫襯咗十幾年，希望佢撐得住啦！

UNIQLO Tee

難得 老闆娘 今日七點半就收得工，一於拍拖行陣街街。行過UNIQLO 難免要睇睇有無新貨，最後放低幾條紅衫魚換取幾件靚靚 Tee，包括 卓言仔 嘅生日禮物。路過橫街車仔麵檔見賣相吸引，晚餐地點即決。

愛回家

因為要應付論文，已經無返老家開飯一段時間，所以今日即時返去報到。

火燒論文

今日午飯時間趕返學校交功課正本，雖然預料到評分後九成九會被打回頭大改，但至少惡夢可以暫時了結。曾經講過完成後會火燒論文慶祝，言出必行，夜晚上天台將副本跟隨我嘅小宇宙一齊燃燒，爽呀！

新科目開波

第三個科目正式開波，唯有丟低份論文幾個鐘，食過愛心早餐之後就返 HKPU 上堂。放學後要參加親戚飯局，由於未到訂座時間，唯有傻仔一樣坐响公園邊做功課邊等夠鐘。到酒樓後其他人又遲到，前前後後又成個幾鐘。加埋搭車食飯，終於全日無咗大半日時間做功課... #_#"

咖哩豬排飯

明知份論文唔夠時間，但剩低最後兩日，只好盡力而為。無人陪嘅 老闆娘 唯有玩煮飯仔，先準備五大盒「咖哩豬排飯」作為下星期午餐。之後再精心製作是日晚餐「日式炒拉麵」，讚！
　

胡椒湯麵

OT 到成十點鐘終於都可以收工。飛的返到屋企，老闆娘 陪我食個近期至愛嘅"胡椒湯麵"，之後就上房同論文繼續搏鬥！

澳洲常餐

今日收到 email，知道第一學期嘅成積比預期中好，可以鬆一口氣之餘，有返小小動力做好之後三個科目！是日愛心午餐係「節瓜排骨飯」，晚餐就到由朝到晚都坐滿人嘅"澳洲牛奶公司"食常餐。

等年尾分花紅

突然收到消息，Professional Staff 由今年開始都可以分到額外花紅，真係咁好？ 唔好講過就算數喎！晚飯時候發現一間超平荼餐廳，圖中所見都唔需要七十蚊，尖咀區來講真係超抵！

芝士德國肉腸飽

是日自備愛心早餐「芝士德國肉腸飽」。趁住老細開會，一有空檔就做功課，當然事倍功半啦。最後都係放棄，費事工作同功課都兩頭唔到岸。

雪菜肉絲上海麵

今日係論文功課 deadline，雖然我已經申請廷期七日後交，不過都想同 Miss 傾多兩句，睇睇有無地方要再改一改。返到學校得到一眾同學問候身體狀況，感激！放學返到屋企 老闆娘 已經準備好清淡晚餐，「雪菜肉絲上海麵」是也。

五一勞動日

五一假期，倉務主管 一早到飛鷹基地勞動一下補一補貨。由於實在太早，補貨後齊齊到茶餐廳食個早餐，但係返到屋企 老闆娘 依然未起身，勁！做下家務做下功課又一日，是日清淡晚餐「南瓜肉碎粥」。

病假變加班

想起今日有 full day training，唯有取消病假返工去。 九點開始上半節，中場休息時，無端端由老細請食貴價壽司，不過要趕下半節 training，食得唔夠暢快。完埋下半節後繼續開會，成七點先正式開始做 daily jobs，最後成十點先收工，咁當然係公司俾錢飛的士返屋企啦！

焗金沙骨飯

病假一天，聽話訓到成十一點幾...不過起身後就唔聽話開始做功課，如果唔係一定趕唔切。是日午餐為老闆娘準備嘅「焗金沙骨飯」。

雙色苦茶

老闆娘 今日請假去見工，下畫襯空檔約埋我同 董事長夫人 見下新家庭醫生 盧中醫 調理一下。醫師話基本上兩個都無乜大問題，我就只係平日無足夠休息所以積勞成病。一口氣比我兩日假，唔該乖乖休息。夜晚叫埋 董事長 齊齊晚飯，之後返到屋企再煲苦茶飲。

雜丸公仔麵

身體好返七八成，不過唔敢亂食嘢。午餐自備「茄子肉絲飯」，晚餐「雜丸公仔麵」。又話財多身子弱，咁我應該好強壯先係架！

大碗細碗

因為上星期只返得三日工，全日忙到傻。同 老闆娘 各自 OT 完後一齊食晚飯，平時我食大碗佢食細碗、我食酸辣佢食清湯，今日剛剛相反，哈哈！

南瓜肉碎粥

論文死線倒數兩星期，Miss 突然出招請病假，即是變相遲一個星期交功課。令到各位做到半死嘅同學可以透一透氣，Miss 萬歲！是日晚餐「南瓜肉碎粥」+「叉燒腸粉」。

面青口唇白

訓醒覺同 老闆娘 過隔離村食午飯，之後閉關長留書房做功課。大約四個鐘之後出關到廚房飲水，換來一個驚訝表情...原來我當時面青口唇白，嚇得佢即時下令停做功課。坐到晚飯時間時情況更差，完全無胃口兼頭痛，最後一枱美食只係食咗兩啖麵就上床訓。

積神走人

久病初癒，本應取消 China office 之旅，不過舊助手 積神 搵到主好人家離別在即，點都要親自 farewell 一下。此終唔係自己地頭，埋單時爭輸咗！不過佢新工新居都好近福田，將來想約見面都唔係大問題，所以下餐我嘅！

絕望真相 An Inconvenient Truth

公司為提倡環保，午飯時間响大會議室免費播放電影"絕望真相(An Inconvenient Truth)"之外，更準備「煙肉生菜番茄三文治」比所有參加同事，讚！希望各位同事唔好睇完就算，環保要身體力行呀！

消假返工

由於今個月已經請咗幾日病假，所以見起身無頭暈就消假返工，唔係之後一樣忙死。始終用電腦長少少時間就會唔舒服，所以做下停下，節奏比平時慢一半。全日主要食物依然係「愛心白粥」。

愛心白粥

醫生比咗兩日病假，訓到成十二點先起身。嘗試分段睇書同用電腦，

但係十五分鐘左右就會頭暈，所以都係聽醫生話暫時放低份功課。老闆娘 怕我無胃口同亂食野，返工前煮定一大鍋「愛心白粥」，食足一日。

又暈又嘔又去飲

終於做功課做到出事，朝早開完會已經覺得頭暈暈唔係好舒服。午飯時間連飯都食唔落，一直伏响枱唔敢亂郁。直至有個大陸同事不斷電話騷擾，由於太勞氣，真氣一動嘔吐大作。公司當然好緊張，著我坐定回一回氣即時收工去睇醫生。期間 老闆娘 同 董事長夫人 收到風，嚷住要到診所同我見醫生，攪到好似好大件事。最後 張醫生 話因為感冒加上唔夠休息導至耳水不平衡，最快回復方法係打針，另外嚴禁長期對住電腦同做功課最少三日。但今晚撞正 表妹 結婚，全家人一致通過話唔去飲陪我返屋企。嘩嘩嘩！ 咁除時比人怨一世喎，唯有死頂扮無事，堅持到場坐一陣先走... 最後人在江湖坐到幾乎完場，仲要以一隻金牛兩條魚嘅代價，換來全晚麵包半磅。@_@"

粟米肉鬆薯容

唔想將浪費交通時間，決定唔返學留响書房趕功課。全日足不出戶，由朝到晚睇住部 iMac，終於睇到頭昏腦脹。是日晚餐「粟米肉鬆薯容」+「自家撈海蜇」。