2007年12月31日星期一

元旦自由行

雖然元旦日可以早收工四點,可惜最後都要成六點先走得。China office 個助手今日到咗香港幫手準備展覽會,難得佢第一次到香港,當然要做嚮導等佢感受下熱鬧氣氛。先帶佢去到想見識嘅旺角,當然人山人海啦! 搵咗間咖哩專門店開餐,之後上新世紀廣場行街街,再過朗豪坊打個轉,最後到奧海城倒數! 雖然可以見識見識,但係直落五個鐘係咁行,真係行到佢怕怕~ XDDD

"炸彈仔"面世


恭喜恭喜! "炸彈仔"終於面世! 雖然差少少唔能夠成為 2008 年第一個 BB, 但好可能係 2007 年最尾一個喎, 一樣咁特別啦!

2007年12月30日星期日

今夜只因您

唔經唔覺就四年,個感覺有啲似有一個好耐無見嘅朋友去咗遠行,聯絡唔上,但係久唔久又會聽到佢一啲消息。近排公私兩忙時間好唔見駛,今晚怱忙趕到只出席十五分鐘就要走,雖然趕到氣咳,但我知道自己完全唔出席的話,事後一定會後悔。Anyways,遲少少就到時間再入寶蓮寺探妳!

永遠懷念

2007年12月29日星期六

TB Gathering

今晚 Fanclub 有個"梅艷芳舞台欣賞會",雖然已經好努力咁安排時間,可惜最後都係趕唔切去睇... 麻煩晒 Ocean 幫我攞紀念品。既然趕唔到第一個約會,唯有直接出席下一個,仲由預計中嘅遲到變成準時到。好耐無見 TB 班朋友仔,今晚好難得約到成二十個人一齊"拾拾"下呀! 食完成十一點大家都意悠未盡,又話食糖水又話去 drink,不過我同女友真係好攰喇,所以決定閃先!

2007年12月27日星期四

RTHK - 不死傳奇 梅艷芳 特輯

仲有兩日《不死傳奇》就有得睇,據閒有兩首從未曝光新歌片段,不容錯過! 亦因為版權關係,特輯只可以播一次唔會重播,大家記得睇呀! 播放時間係12月29日晚上19:35-20:30。


宣傳片段

2007年12月26日星期三

X'mas Party

聖誕節唔開下派對又點似樣? 所以集齊各隊員,一行八個人上 Ah E 屋企攪攪震。開頭明明話全部外賣唔好整,最後各位靚女咪又係忍唔到手... Ah E 整"什果沙律",史狄女 煮"咖喱雞",女友 煮"炆雜菇"、"三色波蘿雞柳",再三人聯手合作一個"煎/鹽焗雞翼"。好多嘢食? 未算! 唔計零食同汽水、紅酒,仲有兩盤"壽司"同叫咗個 pizza 呀! 最後當然食唔晒啦,由繼續放大假嘅 闊少 打包。個個玩到忘形唔知時間,幾乎趕唔到尾班車!

2007年12月25日星期二

聖誕有朋自遠方來

今日聖誕節, 約咗女友媽媽飲茶. 點知一去到酒樓成圍枱人... 原來佢地朝早返過教會, 啲親戚我又見過晒, 所以伯母話齊齊食開心啲! 飲完荼去睇女友妹妹有份做幕後嘅話劇"風流劍客", 又幾好睇喎, 完咗仲有免費咖啡飲添. 之後趕入沙田同女友個死黨 WingE 食飯, 上次女友晌美國多得佢照顧, 所以今晚堅持要請佢! 見佢長居外地未試過快餐店都可以火鍋, 就帶咗佢去"美心"試日式火鍋, 一邊食一面傾, 傾到人地收舖... 仲未傾完喎, 點算?! 唯有轉去食糖水囉, 兩位女士幾乎傾到無車搭先肯擇日重賽咋.

2007年12月23日星期日

Home Dinner


好耐無返屋企食飯喇,所以今晚決定同女友齊齊返去做節。

X'mas cake

露露 過兩日去旅行 join 唔到 X'mas party, 所以佢 hand made 定咗啲蛋糕仔今日送比我地. 賣相唔錯架, 味道呢... 都 OK 喎, 下次再加多少少朱古力就仲正, 70分啦!

2007年12月22日星期六

齊齊造冬

天氣唔凍唔熱, 攪到個人都好似病病地, 訓咗成七,八個鐘都仲係有啲攰. 之前應承女友好耐, 今日終於有比較充裕嘅時間過黃埔睇衫, 雖然行行睇睇幾粒鐘, 但只要搵到心頭好, 再行耐啲都無問題. 夜晚約咗女友親戚"造冬", 因為老人家歡喜, 地點依舊係鴨寮街某資深酒家. 上次一圍已經夠, 今次多咗人抽到時間, 要開足兩圍先夠坐, 但仲好似話未齊人喎... 咁齊人要幾多圍呢?

2007年12月21日星期五

韓式晚餐


大編輯 慣性星期四搵我地食飯, 難得我地今晚可以早啲, 行遠少少落旺角啦!

2007年12月20日星期四

讀者投訴

今日又收到讀者投訴我唔 update 個 blog... 快架喇, 等我整理好之前每日 drop 低嘅 draft 先啦... 總之07年內 update 返晒, okay?

2007年12月19日星期三

兩個"第一次"

今日臨時要上 China office, 所以 book 唔到公司車要自己上. 過到羅湖等咗半粒鐘都無車到, 原來大陸同事唔記得 call 白牌車... 如果唔係隔離 team 有人一齊我實掉頭返香港! 最後唯有坐的士, 亦係我第一次响大陸坐的士. 雖然後座無安全帶都幾唔安全, 不過都算預到個好司機, 一路都揸得好定. 上到去見到大老細先知佢都上嚟開會(唔怪得之 book 唔到位啦...)! 收工 call 車走時, 見時間尚早就同隔離組 白賴仁 到"書城"一遊, 仲買咗隻 梅姐 嘅大陸版 DVD. 走時要自己坐地鐵返羅湖站, 第一次坐深圳地鐵, 又幾乾淨企理喎! 同女友夾好時間晌火車站等, 之後去行街街, 路過一間新開張嘅茶餐廳, 又可以試新嘢喇!


CAS & Taxi

2007年12月10日星期一

不死傳奇:梅艷芳

香港電台製作《不死傳奇》,以嶄新角度演繹已故巨星的光輝生命,與觀眾重溫屬於每 個香港人的集體回憶。十二月二十九日晚上,與你重溫香港的女兒 -- 梅艷芳 的動人故事。


愛將 Live in 1986

2007年12月9日星期日

聖誕"貨物"

下星期就要擺展覽, 但係好似乜都未開始準備, 所以決定今日一打完波就上倉先揀定貨, 唔駛到時滾水淥腳帶漏嘢! 接埋女友上倉, 執執下突然醒起臨近聖誕節, 即刻打比 昌老闆, 問下佢要唔要貨過聖誕?! 一句"無問題", 即時更改計劃先摷聖誕貨. 最終搵咗兩大箱, 連同兩大手抽袋, 同女友飛的士出 昌老闆 旺角個倉寄存, 順便加句"慢慢賣唔駛急, 過完聖誕節先計!"... 當然最好就幫我賣晒佢啦!

2007年12月6日星期四

Seven & Eleven

肥蟹 中山工幹返港約晚飯, 相差唔夠十分鐘, 大編輯 又打電話約晚飯... 可惜一個七點一個十點時間唔啱, 唔係佢兩個可以順便見過面. 最後七點先同 肥蟹 先食個快飯, 之後返公司繼續博殺. 到咗十一點準備叫車走時, 大編輯 又打嚟話收得工喎! OK, 橫豎都係坐的士, 即管陪佢飲多杯奶茶先返屋企啦!

2007年12月4日星期二

Juno Live Music Show

因為 SK 做嘉賓嘅關係, 今晚原本有免費飛睇 Juno 音樂會. 可惜排山倒海嘅工作, 根本就行唔開...(#^&%*)! 好彩 SK 只係唱咗半首歌, 去唔到聽都唔算大損失. 放工返到屋企, 朋友仔已經將一批私家相 upload 上網站, 如果想睇好有型嘅 SK, click HERE!

2007年12月3日星期一

雙糧月

終於等到十二月, 一個出雙糧嘅月份! 記得好友話份人工已經包括咗受氣, 希望今個月順順利利, 啲氣唔駛受雙份啦!

2007年12月2日星期日

一年一會

好耐無試過賴床唔願起身, 但係今朝就拖拖拉拉到成十二點, 攪到滾水淥腳咁換衫去打波. 臨行前收到 message 要幫手買飛, 球場唔夠人又行唔開, 點算? 好彩 Ocean 同 大佬 抽到時間去買, 麻煩晒! 食完 tea 買定燒餅接女友, 之後齊齊陪 史狄女 去買滑鼠. 夜晚女友要去數碼港飲喜酒, 送佢過海之後幫佢攞個運動袋返公司, 再落旺角搵 艾域 食飯. 呢餐飯都巴閉, 時間一改再改, 差不多約咗一年先成事!

2007年12月1日星期六

葛福臨佈道大會

女友個伯爺响外國返咗香港探親, 由於時間緊迫, 只可以相約飲個午茶. 尋日放咗個"半天假", 結果就係今日飲完茶要返公司 OT! 極速攪掂啲手尾, 準時七點趕過大球場參加"葛福臨佈道大會". 出乎意料咁多人, 去到 CWB 地鐵站已經有廣播話大球場爆滿, 叫大家轉到馬場! 排隊入到馬場要坐草地, 對於我地呢啲唔識打坐嘅人確係為難, 唯有全程不斷轉換坐姿以防腳痺!