2009年9月30日星期三

暴雨探 B 團

收工後冒住狂風暴雨到醫院探 BB,雖然一褲濕晒,但總算趕得切探 BB 時間。分別見到 B媽、B囡 十多分鐘,之後順路送世伯伯母到車站坐地鐵,我地就坐火車搵食去。

油麥菜肉絲炒烏冬

是日愛心午餐為「油麥菜肉絲炒烏冬」。

2009年9月29日星期二

私房月餅準備中

今日收工專誠到沙田 Citisuper 買材料準備星期六造私房月餅,日本南瓜、日本蕃薯通通入籃!由於今日响公司食太多雪糕月餅導致一身寒氣,所以之後去食譚仔米線,熱湯一大碗區一區寒氣!

2009年9月28日星期一

金菇腿蛋炒公仔麵

原先打算到旺角買月餅材料,可惜要 OT 就唔到時間,最後要改 plan,老闆娘 返屋企煮飯仔等我收工。是日晚餐「金菇腿蛋炒公仔麵」。

李千金面世

大佬 B 女已經順利到達人間,祝 李千金 快高長大、精靈可愛!

2009年9月26日星期六

一改再改

一早約好 倉務主任 去試洪水橋奶茶王,但因為坐車過元朗時大塞車,之後又要趕去 LCC 關係,計畫被迫改為食上海麵同餃子。去到 LCC 又發現記錯時間,無問題,即時轉到旺角買造月餅材料,為私房月餅做好準備!

2009年9月24日星期四

優質午餐

今日有神秘人飛車嚟陪食午飯之餘,仲要請我食過百蚊一位嘅正忠日式燒烤,多謝晒!XDDD

2009年9月23日星期三

月餅禮劵

係時候放低幾張月餅劵俾 董事長夫人 過節兼送禮,當然順便返屋企開餐啦!截至今日為止,連同 老闆娘 暫時共收到十張月餅劵,比預期中多喎!

2009年9月22日星期二

食飯無錢比

晚飯有趣事,就係去食 Burger King 時唔夠錢比... 我有"人仔"、有 Yen、有美金、有信用咭、有八達通,就只係唔夠港幣,吹漲!之後約咗 倉務主任 食宵夜,佢見 老闆娘 對烹飪興趣愈來愈濃厚,專誠送咗幾本鬼佬秘笈比我地,等 老闆娘 進修進修!

2009年9月21日星期一

2009年9月20日星期日

栗子炒雞軟骨

尋日大掃除,今日再打個幾鐘頭 tennis,食完 tea 已經唔想再四圍走,決定去街市買餸玩煮飯仔。是日晚餐「栗子炒雞軟骨」+「菜心炒牛肉」。食飽飽睇"超級巨聲",全晚唱到最好、最有感染力嘅竟然係鄰居 官小姐,真係估佢唔到!

2009年9月19日星期六

雪梨湯

起身之後, 修剪芒果樹, 洗花園, 同兩隻狗沖涼, 打掃晒三層樓... 果種攰嘅感覺好似打完溫布頓一樣 !夜晚放棄煮飯出街開餐,老闆娘 心儀日本菜但到處都要等位,最後只好幫襯人龍最短,幾年無去嘅元綠。 返到屋企愛心"雪梨湯"剛好完成,清清甜甜好味道!

2009年9月18日星期五

冬瓜炆排骨紅米飯

趁住尋晚有空檔,老闆裝 已經準備好今日嘅午餐,「冬瓜炆排骨紅米飯」。

2009年9月17日星期四

茄蛋雞絲公仔麵

晚餐食咗幾日飯,又係時候轉轉口味。是日晚餐「茄蛋雞絲公仔麵」

2009年9月16日星期三

洋蔥豬扒便當

八號風球副產品,「洋蔥豬扒便當」。

珍惜聚會時 '09

Anita 生日當天下午一時,歌迷會會在省善真堂進行儀式,歡迎大家前來致意。晚上,歌迷會將於酒店舉行一年一度自助晚餐聚會。

日期:2009年10月10日(星期六)
地點:富豪九龍酒店 (尖沙咀麼地道71號)
時間:晚上7:00 (如要送花請安排下午4時後送到)

如欲參加聚會,請於以下時間到歌迷會購票。
日期:2009年9月5日及6日(星期六、日)
時間:下午3:00 - 5:00
地點:歌迷會會址 - 香港北角電氣道148號10樓1003室
電郵:amifc1985@yahoo.com.hk

2009年9月15日星期二

繼續八號

七點起身聽到八號風球未落,將鬧鐘較遲兩粒鐘,繼續訓!再起身已知道將近落波,同 老闆娘 提早準備,出門時成功避開人潮。如我所料,堆積咗一日半嘅工作係無可能用半日攪返掂,最後 OT 到成十點幾先飛可以的返屋企。

2009年9月14日星期一

又打八號風球

暴曬兩日,最後都要請日假留响屋企叉一叉電。悠悠閑執下屋、玩下狗、check email。打開電視,新聞報導話夜晚會由三號轉八號風球,即時打比 老闆娘 問需唔需要去買餸?之後去到超市已經人山人海,好彩仲比我搶到絕無僅有嘅幾包菜。晚飯時間 外母 到齊,粗粗地都有「洋蔥豬扒」+「菜心炒草菇」+「煎餃子」+「金寶雞湯」+「雲耳蒸雞(外賣)」。

金剛經 - 何韻詩

作曲:HoCC 填詞:黃偉文
編曲:陳奐仁、何秉舜@goomusic

我托住了 倒塌大橋
還派個隊友 阻擋海嘯
我破罪案 她去護苗
排難救災 未算少

你有絕症 他會治療
而你拒絕了 因他太妖
救過命已 一百萬條        
歧視眼光 沒有少

你 遇了險 誰人像金剛般給你去撑腰
萬人卻在 拿着十架在搖 願釘起我焚燒

我們仍然未得勝
還是有部 難唸的經
我們仍然未得勝
還在革命 頑強爭取 太平

你我亦會 感到寂寥
何以卻沒法 肝膽相照
哪個為我 煮個麵條
強大勇者 就折腰

我 待你好 猶如煉金般 怎麼怕猛火燒
沒人仰望 還是未有動搖 負傷衝上雲霄

我們仍然未得勝
還是有部 難唸的經
我們長年在打拼
融合隔膜 同存於這星
世人何時受感應 全部甦醒

我們仍然未得勝
還是有部 難唸的經
我們長年在打拼
融合隔膜 同存於這星

我們祈求被尊敬
能做已做 無人響應
既然仁慈是必勝
難亦要唸 難唸的經 難唸的經

誰是 同類 誰是 仇敵 
難道 難道 還未 還未 分清

2009年9月11日星期五

整裝待發

明知聽日有排忙,所以今晚謝絕應酬。唔想死背自備嘅司儀稿,重新閱讀兩次之後決定唔再睇,去到現場先執生!臨訓前天氣時好時壞,唯有祝兩位主角好運,可以順利地响沙灘行禮!

2009年9月10日星期四

西來也西去

上星期返老家攞西裝,一時情急攞咗十幾年前最舊果套。雖然尚算啱身,但唔夾婚宴場地,所以今晚要再次努力發掘另一套。食完飯開工,終於搵到最近期果套,重新配搭過另一件恤衫、頜呔,攪掂!

2009年9月9日星期三

2009年9月8日星期二

草菇肉鬆炆豆腐

夜晚繼續煮係 老闆娘 嘅飯仔時間,是日晚餐「草菇肉鬆炆豆腐」+「青炒通菜」。

海鮮會意粉

午飯時間由 老闆娘 包辦,「海鮮會意粉」。

2009年9月7日星期一

菜圃炒蛋

放工趕到 HKPU 交學費單,一程日本之旅同時報銷。之後返屋企開飯,今晚 老闆娘 有新煮意,是日菜式為「菜圃炒蛋」+「節瓜炆肉絲」。

2009年9月6日星期日

牛華事件

一個鬧得滿城風雨嘅話題,部份牛迷反應激烈,即時反轉豬肚...。其實 牛華 年紀已經唔細,已婚總比証實佢係”攣”好掛?再者,就算對象唔係豬小姐,係”你、妳、您”嘅機會率等同中六合彩,與其怨偶像一世,倒不如祝福佢!等佢可以繼續唱多啲好歌、拍多啲好戲去慰藉各牛迷嘅心寧,滿足各狂迷嘅白日夢!至於”講大話”呢方面,當你放一個屁都可能成為新聞頭版嘅時候,易地而處時,你就知道有時”唔講”比”講”需要更大嘅勇氣同承擔!

2009年9月5日星期六

李龍、李鳳

終於就啱時間,約埋 貓新地 齊齊去探 李龍、李鳳。一直被坊間流言誤導,以為龍鳳B會同時食、同時訓、同時喊... 原來各有各生理時鐘,大部份時間都唔係一致。不過 BB 好乖呀,令到已經好少機會同枱食飯嘅 李爸李媽 可以安安樂樂咁同我地食完餐飯,抵鍚!

2009年9月4日星期五

陳年老西

倒數一星期,係時候發掘一年先著一次嘅西裝出衣櫃。咁返得老家,當然順便開埋餐,食完先開始動手發掘。大戰半小時,集齊恤衫、西褲、外套、領呔,閃!

2009年9月3日星期四

各自各精彩

今晚各有各節目,老闆娘 約咗舊隊友响尖咀飯局,我就約咗舊同事 艾域 同 倉務總管 响旺角,最後再約埋一齊返屋企。

2009年9月2日星期三

司儀飯局

雖然係第三次做婚禮司儀,不過今次要幫埋沙灘行禮個部份,所以都有少少緊張。好在晚宴時段搵到 公主 幫手,唔係就要一個由朝頂到晚。今晚 大編輯夫婦 就約埋兩個司儀,開返個會傾下個內客。

2009年9月1日星期二

齊齊開學

開學日交通七國咁亂,差啲趕唔切坐公司車上 China office。一如以往跟大陸助手開下會、食下飯,確保全部如期可以收工。返到屋企剛剛開著電腦就收到 HKPU 電話,英國大學已經確認取錄,十月開學,盛惠第一期學費一千英鎊。呼...係時候計劃一下點樣重組我嘅生活秩序喇!