三月最後一日

今日都算繁忙, 十點幾起身之後就開始執屋同搵婚禮流程資料比大佬參考。哈哈, 雖然佢可能已經唔記得問過我攞資料, 但既然聽日見到佢就儘力搵啦! 二點半左右就約咗女友食 lunch, 食日本拉麵呀! 之後就上倉包好啲畫, 準備聽日晌 VAC 做展覽用。五點幾趕返出旺角換禮物, 跟手六點幾再飛 taxi 到九龍塘教會聚會。個聚會差不多八點完, 我眼見跟身批畫一啲都唔輕, 決定連人帶畫送晒返女友屋企先! 安置好啲畫, 就過咗去上水舊墟搵嘢食, 最後由女友發版食印度咖哩。

"Momentum" Art Exhibition 2007-04-01

女友又 join 咗個展覽, 今次晌香港公園內嘅"VAC"攪, 大家有時間就支持吓啦! 今次嘅作品係原整嘅「灰雪」系列, 比之前加多咗兩張畫.

Place: Visual Art Centre

Date: 1.4.2007-4.4.2007

Opening: 1.4.2007-17:00(sun)

這是我心裡對白 - SK

八珍姐姐/哥哥:
我係 關淑怡。現在我在自己forum向您說明以上的報導是極度錯誤，我已向傳媒作出清晰解說過。需要我再一次解釋嗎??? 我從沒向任何人提出過加歌酬，part2為何會沒法在去年舉行，是因為張耀榮先生強將2006年6月(世界杯)期提供給演唱會有關人士，亦是唯一的擋期。沒有選擇餘地!!!這個檔期原先已被多位歌手拒絕，你應該明白是因為世界杯的問題，所以演唱會所有有關人士都一致反對在這期間舉行part2。如您是投資者，試問會否在這段期間作出投資呢???相信八珍可以理解的!!!請別再將不必要責任推在我身上。此報導從來並非事實，請放過張耀榮及我吧!!! 唔該!!! 我個人非常樂意以歌會我的歌迷或一些不太喜歡我的人，我都會同樣地為他們而高歌。這就是音樂的精神!!! 這就是我。
SK~~~

*以上係 SK 晌 forum 嘅留言, Part II 演唱會開唔成係因為檔期問題, 並非傳聞中因為歌酬由50萬激增至80萬而取消! 面對住而家以"作料"為生嘅傳媒, 有時真係好難可以清者自清!

好味麻辣車仔麵

話說尋晚睇完戲去咗食車仔麵, 呢間車仔麵舖頭應該都開咗最少四五年, 係我當日晌"潮特"時期, 其中一間經常幫襯嘅食店! 價錢唔貴架, 四款餸+粉麵+飲品 都只係廿八蚊, 圖中所見加埋都只係五十蚊咋, 絕對適合儲緊錢嘅我! 間舖頭晌女人街第三段, 幫襯時記得試下佢嘅麻辣汁, 幾好味架!


興隆車仔麵 旺角通菜街21號地下

爭取成功, yes!

今日有件開心事發生咗, 所以唔理三七廿一, 六點幾就走人同女友慶祝一下! 原先想食餐好嘅慶祝, 點知晏晝個自助午餐仲未成功消化, 所以即時改 plan, 睇返套講咗好耐都未睇嘅<戰狼300>先! 睇完之後行咗一陣都仲未肚仔餓, 最後決定擇日重賽, 延期再食過! 但係成十點鐘, 總要食少少嘢, 就去咗食好味車仔麵!

四餸一湯, 白飯任載!

經過個幾月嘅搏鬥, 終於將啲 job 殺得七七八八喇, yeah! 既然今日難得早收, 一於同女友返屋企食住家飯啦。八點趕到返去, 坐一陣就開飯喇, 四餸一湯, 白飯任裝。有幾好味? 自己睇相啦~ :P

一個短訊

今日收到一個 SMS 話"行動失敗"... Well, 朋友仔! 雖然你唔可以一擊即中, 但最起碼你有勇氣踏出第一步做啦, 已經好有進步。況且, 個 feedback 都唔係咁差啫, 仲有機架!

總動員家庭日

尋日係家庭日, 全家總動員上山掃墓之後, 就過咗旺角警察會飲茶。原先諗住飲完茶會上倉執下嘢, 點知有人提議打保齡... 哈哈, 我又真係未試過同屋企人"碌 ling"喎, 咁即管玩玩啦。由二少, 二少奶, 女友同我四個唔多識打嘅初哥打咗一個鐘。Well, 我唔識唔識都打咗三個全中, 三個補中架! 打完波去食tea休息吓之後, 董事長就返工, 其他人跟手一齊過紅磡老人院探婆婆。探完婆婆就各自行動, 我同女友過咗黃埔行街街。行到肚仔餓, 見到間賣餃子同豬什嘅舖頭仔幾特別, 就入去食 dinner。女友要咗個"椰菜木耳餃+鮮魚豆腐湯米", 我就要"白菜餃+豬什+豬骨湯上海幼麵", 味道唔錯價錢又平, 兩碗加埋都唔駛三十蚊, 抵食!

大編輯請食飯

尋晚女友有生日派對要出席, 又係我見下朋友嘅時候! 送咗女友去目的地之後, 就約咗 L君 晌附近等, 今晚佢都算比面喇, 竟然只係遲到少少! 之後陪佢過咗旺角地底玩具城買嘢, 啲行家好比面呀, 見佢係我嘅 friend, 收平佢成舊水呀! 最後? 當然由大編輯請食飯啦! 我唔貪心嘅, 車仔麵都 ok 架喇!

愛心早餐

煩忙嘅一日。一返工就話要開會, 跟手仲要收稿追稿對稿放稿, 轉頭又一輪電話, 一直忙到食 lunch! 好彩成個上晝有董事長+女友晨早整嘅愛心早餐"糖心烚雞蛋+好立克麥皮"頂住啫!

Ah~

呀! 呀! 呀! 呀! 呀! ...... (舒服晒!)

JUMP - Madonna

JUMP written by Madonna, Joe Henry, and Stuart Price
　
I haven't got much time to waste, it's time to make my way
I'm not afraid of what I'll face, but I'm afraid to stay
I'm going down my own road and I can make it alone
I'm working, I'm fighting, I'll find a place of my own

Chorus:
Are you ready to jump
Get ready to jump
Don't ever look back, oh baby
Yes, I'm ready to jump
Just take my hands
Get ready to jump

We learned our lesson from the start, my sisters and me
The only thing you can depend on is your family
And life's gonna drop you down like the limbs of a tree
It sways and it swings and it bends until it makes you see

Chorus2:
Are you ready to jump
Get ready to jump
Don't ever look back, oh baby
Yes, I'm ready to jump
Just take my hands
Get ready to, are you ready

I'm working, I'm fighting, I'll find a place of my own
It sways and it swings and it bends until you make it your own
I can make it alone
I can make it alone
I can make it alone [my sisters and me]
I can make it alone [my sisters and me]

"Momentum" Art Exhibition

Place: Visual Art Centre
Date: 1.4.2007-4.4.2007
Opening: 1.4.2007-17:00(sun)

乜乜展覽會

今日跟大佬同未來阿嫂行咗幾粒鐘展覽會, 之前都無特別想行, 不過女友想見識下, 又有導遊, 當然唔好浪費。有 friend 問行嚟做乜? 增廣見聞啫! 幾時知多啲識多啲都無蝕底嘅, 況且都幾得意呀, 你諗過同諗唔到嘅嘢都會有。行乜展覽會? 關鬼你事咩! 總之就有大 project 要去攞料啦! XDDD~

要做拆彈專家

月頭有同事離職, 晌未請到人嘅情況下, 佢做緊嘅 project 自動過戶比其他同事, 攪到成 team 人都以一敵百, 百上加斤! 正當每個人都做到昏天暗地, 情緒一觸即發嘅時候... 我出奇地無發脾四喎! 可能我知道炸彈爆發會有連鎖反應, 我唔要做引爆果個, 要做就做拆彈專家! 每拆一個就可以再行前多一步。況且, 人地OT時我又OT, 但我有美相伴, 就要知足啦! XDDD~

只得一次 - 電視劇"同事三分親"片尾曲

只得一次 　唱:關淑怡　
曲:鄧智偉　詞:陳詩慧　編:Johnny Yim

聽聽歌曲再次記起
奔波中生活或太膩
誰願花光　全部心機
為求剎那的歡喜
他跟她可會再記起
彼此相識就是趣味
名利拋開　曾無私獻技
原來這是誰的福氣

Chorus
偏愛面子　總不肯開口
太沒有意思　明明可以
像回復當年那樣子
捨棄面子　講一聲很愛
聽罷就會知　然而　忙著多的是
誰沒有守時　而這種機會只得一次

很想講一句在意嗎
親暱的關係未變吧
如若講出　遲來的說話
連人間寂寥都不怕

Repeat Chorus ※
寫上地址　簡單的祝福
看罷就會知　然而心意
若遺下了就變歷史　誰人寫出心事
誰人沒有守時　原來這種機會只得一次

*SK 又有新歌! 今次仲難估, 竟然會係電視劇嘅片尾曲?!

香港公益金百萬行 - 4月15日

香港公益金將於2007年4月15日(星期日)假深港西部通道(香港段)舉行百萬行, 參加者可於通道正式通車前一睹整項宏偉的工程, 同時為有需要的人籌款。請把握機會踏足通道, 欣赏后海灣怡人的景色及遠眺深圳蛇口。全程長约7公里, 步畢全程约需2小時! 名額有限先到先得, 額滿即止! 詳细資料可登入以下公益金網址瀏覽: http://www.commchest.org/chi/event.cfm?no=124

好味燴蕃薯

尋晚 OT 到悶悶地, 同女友八點幾落街行個轉. 行行吓一陣香氣飄過嚟, 完來係賣燴蕃薯嘅車仔檔, 知道女友鍾意食, 即時買返個當甜品啦! 返到公司打開睇睇, 熱辣辣嘅紫心蕃薯, 好味道! :P

Gmail 全面開放

網絡搜索器一哥 Google 昨天（周三）宣布，Gmail 網上電郵將會移走「邀請限制」，全面向世界各地開放使用權，顯示 Google 有信心擁足夠儲存空間，應付大量資料。Gmail 於 2004 年創立，使用權受到限制，登記者必須是網誌用戶，或者是手提電話用戶，當時 Google 稱，是為了防止濫用電郵。去年 8月，Gmail 全面開放予澳紐和日本用戶，登記即可使用，但登記仍然有「邀請限制」，直至昨天才宣布，有關限制將解除。Google 創辦人之一的布林（Sergey Brin）直言：「Gmail 已成為我們的基石。」Google 對手 Yahoo 和微軟的電郵用戶，同樣不設登記限制 。

Wedding Buffet

尋日參加咗波友仔 阿信嘅婚禮, 地點係黃埔海逸酒店。今次婚禮幾特別, 係觀禮儀式加 wedding buffet。雖然十二點半已經同 L君 到步, 但基於我地 dress code 比較特別, 最後都係晌大堂等多幾個波友仔先有勇氣入場! 我地著乜? 咪就係一身打波 look加球拍囉! 無他嘅, 可以送一張與別不同的相比主人家之餘, 又可以同一大班球場相識嘅朋友仔留個記念。開始時前有一班小妹妹表演芭蕾舞, 跟手主角入場繞場一週, 再上台進行簽名儀式。自助餐水準比想像中好, 仲有一盆不斷 refill 既新鮮生蠔同海鮮, 可惜當日腸胃唔多好, 唔係實好似 L君 咁食佢一打半打! 婚禮完結之後, 我地一行十八個人仲浩浩蕩蕩咁去打波, 咁咪就係"出奇蛋", 有得玩又有得食囉!

i'm...

一覺醒來見到幾個朋友 MSN 名上面多咗個"*wwf", "*unicef"..., etc. 一問之下原來有意思。實際係美國推出一個公益捐助計畫，晌 Windows Live Messenger 8.1版嘅暱稱上面輸入一串「特定碼」，MSN 暱稱除咗出現「i'm」符號之外，微軟將按照訊息量，拆分一定比例嘅廣告收益捐贈比代碼所表示的慈善機構，在第一年每個機構的捐款下限是十萬美元，Chat 得越多微軟也將捐贈得越多，由於這個計畫是在美國實行，捐贈嘅對象將係美國慈善團體，而且限定對話嘅雙方必須有一方係晌美國網站註冊嘅用戶。如果香港日後推行，大家都應該參與。想知多啲可以到呢個網頁睇睇: http://im.live.com/Messenger/IM/Home/

M記 舊同事聚會

今晚係舊同事聚會, 一行七人去咗九龍城嘅"龍城金記"拾拾吓。由於想等齊人, 呢餐飯由中秋改到聖誕再改到新年... 好彩唔駛再改到復活啫! 唔覺唔覺呢班同事識咗兩年, 其中四個已經轉咗工, 不過一直都有聯絡, 無他嘅, 當年共事最少嘅都有半年, 而合作期間真係幾開心! 當日晌公司我地有個朵叫"富貴 temp", 因為我地成班 temp stuff 日日都食 tea 之餘, 個 tea 仲貴過個 lunch。尋日食完 Covan 嘅 cheese cake, 今日就食 CitiSuper 嘅特大 strawberry, 樣樣都過百錢, 食食埋埋條數都幾甘架。而家呢? 做事要有計劃, 唔捨得咁駛錢啦! hahaha~

三月首個生日聚會

尋日係死黨 ForeverChan 嘅生日, 應壽星仔要求, 一行八人晌尖咀食 "妹記大排檔" 慶祝! 位位朋友都日理萬機唔可以準時收工, 大家唯有食住等, 齊人都已經九點幾鐘。飲飽食醉埋單計一計, 原來前前後後都食咗十幾個小菜, 呢班蝗蟲絕對唔可以睇少。完咗上半場, 下半場轉戰 綿登徑 某酒吧, 但情況就剛剛相反, 因為第二日要返工, 一人一杯就飲到完場喇。之後散場, 陪壽星仔慢步行落旺角搭車... 點解行咁遠?! 無他嘅, 等壽星仔可以修吓身, 快快行返個桃花運吖嘛!

各位三月壽星生日快樂!

三月有十幾個朋友仔生日, 為免忙起上嚟有遺漏, 在此先行一次過同各位講聲生日快樂 !

壽星仔A - 祝你: "豬"事暢旺, 桃花盛開!
壽星仔D - 祝你: "豬"籠入水, 生意興隆!
.........

天台的月光

今日係初十五「元宵節」, 又名中國情人節。原先諗住同女友行綵燈會, 睇吓花燈猜吓燈迷! 不過最後因為要提早同佢妹妹慶祝生日嘅關係, 臨時取消咗行程喇! 食完生日飯送佢一家人返屋企嘅時候, 不停諗仲可以有乜攪作。正想放棄嘅時候, 女友提議到佢舊屋行一行, 因為之前租客搬走之後裝修過, 順便檢查一吓。之後成家人拖埋小狗當奴到舊屋大搜查, 由於我第一次到, 女友帶我行晒三層上埋天台, 其他人就嫌要行樓梯無跟上嚟。由於係村屋四面都無高樓, 倆個人晌天台抬頭望住一個又大又圓嘅月亮, 再加一閃一閃小星星, 個 feel 正得呢... 元宵節嘅二人世界, 今次都算失而復得~ XDDD

同契媽拜年

好耐無見過我 契媽 喇, 我得閒時佢又唔得閒, 終於狗年約到豬年先成事! 佢好錫我架, 中學有段時間我每個星期六都會上佢屋企食飯, 有時出街玩得夜又會上佢屋企過夜, 過時過節又會同我去行街買衫。尋晚就佢方便晌荃灣食, 點知四週圍都排長龍, 最後走咗中央街市對面嘅飯店食。間飯店開咗好多年架喇, 計埋女友三個人四碟小菜, 啲嘢都幾大碟又有鑊氣, 都唔錯架。最後幾乎食唔晒, 下次要睇清楚個舖名先得!

年假後遺症

晚晚收咁夜, 個 Blog 就快變週記。放咗十日新年假都知一返工就大煲, 一開機睇下得幾十個 email 仲以為比預期中好, 點知睇晒就知封封都係精品。雖然 HK & China office 放假, 但係美國同印尼同事無假放, 咁就期照排貨照造稿照追! 開工第一晚都仲抽到時間同大佬食飯, 之後就甘喇, 晚晚收十二尋晚仲兩點! 坐房個打把仲問做咩成 team 做到咁夜, 有乜野問題? 佢就當然無問題, 張啲 job 比晒個 manager 跟自己死去放假, 梗"無"問題啦! 條氣係唔順架, 不過唔緊要, 我肯捱更抵夜都係為自己, 儲夠彈藥就會遠走高飛! 雖然有啲 job 晌垂死邊緣, 我就係唔信我做唔到, 依家都已經救咗幾件, 其他都一定救得返, 我話嘅!! 反而美國班同事知道攪到我地成 team 勁 OT, 主動比 email 話唔好意思之餘, 再比個 email 啲 VP呀 CEO呀, 讚我地做得好, 下星期仲會請我地食飯添! 真心又好門面又好, 起碼條氣順返少少! 好... 努力加油, 夠料即走!!

"撞"藝展 已經完滿結束

多謝各位到場人士參觀支持！