生於九月一日

一早起身同女友過咗 LCC 上堂，之後就趕返去陪 董事長夫婦 飲茶。跟手上倉攞貨去朋友舖頭，見到旺角人山人海先醒起仲有兩日就開學。九月一日係開學日之外，亦係我兩位舊同學嘅生日日期。其中神神化化嘅 蔬菜先生 已經失蹤一年有多，最後消息係上大陸攪生意，暫時音訊全無。另一位 玩具狗，講起佢就記起"最佳損友"呢首歌，Wyman 嘅歌詞好中，寫出咗我地嘅關係。由好朋友變陌路人，當中過程同被人出賣嘅感覺確實唔好受。不過時間可以沖淡一切，早兩年晌 MK 見返佢，佢好熱情咁請我上佢屋企食飯，仲即時打比 狗嫂 話有神秘嘉賓上去坐。老朋友聚舊講下近況，交換其他朋友嘅消息，當晚的確係傾得幾開心，最後仲傾到過晒時要坐的士走。但係跌爛咗嘅玩具始終有瑕疵，永遠都唔會變得返做新買嘅時候!