工作遇「喪C」

無端端比個新同事噴到一面屁...好在我EQ都唔差，唔係開片都似。我只係想補充：你覺得有問題又唔出聲，家陣怪我唔配合你？識得你個幾個月，同你好熟咩，鬼知你想點？另外一個重點係，你又唔係我老細，點解要我配合你，倒不如你先配合呢間公司先啦。低B！

病... 中咗六合彩

起身聲都變埋，請返日病假休息下兼試試做多少少功課。出市集時發覺中咗六合彩五獎，都有幾舊水，lucky！

2011 Happy New Year!

Happy New Year to all of my friends!

Merry X'mas 2010

老闆娘 生日快樂！

「梅艷芳海報集」

在尖沙咀區遍尋不穫的「梅艷芳海報集」，夜半於家中最近的便利店碰上。二話不說，手起錢落，買！

江湖救急

今日歸隱內地嘅 忍者龜 突然傳來短信，原來係為咗江湖救急，可惜我全日被困會議室，愛莫能助！是日晚餐「餐肉雲吞辛辣麵」。

逃獄英雄

今日上到 China office 開會，所以五點半左右已經返到屋企，竟然發現小狗 Hero 自己偷走出籠。咁短時間就學識逃獄，真係估佢唔到！是日晚餐「草菇青瓜炒肉片」。

沖涼用品

因為要買沖涼用品比 Hero，所以返屋企前去 shopping，順便試下間新開嘅"酸辣粉"專門店。味道都唔錯，下次可以再試下佢地嘅蕃薯粉。

玩呀玩呀

老闆娘 同我一樣都要 OT，為爭取時間照顧 Hero，到隔鄰村茶餐廳食過快飯後火速歸家。返到屋企 老闆娘 同 Hero 玩呀玩呀，玩到唔知時間，終於人狗齊齊玩到攰勁打呵欠！XDDD

粟米餐肉金菇蝦子炆米

天朗氣清，終於都打得成波喇！食完個快速下午茶之後返學校傾 layout，傾到成六點幾先放學。返屋企前到附近十蚊店買咗玩具同迷彩狗帶比 Hero，果然帶上後十分型仔。是日晚餐「粟米餐肉金菇蝦子炆米」。

Hero go home

無錯，佢就係當選嘅黑色小狗，今日起將命名為 Hero Lam/林英雄！可能比人救起前曾經被人嚇過，基本上 Hero 好怕陌生人，我地接佢返屋企途中已經兩次驚到賴臭臭。不過佢都幾聰明，返到屋企幫佢抺乾淨個身安頓好之後，唔駛半個鐘已經習慣咗個環境，無再驚同震。一雙藍眼睛加上長期擺出憂鬱嘅眼神，溝死女無難度！XDDD

血染的風采 - 梅艷芳

誰是英雄

今日決定咗收養邊隻狗仔，想知邊個係 my Hero，過多幾日就知喇！

神像無間道

老闆娘 今日返新工, 變咗葵涌工廠妹。呢幾日因為紀念六四攪到好混亂，不過轉兩轉之後, 個"神像"反而提早到達維園, 似唔似玩緊"無間道"?

候選佳麗 No.2 & 3

今日公司部 G5 打柴，好彩重搶救得到，不過就要借屍還魂換另一個殼連底版。放工後到旺角睇候選佳麗二、三號"烏咀狗兄弟"，雖然樣係好得意，但係體質比較差，好擔心會養唔大呀，都係諗清楚先。

蒜泥蒸扇貝

難得抽到時間打波，點知出到球場先落兩，吹漲！快快同波友食個下午茶後返學，傾完功課就歸家去。是日豊富晚餐「愛心藥材湯」+「蒜泥蒸扇貝」+「節瓜炒肉片」。

"朋友號"無電

好耐無見 聾貓拳，一於齊齊出城食個快樂火鍋。坐上 朋友號 出發，即時打電話到"龍成金記"訂定枱同留搶手招牌菜。到步時橫風橫雨，一個箭步入酒家。食飽飽攞 朋友號 時先發現唔記得熄車尾燈，全車無晒電開唔郁。救助於 的士佬 用過江龍都無起色，最後要叫車房出車，返到屋企已經係凌晨。

候選佳麗 No.1

老闆娘 心思思想養一隻小狗代替 Zero 保衛家園，經義工介紹下，放工後到西貢與第一隻候選佳麗會面。黑色小狗剛見面時全身抖震，感覺很怕陌生人。可能曾經被遺棄，所以性格有點怕事，不過相處半小時後已經好安心咁訓到我地身邊，就睇下最後會唔會入選啦！

豉汁排骨油麥菜

日日都出街食，今日決定早返少少歸家食住家飯。是日晚餐「豉汁排骨油麥菜」。