愛回家

因為要應付論文，已經無返老家開飯一段時間，所以今日即時返去報到。

趕趕趕

起身二話不說到書房坐定定做功課，直到 老闆娘 煮好午飯。飯後再戰功課，終於多一百幾十字可以同 Miss 交代。返學前到"馬會藝術中心"參觀朋友嘅展覽，再趕返 HKPU，放學後再返老家食飯。

大瀉天下

鐵人終於倒下，由半夜一直攪肚痛至天光，終於成功駛出一招"大瀉天下"。成晚半夢半醒根本無訓過，所以決定請病假一天抖一抖。外母 知道後專程煮咗一碗"白粥"中午送上門作為我嘅早午餐，乖乖地食完後再繼續以龜速活動。全日食物一於清到底等身體休息一下，是日晚餐「餃子烏冬」。

虎年初二

全日主要都係女家親戚團拜，一條直路由深水埗開始、太子、旺角、途經"潮特"時停一停站、油麻地、最後返外家。晚飯後返到屋企 熊貓拳 率先嚟拜年，齊齊外出食過宵夜之後，就到"熊屋"通宵 Wii 大戰！

虎年初一

大年初一加情人節，可惜心情未平服。今日最大難題係仲應唔應該比"利是"親朋？知詢過長輩認為"利是"可以派，但到處團拜年可免則免...最後決定只派"利是"比親戚及非常要好嘅朋友，並取消新年期間所有家訪。拜年程序跟往年一樣，先到麗晶、再到青衣、最後返老家。路經商場想起今日為情人節，決定買一個 "Bear in snow" 造型嘅情人節蛋榚同成個 董事局 分享！董事長夫人 發功放滿一枱美食，有蝦、有魚、有雞、有菜、有湯、有鮑魚，再加湯圓同我地嘅蛋榚，全家人都大滿足！

阿媽靚湯

好多大陸廠趕收爐，所以有可能提早完成嘅 job 都會做，無形中又日日都要 OT。約咗返老家食飯，六點已經話走，最後七點都走唔到，真正趕到差不多成八點半。 好彩返到去有"阿媽靚湯"平衡一下個人先無咁躁。

八千字論文

今日第二個 module 正式開始，轉咗新 Miss 教。今個 module 要寫八千字嘅論文，第一堂就睇足四個鐘嘅 Powerpoint 同 PDF，睇到人到癲。期間從同學口中得知自己份功課交少咗一部份，即時問有無得補鑊，可惜負責職員放假，要等一日先知...唔得就大件事喇！@_@"

是日晚餐「海鮮炒鮑魚麵」。

伙炭工作室

又係忙碌嘅一日。訓醒覺上一陣網已經成十二點，拿拿聲叫醒 老闆娘 換衫過火炭工廠區，探有份參與"伙炭工作室開放日"嘅朋友仔。期間竟然撞到 力奇夫婦，邪！六點左右到 LCC 出席七十週年紀念活動，之後再趕返幾過星期無見嘅老家開飯。

冬至+聖誕晚餐

成個董事局嘅成員都係忙人，所以夾啱時間就一次慶祝晒兩個節日。今次仲成功游說 董事長夫人，被免咗十個人二十個餸嘅驚嚇場面再現！

酒樓外賣

差不多成個月無返老家開飯，又係時候浦一浦頭。枱上有三碟味道極濃嘅餸菜，董事長夫人 聲稱係隔鄰師奶合力之作... 但我覺得似係酒樓外賣囉，究竟邊個比人呃先？

契媽廚房

雖然自己心情都唔好，但失去多年老伴嘅契媽更需要人關心，所以放工之後趕入青衣晚飯。

味精蒸肉餅

近期少咗返老家開餐，今晚見有時間即時安排啦！隔鄰屋師奶知道我地會出現，好有心咁準備咗一個餸請我地食(就係右下角嘅"味精蒸肉餅")... "好味"到食咗兩啖已經想倒咗佢！

老家九大簋

開學後時間開始唔多夠用，見時間許可，即慶話返老家食飯。返到去都呆一呆，一直話無買餸嘅 董事長夫人，竟然响短短兩個鐘頭內準備咗九味餸菜，面對呢個「九大簋」，真係要拍拍手掌！

外家做節日 - 第二回

今日係開學前最後一場網球，因為撞返學時間之餘，亦唔知將會有幾忙，唯有開咗學再算。夜晚到外家(姑媽)做節，十幾個親友廿幾人嘅份量，飽到你唔識行！(圖為其中一張枱)

月餅禮劵

係時候放低幾張月餅劵俾 董事長夫人 過節兼送禮，當然順便返屋企開餐啦！截至今日為止，連同 老闆娘 暫時共收到十張月餅劵，比預期中多喎！

西來也西去

上星期返老家攞西裝，一時情急攞咗十幾年前最舊果套。雖然尚算啱身，但唔夾婚宴場地，所以今晚要再次努力發掘另一套。食完飯開工，終於搵到最近期果套，重新配搭過另一件恤衫、頜呔，攪掂！

陳年老西

倒數一星期，係時候發掘一年先著一次嘅西裝出衣櫃。咁返得老家，當然順便開埋餐，食完先開始動手發掘。大戰半小時，集齊恤衫、西褲、外套、領呔，閃！

三餸一湯

老闆娘 玩到病，要請假一天响屋企叉電。剛巧 董事長 又放假，約老闆娘 飲完下午茶就入咗飛鷹基地陪 Zero 玩，順便整理一下花園。兩位女士就玩研究煮飯仔，等埋我就齊人開飯。是日晚餐「老火靚湯」+「梅菜蒸豬肉」+「節瓜炆排骨」+ 外購「老水雞翼」。

Home Dinner

腸胃反反覆覆，趁今日公司無咁忙，都係睇一睇醫生。唔記得帶公司醫療咭，最後盛惠三百大洋換七包藥丸。夜晚返老家開飯，唔係...係食上海麵先真，其他餸只可以齋睇。

Home dinner

OT 到成八點，趕緊返老家嘅時候竟然嚟一架無冷氣嘅舊款巴士，唯有頂硬上。落車時如同焗完桑拿，一身濕晒，上到老家見到一枱餸都唔係好想食，最後食兩碗飯就收工。