人間有情

連日收到各方親友以不同形式嘅關懷同慰問，在此要多謝大家嘅關心！雖然事出突然，我地心情亦尚未平服，但既然不幸事情已經發生咗，我地會堅強面對，大家唔駛太擔心！

占士波 大日子

Jenny & James, Happy Wedding!

贈慶...

平日起身開門時，二樓總會聽到 Zero 興奮嘅腳步聲，期待著我地出現... 唔想繼續觸景傷情，決定返學前同 老闆娘 一齊出球場見下朋友透下氣。下午茶後返學校交待功課，放學後再與 老闆娘 會合，直到七點半再分道揚鑣。雖然心情惡劣唔想出席任何喜慶活動，但係與 占士波 相交十多年，最後於 老闆娘 遊說下，決定一個人出席其婚宴。

痛...

仍然記得當發現 Zero 倒地不起時，老闆娘 於身邊一直嚎哭，我同自己講一定要冷靜... 冷靜先可以好好處理 Zero 身後事... 冷靜先可以好好安慰老闆娘... 冷靜到望住冰冷嘅 Zero 都毫無感覺，冷血一樣。直到半夜 Zero 被接走，所有事要決定已經決定、要處理已經處理之後，心就開始痛... 痛得一發不可收拾... 痛得心如刀割... 痛！

Zero 離世了

參觀大陸廠

今日要上大陸廠參觀，整個行程十分輕鬆，變相放咗半日假。十一點先到對方香港 office 參觀，出發前到餐廳食晏，之後該老闆親自揸車上大陸廠，完成後再直接車我到屋企門口，正！老闆娘 要OT，所以今晚決定出街開飯。返到屋企發見 Zero 偷食朱古力粉，真係比佢激到跳起！

百搭麵

尋日為咗睇展覽早收工，所以今晚要 OT 補數。Zero 今日响屋企自己玩大食會，竟然食晒餐枱上面嘅餅乾、小食、茶葉、維他檸檬茶...等等，有無攪錯！激到 老闆娘 打比我話無心機煮飯，需則話無心機，不過碗「百搭麵」都一樣咁 OK 喎！

一地布虎

終於抽到時間，响展期最後幾日到訪朋友仔嘅展覽。打小人用嘅布製"紙老虎"公仔一地多係，估唔到個感覺又幾特別喎！其實幾年前已經擁有一隻，現存公司枱面作闢邪之用，都 OK work 架！XDDD

口齒伶俐

今日收到風話要我代表自己 team 做一個 presentation。要一次過對住幾十人講英文都仲未試過，諗起都已經有啲緊張，希望到時順順利利，口齒伶俐啦！

生日火鍋

重覆上星期動作，一覺訓醒就同 老闆娘 趕返公司將第二份功課埋尾。完成咗一份十五頁嘅 powerpoint 同一張大 board 之後就趕去釘裝，分別係今日無空住個肚返學。放學後約咗 tennis team 火鍋飯局，等咗大半個月，班忙人終於集齊可以替我地慶祝生日喇！力奇 當然唔放過機會，順便派埋張喜帖俾大家啦。

朱古力曲奇

繼續簡而清嘅星期六行程，訓醒、食晏、返公司做功課。不過今次 老闆娘 係一齊到公司，幫手做 powerpoint，我就畫、畫、畫。夜晚買"大家樂"外賣，覺得食物有小小貨不對辨，所以相都費事影低。都係尋晚 老闆娘 自製嘅朱古力曲奇正啲！

企鵝 Zero

食完晚飯之後 老闆娘 又開始玩整餅仔，留响廚房玩到零晨。期間 Zero 陪伴左右，見屋企見天寒地凍，嘗試幫佢著衫保暖。可惜隻衰仔唔領情，擺出一副扮無知嘅可憐樣，之後再扮企鵝... 足足笑咗我地十幾分鐘！

芝麻什菌撈韓國粉絲

放工後留响公司做功課到八點幾，之後趕返屋企食 老闆娘 嘅新煮意。「芝麻什菌撈韓國粉絲」是也！

金沙骨公仔麵

由朝開會開到晚，離開公司已經八點幾，打消咗行街街嘅念頭。返到屋企晚餐已準備好，是日精選為「金沙骨公仔麵」+「煎香草豬肉腸」+「清炒芥蘭菜」。

芋頭炆臘味

小休兩日之後再開始另一份功課，今日就四出報價攞資料。明知得個"報"字唔會真係做，所以報價嘅時候十分唔好意思，覺得自己好似元整古電話咁！是晚 老闆娘 有新嘗試，"芋頭炆臘味"，好味！

三人火鍋

今日上 China office 開會，順便同隔鄰部門主管 阿桑 食歡送飯。夜晚 倉務主管 買定餸入 飛鷹基地，點貨之餘兼同我地攪個"三人火鍋"慶祝生日。

味精蒸肉餅

近期少咗返老家開餐，今晚見有時間即時安排啦！隔鄰屋師奶知道我地會出現，好有心咁準備咗一個餸請我地食(就係右下角嘅"味精蒸肉餅")... "好味"到食咗兩啖已經想倒咗佢！

終於完成

一覺訓醒就同 老闆娘 趕返公司將份功課埋尾，趕呀趕呀，完成咗一份四十頁嘅 powerpoint 同一張大 board 之後就趕去釘裝，跟手空住個肚飛返學校。放學後第一時間約 老闆娘 食個 tea 叉一叉電，夜晚就出席 特警馬克 替我地慶祝嘅生日飯。

齊齊趕功課

全日行程簡而清，訓醒、食晏、返公司做功課。黃昏時段 老闆娘 到公司打氣兼幫手，夜晚齊齊買"大食代"外賣又一餐。

黑色星期五

黑色星期五可以做乜？做功課囉！後日就要交第一份完整嘅功課，做落先知比意料中難處理，連累到 老闆娘 等我等到差不多十一點先有飯開...