JimmyPlayground

2009年2月5日星期四

己丑牛年初十一

今晚輪到同高豬食飯，地點係街市樓上嘅熟食中心，即係以前啲大排檔。整體味道 ok 啦，但係碟燒味拼盤真係無野好講，味道唔錯之餘仲勁抵食，圖中所見有半邊雞、半邊鵝、再加其他都只係$98... 我地懷疑個師傅中咗馬仔囉。

2009年2月4日星期三

己丑牛年初十

原本約咗一班新舊同事團拜，但係有部份臨時放飛機，所以擇日重賽。老闆娘即時改 plan 返屋企煮飯，是日晚餐係「豬肉碎炆豆腐」+「清炒白菜」。

2009年2月3日星期二

己丑牛年初九

正式開工喇！由於好多廠未開，美個又無乜新野到，全日比意料中清閒。响公司最忙都應該係派利是段時間，話晒新婚後第一次派，當然要主動出擊四維走啦！不過下年各位同事就自動自覺搵我喇~ XDDD。夜晚上咗師姐屋企拜年兼開飯，因為太耐無見，老闆娘傾到唔捨得走，返到飛鷹基地已經十二點幾喇。

2009年2月2日星期一

己丑牛年初八

因為要帶 Zero 睇醫生，所以老闆娘今日請咗假。放低 Zero 响動物診所之後，就出城去拜年，目的地同樣係一間診所，都幾搞笑！由於想買多個 portable harddisk，去黃金行咗轉，順便去食我喜愛嘅「豬油渣麵」。食飽飽之後就趕返去接隻衰仔返屋企。

2009年2月1日星期日

己丑牛年初七

牛年第一個星期日，當然要打返場開年波，兼到球場派利是啦！打完波食完 tea 入咗西田行街街，順便買新年禮物。夜晚就約埋大海去食 Ruby Tuesday 嘅 Steak 同 Tallcake。

2009年1月31日星期六

己丑牛年初六

今日輪到契媽家訪，所以一早起身打掃好地方，準備招呼貴賓。原先打算嚟個下午茶 BBQ，但契媽唔想我地麻煩，最後坐咗一粒鐘就拉大隊揸車出去食晏。家訪比預料中早完結，臨時決定去街市買餸玩煮飯仔。是日晚餐係「咖哩金菇肥牛炒烏冬」。

2009年1月30日星期五

己丑牛年初五

上晝一個人响屋企輕輕鬆鬆做下家務，之後同聾貓權到中大搵奇異果飲午茶。近黃昏時候上咗"潮特"掃場派利是，夜晚就約咗大佬夫婦食飯兼拜年，仲收到一份好靚嘅入伙禮物，正！

話說今日坐巴士到旺角期間，車程中見到一個不明發光物體响天空。大約五點左右，巴士駛至九龍塘，天朗氣清，天空清楚見到淡白色嘅月亮同右邊一粒好光嘅星。當時我一面聽MP3一邊望𥦬睇風景，忽然發現多咗一粒好光好光嘅物體，好似一個大光燈咁掛响天上另一面。我望住個光點最少十至二十秒，光點完全無移動過。心諗唔會係日光日白見到 UFO 掛，可能只係一粒泛黃光嘅星星呢？所以我望返另一面嘅月亮同星星想作比較，但係再回頭已經唔見咗個光物體... Well，我唔敢講佢一定係 Unidentified Flying Object，唯一可以肯定係，原來自己見到時，唔係想像中咁雀躍同興奮囉！

2009年1月29日星期四

己丑牛年初四

公眾假期完畢，老闆娘一早起身返工，而我就繼續公司額外三日嘅新年假期。訓醒開電腦上 MSN，見到一班久違咗嘅朋友，齊齊拜個年。下晝約咗任先生食 tea，之後上佢新工作室參觀。夜晚就集齊成個董事局成員，六大一細，上咗契公屋企食開年飯。卓言仔見到外藉"太公"一啲都唔驚，仲識得自己轉講英文，果然係聰明仔！今晚見到契公非常開心，原來間屋已經好幾年未試個咁熱鬧，所以為咗招呼我地一家，重開咗個飯廳。既然老人家咁開心，出年一於再嚟過！

2009年1月28日星期三

己丑牛年初三

今日訓醒先到外母屋企拜年兼食午飯，之後就返屋企準備，等董事長夫婦同二少爺一家入嚟拜年。卓言仔帶咗兩件狗玩具送比兩隻衰仔，開心到 Zero 全晚不停四圍走。應大家要求，時晚菜色係私房火鍋+中文版"花鼠俱樂部"。當食到七七八八嘅時候，又收到聾貓權電話約睇戲，火速收拾好地方，司機已經駛到門口。由於趕開場，上車、落車、到便利店、入戲院、笑、笑、笑、再上車、返到屋企，前後兩個鐘同司機都傾唔夠三十句，勁！

家有囍事 2009

樂也融融的余宅一家四口，父親余春、母親 Selina、長女余珠及幼男余寶。寶一向愛情至上，但因「長女未嫁，弟妹不能嫁娶，否則多災多難」的家規，所以情路上一直不能開花結果，而偏偏珠卻是推祟「單身」及「女人不一定要結婚」的寫作界女強人。為此，寶聘請專門解決愛情問題的愛情治療師曹廸克進入珠的出版社工作，以其專業技巧令珠一顆枯萎已久的芳心再次茂盛起來。因為曹出現，珠在72小時內由兇惡無比變成嘴角含春，決跑到千島湖見愛郎一面。珠發現曹正在追求小敏，妒意一發決定跟蹤，因而遇上在私家偵探 L。珠霸道倔強，L 則談吐斯文，但珠每每被 L 折服只能留在身後當小女人。單純的敏如何令曹明白愛情真諦? 天意如何作弄寶及哨牙珍? L 究竟是何許人? 珠最後芳心誰屬?一切一切讓觀眾笑着尋找答案...

*片名雖為"家有囍事 2009"，但卡士不能與當年同日而語。內容笑料不至於令人"爆笑"，整體總算合格，加上眾多"串"星，新年期間可以一看。

2009年1月27日星期二

己丑牛年初二

年初二繼續九龍一日遊，第一站係到深水埗食開年盤菜。之後沿地鐵，以步行方式一區一戶，到訪太子、旺角、油麻地。原本尾站係入藍田，不過太遠喇，改為應熊貓權之約，返暴力熊之家食 Pizza 同睇 DVD。是晚大電影係「史力加 3」。

2009年1月26日星期一

己丑牛年初一

大年初一訓醒覺裝好身之後，先向青衣出發。逗留半個鐘就趕返老家同董事長夫婦拜年，兼食開年午飯。今日嘅餸比平時多一倍有多，六大一細要應付九個餸菜，結果當然係"年年有餘"啦，邊可能一次過食得晒。飯後小休再到九龍灣，嚟多一轉餐榚點下午茶。要拜年嘅地方實在太多，下一站九龍塘，逗留一粒鐘之後再到九龍城晚飯。途中收到熊貓權電話，約定時間順路車埋我地返屋企。最後再加一個特備節目，就係十點過後熊貓權&奇異果帶同湯丸上門拜年，老闆娘出手再煮一客糖水宴客... 今年初一實在太"滿足"喇！