五一勞動日

五一假期，倉務主管 一早到飛鷹基地勞動一下補一補貨。由於實在太早，補貨後齊齊到茶餐廳食個早餐，但係返到屋企 老闆娘 依然未起身，勁！做下家務做下功課又一日，是日清淡晚餐「南瓜肉碎粥」。

病假變加班

想起今日有 full day training，唯有取消病假返工去。 九點開始上半節，中場休息時，無端端由老細請食貴價壽司，不過要趕下半節 training，食得唔夠暢快。完埋下半節後繼續開會，成七點先正式開始做 daily jobs，最後成十點先收工，咁當然係公司俾錢飛的士返屋企啦！

焗金沙骨飯

病假一天，聽話訓到成十一點幾...不過起身後就唔聽話開始做功課，如果唔係一定趕唔切。是日午餐為老闆娘準備嘅「焗金沙骨飯」。

雙色苦茶

老闆娘 今日請假去見工，下畫襯空檔約埋我同 董事長夫人 見下新家庭醫生 盧中醫 調理一下。醫師話基本上兩個都無乜大問題，我就只係平日無足夠休息所以積勞成病。一口氣比我兩日假，唔該乖乖休息。夜晚叫埋 董事長 齊齊晚飯，之後返到屋企再煲苦茶飲。

雜丸公仔麵

身體好返七八成，不過唔敢亂食嘢。午餐自備「茄子肉絲飯」，晚餐「雜丸公仔麵」。又話財多身子弱，咁我應該好強壯先係架！

大碗細碗

因為上星期只返得三日工，全日忙到傻。同 老闆娘 各自 OT 完後一齊食晚飯，平時我食大碗佢食細碗、我食酸辣佢食清湯，今日剛剛相反，哈哈！

南瓜肉碎粥

論文死線倒數兩星期，Miss 突然出招請病假，即是變相遲一個星期交功課。令到各位做到半死嘅同學可以透一透氣，Miss 萬歲！是日晚餐「南瓜肉碎粥」+「叉燒腸粉」。

面青口唇白

訓醒覺同 老闆娘 過隔離村食午飯，之後閉關長留書房做功課。大約四個鐘之後出關到廚房飲水，換來一個驚訝表情...原來我當時面青口唇白，嚇得佢即時下令停做功課。坐到晚飯時間時情況更差，完全無胃口兼頭痛，最後一枱美食只係食咗兩啖麵就上床訓。

積神走人

久病初癒，本應取消 China office 之旅，不過舊助手 積神 搵到主好人家離別在即，點都要親自 farewell 一下。此終唔係自己地頭，埋單時爭輸咗！不過佢新工新居都好近福田，將來想約見面都唔係大問題，所以下餐我嘅！

絕望真相 An Inconvenient Truth

公司為提倡環保，午飯時間响大會議室免費播放電影"絕望真相(An Inconvenient Truth)"之外，更準備「煙肉生菜番茄三文治」比所有參加同事，讚！希望各位同事唔好睇完就算，環保要身體力行呀！

消假返工

由於今個月已經請咗幾日病假，所以見起身無頭暈就消假返工，唔係之後一樣忙死。始終用電腦長少少時間就會唔舒服，所以做下停下，節奏比平時慢一半。全日主要食物依然係「愛心白粥」。

愛心白粥

醫生比咗兩日病假，訓到成十二點先起身。嘗試分段睇書同用電腦，

但係十五分鐘左右就會頭暈，所以都係聽醫生話暫時放低份功課。老闆娘 怕我無胃口同亂食野，返工前煮定一大鍋「愛心白粥」，食足一日。

又暈又嘔又去飲

終於做功課做到出事，朝早開完會已經覺得頭暈暈唔係好舒服。午飯時間連飯都食唔落，一直伏响枱唔敢亂郁。直至有個大陸同事不斷電話騷擾，由於太勞氣，真氣一動嘔吐大作。公司當然好緊張，著我坐定回一回氣即時收工去睇醫生。期間 老闆娘 同 董事長夫人 收到風，嚷住要到診所同我見醫生，攪到好似好大件事。最後 張醫生 話因為感冒加上唔夠休息導至耳水不平衡，最快回復方法係打針，另外嚴禁長期對住電腦同做功課最少三日。但今晚撞正 表妹 結婚，全家人一致通過話唔去飲陪我返屋企。嘩嘩嘩！ 咁除時比人怨一世喎，唯有死頂扮無事，堅持到場坐一陣先走... 最後人在江湖坐到幾乎完場，仲要以一隻金牛兩條魚嘅代價，換來全晚麵包半磅。@_@"

粟米肉鬆薯容

唔想將浪費交通時間，決定唔返學留响書房趕功課。全日足不出戶，由朝到晚睇住部 iMac，終於睇到頭昏腦脹。是日晚餐「粟米肉鬆薯容」+「自家撈海蜇」。

青魚伴日式冷麵

訓醒覺同 老闆娘 過隔離村食宴，之後又係訓身留屋企做功課。是日晚餐「青魚伴日式冷麵」。

玩狗城一遊

做功課做到無朋友兼斷六親，剛巧今日有嘢要同 闊少 交收，齊齊到"玩狗城"行咗個轉，終於叫做見過吓人。

冬菇馬蹄炆排骨飯

休息一日之後精神咗少少，自覺唔駛介口，所以自備 老闆娘 嘅愛心飯盒「冬菇馬蹄炆排骨飯」。不過食咗藥個人始終會慢半拍，所以覆 email 都平時慢三成，唔 OT 都唔得。

芒果盛開

乖乖聽醫生話，一覺訓到十二點先起身做功課。比 聾貓拳 發現我無返工無飯開，專程車我到哥爾夫球場附近食個晏，真係上等人嘅生活。返到屋企見到盛開嘅芒果樹，忍唔住又影咗幾張相，遲少少會一次過放上 FB，有興趣可以上去眅眅。

又要睇醫生

病程繼續惡化，喉痛加鼻水，決定再睇多次 張醫生。診斷結果係上次嘅病醫好咗，但係感染咗另一種流感，建議聽日病假一天好好休息，同埋今次一定要食抗生素。是日午餐「銀牙豆干肉絲飯」。

愛莫能助

病程開始惡化，放工後打算去食粥清清腸胃。記起橫街有間隱藏粥店，到步時竟然巧遇年幾無見嘅 蘋果電腦，真係有緣千里能相會。知道佢幫緊一個過氣 吹水主筆 打工，但係待遇麻麻，可惜呢個時勢我都愛莫能助。即時可以做到就只有請佢食餐飯，希望佢明天會更好啦！

切片咸豬手

訓醒覺 老闆娘 自己煮早餐，之後幫芒果樹影咗輯相，大家遲啲上 FB 睇啦。開波做功課到四點左右出發返學。今日返到去仲好多同學，原來大家都進度唔理想，所以個個都唔願走狂問 Miss 問題。八點返到屋企又開飯，是日晚餐「上湯菜切片咸豬手」。

洋蔥雞翼

訓醒覺同 老闆娘 出街市食晏兼買餸，之後佢做家務、我做功課，各有各忙。唔覺唔覺就到開飯時候，睇一陣電視又到十一點，再上一陣網咁又一日。是日晚餐「洋蔥雞翼」+「清炒菜心」+「十穀飯」。

一日一麵

乖乖聽話訓到成十點先起身，check 公司 email 時知道有 PK 扮好人為名、攪亂檔為實，只好親身交帶好其他人 backup。一輪 email 同電話來往之後已經成點鐘，無計，自己唔跟返就比人趁亂抽水！食塊餅送藥就開波做功課，直到七點幾知道 老闆娘 要 OT 好夜返，再煮多個麵當晚餐，that's all！

感冒菌入腸

感冒好似嚴重咗，放工時決定去成年無見嘅 張醫生 度睇一睇。答案係長期唔夠休息加感冒菌入腸胃，病假一日，唔該聽日乖乖留响屋企。是日午餐「鮮茄鴛鴦腸仔飯」。

超甜杯榚

又要返工喇，感覺好似無放過假一樣。成九點先收工，搵間茶餐廳快快食完就返屋企。返到去未夠喉，再 KO 埋兩個 Cupcake 做甜品，不過甜過頭有少少失望。

論文回歸

最後一日復活節假期，回歸論文功課嘅懷抱。中午被魔鬼誘惑，到舊墟据咗個扒，擔擱咗少少做功課嘅時間。是日晚餐「甘荀椰菜肉鬆」+「混合白米飯」。

練奶格仔餅

今日要上山掃同見下班契親戚，功課迫於無奈休息一天。雖然由太子、旺角、樂富、銅鑼灣一路無停行程緊密，但晚飯前仍成功抽空同 二少夫婦 去 shopping，老闆娘 繼續成為大贏家。其後返俱樂部會合 董事長夫婦 同玩到落湯雞一樣嘅 卓言仔，集齊 董事局成員 同 Uncle Ken 食埋晚飯先散場。返到屋企附近車仔檔見到罕有嘅"練奶格仔餅"，一時口痕又多兩樣宵夜。XDDD

搶頭啖湯

功課尚未完成，但要返學校比 Miss 睇睇個進度，焗住要出街。放學後順道同 高豬 慶祝生日，响旺角"萬發食館"食小菜。食完去咗買"Cup Cake"，臨坐車走前再到"廟街"食糖水。之後竟然意悠未盡，搶咗 聾貓權 嘅頭啖湯，上咗 飛鷹基地 Ｗii 大戰到成點鐘。

老闆娘曲奇

可以連續兩日咁做功課進度真係會好啲，全日主要留連响書房，無出過街！今日三餐由 老闆娘 包辦，下晝空閒時佢一個人玩整曲奇餅，咪睇個樣好似燶燶地，其實軟硬剛剛好，熱食時最好味道！是日午餐「什丸撈蝦子麵」，晚餐「冬菇羅白炆排骨」。

We Wii Fit

復活節假期正式開始，亦即係全力趕功課嘅時候。為免 老闆娘 一個人响屋企發牛斗，今日冒往大風大雨，行出廣場買入咁大個仔第一部嘅電視遊戲機套裝 - Wii Resort & Wil Fit 是也！可以日日做運動，咁就唔怕佢悶親啦！是日晚餐「銀牙肉絲炒公仔麵」。

愚人節

等 老闆娘 放工等到發炆憎，決定落街邊行邊等。剛巧一出電梯大堂就撞見年幾無見面嘅 狗夫婦，仲閒談咗十幾分鐘。世事就係咁奇妙，上星期先發現遺失佢地嘅聯絡電話，今日就無端端撞倒兼 add 埋 FB，邪！終於等到 老闆娘 放工，但係已經成十一點，所以飯都唔食直接返屋企。途中突然記起今日係"愚人節"，唔怪之得要等咁耐啦！

免費自助餐

傳聞今年高層各分花紅分到笑，所以今日請晒全個部門去酒店食自助午餐，當復活節禮物。一個鐘當然唔夠時間食，高層默許之下，由十二點半食到成兩點幾先返公司。

痴痴呆呆

因為要趕復活節假期前放晒啲稿出街，OT 到痴痴呆呆，成九點幾先收工。望住啲功課都唔知自己想點，好似無做過咁！@_@"

金菇南瓜十穀飯

是日午餐「金菇南瓜十穀飯」。

逃學威蟲

因為功課進度不大，唔想浪費車錢同坐車時間，今日決定做逃學威蟲！Send 個 email 通知 Miss 之後，索性陪 老闆娘 出街市買餸兼食晏。返到屋企就開始閉關，直到煮好晚飯先出現。是日晚餐「薯仔炆雞翼燴什通粉」。

首煎倉魚

又係起身就開始做功課，但愈心急進度就愈慢... 開始做到心煩氣燥！直到夜晚為支持"地球一小時"，熄燈熄電腦一個鐘，停一停出街抖下氣。返到屋企 老闆娘 以極速煮好晚飯，今晚有「青瓜雲耳炒金菇豆卜」、「十穀飯」，同佢第一次試做嘅「煎倉魚」、「羅漢果豬𦟌湯」。

Light Up Your Dreams - 林一峰

曲/詞/編/監/主唱: 林一峰

藏於天空每點星光
仍有待浮現
褪掉白晝每分喧嘩
來　齊看夜還完

漁村星火撒於淺灘
鱗光水裡閃
腳步慢了萬里漆黑
銀河　終於可見

Lai lai lai lai
Lai lai lai lai
Light up your dreams
閉起雙眼
用心看一看你面前
留於心中半點燭光
陪我抱你入眠

Lai lai lai lai
Lai lai lai lai
Light up your dreams
閉起雙眼
用心看一看你面前
Lai lai lai lai
Lai lai lai lai
Light up your dreams
閉起雙眼
認真看一看這樂園

留於心中半點燭光
陪我抱你入眠
甦醒於恬靜
呼吸一線曙光
吻你的臉

Jimmy's Kitchen

今日係外婆骨灰上位嘅日子，公司特許放假一天。兩點鐘趕到"省善真堂"，經過一輪法事之後，從此 外婆 就成為咗 梅姐 嘅鄰居。完事後 董事長 趕返工，董事長夫人 又話攰要返屋企休息，剩返我同 二少一家 去食下午茶。之後返屋企邊做功課邊等 老闆娘 放工，由於等得太夜唔想再出街，最後決定親自下廚。是日 Jimmy's Kitchen 餐單係「三色餃拼娃娃菜」+「腸仔炒一丁」。

死黨飯局

今晚係久違咗嘅死黨飯局，闊少、力奇同我各自冷落另一半，同 Ah E 一行四人飯聚三個半鐘。近排比份論文迫咗埋場，今晚可以抖抖氣。地點係尖咀"Pizza Express"，食物水準同環境都唔錯，嘻嘻哈哈就坐到餐廳打烊。飯後同 闊少 慢步到佐敦坐車，傾多陣計之餘，最緊要係等近期缺少運動嘅我可以齊齊減下肥。

露天餐廳

有部份舊同事 老闆娘 好耐無見過面，所以今日約咗 八掛公、沙莉...等，齊齊到露天餐廳食晏。是日風和日麗，吸收完太陽能，下畫响公司時都精神啲！

蕃茄腸仔炒蛋

基本上 老闆娘 每晚都要 OT，今晚當然唔例外。接放工後落到大街，大家不約而同都想早少少返屋企。無問題，就返屋企玩煮飯仔啦。是日晚餐係「蕃茄腸仔炒蛋」+「福米一丁」。

蘇生之秘密

約咗久違嘅 蘇生 食晏，閒談間發現咗一個誤傳幾年嘅秘密，聽返都幾好笑。

功課做做做

訓醒之後睇睇睇、做做做，希望盡最後努力返學有多啲功課交。午飯屋企煮飯仔，之後整理一下資料就飛返學校。同 Miss 傾功課傾到過晒鐘，佢話大部份同學都 behind schedule，擔心大家會趕唔到 deadline。其實唔只佢，我地自己都擔心啦！之後入咗 二少 屋企食晚飯，打陣機傾陣計，返到屋企又幾乎十二點。

繼續生日飯

今日 倉務主管 突然殺到，雖則以佢個人之力輕易磁場轉動個倉，但間唔時同我報告情況總會令我分心，功課進度再一次被阻。因利成便，完成後順道同佢据個扒預祝生日。返到屋企乜都無做過又話要趕出太子同 外母婆婆 慶祝生日，點知趕到出去又係要呆等... 咁又無咗幾個鐘喇！

公司派糖

公司今日派成績表，雖然只係分到粒糖，不過都粗粗地夠睇戲食飯嘅。有同事怨聲載道，認為加得少。其實係佢地期望過高啫...根本無預計會加得多，無期望就無失望。原先打算食餐好慶祝下，點知 老闆娘 成十點幾先收工，最後都係返屋企煮飯仔。

保險飯局

今晚約咗 保險B 食飯，聚一聚之餘，順便 review 下張保單有無細節需要加減。順帶一提，晚飯嘅尖咀"星加坡餐廳"，食物質數真係每況愈下，幾乎食到一半想停口。

參觀新公司

今日機緣巧合，放工後到 老闆娘 新公司參觀咗一陣。地方同我公司差不多大，不過密度比較低，間隔比較開揚。之後出街食完飯，返到屋企口痕痕，所以煮多個湯圓做宵夜。

屋村爆水管

半夜準備沖涼嘅時候發現無乜水出，即時到廚房留定一湯煲水尾，至少可以洗過面。最後證實條村又爆水管，好彩天氣唔太熱，免強唔沖一晚涼還可以。

玉子豆腐蛋炒飯

兩個都仲好似有少少唔舒服，一定係交叉感染。午飯無出街食，自備 老闆娘 嘅「玉子豆腐蛋炒飯」。夜晚都係清清地食上海麵，臨返屋企再行陣街街，老闆娘 再多一對波鞋戰利品。

趕趕趕

起身二話不說到書房坐定定做功課，直到 老闆娘 煮好午飯。飯後再戰功課，終於多一百幾十字可以同 Miss 交代。返學前到"馬會藝術中心"參觀朋友嘅展覽，再趕返 HKPU，放學後再返老家食飯。

頭昏腦脹

再一次閉關失敗。十一點左右起身，做少少家務、外出食晏、到超級市場辦貨，返到屋企認真坐低都已經成四點。打後幾個鐘一枱資料，一"Mon"資訊。左一堆、右一堆睇到頭昏腦脹，打唔通任督二脈。趁晚飯期間鬆一鬆，睇"竊聽風雲"送飯，套戲都唔錯。是日晚餐「蕃茄雪菜肉絲」，好味道！

大瀉天下

鐵人終於倒下，由半夜一直攪肚痛至天光，終於成功駛出一招"大瀉天下"。成晚半夢半醒根本無訓過，所以決定請病假一天抖一抖。外母 知道後專程煮咗一碗"白粥"中午送上門作為我嘅早午餐，乖乖地食完後再繼續以龜速活動。全日食物一於清到底等身體休息一下，是日晚餐「餃子烏冬」。

無事出街小破財

終於今日收工時間唔一樣，放工時要夾時間先可以齊齊走。返到屋企煮飯實在太夜，都係出街食方便。路過久違嘅"公和"，咁就呢度開餐啦。平日收工好少行街，呢幾日不停咁四圍行，老闆娘 終於開齋買咗個手袋。

忽冷忽熱

今日開始各自出門口，放工都有等埋一齊走。不過天氣忽冷忽熱，攪到個人好似有少少作病咁，所以晚餐清清地食港式粉麵就算："三寶河"+"油菜"+"淨雲吞"。

各自各返工

第二日齊齊出門口，目標係我可以準時返到公司，但結果趕到 老闆娘 氣都咳。最後決定聽日開始各自各返工，咁就唔怕將來會因為返工時間而嘈交。收工後約埋行咗一陣街，食埋"譚仔米線"就返歸。

返新工！

返新工喇！不過唔係我，係 老闆娘。新工作地點好近我公司，就响同一座商業大廈，所以今日齊齊出門口。開工時間相差半個鐘，結果佢早到我遲到。收工時間基本上都唔同，不過第一日大家都要 OT，當然約埋齊齊走啦！到 K11 行咗個圈，再搵咗間餐廳仔醫肚，之後就返歸喇！

金沙角大排檔

起身後繼續努力，可惜只得些微進展。下畫返 HKPU 同 Miss 傾功課，放學後約咗大忙人 大編輯夫婦 到沙角大排檔聚一聚。呢餐飯由聖誕約到新年足足三個幾月先成事，約到我都想放棄。講返呢個大排檔嘅食物同價錢 OK，環境又夠晒草根，已經約定下次同一地點再聚，希望呢次唔駛等三個月啦下！XDD

海盜王寶藏

因為八千字論文進度緩慢，原先打算今日閉關趕工，可惜 倉務主管 忽然有假放，所以只好抽半日時間齊齊尋寶。最終成功尋獲兩大袋絕版"海盜王"，睇下呢袋寶藏又值幾多錢啦！是日晚餐「西芹豬扒會通粉」。

闊少 生日快樂！

大個仔喇，祝你今年 萬事如意、身體健康！
記得要做好"男朋友"呢份工呀！^_^

闊少 生日飯局

由於 闊少 正日要過二人世界，所以提早一日慶祝。星期五晚嘅CWB人山人海，"泉章居"訂咗位都要等到九點幾先有位坐。今晚蝗蟲步隊齊章，一輪狂風掃落葉，十點幾已經清咗枱。跟手有人提議食甜品，一行十一人轉戰"五代同糖"。一如過住，如果飯後有下文就由壽星仔萬歲，而牆上"流行榜"剛剛好十一款，有人豪指一下照榜落單，最後... 在此真係要代各位講一次多謝晒！

K仔生日飯

又係三月排隊慶生辰嘅時候，第一位係 姨仔K，生日飯由 老闆娘 操刀。簡簡單單「豆卜炆排骨」+「 炒芥蘭」+「炒飯」，重頭戲係响酒店買嘅"北海道雜果蛋糕"。

即慶大排檔

臨近收工時間 熊貓拳 有電話到約食飯，同 老闆娘 商議過都無乜所謂，橫豎大家都要 OT。八點幾港鐵會合之後，向大排檔出發。

新派老餐廳

差不多收工時間，收到 熊貓拳 電話通知"朋友號"會路過附近，有無興趣坐順風車？有司機接送喎，即時熄機走人啦。去到粉嶺落車，人生路不熟，隨便搵咗一間自稱六五年開業，但係全間新派裝修嘅餐廳開飯。

老家開飯

今日工作唔算太忙，爭取時間返老家開飯，唔係一趕功課隨時幾個星期無得返。