老闆娘曲奇

可以連續兩日咁做功課進度真係會好啲，全日主要留連响書房，無出過街！今日三餐由 老闆娘 包辦，下晝空閒時佢一個人玩整曲奇餅，咪睇個樣好似燶燶地，其實軟硬剛剛好，熱食時最好味道！是日午餐「什丸撈蝦子麵」，晚餐「冬菇羅白炆排骨」。

We Wii Fit

復活節假期正式開始，亦即係全力趕功課嘅時候。為免 老闆娘 一個人响屋企發牛斗，今日冒往大風大雨，行出廣場買入咁大個仔第一部嘅電視遊戲機套裝 - Wii Resort & Wil Fit 是也！可以日日做運動，咁就唔怕佢悶親啦！是日晚餐「銀牙肉絲炒公仔麵」。

愚人節

等 老闆娘 放工等到發炆憎，決定落街邊行邊等。剛巧一出電梯大堂就撞見年幾無見面嘅 狗夫婦，仲閒談咗十幾分鐘。世事就係咁奇妙，上星期先發現遺失佢地嘅聯絡電話，今日就無端端撞倒兼 add 埋 FB，邪！終於等到 老闆娘 放工，但係已經成十一點，所以飯都唔食直接返屋企。途中突然記起今日係"愚人節"，唔怪之得要等咁耐啦！

免費自助餐

傳聞今年高層各分花紅分到笑，所以今日請晒全個部門去酒店食自助午餐，當復活節禮物。一個鐘當然唔夠時間食，高層默許之下，由十二點半食到成兩點幾先返公司。

痴痴呆呆

因為要趕復活節假期前放晒啲稿出街，OT 到痴痴呆呆，成九點幾先收工。望住啲功課都唔知自己想點，好似無做過咁！@_@"

金菇南瓜十穀飯

是日午餐「金菇南瓜十穀飯」。

逃學威蟲

因為功課進度不大，唔想浪費車錢同坐車時間，今日決定做逃學威蟲！Send 個 email 通知 Miss 之後，索性陪 老闆娘 出街市買餸兼食晏。返到屋企就開始閉關，直到煮好晚飯先出現。是日晚餐「薯仔炆雞翼燴什通粉」。

首煎倉魚

又係起身就開始做功課，但愈心急進度就愈慢... 開始做到心煩氣燥！直到夜晚為支持"地球一小時"，熄燈熄電腦一個鐘，停一停出街抖下氣。返到屋企 老闆娘 以極速煮好晚飯，今晚有「青瓜雲耳炒金菇豆卜」、「十穀飯」，同佢第一次試做嘅「煎倉魚」、「羅漢果豬𦟌湯」。

Light Up Your Dreams - 林一峰

曲/詞/編/監/主唱: 林一峰

藏於天空每點星光
仍有待浮現
褪掉白晝每分喧嘩
來　齊看夜還完

漁村星火撒於淺灘
鱗光水裡閃
腳步慢了萬里漆黑
銀河　終於可見

Lai lai lai lai
Lai lai lai lai
Light up your dreams
閉起雙眼
用心看一看你面前
留於心中半點燭光
陪我抱你入眠

Lai lai lai lai
Lai lai lai lai
Light up your dreams
閉起雙眼
用心看一看你面前
Lai lai lai lai
Lai lai lai lai
Light up your dreams
閉起雙眼
認真看一看這樂園

留於心中半點燭光
陪我抱你入眠
甦醒於恬靜
呼吸一線曙光
吻你的臉

Jimmy's Kitchen

今日係外婆骨灰上位嘅日子，公司特許放假一天。兩點鐘趕到"省善真堂"，經過一輪法事之後，從此 外婆 就成為咗 梅姐 嘅鄰居。完事後 董事長 趕返工，董事長夫人 又話攰要返屋企休息，剩返我同 二少一家 去食下午茶。之後返屋企邊做功課邊等 老闆娘 放工，由於等得太夜唔想再出街，最後決定親自下廚。是日 Jimmy's Kitchen 餐單係「三色餃拼娃娃菜」+「腸仔炒一丁」。

死黨飯局

今晚係久違咗嘅死黨飯局，闊少、力奇同我各自冷落另一半，同 Ah E 一行四人飯聚三個半鐘。近排比份論文迫咗埋場，今晚可以抖抖氣。地點係尖咀"Pizza Express"，食物水準同環境都唔錯，嘻嘻哈哈就坐到餐廳打烊。飯後同 闊少 慢步到佐敦坐車，傾多陣計之餘，最緊要係等近期缺少運動嘅我可以齊齊減下肥。

露天餐廳

有部份舊同事 老闆娘 好耐無見過面，所以今日約咗 八掛公、沙莉...等，齊齊到露天餐廳食晏。是日風和日麗，吸收完太陽能，下畫响公司時都精神啲！

蕃茄腸仔炒蛋

基本上 老闆娘 每晚都要 OT，今晚當然唔例外。接放工後落到大街，大家不約而同都想早少少返屋企。無問題，就返屋企玩煮飯仔啦。是日晚餐係「蕃茄腸仔炒蛋」+「福米一丁」。

蘇生之秘密

約咗久違嘅 蘇生 食晏，閒談間發現咗一個誤傳幾年嘅秘密，聽返都幾好笑。

功課做做做

訓醒之後睇睇睇、做做做，希望盡最後努力返學有多啲功課交。午飯屋企煮飯仔，之後整理一下資料就飛返學校。同 Miss 傾功課傾到過晒鐘，佢話大部份同學都 behind schedule，擔心大家會趕唔到 deadline。其實唔只佢，我地自己都擔心啦！之後入咗 二少 屋企食晚飯，打陣機傾陣計，返到屋企又幾乎十二點。

繼續生日飯

今日 倉務主管 突然殺到，雖則以佢個人之力輕易磁場轉動個倉，但間唔時同我報告情況總會令我分心，功課進度再一次被阻。因利成便，完成後順道同佢据個扒預祝生日。返到屋企乜都無做過又話要趕出太子同 外母婆婆 慶祝生日，點知趕到出去又係要呆等... 咁又無咗幾個鐘喇！

公司派糖

公司今日派成績表，雖然只係分到粒糖，不過都粗粗地夠睇戲食飯嘅。有同事怨聲載道，認為加得少。其實係佢地期望過高啫...根本無預計會加得多，無期望就無失望。原先打算食餐好慶祝下，點知 老闆娘 成十點幾先收工，最後都係返屋企煮飯仔。

保險飯局

今晚約咗 保險B 食飯，聚一聚之餘，順便 review 下張保單有無細節需要加減。順帶一提，晚飯嘅尖咀"星加坡餐廳"，食物質數真係每況愈下，幾乎食到一半想停口。

參觀新公司

今日機緣巧合，放工後到 老闆娘 新公司參觀咗一陣。地方同我公司差不多大，不過密度比較低，間隔比較開揚。之後出街食完飯，返到屋企口痕痕，所以煮多個湯圓做宵夜。

屋村爆水管

半夜準備沖涼嘅時候發現無乜水出，即時到廚房留定一湯煲水尾，至少可以洗過面。最後證實條村又爆水管，好彩天氣唔太熱，免強唔沖一晚涼還可以。

玉子豆腐蛋炒飯

兩個都仲好似有少少唔舒服，一定係交叉感染。午飯無出街食，自備 老闆娘 嘅「玉子豆腐蛋炒飯」。夜晚都係清清地食上海麵，臨返屋企再行陣街街，老闆娘 再多一對波鞋戰利品。

趕趕趕

起身二話不說到書房坐定定做功課，直到 老闆娘 煮好午飯。飯後再戰功課，終於多一百幾十字可以同 Miss 交代。返學前到"馬會藝術中心"參觀朋友嘅展覽，再趕返 HKPU，放學後再返老家食飯。

頭昏腦脹

再一次閉關失敗。十一點左右起身，做少少家務、外出食晏、到超級市場辦貨，返到屋企認真坐低都已經成四點。打後幾個鐘一枱資料，一"Mon"資訊。左一堆、右一堆睇到頭昏腦脹，打唔通任督二脈。趁晚飯期間鬆一鬆，睇"竊聽風雲"送飯，套戲都唔錯。是日晚餐「蕃茄雪菜肉絲」，好味道！

大瀉天下

鐵人終於倒下，由半夜一直攪肚痛至天光，終於成功駛出一招"大瀉天下"。成晚半夢半醒根本無訓過，所以決定請病假一天抖一抖。外母 知道後專程煮咗一碗"白粥"中午送上門作為我嘅早午餐，乖乖地食完後再繼續以龜速活動。全日食物一於清到底等身體休息一下，是日晚餐「餃子烏冬」。

無事出街小破財

終於今日收工時間唔一樣，放工時要夾時間先可以齊齊走。返到屋企煮飯實在太夜，都係出街食方便。路過久違嘅"公和"，咁就呢度開餐啦。平日收工好少行街，呢幾日不停咁四圍行，老闆娘 終於開齋買咗個手袋。

忽冷忽熱

今日開始各自出門口，放工都有等埋一齊走。不過天氣忽冷忽熱，攪到個人好似有少少作病咁，所以晚餐清清地食港式粉麵就算："三寶河"+"油菜"+"淨雲吞"。

各自各返工

第二日齊齊出門口，目標係我可以準時返到公司，但結果趕到 老闆娘 氣都咳。最後決定聽日開始各自各返工，咁就唔怕將來會因為返工時間而嘈交。收工後約埋行咗一陣街，食埋"譚仔米線"就返歸。

返新工！

返新工喇！不過唔係我，係 老闆娘。新工作地點好近我公司，就响同一座商業大廈，所以今日齊齊出門口。開工時間相差半個鐘，結果佢早到我遲到。收工時間基本上都唔同，不過第一日大家都要 OT，當然約埋齊齊走啦！到 K11 行咗個圈，再搵咗間餐廳仔醫肚，之後就返歸喇！

金沙角大排檔

起身後繼續努力，可惜只得些微進展。下畫返 HKPU 同 Miss 傾功課，放學後約咗大忙人 大編輯夫婦 到沙角大排檔聚一聚。呢餐飯由聖誕約到新年足足三個幾月先成事，約到我都想放棄。講返呢個大排檔嘅食物同價錢 OK，環境又夠晒草根，已經約定下次同一地點再聚，希望呢次唔駛等三個月啦下！XDD

海盜王寶藏

因為八千字論文進度緩慢，原先打算今日閉關趕工，可惜 倉務主管 忽然有假放，所以只好抽半日時間齊齊尋寶。最終成功尋獲兩大袋絕版"海盜王"，睇下呢袋寶藏又值幾多錢啦！是日晚餐「西芹豬扒會通粉」。

闊少 生日快樂！

大個仔喇，祝你今年 萬事如意、身體健康！
記得要做好"男朋友"呢份工呀！^_^

闊少 生日飯局

由於 闊少 正日要過二人世界，所以提早一日慶祝。星期五晚嘅CWB人山人海，"泉章居"訂咗位都要等到九點幾先有位坐。今晚蝗蟲步隊齊章，一輪狂風掃落葉，十點幾已經清咗枱。跟手有人提議食甜品，一行十一人轉戰"五代同糖"。一如過住，如果飯後有下文就由壽星仔萬歲，而牆上"流行榜"剛剛好十一款，有人豪指一下照榜落單，最後... 在此真係要代各位講一次多謝晒！

K仔生日飯

又係三月排隊慶生辰嘅時候，第一位係 姨仔K，生日飯由 老闆娘 操刀。簡簡單單「豆卜炆排骨」+「 炒芥蘭」+「炒飯」，重頭戲係响酒店買嘅"北海道雜果蛋糕"。

即慶大排檔

臨近收工時間 熊貓拳 有電話到約食飯，同 老闆娘 商議過都無乜所謂，橫豎大家都要 OT。八點幾港鐵會合之後，向大排檔出發。

新派老餐廳

差不多收工時間，收到 熊貓拳 電話通知"朋友號"會路過附近，有無興趣坐順風車？有司機接送喎，即時熄機走人啦。去到粉嶺落車，人生路不熟，隨便搵咗一間自稱六五年開業，但係全間新派裝修嘅餐廳開飯。

老家開飯

今日工作唔算太忙，爭取時間返老家開飯，唔係一趕功課隨時幾個星期無得返。

返學大整蠱

今日返學時間完全係大整蠱，分三節時間，12:00-13:00、16:00-16:30、20:30-21:30，每節相隔三至四個鐘，同食藥差不多！由於屋企廚房要換水龍頭，第一節缺席。第二節準時到，但係同 Miss 傾到五點幾先放學，之後與同學食個 tea 打一打底。第三節係 representation，因為之前個 B Sir 無再教，由另一個 J Sir 重新俾多一次分。已經早到一個鐘希望有得早到早走，可惜所有同學都超時，最後十一點幾先走得。返到屋企已經無晒胃口，所以 老闆娘 臨時煮咗個麵當晚餐(宵夜)就算喇！

狗不可以亂摸

新年期間第二次開放 飛鷹基地，是日訪客為 老闆娘 舊同學。由於有兩名飛機王臨時缺席，所以 老闆娘 決定親自下廚宴客，有「臘味飯」+「蜜糖金沙骨」+「冬菇芋絲炆黃牙白」+「煎豆腐炸菜肉餅」。不可不提係今日有人客多手亂摸 Donald 個身，因而俾 Donald 輕輕咬咗一口以示警告... 所以老狗係唔可以亂摸架！

老鴨湯火鍋

話說我尋日發現美國有個咗 job 資料錯誤，如果唔即時更正就做唔切貨。當美國同事們你推我讓之制，竟然有人寫咗句"marketing ALWAYS brings trouble"...嘩，大件事！雖然錯不在我，為免大戰一觸即發，唯有OT 做好晒啲稿同 PDF，再加多兩個解決方案比美國，希望息事寧人！亦因為咁，去到"老三火鍋"已經而遲到咗一個半鐘頭，好彩大家都無詐形。"老鴨湯底"OK，不過剩飲時有啲咸，最好留返半碗湯邊食邊飲，豉油都唔駛點呀！

芋絲炆排骨

全日都唔算太忙，有時間可以偷雞做下功課，所以七點幾先走。返到屋企剛剛好開飯，今晚有新菜式「芋絲炆排骨」+「回鍋肉炒蛋」，好味道！

開工大吉

悠長假期終於結束，正式回歸辦公室。𢭃過開工利是，放眼一望，在座唔夠一半同事，估計三月頭先會齊將。積咗十幾日嘅 job，清下 email 清下枱已經七點幾，拿拿聲返歸食住家飯。是日晚餐「日式餃子炒烏冬」。

外婆，再見！

最後一日假期，主要時間都係處理 外婆 身後事。先到醫院認領遺體，作告別儀式後，再即場做咗一個小法事，就轉載去柴灣火化場。接住做第二場法事，拜祭後將遺體推入房做後期處理，下次再見將會係於"省善真堂"上位嘅時候。

董事局 Wii 大戰

最後兩日假期，原先打算閉關做功課，點知 卓言仔 打嚟問可唔可以上佢屋企食飯同陪佢玩 Wii，因為話聽日開學。哈哈，試問邊好意思推卻一個四歲小朋友嘅邀請呢？最後集齊所有 董事局 成員，食完 pizza 就齊齊 Wii Fit 大作戰。睇倒 老闆娘 同大家嘅開心樣，似乎 飛鷹基地 好快都會出現一部 Wii...XDDD

中西日星馬泰菜

前後幾日都未能解決 iMac 上網問題，忍唔住打電話去"網上痕"熱線投訴，擾攘咗半個鐘終於有解決辦法，就係直接去門市迫佢更新客戶資料。由於論文功課了無寸進，如非必要都唔想九哩遠趕返學校。最終都係留响屋企攪 iMac，只係扥同學代為通知 Miss 個進度。老闆娘 剛煮好「肉骨茶」，我又攪掂部電腦，外母一家又到齊，開飯！因為大姨仔聽日返台灣，所以有個"北海道牛奶蛋榚"做甜品，全晚中西日星馬泰食品有齊，勁！

虎年初七

今日係 飛鷹基地 農曆年期間第一次對外開放嘅日子，即係 Tennis team + Design 1st 嘅 "BBQ 團拜"。起身打掃下間屋，之後出街市食晏兼買定燒烤食品，因為知道班友仔一定會遲到。終於 張氏 一家三口準時三點幾到步外，其他人五點後先陸續出現，最遲嘅成七點幾先到... 要人地成一家大細等多成兩個幾鐘，過意得去嘛？! 其實萬眾期待嘅 闊少 都有意外，由準時變遲大到。不過佢今次好有交帶咁每半個鐘報告一次情況，再加上第一次攜眷出席，大家都會睇諒佢嘅！遲開波當然就遲收爐，好在現場前後有三部私家車唔怕夜，最後大家玩到十二點幾盡慶而歸！

虎年初六

屋企太多嘢令自己分心，決定返公司靜靜地做功課。途經旺角站與 炸彈家族 一聚，四點幾先返到公司。夜晚會合 老闆娘 ，上 契媽 屋企拜年兼食開年飯。之後當然又食又拎，幾乎將所有「咖哩雞」全部打包！XDDD

二少奶 生曰快樂！

祝你今年 隨心所欲、身體健康，卓言仔 聽教聽話！^_^

虎年初五

老闆娘 尋晚玩過龍，一起身就頭痛，最後請病假無返工。起身食完晏，再陪 老闆娘 去睇醫生。天寒地凍，成個人都以龜速轉動，腦筋遲鈍下份論文原地踏步無進展。夜晚即興會合 董事長夫婦 同過氣 明星婆婆 拜年兼食晚飯，之後返到屋企再煮多個「黑糖湯丸」做甜品。

虎年初四

老闆娘 開始返工，屋企凍到長期响雪櫃一樣，唔願離開張床。落床之後安裝部 iMac，先發覺忘記密碼唔能夠 online，所以有部份 application 裝唔到，唯有等一等再請教高人。夜晚 老闆娘 收工後，買埋"家鄉龜"同"漢堡王"到"熊屋"，再續第二回 Wii 大戰至十一點先打道回府。

虎年初三

與熊大戰至晨早六點半結束，叫醒兩位女士齊齊歎個早茶先散會。八點左右返到屋企就沖涼訓覺，响六度低溫之下，老闆娘 訓到成五點都唔肯離開張床。夜晚返外家出席"火鍋團拜"，不過食物全部為長者而設，最後要返屋企再食糖水先飽飽。半夜收到虎年第一個好消息，闊少 終於守得雲開，蜜運成功！衷心祝福呢位視如兄弟嘅"伴郎"，期待著見証你地開花結果！^_^

不要驚動愛情 - 高皓正 / 鄭秀文

作曲: 歐陽業俊　填詞: 高皓正

很想輕撫你　所以避開你
寧願用距離　去令你好奇
迴避過眼神　先偷偷喘氣
吩咐手臂　放在原地
傳聞浪漫太快　愛戀都走得快
才會遲遲未步向你　說一世愛護你

情太過洶湧像深海　而我卻會忍耐
但求來日你醒過來　這份情像翅膀打開
還沒有相戀別意外　神教會我等待
待情流像細水　才去承諾你　拿一生兌換愛

很心急擁抱　所以在禱告
求甜蜜以前　帶著你慢步
遊歷過旅途　等一天終老
生老病死　一起細數
原來慢慢靠近　更珍惜這一吻
而我停留是為了你　要給予你護蔭

情太過洶湧像深海　而我卻會忍耐
但求來日你醒過來　這份情像翅膀打開
還沒有相戀別意外　神教會我等待
待情流像細水　才去承諾你　拿一生兌換愛

能為愛戀學習按奈　情信寄進心內
但求能學會倚靠神　愛被馴服過更精采
連地老天荒亦不更改　時間永遠等待
等你情願那天　才去承諾你
無止境那份愛　我用沈默叫醒愛情　
你用期待做你反應　繼續行近直至開始愛

虎年初二

全日主要都係女家親戚團拜，一條直路由深水埗開始、太子、旺角、途經"潮特"時停一停站、油麻地、最後返外家。晚飯後返到屋企 熊貓拳 率先嚟拜年，齊齊外出食過宵夜之後，就到"熊屋"通宵 Wii 大戰！

虎年初一

大年初一加情人節，可惜心情未平服。今日最大難題係仲應唔應該比"利是"親朋？知詢過長輩認為"利是"可以派，但到處團拜年可免則免...最後決定只派"利是"比親戚及非常要好嘅朋友，並取消新年期間所有家訪。拜年程序跟往年一樣，先到麗晶、再到青衣、最後返老家。路經商場想起今日為情人節，決定買一個 "Bear in snow" 造型嘅情人節蛋榚同成個 董事局 分享！董事長夫人 發功放滿一枱美食，有蝦、有魚、有雞、有菜、有湯、有鮑魚，再加湯圓同我地嘅蛋榚，全家人都大滿足！

外婆，一路好走！

為迎接新年，起身後忙過不停。打掃屋企、陪姨甥仔食晏、準備團年飯...等等！可惜 董事長夫人 到步時帶來一個壞消息，原來今日收到老人院電話， 外婆 因為急性肺炎，半夜送咗入醫院。正當大家打算提早開飯趕出醫院嘅時候，收到另一個電話話情況唔太樂觀...二話不說，即時叫咗兩部的士飛車去醫院...可惜途中再收到護士電話通知 外婆 已經仙遊。到達醫院，護士特准所有親人包括小童到病床見最後一面，所以可以齊齊整整一家人送別 外婆！雖然唔捨得，但見到 外婆 遺容安詳，總算有點安慰，畢竟已經八十八高齡。離開醫院之後已經九點幾，隨意搵咗一間小酒家繼續餘下嘅團年飯，之後各自歸家。

親愛的外婆，家中各人安好，不用掛念，一路好走！

造節第二回合

農曆年假正式開始，起身開始嚟個熱身小掃除，約埋同樣已經收爐嘅 熊貓拳，到舊墟"漢興"食"咸牛肉公仔麵"。到"瘋宅"攞部 iMac 返屋企，之後繼續中掃除。夜晚過咗 麗晶姑媽 屋企造節。

悠長假期

返埋今日就開始放一連十二日嘅悠長假期，good！

iMac is coming

籌備已久嘅 "iMac go home" 行動決定今日出手。收工後先會合 老闆娘 到"金裝奶佬"開餐，可惜味道差、起菜慢，已被 bad list。之後去到"瘋宅"發現預留比我嘅 iMac 比另一名 sales 賣走咗，好在佢地即時補到鑊可以農曆年前返到另一部新機。咁就俾多次機會佢等多兩日啦，話晒呢庋買有現金回贈加大量贈品嘛！　

法力無邊

條"髮力毛鞭"實在太長，襯未過年決定修一修剪。老闆娘 先到 salon 做 highlight，我就遲一個鐘到，但都仲係人山人海。最尾成十一點先攪掂，拿拿聲就近搵間茶餐廳醫肚就算。

倉務日

又係清大假日子，起身做一陣功課之後，等埋 倉務總管 到步就一齊食完晏，之後就開始點倉。

造節第一回合

年近歲晚，每個週未都有得"節"要造，今日放學後第一回合係 何文田姨媽。大大細細成二十幾三十人，開晒飯廳客廳都唔夠位坐。兩邊枱各有十幾個餸，場面震撼。埋尾仲有蛋撻同生日蛋糕，真係見到幾靚都食唔落呀！

泰國人海南雞

完咗 LCC 之後，夜晚過咗花墟睇花，兼幫襯推車檔食咗幾隻"焗鵪春蛋"。行完到咗"泰國人海南雞"，第一次食都算OK，不過炒河比較好味。順便以$198買咗兩張"海南雞劵"，咁新年就唔駛捱貴雞喇！

精裝年夜飯

時勢未見好，已住幾十圍嘅"大龍鳳"年夜飯不復見，各部門都要食自己。今年响尖東"好彩"連開九席，全晚前前後後都有成二萬幾獎金獎品，不過不失啦。最失望反而係食物質索同服務態度，點解可以比同集團嘅"彩雲軒"差幾皮嘅？

Team building

公司失驚無神攪咗個 team building，所有香港同大陸同事無一幸免。晨早八點到羅湖轉公司車，十點正式開波玩到食晏。如我所料齊齊食外賣，好彩手快搶到"真功夫"蒸飯，因為飯後同事話"老麥"超難食。飯後繼續"建大廈"，詢眾要求下上台分享當年如何協辦與 SK 嘅"神秘約會"，之後所有人合作畫咗一幅五十呎嘅大畫，準時六點散場。其後坐嘅大巴响公路發生小車禍，悶到落車影咗幾張亡命公路快相，返到香港已經差八點幾。

阿媽靚湯

好多大陸廠趕收爐，所以有可能提早完成嘅 job 都會做，無形中又日日都要 OT。約咗返老家食飯，六點已經話走，最後七點都走唔到，真正趕到差不多成八點半。 好彩返到去有"阿媽靚湯"平衡一下個人先無咁躁。

雜丸鮑魚汁撈麵

今日要 OT、又要處理好多其他事，心情有八個差。老闆娘 心情亦唔見得係好，所以大家都想簡簡單單就一餐。一碗「雜丸鮑魚汁撈麵」+「清炒菜心」就兩份分。

煎雞尾飽

農曆新年前最後一日大假，主要任務都係繼續大掃除。期間去過大埔食"咖哩雞飯"，同去過粉嶺哥爾夫球場旁嘅 榮昌茶座 食"煎雞尾飽"做下午茶。夜晚就到咗比領匯破壞到不似商場嘅屋村食港式日本位麵。

無聊通告

網主忙到心浮氣燥，思覺失調！暫停更新至思路回服正常為止... 可能一陣、一日、一星期、一個月... 唔知幾耐！多謝收看！！