新派老餐廳

差不多收工時間，收到 熊貓拳 電話通知"朋友號"會路過附近，有無興趣坐順風車？有司機接送喎，即時熄機走人啦。去到粉嶺落車，人生路不熟，隨便搵咗一間自稱六五年開業，但係全間新派裝修嘅餐廳開飯。

老家開飯

今日工作唔算太忙，爭取時間返老家開飯，唔係一趕功課隨時幾個星期無得返。

返學大整蠱

今日返學時間完全係大整蠱，分三節時間，12:00-13:00、16:00-16:30、20:30-21:30，每節相隔三至四個鐘，同食藥差不多！由於屋企廚房要換水龍頭，第一節缺席。第二節準時到，但係同 Miss 傾到五點幾先放學，之後與同學食個 tea 打一打底。第三節係 representation，因為之前個 B Sir 無再教，由另一個 J Sir 重新俾多一次分。已經早到一個鐘希望有得早到早走，可惜所有同學都超時，最後十一點幾先走得。返到屋企已經無晒胃口，所以 老闆娘 臨時煮咗個麵當晚餐(宵夜)就算喇！

狗不可以亂摸

新年期間第二次開放 飛鷹基地，是日訪客為 老闆娘 舊同學。由於有兩名飛機王臨時缺席，所以 老闆娘 決定親自下廚宴客，有「臘味飯」+「蜜糖金沙骨」+「冬菇芋絲炆黃牙白」+「煎豆腐炸菜肉餅」。不可不提係今日有人客多手亂摸 Donald 個身，因而俾 Donald 輕輕咬咗一口以示警告... 所以老狗係唔可以亂摸架！

老鴨湯火鍋

話說我尋日發現美國有個咗 job 資料錯誤，如果唔即時更正就做唔切貨。當美國同事們你推我讓之制，竟然有人寫咗句"marketing ALWAYS brings trouble"...嘩，大件事！雖然錯不在我，為免大戰一觸即發，唯有OT 做好晒啲稿同 PDF，再加多兩個解決方案比美國，希望息事寧人！亦因為咁，去到"老三火鍋"已經而遲到咗一個半鐘頭，好彩大家都無詐形。"老鴨湯底"OK，不過剩飲時有啲咸，最好留返半碗湯邊食邊飲，豉油都唔駛點呀！

芋絲炆排骨

全日都唔算太忙，有時間可以偷雞做下功課，所以七點幾先走。返到屋企剛剛好開飯，今晚有新菜式「芋絲炆排骨」+「回鍋肉炒蛋」，好味道！

開工大吉

悠長假期終於結束，正式回歸辦公室。𢭃過開工利是，放眼一望，在座唔夠一半同事，估計三月頭先會齊將。積咗十幾日嘅 job，清下 email 清下枱已經七點幾，拿拿聲返歸食住家飯。是日晚餐「日式餃子炒烏冬」。

外婆，再見！

最後一日假期，主要時間都係處理 外婆 身後事。先到醫院認領遺體，作告別儀式後，再即場做咗一個小法事，就轉載去柴灣火化場。接住做第二場法事，拜祭後將遺體推入房做後期處理，下次再見將會係於"省善真堂"上位嘅時候。

董事局 Wii 大戰

最後兩日假期，原先打算閉關做功課，點知 卓言仔 打嚟問可唔可以上佢屋企食飯同陪佢玩 Wii，因為話聽日開學。哈哈，試問邊好意思推卻一個四歲小朋友嘅邀請呢？最後集齊所有 董事局 成員，食完 pizza 就齊齊 Wii Fit 大作戰。睇倒 老闆娘 同大家嘅開心樣，似乎 飛鷹基地 好快都會出現一部 Wii...XDDD

中西日星馬泰菜

前後幾日都未能解決 iMac 上網問題，忍唔住打電話去"網上痕"熱線投訴，擾攘咗半個鐘終於有解決辦法，就係直接去門市迫佢更新客戶資料。由於論文功課了無寸進，如非必要都唔想九哩遠趕返學校。最終都係留响屋企攪 iMac，只係扥同學代為通知 Miss 個進度。老闆娘 剛煮好「肉骨茶」，我又攪掂部電腦，外母一家又到齊，開飯！因為大姨仔聽日返台灣，所以有個"北海道牛奶蛋榚"做甜品，全晚中西日星馬泰食品有齊，勁！

虎年初七

今日係 飛鷹基地 農曆年期間第一次對外開放嘅日子，即係 Tennis team + Design 1st 嘅 "BBQ 團拜"。起身打掃下間屋，之後出街市食晏兼買定燒烤食品，因為知道班友仔一定會遲到。終於 張氏 一家三口準時三點幾到步外，其他人五點後先陸續出現，最遲嘅成七點幾先到... 要人地成一家大細等多成兩個幾鐘，過意得去嘛？! 其實萬眾期待嘅 闊少 都有意外，由準時變遲大到。不過佢今次好有交帶咁每半個鐘報告一次情況，再加上第一次攜眷出席，大家都會睇諒佢嘅！遲開波當然就遲收爐，好在現場前後有三部私家車唔怕夜，最後大家玩到十二點幾盡慶而歸！

虎年初六

屋企太多嘢令自己分心，決定返公司靜靜地做功課。途經旺角站與 炸彈家族 一聚，四點幾先返到公司。夜晚會合 老闆娘 ，上 契媽 屋企拜年兼食開年飯。之後當然又食又拎，幾乎將所有「咖哩雞」全部打包！XDDD

二少奶 生曰快樂！

祝你今年 隨心所欲、身體健康，卓言仔 聽教聽話！^_^

虎年初五

老闆娘 尋晚玩過龍，一起身就頭痛，最後請病假無返工。起身食完晏，再陪 老闆娘 去睇醫生。天寒地凍，成個人都以龜速轉動，腦筋遲鈍下份論文原地踏步無進展。夜晚即興會合 董事長夫婦 同過氣 明星婆婆 拜年兼食晚飯，之後返到屋企再煮多個「黑糖湯丸」做甜品。

虎年初四

老闆娘 開始返工，屋企凍到長期响雪櫃一樣，唔願離開張床。落床之後安裝部 iMac，先發覺忘記密碼唔能夠 online，所以有部份 application 裝唔到，唯有等一等再請教高人。夜晚 老闆娘 收工後，買埋"家鄉龜"同"漢堡王"到"熊屋"，再續第二回 Wii 大戰至十一點先打道回府。

虎年初三

與熊大戰至晨早六點半結束，叫醒兩位女士齊齊歎個早茶先散會。八點左右返到屋企就沖涼訓覺，响六度低溫之下，老闆娘 訓到成五點都唔肯離開張床。夜晚返外家出席"火鍋團拜"，不過食物全部為長者而設，最後要返屋企再食糖水先飽飽。半夜收到虎年第一個好消息，闊少 終於守得雲開，蜜運成功！衷心祝福呢位視如兄弟嘅"伴郎"，期待著見証你地開花結果！^_^

不要驚動愛情 - 高皓正 / 鄭秀文

作曲: 歐陽業俊　填詞: 高皓正

很想輕撫你　所以避開你
寧願用距離　去令你好奇
迴避過眼神　先偷偷喘氣
吩咐手臂　放在原地
傳聞浪漫太快　愛戀都走得快
才會遲遲未步向你　說一世愛護你

情太過洶湧像深海　而我卻會忍耐
但求來日你醒過來　這份情像翅膀打開
還沒有相戀別意外　神教會我等待
待情流像細水　才去承諾你　拿一生兌換愛

很心急擁抱　所以在禱告
求甜蜜以前　帶著你慢步
遊歷過旅途　等一天終老
生老病死　一起細數
原來慢慢靠近　更珍惜這一吻
而我停留是為了你　要給予你護蔭

情太過洶湧像深海　而我卻會忍耐
但求來日你醒過來　這份情像翅膀打開
還沒有相戀別意外　神教會我等待
待情流像細水　才去承諾你　拿一生兌換愛

能為愛戀學習按奈　情信寄進心內
但求能學會倚靠神　愛被馴服過更精采
連地老天荒亦不更改　時間永遠等待
等你情願那天　才去承諾你
無止境那份愛　我用沈默叫醒愛情　
你用期待做你反應　繼續行近直至開始愛

虎年初二

全日主要都係女家親戚團拜，一條直路由深水埗開始、太子、旺角、途經"潮特"時停一停站、油麻地、最後返外家。晚飯後返到屋企 熊貓拳 率先嚟拜年，齊齊外出食過宵夜之後，就到"熊屋"通宵 Wii 大戰！

虎年初一

大年初一加情人節，可惜心情未平服。今日最大難題係仲應唔應該比"利是"親朋？知詢過長輩認為"利是"可以派，但到處團拜年可免則免...最後決定只派"利是"比親戚及非常要好嘅朋友，並取消新年期間所有家訪。拜年程序跟往年一樣，先到麗晶、再到青衣、最後返老家。路經商場想起今日為情人節，決定買一個 "Bear in snow" 造型嘅情人節蛋榚同成個 董事局 分享！董事長夫人 發功放滿一枱美食，有蝦、有魚、有雞、有菜、有湯、有鮑魚，再加湯圓同我地嘅蛋榚，全家人都大滿足！

外婆，一路好走！

為迎接新年，起身後忙過不停。打掃屋企、陪姨甥仔食晏、準備團年飯...等等！可惜 董事長夫人 到步時帶來一個壞消息，原來今日收到老人院電話， 外婆 因為急性肺炎，半夜送咗入醫院。正當大家打算提早開飯趕出醫院嘅時候，收到另一個電話話情況唔太樂觀...二話不說，即時叫咗兩部的士飛車去醫院...可惜途中再收到護士電話通知 外婆 已經仙遊。到達醫院，護士特准所有親人包括小童到病床見最後一面，所以可以齊齊整整一家人送別 外婆！雖然唔捨得，但見到 外婆 遺容安詳，總算有點安慰，畢竟已經八十八高齡。離開醫院之後已經九點幾，隨意搵咗一間小酒家繼續餘下嘅團年飯，之後各自歸家。

親愛的外婆，家中各人安好，不用掛念，一路好走！

造節第二回合

農曆年假正式開始，起身開始嚟個熱身小掃除，約埋同樣已經收爐嘅 熊貓拳，到舊墟"漢興"食"咸牛肉公仔麵"。到"瘋宅"攞部 iMac 返屋企，之後繼續中掃除。夜晚過咗 麗晶姑媽 屋企造節。

悠長假期

返埋今日就開始放一連十二日嘅悠長假期，good！

iMac is coming

籌備已久嘅 "iMac go home" 行動決定今日出手。收工後先會合 老闆娘 到"金裝奶佬"開餐，可惜味道差、起菜慢，已被 bad list。之後去到"瘋宅"發現預留比我嘅 iMac 比另一名 sales 賣走咗，好在佢地即時補到鑊可以農曆年前返到另一部新機。咁就俾多次機會佢等多兩日啦，話晒呢庋買有現金回贈加大量贈品嘛！　

法力無邊

條"髮力毛鞭"實在太長，襯未過年決定修一修剪。老闆娘 先到 salon 做 highlight，我就遲一個鐘到，但都仲係人山人海。最尾成十一點先攪掂，拿拿聲就近搵間茶餐廳醫肚就算。

倉務日

又係清大假日子，起身做一陣功課之後，等埋 倉務總管 到步就一齊食完晏，之後就開始點倉。

造節第一回合

年近歲晚，每個週未都有得"節"要造，今日放學後第一回合係 何文田姨媽。大大細細成二十幾三十人，開晒飯廳客廳都唔夠位坐。兩邊枱各有十幾個餸，場面震撼。埋尾仲有蛋撻同生日蛋糕，真係見到幾靚都食唔落呀！

泰國人海南雞

完咗 LCC 之後，夜晚過咗花墟睇花，兼幫襯推車檔食咗幾隻"焗鵪春蛋"。行完到咗"泰國人海南雞"，第一次食都算OK，不過炒河比較好味。順便以$198買咗兩張"海南雞劵"，咁新年就唔駛捱貴雞喇！

精裝年夜飯

時勢未見好，已住幾十圍嘅"大龍鳳"年夜飯不復見，各部門都要食自己。今年响尖東"好彩"連開九席，全晚前前後後都有成二萬幾獎金獎品，不過不失啦。最失望反而係食物質索同服務態度，點解可以比同集團嘅"彩雲軒"差幾皮嘅？

Team building

公司失驚無神攪咗個 team building，所有香港同大陸同事無一幸免。晨早八點到羅湖轉公司車，十點正式開波玩到食晏。如我所料齊齊食外賣，好彩手快搶到"真功夫"蒸飯，因為飯後同事話"老麥"超難食。飯後繼續"建大廈"，詢眾要求下上台分享當年如何協辦與 SK 嘅"神秘約會"，之後所有人合作畫咗一幅五十呎嘅大畫，準時六點散場。其後坐嘅大巴响公路發生小車禍，悶到落車影咗幾張亡命公路快相，返到香港已經差八點幾。

阿媽靚湯

好多大陸廠趕收爐，所以有可能提早完成嘅 job 都會做，無形中又日日都要 OT。約咗返老家食飯，六點已經話走，最後七點都走唔到，真正趕到差不多成八點半。 好彩返到去有"阿媽靚湯"平衡一下個人先無咁躁。

雜丸鮑魚汁撈麵

今日要 OT、又要處理好多其他事，心情有八個差。老闆娘 心情亦唔見得係好，所以大家都想簡簡單單就一餐。一碗「雜丸鮑魚汁撈麵」+「清炒菜心」就兩份分。

煎雞尾飽

農曆新年前最後一日大假，主要任務都係繼續大掃除。期間去過大埔食"咖哩雞飯"，同去過粉嶺哥爾夫球場旁嘅 榮昌茶座 食"煎雞尾飽"做下午茶。夜晚就到咗比領匯破壞到不似商場嘅屋村食港式日本位麵。

無聊通告

網主忙到心浮氣燥，思覺失調！暫停更新至思路回服正常為止... 可能一陣、一日、一星期、一個月... 唔知幾耐！多謝收看！！

打包私房菜

今日真經典，到港島富貴球場打完收爐波，tea 都唔食就趕返學。點知原先只需要上半個鐘嘅堂，最後變咗五個鐘。事緣今日重點係返學交代篇論文嘅主題同方向，Miss 同意之後就可以開波。可惜大部份同學嘅主題都唔合心意，大家排住隊 present，Miss 唔 buy 嘅又重新再排過隊，排完一次又一次，終於九點鐘全部煞科，鳴金收兵！本身約咗外母女家食私房菜嘅我，期間每個鐘同 老闆娘 電聯一次，由"儘快到"，變"遲少少到"，再變"遲半個鐘到"，再再變"遲一個鐘到"，最後決定唔到！大家知我為返學當然唔會咋型，仲有打包返屋企比我添！不過...明明話私房菜，點解咁似酒樓啲餸菜嘅？

合掌瓜煲豬骨

係時候開始玩大掃除，雖然進度緩慢，總算有執拾過。全日上上落落都無乜時間玩煮飯仔，晚飯只可以外賣滷味、炒唐生菜，另加足料靚湯「合掌瓜煲豬骨」一大煲。

悶悶地中獎

今日應 vendor 邀請，與 老闆娘 齊齊出席其 annual dinner。雖然悶咗成晚，加上"龍堡"餐飯又唔好食，不過幸運地中咗一隻手表及二等現金獎，都算悶得嚟有少少收穫。^_^

信者得愛 - 鄭秀文

作曲: Kim Do Hoon　填詞: MC仁 / 陳少琪
編曲: James Ting　監製: 蔡德才

You know I got this
Let’s Go! Live your life up day and night!
It’s so high high high
Let’s get it going , Let’s get it going up...
It’s so high high high
You’re gonna get go, Let’s get it going up...
It’s so high high high
You’re gonna get go, Let’s get it going up...
It’s so high high high
You’re gonna get go, Let’s get it going up,
Come On!

當你多麼多麼仇視著世界
這一切　節奏太快　快到個性被分解
(you gotta stand in line)
種種天災令大地像洩氣車胎
氧氣要購買　快滅絕美好生態　oh

別怨新聞這麼假 (那需挑剔)　天色這麼差
相信愛可統領天下 (put ‘em up put ‘em up)
別怪煙花這麼花 (每一點愛)　可修補傷疤
將那　黑色世代轉化　wo…oh

機關槍　坦克車　狂亂地跳舞
戰爭裡　世界痛了信仰那會被打倒
(it’s time you live it up)
空中花園傲慢極沒法夠天高
慾念是甚麼　信念就是我的禱告　oh

別怨新聞這麼假 (那需挑剔)　天色這麼差
相信愛可統領天下 (put ‘em up put ‘em up)
別怪煙花這麼花 (每一點愛)　可修補傷疤
將那黑色世代轉化　wo…oh

無論寸步難行　仍舊張開雙眼
用你心感應天父衪　oh oh oh oh
有愛武器會軟化　掌握手中的十架
盡力量感染着世人吧　ah

睇唔見嘅士兵　聽唔見嘅叫聲
遮唔住嘅眼睛　等唔見嘅救星
究竟聖經已指引一條點樣嘅路
諗唔到點解仲無人知道點樣去做
你睇到毀滅　定睇到創造
肯跪低嘅話會睇到一條光明嘅路
真理生命就有最美好引渡
信望愛　取決咗你嘅下一步

別怨新聞這麼假 (那需挑剔)　天色這麼差
相信愛可統領天下 (put ‘em up put ‘em up)
別怪煙花這麼花 (每一點愛)　可修補傷疤
將那黑色世代轉化 wo…oh
別怨新聞這麼假 (那需挑剔)　天色這麼差
相信愛可統領天下 (put ‘em up put ‘em up)
別怪煙花這麼花 (每一點愛)　可修補傷疤
將那黑色世代轉化　wo…oh　Come On!

魚翅撈飯

將星期一嘅大假改為今日，因為 熊貓拳 又有好嘢益我地... 就係二手名牌洗衣機一大部喇！食完早/午餐之後飛車入南田，爭取時間搬機，點知返到屋企發覺原先想放個位唔多好，做唔到去水位。左計右計都唔啱位，最後合二人之力，竟然成功繞過兩層旋轉梯，將部洗衣機搬咗上天台，奇蹟！為咗慰勞呢位出車又出力嘅壽星仔，最後請佢食咗餐魚翅撈飯！

醜叮噹+細無霸

今日唔算太忙，所以就時間到金都睇睇本 photobook 嘅進度。雖然已經改咗三次，但係一樣有少少瑕疵。但最後都免強收咗貨，因為再改就真係虎年都未有得睇呀！之後去食好似好抵食嘅"老麥"二十蚊餐... 中晒廣告計，從未見過咁細嘅"巨無霸"囉，味道又差薯條又淋，下次都係唔好貪平食返 Burger King 喇！BTW，啲叮噹公仔真係好醜樣... >_<"

銷假返工

原先今日應該繼續放大假，但有個 job 一定要農曆年之前攪掂，而我又唔想假手於人，所以決定銷假返公司自己跟進。至於不甘工作沉悶嘅 老闆娘 就請咗半日假，到灣仔玩見工。大約八點再會合齊齊食完晚飯先返屋企。

SWP 同學聚會

新課程嘅 Miss 好喜歡與同學們溝通，連同睇 powerpoint 嘅時間，今日又係上足四個鐘，厲害！放學後係第一次 SWP 同學聚會，大約有七成同學出席。期間互相交流一下大家嘅背景、工作性質等等。因為在座主要都係八十後嘅人，所以好快已經熟落，天南地北無所不談。

新居探訪

好運蘋果 新居入伙一段時間，終於輪到我地設計組別上門攪破壞。雖然地方細細，但環境舒舒服服。今晚有私家靚湯、有盆菜、有紅酒、有專程由澳洲訂嘅 cheesecake、仲有親善大使 貂鼠矇矇 左右穿插，十幾個人團團轉，開開心心嘈到拆天又一晚！

一年一度清大假

又係一年一度被迫清大假嘅日子。雖然人不在公司，但係訓醒覺還不是要 check 公司 email？期間覆下 email、上一陣網、做一陣功課，倉務主管 就到步。兩個人磁場轉動完個倉、補完貨、食完下午茶又大半日。之後換上 小姨甥母子 上門同 當奴 玩，順便等 老闆娘 收工，齊齊返外家晚飯。去到外家先知中計，原來只係食冷飯 (真係唔熱果種...)，早知自己煮麵好過啦... #_#"

豬扒炒日本拉麵

又再開會同 OT ，最終都要成十點先走到。即時飛的返屋企，晚餐已經準備好，「豬扒炒日本拉麵」是也。

牛丸雲吞胡椒湯麵

要做返晒呢兩日因為做功課而慢咗嘅 job，終於 OT 到成十一點先走。難為 老闆娘 堅持等我開餐，最後晚飯變宵夜...是日晚餐(?)「牛丸雲吞胡椒湯麵」。

飛車交功課

朝早十點就收到一個不禮貌電話追交功課，仲話今日唔交就唔會收。Well...如果唔係自己理虧的話，我一定小爆個職員！會與會之間偷雞 print 定所有稿，午飯都唔食就極速裝表，仲有同事出手相助，順利完成！飛車來回 HKPU 同公司都已兩點幾，不過午飯期間老細見到我係趕功課，所以無咋型，好彩！

補做功課

雖然一早收到電話可以比我補交功課，但係全日不停開會乜都做唔到。最後成八點先回復自由身，唯有儘量做到幾多得幾多，埋頭苦幹至凌晨再飛的士返屋企！

八千字論文

今日第二個 module 正式開始，轉咗新 Miss 教。今個 module 要寫八千字嘅論文，第一堂就睇足四個鐘嘅 Powerpoint 同 PDF，睇到人到癲。期間從同學口中得知自己份功課交少咗一部份，即時問有無得補鑊，可惜負責職員放假，要等一日先知...唔得就大件事喇！@_@"

是日晚餐「海鮮炒鮑魚麵」。

伙炭工作室

又係忙碌嘅一日。訓醒覺上一陣網已經成十二點，拿拿聲叫醒 老闆娘 換衫過火炭工廠區，探有份參與"伙炭工作室開放日"嘅朋友仔。期間竟然撞到 力奇夫婦，邪！六點左右到 LCC 出席七十週年紀念活動，之後再趕返幾過星期無見嘅老家開飯。

裙拉褲乜

話說尋晚最後做到凌晨三點先完工，飛的士返到屋企，梳洗完畢訓落床都已經天光。由於有大會要出席，小睡兩個鐘之後就要趕返公司，而 老闆娘 就臨時請假留响屋企叉電。會一直開個不停，打電話到學校通知要遲過七點後先趕得到交功課...一如所料，六點幾先開完會，裙拉褲乜趕到去學校，妹妹仔話好彩我報定案，唔係過時當遲交要扣分！而家就唔計數，鬆一口氣！返到屋企先知要到 外母 處食飯，順便見下台灣返嚟嘅精靈外甥仔。是晚餸菜由老闆娘準備，有「梅菜蒸肉餅」+「南瓜炆排骨」+「粟米紅紅蘿蔔湯」。

交功課前夕

聽日就要交功課，所以努力爭取缺席非必要嘅會議，偷時間做功課。放工後繼續努力，期間同 秘書姐姐、老闆娘 三人行响"菓一道"食咗個快飯後，回歸 office 繼續向前衝直到凌晨...(未完待續)

幾時再見

美國同事今日返歸，噓寒問暖已經用咗一個朝早。其中一個比較 close 嘅同事原來已經有咗三個月，即是話除非公司短期內派我到美國 office，如果唔係最少一年半以上唔會再見，因為短期內佢都唔可能再飛！

粟米蒸肉餅飯

國內同事到香港 office 幫手，想陪佢食個晏都抽唔到時間。午飯時間响公司以極速 KO 咗 老闆娘 嘅愛心「粟米蒸肉餅飯」之後，即時開波做功課。放工後繼續努力趕功課，剛巧國內同事 OT 完畢，最後約埋 老闆娘 三個人齊齊到茶餐廳聚一聚。

羅白炆排骨

星期一繼續停不了嘅 會議，逃避不了嘅 OT 。爭取時間趕功課，返到屋企已經十一點幾，難為等我開飯嘅 老闆娘。是日晚餐「羅白炆排骨」。

焗粟米魚柳紅米飯

今日時間許可，返學前先打場波減一減壓，飲埋餐下午茶之後就飛返 HKPU。原定係交功課嘅日子，但係 B Sir 體諒各位半工讀唔夠時間做功課，所以 deadline 改咗做星期五，不過都要浦一浦頭俾佢睇睇個進度。聽完 comments，放學後上公司再執一執份功課，九點左右就返屋企食晚飯。是日精選係「焗粟米魚柳紅米飯」。

公司大排檔

每個星期六都係趕功課嘅黃金期，今日都唔例外。返上公司前專程到 老闆娘 久違嘅大排檔醫肚，呢處係我地拍拖時段其中一個飯堂，不過轉工後，佢已差不多兩年無幫襯過，難得檔主對我地仲有少少印象喎。返到公司開行 turbo，老闆娘 主力幫我砌好 powerpoint 之後就去咗飲，我就一個人全力做 final artwork，終於趕及離場前原成咗八成以上。Good!

Nagoyaka Tei

Non-stop meeting，全日開過不停！終於六點幾可以坐返埋位，可惜腦袋完全失靈。與其望住部電腦發呆，索性約 老闆娘 到"和花亭"晚飯，攞靈感兼順便影相當做 research。

煎魚肉豆腐

開會開到頭昏腦脹，明明可以抽到少少時間做功課，望住部電腦個腦一片空白。坐咗半粒鐘成九點都無乜頭緒，即時改計劃趕返屋企陪 老闆娘 食晚飯。是日晚餐係「煎魚肉豆腐」+「西芹炒肉片」，特別嘉賓 外母 +「八條腸仔」。

趕頭趕命

心電圖一樣，前日夜收、尋日早收、今日再夜收！最大件事係全日都趕頭趕命，完全抽唔到時間做功課之餘，有時趕到連飯都唔想食！

潮特封路

收到通知相機已經維修好，加快速度收工，剛剛七點關門前趕到。之後路過"潮特"順便探下朋友，發現彌敦道大門已經被封，改為珠寶店。咁唔方便客人都做，業主梗係加租加到儍咗！

豆腐炆排骨

新一年第一日開工就忙到顛，因為連續兩個星期嘅 on-site meeting 正式開始。全日响會議室出出入入，平均一個鐘頭只得五分鐘响自己個位，所有日常工作都要收工後開始做。離開公司時已經成十點幾，即刻飛的士返屋企食住家飯。是日晚餐「豆腐炆排骨」+ 即將到期嘅「焗急凍薯條」。

工展會掃貨

新年第一個星期日，當然要打返場賀年波慶祝一下。開心過後又要返學校交功課，可能今次個 layout 合 B sir 心意，所以進展頗為順利。放學後會合 老闆娘 到天后食清湯腩，再到工展會掃貨。一如往年，掃得最重手都係"長壽果"品牌嘅麵食，再加上一堆健康食品，滿載而歸！

焗蜜糖咸豬手

一覺訓醒，重新開波做功課。尋日難得出過街市，所以全日足不出戶都有好嘢食。午餐先嚟一個「酸菜肉絲上海麵」。晚餐仲厲害，有「焗蜜糖咸豬手」+「西蘭花薯蓉」。

新年快樂！

新年新開始，放自己個腦袋一日假，將功課拋諸腦後。等 老闆娘 訓醒之後，齊齊用龜速到街市食下午茶(早餐)，點知熟食檔五點左右已經洗太平地，唯有即時轉軚幫襯一間家庭式上海小食店。之後再上街市買餸返屋企玩煮飯仔。是日新年菜單係「鮮茄焗鮮豬扒飯」+「粟米忌廉湯」+「大杯奶茶」。再伴以 "SuperGoo Live 2009" 4 DVD，大滿足！