洋蔥豬扒便當

八號風球副產品，「洋蔥豬扒便當」。

珍惜聚會時 '09

Anita 生日當天下午一時，歌迷會會在省善真堂進行儀式，歡迎大家前來致意。晚上，歌迷會將於酒店舉行一年一度自助晚餐聚會。

日期：2009年10月10日(星期六)
地點：富豪九龍酒店 (尖沙咀麼地道71號)
時間：晚上7:00 (如要送花請安排下午4時後送到)

如欲參加聚會，請於以下時間到歌迷會購票。
日期：2009年9月5日及6日(星期六、日)
時間：下午3:00 - 5:00
地點：歌迷會會址 - 香港北角電氣道148號10樓1003室
電郵：amifc1985@yahoo.com.hk

繼續八號

七點起身聽到八號風球未落，將鬧鐘較遲兩粒鐘，繼續訓！再起身已知道將近落波，同 老闆娘 提早準備，出門時成功避開人潮。如我所料，堆積咗一日半嘅工作係無可能用半日攪返掂，最後 OT 到成十點幾先飛可以的返屋企。

又打八號風球

暴曬兩日，最後都要請日假留响屋企叉一叉電。悠悠閑執下屋、玩下狗、check email。打開電視，新聞報導話夜晚會由三號轉八號風球，即時打比 老闆娘 問需唔需要去買餸？之後去到超市已經人山人海，好彩仲比我搶到絕無僅有嘅幾包菜。晚飯時間 外母 到齊，粗粗地都有「洋蔥豬扒」+「菜心炒草菇」+「煎餃子」+「金寶雞湯」+「雲耳蒸雞(外賣)」。

金剛經 - 何韻詩

作曲：HoCC　填詞：黃偉文
編曲：陳奐仁、何秉舜@goomusic

我托住了　倒塌大橋
還派個隊友　阻擋海嘯
我破罪案　她去護苗
排難救災　未算少

你有絕症　他會治療
而你拒絕了　因他太妖
救過命已　一百萬條　　　　　　　　
歧視眼光　沒有少

你　遇了險　誰人像金剛般給你去撑腰
萬人卻在　拿着十架在搖　願釘起我焚燒

我們仍然未得勝
還是有部　難唸的經
我們仍然未得勝
還在革命　頑強爭取　太平

你我亦會　感到寂寥
何以卻沒法　肝膽相照
哪個為我　煮個麵條
強大勇者　就折腰

我　待你好　猶如煉金般　怎麼怕猛火燒
沒人仰望　還是未有動搖　負傷衝上雲霄

我們仍然未得勝
還是有部　難唸的經
我們長年在打拼
融合隔膜　同存於這星
世人何時受感應　全部甦醒

我們仍然未得勝
還是有部　難唸的經
我們長年在打拼
融合隔膜　同存於這星

我們祈求被尊敬
能做已做　無人響應
既然仁慈是必勝
難亦要唸　難唸的經　難唸的經

誰是　同類　誰是　仇敵　
難道　難道　還未　還未　分清

大編輯 大日子

整裝待發

明知聽日有排忙，所以今晚謝絕應酬。唔想死背自備嘅司儀稿，重新閱讀兩次之後決定唔再睇，去到現場先執生！臨訓前天氣時好時壞，唯有祝兩位主角好運，可以順利地响沙灘行禮！

西來也西去

上星期返老家攞西裝，一時情急攞咗十幾年前最舊果套。雖然尚算啱身，但唔夾婚宴場地，所以今晚要再次努力發掘另一套。食完飯開工，終於搵到最近期果套，重新配搭過另一件恤衫、頜呔，攪掂！

090909

百年一見嘅日子。總括全日，一個"等"字！

草菇肉鬆炆豆腐

夜晚繼續煮係 老闆娘 嘅飯仔時間，是日晚餐「草菇肉鬆炆豆腐」+「青炒通菜」。

海鮮會意粉

午飯時間由 老闆娘 包辦，「海鮮會意粉」。

菜圃炒蛋

放工趕到 HKPU 交學費單，一程日本之旅同時報銷。之後返屋企開飯，今晚 老闆娘 有新煮意，是日菜式為「菜圃炒蛋」+「節瓜炆肉絲」。

牛華事件

一個鬧得滿城風雨嘅話題，部份牛迷反應激烈，即時反轉豬肚...。其實 牛華 年紀已經唔細，已婚總比証實佢係”攣”好掛？再者，就算對象唔係豬小姐，係”你、妳、您”嘅機會率等同中六合彩，與其怨偶像一世，倒不如祝福佢！等佢可以繼續唱多啲好歌、拍多啲好戲去慰藉各牛迷嘅心寧，滿足各狂迷嘅白日夢！至於”講大話”呢方面，當你放一個屁都可能成為新聞頭版嘅時候，易地而處時，你就知道有時”唔講”比”講”需要更大嘅勇氣同承擔！

李龍、李鳳

終於就啱時間，約埋 貓新地 齊齊去探 李龍、李鳳。一直被坊間流言誤導，以為龍鳳B會同時食、同時訓、同時喊... 原來各有各生理時鐘，大部份時間都唔係一致。不過 BB 好乖呀，令到已經好少機會同枱食飯嘅 李爸李媽 可以安安樂樂咁同我地食完餐飯，抵鍚！

陳年老西

倒數一星期，係時候發掘一年先著一次嘅西裝出衣櫃。咁返得老家，當然順便開埋餐，食完先開始動手發掘。大戰半小時，集齊恤衫、西褲、外套、領呔，閃！

各自各精彩

今晚各有各節目，老闆娘 約咗舊隊友响尖咀飯局，我就約咗舊同事 艾域 同 倉務總管 响旺角，最後再約埋一齊返屋企。

司儀飯局

雖然係第三次做婚禮司儀，不過今次要幫埋沙灘行禮個部份，所以都有少少緊張。好在晚宴時段搵到 公主 幫手，唔係就要一個由朝頂到晚。今晚 大編輯夫婦 就約埋兩個司儀，開返個會傾下個內客。

齊齊開學

開學日交通七國咁亂，差啲趕唔切坐公司車上 China office。一如以往跟大陸助手開下會、食下飯，確保全部如期可以收工。返到屋企剛剛開著電腦就收到 HKPU 電話，英國大學已經確認取錄，十月開學，盛惠第一期學費一千英鎊。呼...係時候計劃一下點樣重組我嘅生活秩序喇！

鮮茄南瓜縲絲粉

拖咗幾個月，今日忍唔住再打去 HKPU 追問個課程收生情況，究竟係唔收定係攪唔成先？由於語氣過份凶惡，嚇得接線生唔識應對，講咗十幾分鐘癈話，最後答案都係聽咗無數次嘅"等一等"... 頂！是日晚餐要食索下一下火，「鮮茄南瓜縲絲粉」是也。

熟食加工

一般人到街市都係想買新鮮食物，而我地每次去到見到一眾美味熟食就會心思思想買。今日都唔例外，最後只係買咗新鮮嘅菜，其他全部都係熟食... 返到屋企再加工，哈哈！

董事長夫人 生日宴

為咗所有子子孫孫、契仔契女可以全部出席，董事長夫人 生日宴延期到今日响太子警察會舉行。揀呢個場主要因為就到所有人坐車方便，而且又係 董事長 地頭，一家大細可以留連一日都唔怕悶。

BB 飯局

幾經辛苦終於搶到一件送比 大佬BB 嘅出生禮物，當然要即時送到 大佬 手上啦！為免身懷六甲嘅 阿嫂 舟車勞頓，是日開餐地點為 APM 上樓。半年一聚，輕輕鬆鬆、嘻嘻哈哈又兩粒鐘。在此祝兩位一切順利，下個月探 BB 再見！

董事長夫人 生辰快樂！

祝妳 身體健康、美艷動人、開 show 開到去"紅館"！

沙田 shopping

應主人家要求，尋找一件桃紅 polo shirt 作婚禮司儀之用。幾間大路連鎖店都睇唔上眼，最後返去近期至愛 UNIQNO。一睇果然有心水，仲連帶有其他發現，埋單一共六百幾，呢件戰衣真係貴！

COVA Cakes

今晚嘅宵夜甜品，就係 Wall E 離開地球前嘅手信，COVA cake 兩大件，Yummy！

磨菇牛柳絲一丁

連繢大魚大肉兩日，係時候抖一抖。是日晚餐「磨菇牛柳絲一丁」。

大編輯 兄弟飯局

倒數最後兩星期終於入直路，與各兄弟姊妹見過面，順便分配下各人工作。本兄弟姊妹團特式係男女混合各有卧底做無間道。散會時 schedule 尚未完成，同志仍需努力。

長洲美食之旅

已經唔記得幾多年未到過長洲，藉著慶祝 Ah E 生日，一行八人殺入長洲進行美食之旅。由上船嘅「腿蛋飯」開始，落船先飲一個「龍鳳大檸樂」，沿路再食「腐皮魚旦」、「特大魚旦」、「縲旋薯片」、邊行邊飲「珍珠奶茶」。小休之後決戰「海鮮九大簋」，大戰個多小時，上船前再一人一個甜品... 大滿足呀！

三人火鍋

Wing E 返火星進入倒數階段，回歸前正式到訪飛鷹基地，老闆娘 以火鍋陣恭候光臨。

Ah E 生日快樂

祝妳早日搵到一個如意郎君！

同學聚會

由於 力奇 星期六唔得閒，提早今日請 Ah E 食生日飯，順便來過同學聚會。

時新快餐店

無意中讀到一篇食評介紹呢間舊式快餐店，見今日唔駛 OT 就去試一試。雖然味道不至於傳聞中咁無敵，但以快餐店價錢計，絕對交足貨。「芝士蛋漢堡」、「黑椒汁魚柳包」、「炸薯條」同「炸雞脾」，再加兩杯凍飲盛惠 HK$64。

青魚一丁

又係時候煮下飯仔，是日仿日晚餐為「薯仔絲伴青魚一丁」。

外母回歸

外母 完成為期兩週嘅"台灣探孫團"，今日回歸，仲即興叫大家出街食晚飯。下廚中嘅 老闆娘 即時"O"咀，好彩已經煮嘅飯菜可以改為 lunch box，唔係就浪費喇！

街市大排檔

董事長夫婦 襯假期入飛鷹基地探 Zero 兼打掃，夜晚就到街市大排檔，食佢地期待已久嘅「咖哩蟹飽」，多肉又多膏，果然係好味道！

墨魚餅烏冬

放工後忽然想行街街，所以同 老闆娘 過咗 TST Sogo。路經 food court 見到一眾日食頗為吸引，決定試一試。「墨魚餅烏冬」+「墨魚丸、燒餅、炒麵」餐，味道唔錯價錢亦唔貴，下次可以再幫襯。

豪門夜宴

Wing E 差不多時候要回歸火星，所以今晚應邀到九肚山豪宅晚飯，試試佢手勢之餘，順便探訪下佢嘅家人。圖中所見嘅「焗蟹蓋」、「柚子沙律」同「麻婆豆腐」就係 Wall E 出品。

大編輯 會議

喜事將至，當然要做足準備，又係同 大編輯 開晚飯會議嘅時間。開完會較啱時間接埋 老闆娘 返屋企，prefect！

Oral test

準時六點鐘霸定間 conference room，等考官電話... 一聽之後，原來考官只係人唔係鬼，信心指數即時上升十個巴先！幾句開場白之後正式英文對答，原定三分鐘，最後傾咗幾乎十分鐘。相對平時同美國同事講電話，今次對話可以話無難度，因為個考官本身講嘅英文都幾"香港"！XDDD

二少爺 生日快樂

玩具開放日 Day 2

會場優先展出嘅"天威勇士"SD合金，同場仲有"黃金戰士"、"超獸機神"...等，搶錢咩！

玩具開放日 Day 1

今日終於以海嘯價買入期待已久嘅"柔王丸、櫻姬"玩具。

英文筆試

有錢都唔一定有書讀，今日收工又要趕去 HKPU 英文筆試。兩個鐘內答一百條 grammar MC、一百條 listening MC 同作一篇文。MC 題有八成把握，作文就一半一半啦，因為唔夠時間作唔晒篇文。但係過幾日仲有個 phone in 嘅 oral test... 家陣考會考咩 ?!

漢堡王買一送一

買一個餐送一個餐，絕無取巧成份，值得掌聲鼓勵！早前先講過覺得個飽比以前細咗，但係今晚响尖咀店食嘅時候又唔係好覺喎？奇怪！

煎餃子麻辣麵

是日晚餐，「煎餃子」、「粟米炒蛋」+「麻辣公仔麵」。

日式咖哩雞

久違了嘅日式咖哩再現，味道絕對保持水準，食兩碗飯都係閒事。

日式串燒

難得陽光普照，出發打波時卻發現八達通不翼而飛。一至三樓上上落落十幾次先搵得到，最後遲到成粒鐘！夜晚 老闆娘 約咗兒時老友飯聚，因為要返一返公司，後半段時間先加入。第一站係味道唔錯嘅日式串燒店"石火燒"，之後一行五人再戰"哈狄斯"九大雪糕球。

意大利雲吞

最近比較忙好少玩煮飯仔，趁住星期六又唔想出街，決定煮返個「意大利雲吞」橕下枱腳。是晚自選電影為 "CLICK"。

大佬 生日快樂

話咁快又一年，你同阿嫂好快又去到人生再新一頁，祝你地一切順利！

Buddy Night

美國同事 力高 來港開會一星期，buddy 到訪當然要抽時間一盡地主之誼。接埋 老闆娘 之後二人三鬼上咗"Knutsford"食意大利菜，由紅酒直落到甜品，嘻嘻哈哈、開開心心就玩咗兩個幾鐘。

八十蚊任食火鍋

今晚終於有時間陪 董事長夫婦 到葵芳"紫荊"食任食火鍋，八十蚊任飲任食真係幾抵，不過對食物質素要求唔可以太高！

三餸一湯

老闆娘 玩到病，要請假一天响屋企叉電。剛巧 董事長 又放假，約老闆娘 飲完下午茶就入咗飛鷹基地陪 Zero 玩，順便整理一下花園。兩位女士就玩研究煮飯仔，等埋我就齊人開飯。是日晚餐「老火靚湯」+「梅菜蒸豬肉」+「節瓜炆排骨」+ 外購「老水雞翼」。

南太平洋陸上郵輪假期 Day 2

南太平洋陸上郵輪假期 Day 1

一臉值千金

女人買化裝品動輒就一千幾百，今日 董事長夫人 就駛咗成二千蚊。放工趕餐死落荃灣，之後俾錢又要等一輪，好彩順便搵到 老闆娘 心儀已久嘅"芝麻街" Tee，唔係我實發老脾。

金都曬相

老闆娘 姊妹 WingE 返咗香港，當然要食個飯見個面。約响太子等順便上埋金都曬結婚相，無錯，曬咗成年都仲未曬晒比人，厲害嗎？

縮水漢堡王

老闆娘 十喜愛嘅 Burger King，剛剛開咗一間分店响屋企附近，今晚就去試一試。味道當然係比 M記 好，價錢亦好接近，不過個包嘅 size 好似比以前細，唔通將貨就價？

南瓜炆肉絲

Lulu 魔力未減，上半晝仲係橫風橫雨打唔成波，下半晝就曬到人都溶埋。全日 schedule 大亂，最後決定乖乖地留响屋企，行下超補下貨。是日晚餐「南瓜炆肉絲」+「魚湯浸芥蘭」。

從一到九號風球

生日主角怪，就連約一餐生日飯都邪過人...時間地點一改再改之餘，天氣都突變，由一號風球上到九號、再由黃雨變紅雨，勁！八點幾响"鼎泰豐"開飯時已經掛三號，食到十點收到風個零鐘後會掛八號，即時飛去"Haagen-Daz"食埋甜品先散場，返到屋企剛剛好掛八號！換好衫坐定定睇緊"Fanatic Four"嘅時候，再上埋九號，Lulu 果然魔力迫人！

Home Dinner

腸胃反反覆覆，趁今日公司無咁忙，都係睇一睇醫生。唔記得帶公司醫療咭，最後盛惠三百大洋換七包藥丸。夜晚返老家開飯，唔係...係食上海麵先真，其他餸只可以齋睇。

粟米燴豬排

雖然腸胃開始有好轉，但係都唔敢亂挑戰，都係返屋企食住家飯啦。是日晚餐「粟米燴豬排」+「清炒白菜」。

油麥菜肉絲烏冬

繼續清淡口味，是日午餐「油麥菜肉絲烏冬」。

青紅蘿白

尋晚開始個肚唔係好OK，唔知係咪食得太多XO醬，係時候食返餐粥清清腸胃先得。"海皇粥店"新口味「青紅蘿白粥」...　青紅蘿白都係煲湯好味啲！

鮮茄肉片飯

尋晚食到肚滿腸肚，兩大碗XO醬撈麵，今日要過一過冷河食返餐住家飯先得。是日午餐「鮮茄肉片飯」。

DLS 飯局

勁好天氣，太陽能滿瀉。打完三個鐘 tennis，變咗五個人乾同一隻燒豬。夜晚約咗久違嘅 DLS team "拾下拾下"，唔覺唔覺已經有半隊員結咗婚，九月再會多一對，其他人努力喇！

家居維修日

十一點幾有人上門洗冷氣機，一次過洗咗四部機，一次過洗走咗我幾條紅衫魚同一隻金牛。同期十二點檢查石油汽爐，佈告唔理想，又係時候換機。中期加插 Ocean 到訪，小休食咗個 tea。忙忙碌碌大半日，朋友仔嘅"蠔門夜宴"又趕唔切出席，最後簡簡單單又一餐。是日晚餐係「鮮茄炒蛋」+「阿四煎餃子」+ 公仔麵。