Last day

今日係女友 last day, 同事們為佢攪咗個 farewell lunch, 好耐都無試過有成三圍枱咁多同事齊齊食晏喇. 下午茶時段輪到女友請, 前後買咗七打蛋撻西餅先夠分, 仲要手快有手慢無!

九曲十三彎

換晒衫臨出門口先嚟落雨, 仲要係唔大唔細果種, 頂! 一致通過休息一天, 改為同女友去 Elements 行街街. 今次發現咗一間大書局, 好多外國雜誌都有本 sample 任睇, 非常正! 我地就睇咗成粒鐘, 大家有時間都不妨去睇下書偷下師. 之後趕去女友舅父屋企拜年, 中環半山啲路九曲十三彎, 有啲路仲斜到成三十度角, 真係坐响架車上面都覺得牙煙!

買碟日

訓醒覺陪 董事長夫婦 飲茶, 之後將平時响公司各部門收集返嚟嘅玩具放上倉, 順便又攞返啲貨去賣. Join 埋女友過 LCC, 完咗就行過旺角食晚飯, 今晚玩懷舊幫襯"美而廉". 時間尚早, 到荷理活買咗隻 Sound Track 後再過信和買埋 "方大同 - 未來", 駛完錢就乖乖歸家喇!

山水 - 關淑怡

作曲：Chistiane Hebold/Rene Runge/Andreas Kaufhold/Piet Blank
填詞：夏至　編曲：Johnny Yim

透出　荷葉裡　清秀色
化開了筆跡　似水銀變色
瀟灑看水墨染色　滲得出刺激
在捲進寫意境界　洗滌壓迫
聽得到鬧市外燦爛出風雅
山與水抱擁我彷似我家
暢快嗎　繡上單身小暗花
愛上它　上水彩色雪花
擦過孤單單火花
聽着美麗進入我身體
聽着美麗進入我身體
撥開　掃胭脂手勢
你像我像你像放得低
放入了熱愛滴進心溪
鏡面　發光的天際
對倒　暗啞的海底
你像我像你像放得低
世界會共我雙棲
Loneliness is full of life
Loneliness itself is full of life
Wait up　發光的天際
Even loneliness is full of life
Loneliness itself is full of life

初十五團拜

未過初十五都仲係仲拜年時, 收工趕入籃田到 晶晶 屋企團拜兼晚飯. 一輪炒粉麵飯之後仲有煎糕生果同湯圓... 再咁食法就快變肥仔, 係時候忍下口喇!

二少奶 生日快樂!

迷你全盒

大部份同事都放完晒假開始返工喇, 又係搵真銀嘅時候! 帶住我地個時尚又精緻嘅迷你全盒行咗個轉, 收獲不錯喎! 加埋啲 vendor 上嚟自動獻身, 今年又幾豊收喎... XDDD~

Unexpected Shirley Kwan in Concert 08

Unexpected Shirley Kwan in Concert 08
演出日期: 2008年4月24日至25日
演出地點: 紅磡香港體育館
票價(HK$)：$400/$250/$100

大手買入

又係時候過會展睇 show, 今次嘅主要目的係買餅卡. 午後响車站接咗女友就齊齊坐"天星"過會展, 去到會場 call 個朋友帶我地免費入場. 行咗個零鐘已經攪掂晒, 家陣手頭上貨量多到可以攞去炒. 之後上 雲遜 屋企拜年, 一邊食外賣 pizza 一邊睇唔似鬼片嘅鬼片"C+偵探"!

炸彈仔滿月酒

大部份 vendor 同大陸同事仲放緊假, 攪到好多 job 都要自己落手落腳做, 忙到傻. 夜晚趕過灣仔飲炸彈仔嘅滿月酒, 時間剛剛好無遲到. 同枱有個朋友係迷你版開心果, 全枱由開席笑到散席. 佢仲比人屈連食三碗翅, 即時改名"陳灌翅", 笑死咗好多細胞!

情人節... 禮物

圖中呢扎花, 就係我今年送比女友嘅花... 無錯, 係張相嚟嘅! 嘻嘻, 唔買真花怕唔怕比人詐形? 當然唔會啦, 幾百蚊買扎花先比佢丙呀! 又唔需要同人 show off, 不如留返啲錢, 夠全日食飯睇戲直落喇. 當然禮物就不能少, 今年各自送咗一樣價錢唔算貴, 但知對方有需要同有用嘅嘢, 成個情人節溫暖晒!

年初七 - 開工大吉

話咁快又放完農曆年假, 又要收拾心情開工! 開機埋位一睇得百幾個 email, 比意料中少喎. 再睇下放假前嘅手尾, 美國同事完全無乜點跟進過, 即係我放假時佢又放, 唔怪得之無 email 啦, 哈哈! 好多同事都連住放大假, 攪到公司人唔多水靜鵝飛, 要開個 itune 聽下歌仔先有啲聲!

年初六 - 最後一擊

假期完結前最後一擊, 今日出征將軍澳. 原本想順路一次過探訪幾個朋友仔, 可惜時間唔啱, 最後只到訪兩個家庭. 先約 皮雅 食 tea, 再上佢屋企拜年, 期間佢老公仲攞咗款新產品叫我地俾意見. 中途離場, 行過幾步上埋 大佬 屋企拜年. 坐咗個零鐘之後, 又係時候返轉頭搵 皮雅夫婦 食上海菜, 離開 TKO 已經十一點幾!

年初五 - 盆菜宴

話咁快就初五, 今日第一個目的地就係青衣, 先到女友叔叔屋企拜年, 之後約咗 契媽 飲下午茶. 飲完茶哬佢屋企附近行咗個圈, 原來沿海皮行就可以行到去青衣城, 又幾方便喎! 黃昏趕返出紅磡 Ah E 屋企團拜兼食盆菜. 今晚幫襯"鴻星盆菜", 裏面有鮑魚, 海参, 花膠, 蠔豉, 東菇, 燒肉, 豬手...等等材料, 可惜一個盆菜又邊夠我地八隻蝗蟲分呢?! 所以要另加兩盤壽司, 兩碟雞翼同一個大個 pizza... 臨尾再煮多個"極品盆菜仔公仔麵"就剛剛好喇!

年初四 - 賀年波

年初四剛剛重開球場, 當然要打返場賀年波. 之後女友上球場 join 埋我一齊過西灣河 師姐 屋企拜年. 難得過海, 一於唔好比佢停! 約埋 董事長夫人 上 Uncle White 屋企拜年, 之後再落灣仔食飯. 路過間餐廳見個老闆好熱情咁招呼, 就即管試試. 我要咗個"地獄牛魔王(咖哩牛腩飯)", 女友要"雜菌魚麵, 董事長夫人就要"海南雞飯", 總括味道同價錢都ok, 下次可以再嚟. 最後上埋 陳婆婆 屋企攞封大利是, 全日大功告成!

年初三 - 醒獅

今日要早起, 一訓醒就到未來外母家團拜. 中午時間陸陸續續有親戚加入, 正式開餐時已經圍滿十幾二十人! 期間仲有醒獅上門討利是助慶, 熱鬧非常. 黃昏時間返出荃灣行街街, 順便齊齊買情人節禮物, 之後就約埋 董事長夫人 去鋸排.

年初二 - 勁食團拜

今日全程跟足女友, 中午先到深水埗, 上 婆婆 屋企食團年午飯兼拜年. 小休之後, 一行十幾人轉戰到太子 肥姨 屋企, 品嚐好味道嘅自製年榚, 蘿白榚, 芋頭榚, 紅豆馬蹄榚同腰果糊! 晚飯時間就到 姑媽 九龍塘屋企拜年, 再落九龍城食泰國菜. 全日食食食之後, 飽飽之餘, 怕且已經重咗幾磅!

大年初一 - 開年飯

由於 董事長 今晚要開工, 所以今年開年飯要改食中午飯. 一點左右 二少爺 一家就返到林公館, 等我就落車站接埋女友, 兩點零鐘就正式開餐. 董事長夫人 今日大發神威, 有雞有魚有蝦有菜有鮑魚有湯圓, 全程食足兩個鐘. 而 卓言仔 就全程好留心咁睇"朱古力將門人"同玩佢架特大玩具車. 之後中場休息, 女友先去拜年, 七點鐘再 join 返我一齊睇"長江七號".

大年初一

祝大家:
鼠年快樂, 身體健康!
萬事如意, 鼠運享通!!

送豬迎鼠

正式開始放農曆年假, 終於有覺好訓. 下晝留响屋企執拾無去飲茶, 不過就有愛心速遞嘅粥同腸粉. 夜晚輪到去女友姑媽屋企食團年飯, 加埋都有成十幾人, 仲提早有大利是收添! 之後打算過旺角行花市, 但係勁多人, 即時改 Plan B... 就係去食龜齡膏, 跟住去 shopping. 行完街街先坐車返舊墟行花市兼執平貨, 再慢慢陪女友行返屋企.

藍天白雲

尋日仲係昏天暗地, 預咗今日會無波打, 點知訓醒出露台一望... 藍天白雲!? 去到球場先知一半人唔到, 但係天氣好, 得三個人打足全場都依然無問題! 照舊食完 tea 就接女友行街, 順便等埋 小文 食晚飯. 由於佢新年無假放, 所有今晚專程約我地出嚟食團年飯, 仲爭住比錢... Okay, 大個仔喇唔同你爭, 下餐我嘅!

團年飯 x 2

原先係約聽晚食團年飯, 不過要就 董事長 返工, 又要就 卓言仔 返學早訓, 所以改咗今日飲茶! 飲完茶佢地幾爺孫去行街買衫, 我就同女友返上樓睇DVD. 借借埋埋 闊少 一堆DVD, 今日就睇咗"跟蹤", 希望新年假可以睇多兩套啦. 時間剛剛好, 睇完就出發去食下一餐團年飯. 夜晚呢餐係女友婆婆果邊嘅親戚, 一如已往兩圍枱, 今次大家都好準時, 十點幾就食完喇!

M-nual Dinner

今晚係公司 Annual Dinner, 一如住年晌灣仔延開幾十席, 由七點玩到十一點幾. 期間有大抽獎, 有各部門同事載歌載舞, 又有表演嘉賓... 全晚表演充滿驚喜同驚嚇!

不可能再遇上, Anita 梅艷芳

一位 梅姐 識於微時嘅好友 - 羅君左，為紀念 梅姐 所寫嘅新書。收益除必要開支，全部撥捐善終服務機構"贐明會"。網上見到好多 fans 話買唔到初版，我呢本係响"中華書局"買嘅，有興趣可以去睇睇。

球隊團年飯

今日得果十二度，成個球場涼陣陣，打完波個身都汗無滴。夜晚係球隊嘅團年飯時間，地點係"九龍富豪酒店"食 buffet。點解咁富貴食 buffet? 因為手頭上有30% off coupon 囉! 我仲有兩張，邊個需要就 call 我啦! 講返轉頭，啲嘢食不過不失啦，燕窩蛋撻 同 cake 都唔錯，有折都可以一試嘅，正價三佰幾就偏貴喇!

太子半天遊

又係金都半日遊嘅時間. 哈! 咁耐無上去行, 路過見到四眼哥哥, 佢一眼就認得我地喎. 咁有緣即管坐低聽下, 比個機會佢喇. 之後行埋過花墟, 真係花多眼亂, 樣樣都要格下價, 要做個精明消費者嘛!

結婚週年紀念日

今日係 董事長夫婦 嘅結婚週年紀念日，當然要抽時間陪佢地食飯慶祝。地點菜色任由佢地發板，基於天寒地凍，最後都係去食"拾拾下"。

特長壽司

每次趕時間嘅時候，變形金剛 就會發揮佢阻住地球轉嘅功能! 攪到我遲到成粒幾鐘，好彩食日本嘢通常都續少續少叫，可以邊食邊等啫! 今晚食新舖"板長壽司"，最得我地歡心嘅係 特長鰻魚壽司，味道唔錯架。雖然我唔鍾意食魚生，不過都睇得出啲魚生幾新鮮。我班 friend 最滿意係前後坐咗成三個幾鐘間舖都無咋形之外，仲會自動自覺加茶添!

宵夜晚餐

臨近新年，大編輯 同自己都忙到九彩，約咗成個月都就唔到時間食餐飯。今晚終於排除萬難成事，雖然呢餐係宵夜兼得個零鐘，但總好過約到出年吖嘛!

抵食自助餐

話咁快又到星期日，可以運動下輕鬆下。夜晚約咗 董事長 同 董事長夫人 到 CWB "紀律部隊人員體育及康樂會"食自助餐。起初知道個價錢嘅時候都無乜期望，但正式開始之後，不斷有唔同嘅食物款式替換兼且味道唔錯，又真係十分抵食喎! 以每位 $108 嘅價錢，有生蠔魚生、六款沙律、兩款湯、十幾款熱薰、燒牛肉燒羊肶、十幾款 cake 同甜品、雪糕杯任食、咖啡果汁任飲... 都係果句，"抵食"! 各位有親戚朋友係會員嘅可以一試。

寶寶禮物

今晚應邀出席 vendor 嘅 annual dinner，仲請咗喬寶寶做表現嘉賓。開頭一段表演都頗為沉悶，直到玩遊戲開始先發揮到佢攪笑本色。最頂癮係啲禮物，輸咗嘅有一張寶寶簽名相。贏的話，女嘅禮物係靈芝孢子，男嘅竟然係寶寶做代言人嘅男性補品... 佢仲一輪咀咁勁賣廣告，攪到啲得獎者面紅耳赤，笑爆咀!

R2D2 又覆診

好返幾日，R2D2 又再病發完全開唔著。再帶佢睇醫生，去到診所插好電制就著返喎?! 之後半個鐘不斷同步開唔同嘅 program 試機，乜事都無喎?! Why why tell me why? 最後醫生認為屋企電流或者 cable 啲接觸口可能有事，返去開機前再插過啲線試試。另外仲以低價賣咗條 cable 同 mouse 比我做後備用，希望 R2D2 生生性性頂多一年半載啦!

買波鞋

今日公司隻 變形金剛 返咗大陸，少咗嘈音做嘢都暢順啲! 無人阻頭阻勢，七點零鐘就收得工。咁啱 大編輯 又打嚟約食飯，就同女友拍住拖旺角等佢啦。見到女友對波鞋已經爆晒邊，即刻捉佢去波鞋街買新鞋先，點知我地買完鞋 大編輯 都仲响公司未走得?! 唯有放棄等佢啦，我兩個自己去"康樂冰室"叫個二人小菜餐撐枱腳算喇。

真係咁邪?!

今朝响屋企執嘢嘅時候搵到一張舊同事嘅結婚相，心諗除咗其中幾個間唔中會見面，其他連响街碰面都未試過，幾時再見呢?! 幾個鐘頭之後，正當我買完外賣送比女友嘅途中，就比我撞到其中一個當日待我唔錯嘅 愛麗絲姐姐，真係咁邪?! 佢都好眼利，雖然我個造形完全唔同晒，依然一眼已經認出我。寒喧幾句發覺大家都有同部份同事聯絡，相約攪返個飯局，希望成事啦! 夜晚完咗 LCC 行到太子，諗起未見過 炸彈仔，轉頭就比我地撞到 炸彈人 買飯喎... 邪成咁，當然順便探埋 炸彈仔 啦!

極速冰變水

用咩方法，可以一秒鐘內簡易地將冰變成水?
(答案: 由於實在太容易，決定唔開估喇!)

唔怕一萬...

R2D2 病情又再反反履履... 打比醫生，佢話可能早排成日 hang 機，撞到個腦都有啲事，叫我盡可能 backup 起啲 data，以防萬一。返到屋企又著到機喎，即刻將最近嘅 data 燒落碟先，真係唔怕一萬... 只怕萬一... 到時就大件事!

忍...

忍一時風平浪靜，退一步海闊天空。

病都唔得?!

女友今朝發高燒入咗急症室，好彩無大礙，但醫生講明要多休息，比咗三日病假。幫佢通知上司，個八婆聽到即時一個"西"樣，好似咋病攞假咁... 正仆街!

試粧

今日第一次試粧，地點係金都商場三樓。無

RAM away

勁多客上公司睇 Fair，攪到我地星期六都要返公司全日 stand by，方便即叫即改! 九點幾返到去，一返就十二粒鐘... 頂! 趕返屋企帶 R2D2 去睇醫生，check 完之後又係條舊 ram 出事，今次一於狠下心腸掉咗條 ram，唔好再因為佢死機喇!

R2D2 病發

出事喇... 尋晚通宵掃完病毒今朝熄機，點知今晚收工返到屋企就 boot 唔著，入唔到 window 呀! 又唔得閒帶佢睇醫生，點算好呢? *_*

Happy New Year 2008!

　★☆★　　★☆★　　★☆★　　★☆★
★　新　★★　年　★★　快　★★　樂　★
　★☆★　　★☆★　　★☆★　　★☆★

元旦自由行

雖然元旦日可以早收工四點，可惜最後都要成六點先走得。China office 個助手今日到咗香港幫手準備展覽會，難得佢第一次到香港，當然要做嚮導等佢感受下熱鬧氣氛。先帶佢去到想見識嘅旺角，當然人山人海啦! 搵咗間咖哩專門店開餐，之後上新世紀廣場行街街，再過朗豪坊打個轉，最後到奧海城倒數! 雖然可以見識見識，但係直落五個鐘係咁行，真係行到佢怕怕~ XDDD

"炸彈仔"面世

恭喜恭喜! "炸彈仔"終於面世! 雖然差少少唔能夠成為 2008 年第一個 BB, 但好可能係 2007 年最尾一個喎, 一樣咁特別啦!

今夜只因您

唔經唔覺就四年，個感覺有啲似有一個好耐無見嘅朋友去咗遠行，聯絡唔上，但係久唔久又會聽到佢一啲消息。近排公私兩忙時間好唔見駛，今晚怱忙趕到只出席十五分鐘就要走，雖然趕到氣咳，但我知道自己完全唔出席的話，事後一定會後悔。Anyways，遲少少就到時間再入寶蓮寺探妳!

永遠懷念

TB Gathering

今晚 Fanclub 有個"梅艷芳舞台欣賞會"，雖然已經好努力咁安排時間，可惜最後都係趕唔切去睇... 麻煩晒 Ocean 幫我攞紀念品。既然趕唔到第一個約會，唯有直接出席下一個，仲由預計中嘅遲到變成準時到。好耐無見 TB 班朋友仔，今晚好難得約到成二十個人一齊"拾拾"下呀! 食完成十一點大家都意悠未盡，又話食糖水又話去 drink，不過我同女友真係好攰喇，所以決定閃先!

RTHK - 不死傳奇 梅艷芳 特輯

仲有兩日《不死傳奇》就有得睇，據閒有兩首從未曝光新歌片段，不容錯過! 亦因為版權關係，特輯只可以播一次唔會重播，大家記得睇呀! 播放時間係12月29日晚上19:35-20:30。


宣傳片段

X'mas Party

聖誕節唔開下派對又點似樣? 所以集齊各隊員，一行八個人上 Ah E 屋企攪攪震。開頭明明話全部外賣唔好整，最後各位靚女咪又係忍唔到手... Ah E 整"什果沙律"，史狄女 煮"咖喱雞"，女友 煮"炆雜菇"、"三色波蘿雞柳"，再三人聯手合作一個"煎/鹽焗雞翼"。好多嘢食? 未算! 唔計零食同汽水、紅酒，仲有兩盤"壽司"同叫咗個 pizza 呀! 最後當然食唔晒啦，由繼續放大假嘅 闊少 打包。個個玩到忘形唔知時間，幾乎趕唔到尾班車!

聖誕有朋自遠方來

今日聖誕節, 約咗女友媽媽飲茶. 點知一去到酒樓成圍枱人... 原來佢地朝早返過教會, 啲親戚我又見過晒, 所以伯母話齊齊食開心啲! 飲完荼去睇女友妹妹有份做幕後嘅話劇"風流劍客", 又幾好睇喎, 完咗仲有免費咖啡飲添. 之後趕入沙田同女友個死黨 WingE 食飯, 上次女友晌美國多得佢照顧, 所以今晚堅持要請佢! 見佢長居外地未試過快餐店都可以火鍋, 就帶咗佢去"美心"試日式火鍋, 一邊食一面傾, 傾到人地收舖... 仲未傾完喎, 點算?! 唯有轉去食糖水囉, 兩位女士幾乎傾到無車搭先肯擇日重賽咋.

Merry X'mas 2007

Home Dinner

好耐無返屋企食飯喇，所以今晚決定同女友齊齊返去做節。

X'mas cake

露露 過兩日去旅行 join 唔到 X'mas party, 所以佢 hand made 定咗啲蛋糕仔今日送比我地. 賣相唔錯架, 味道呢... 都 OK 喎, 下次再加多少少朱古力就仲正, 70分啦!

齊齊造冬

天氣唔凍唔熱, 攪到個人都好似病病地, 訓咗成七,八個鐘都仲係有啲攰. 之前應承女友好耐, 今日終於有比較充裕嘅時間過黃埔睇衫, 雖然行行睇睇幾粒鐘, 但只要搵到心頭好, 再行耐啲都無問題. 夜晚約咗女友親戚"造冬", 因為老人家歡喜, 地點依舊係鴨寮街某資深酒家. 上次一圍已經夠, 今次多咗人抽到時間, 要開足兩圍先夠坐, 但仲好似話未齊人喎... 咁齊人要幾多圍呢?

韓式晚餐

大編輯 慣性星期四搵我地食飯, 難得我地今晚可以早啲, 行遠少少落旺角啦!

讀者投訴

今日又收到讀者投訴我唔 update 個 blog... 快架喇, 等我整理好之前每日 drop 低嘅 draft 先啦... 總之07年內 update 返晒, okay?

兩個"第一次"

今日臨時要上 China office, 所以 book 唔到公司車要自己上. 過到羅湖等咗半粒鐘都無車到, 原來大陸同事唔記得 call 白牌車... 如果唔係隔離 team 有人一齊我實掉頭返香港! 最後唯有坐的士, 亦係我第一次响大陸坐的士. 雖然後座無安全帶都幾唔安全, 不過都算預到個好司機, 一路都揸得好定. 上到去見到大老細先知佢都上嚟開會(唔怪得之 book 唔到位啦...)! 收工 call 車走時, 見時間尚早就同隔離組 白賴仁 到"書城"一遊, 仲買咗隻 梅姐 嘅大陸版 DVD. 走時要自己坐地鐵返羅湖站, 第一次坐深圳地鐵, 又幾乾淨企理喎! 同女友夾好時間晌火車站等, 之後去行街街, 路過一間新開張嘅茶餐廳, 又可以試新嘢喇!

CAS & Taxi

不死傳奇：梅艷芳

香港電台製作《不死傳奇》，以嶄新角度演繹已故巨星的光輝生命，與觀眾重溫屬於每 個香港人的集體回憶。十二月二十九日晚上，與你重溫香港的女兒 -- 梅艷芳 的動人故事。


愛將 Live in 1986

聖誕"貨物"

下星期就要擺展覽, 但係好似乜都未開始準備, 所以決定今日一打完波就上倉先揀定貨, 唔駛到時滾水淥腳帶漏嘢! 接埋女友上倉, 執執下突然醒起臨近聖誕節, 即刻打比 昌老闆, 問下佢要唔要貨過聖誕?! 一句"無問題", 即時更改計劃先摷聖誕貨. 最終搵咗兩大箱, 連同兩大手抽袋, 同女友飛的士出 昌老闆 旺角個倉寄存, 順便加句"慢慢賣唔駛急, 過完聖誕節先計!"... 當然最好就幫我賣晒佢啦!

第尾牛排

Seven & Eleven

肥蟹 中山工幹返港約晚飯, 相差唔夠十分鐘, 大編輯 又打電話約晚飯... 可惜一個七點一個十點時間唔啱, 唔係佢兩個可以順便見過面. 最後七點先同 肥蟹 先食個快飯, 之後返公司繼續博殺. 到咗十一點準備叫車走時, 大編輯 又打嚟話收得工喎! OK, 橫豎都係坐的士, 即管陪佢飲多杯奶茶先返屋企啦!

Juno Live Music Show

因為 SK 做嘉賓嘅關係, 今晚原本有免費飛睇 Juno 音樂會. 可惜排山倒海嘅工作, 根本就行唔開...(#^&%*)! 好彩 SK 只係唱咗半首歌, 去唔到聽都唔算大損失. 放工返到屋企, 朋友仔已經將一批私家相 upload 上網站, 如果想睇好有型嘅 SK, click HERE!

雙糧月

終於等到十二月, 一個出雙糧嘅月份! 記得好友話份人工已經包括咗受氣, 希望今個月順順利利, 啲氣唔駛受雙份啦!

一年一會

好耐無試過賴床唔願起身, 但係今朝就拖拖拉拉到成十二點, 攪到滾水淥腳咁換衫去打波. 臨行前收到 message 要幫手買飛, 球場唔夠人又行唔開, 點算? 好彩 Ocean 同 大佬 抽到時間去買, 麻煩晒! 食完 tea 買定燒餅接女友, 之後齊齊陪 史狄女 去買滑鼠. 夜晚女友要去數碼港飲喜酒, 送佢過海之後幫佢攞個運動袋返公司, 再落旺角搵 艾域 食飯. 呢餐飯都巴閉, 時間一改再改, 差不多約咗一年先成事!

葛福臨佈道大會

女友個伯爺响外國返咗香港探親, 由於時間緊迫, 只可以相約飲個午茶. 尋日放咗個"半天假", 結果就係今日飲完茶要返公司 OT! 極速攪掂啲手尾, 準時七點趕過大球場參加"葛福臨佈道大會". 出乎意料咁多人, 去到 CWB 地鐵站已經有廣播話大球場爆滿, 叫大家轉到馬場! 排隊入到馬場要坐草地, 對於我地呢啲唔識打坐嘅人確係為難, 唯有全程不斷轉換坐姿以防腳痺!

半天假

公司每年都會有一日"半天假"活動, 旨在聯絡各同事感情, 全個部門嘅員工都一定要參與. 之前已經試過 BBQ 同 碌LING, 今年就 book 咗酒店食"高級下午茶". Lunch 過後依時集合, 玩咗一兩個無聊 game 就浩浩蕩蕩出發去酒店, 前後玩多兩粒鐘左右就散水. 難得早收工, 今次堅決唔返公司, 一於同女友去拍拖行街街! 夜晚返咗過尖咀"映月樓"飲我表妹嘅喜酒, 仲要無厘頭比人捉咗去坐主家席, 攪到我同女友成晚都坐得唔係好自在!

"忠B"面世

恭喜張氏, 話咁快"忠B"今日出世喇! 為免我地呢班哥哥姐姐(uncle/antie)嘅嘈音影響你聽覺發展, 遲啲先嚟探你啦!

梅艷芳紀念活動

「今夜只因您 ' 07」悼念晚會
地點 ：藝穗會天台 - 中環下亞厘畢道2號天台
(要上兩層樓梯，請各位留意)
日期：2007年12月30日(星期日)
時間 ：7:00 pm
費用 ：免費開放予公眾人士參加，送花請於4:30 pm後

我不會唱歌 - 關淑怡

作曲/詞：林明陽

你就是空氣　讓我能呼吸　
像四季　自在交替
我願自己是暖暖的毛衣　
可以給你　遮風和擋雨
你若是天際　我就有雙翼　
我願意　永不棲息
我是一個關不上的抽屜　
你若願意　放下你的秘密

我不管白晝或黑夜物換星移　
老的不能言語還要一起
冬天的花朵不是奇蹟有愛就可以

我不管流淚或歡喜都是勇氣　
讓生命的樓梯通往甜蜜
我不會唱歌若是我　
失去(了)你　(失去你)

天空又為我們下起雨　
我靠在屬於我的雙臂　
為了你我什麼都放棄　
除了愛你

Live Earth CD/DVD

As announced by Warner Bros, they will be released an internationally Live Earth CD/DVD today. While the CD includes Madonna's "Hey You", the dvd features her "La Isla Bonita" performance with Gogol Bordello, get your video preview here!

搖頭擺尾

趁星期日叉叉電, 訓個飽先起身去打波. 食完 tea 去接女友, 响旺角行咗陣就同佢齊齊返屋企, 因為要幫手做咕哩. 食個快飯, 穿梭兩間寵物店, 買完貓沙再買貓糧, 即時多咗幾十磅上身. 為免運動量超標, 最後都係坐的士返女友屋企. Donald 同 小白 feel 到有嘢食, 一見我地就搖晒頭擺晒尾, 懶可愛咁~ XDD

週末節目

訓醒覺就趕過去 LCC 上最尾一堂, 完咗就慢慢過太子一間出名"波羅油"嘅茶餐廳食 lunch. 之後就係最唔想嘅節目---返公司 OT! 星期六無狗吠又真係做得快手啲喎, 晚飯一於買飯盒, 爭取時間做到幾多得幾多!

感冒+腸胃炎

硬頂咗幾日, 個肚都好似洗衣機咁, 都係見見醫生 uncle 穩陣啲. 五點幾開完個會, 打個電話掛號之後就飛落旺角. 好多病人呀, 等咗成個鐘先輪到我. Check 完晒無大礙, 主要都係感冒引起腸胃炎, 怕且都要忍下口食幾日清淡嘢喇!

約晚飯=食宵夜

又要 OT, 晚飯時間堅持出去透透氣. 正當與同事 CC 咀咒班高層咒到慶高彩烈嘅時候, 大編輯 打嚟約食飯... too late 啦! 可惜我根本無咁早走得, 叫佢唔怕夜就改宵夜喇, 佢又 ok 喎, 最後見面時間已經差不多十二點!

兒童禮物包

臨近聖誕, 公司發起咗一個慈善活動. 所有參加者要準備一份禮物包, 對象係 5-10 歲嘅小朋友. 禮物包內容係不少於五件適合兒童嘅物品, 收集後透過慈善團體轉贈有需要嘅小朋友. 我準備咗三份, 每份內容都有少少唔同, 隨便抽出一套影咗張相留念.

原形畢露

放咗一日假, 都知今日會有排忙. 最煩係 變形金剛 竟然將一個好趕嘅 job hold 住唔放, 點都要等我返去 approve, 所以一早坐低就一大堆電話問長問短忙到一頭煙. Settle 咗之後個 vendor 問我點解係都要等我覆, 問得好, 我點知呀?! 可能有人(?)平時得把口話有跟我地啲 job, 到真係有事時就發覺自己乜都唔知, 怕有鑊氣掛?!

靚人靚衫靚景

今日請咗假, 全心全意做一個專業 model! 有好嘢當然係同女友拍住上啦, 一於嚟個靚人靚衫靚景嘅絕佳組合! 上兩次化妝都因為拍廣告, 啲感覺好唔舒服, 但係今次又 okay 喎(事後女友同我講佢留意到全部係用名牌化妝品). 天公造美, 原本天陰陰, 但係當大家化好妝襯好衫之後太陽伯伯就返出嚟, 成 team 人即時醒晒正式開波. 經驗所得一般都要成八粒鐘, 所以一早預咗玩足朝九晚五. 笑呀笑影呀影, 間場時問助手哥哥戰況如何, 佢話覺得大家都交足功課, 應該有得早收(真係咁好?). 最後又真係唔駛四點鐘就攪掂晒, 攝影師仲續個握手話合作愉快, 勁! 拍攝中途都有好笑嘢, 例如女友周身郁無時停, 攝影師叫要佢乖啲. 而我唔笑個樣 cool 過攏似殺手, 微笑時又有幾分奸人占, 要勞煩攝影師不停講笑話引我發放燦爛嘅笑容~ Cheer!

抖足精神

由於聽日要做 model, 打波時格外小心, 唔係有乜差池啲錢就泡湯. 食完 tea 接埋女友, 平時四圍走, 今日竟然因為怕唔夠休息, 唔知去邊度好喎?! Okay, 咁就留响旺角行個轉算喇. 行完街食完麵就送女友去坐車, 早啲返屋企抖足精神, 聽日影返輯靚相!

"世界文明瑰寶"展覽

今朝陪女友去洗牙, 我當然順便洗埋, 計一計原來自己成十幾年無去過牙醫度洗牙喇! 之後就過尖咀睇"世界文明瑰寶"展覽, 展品來自"大英博物館", 即係當年英國佬四圍搶劫嘅賊贓! 有啲公元前嘅展品真係幾鬼斧神工, 極奇精美. 相反公元後因為有極權國家打壓文明, 技術明顯地停留甚至退化! 睇完落太子攞衫, 竟然做錯款呀?! 個師傅話我要果款咁誇, 上次度身時以為聽錯... 所以做咗件個花無咁勁... 好彩間舖頭仲有唯一一件同款嘅樣板而我又啱身, 就攞住呢件頂檔先啦! 時間尚早, 飛上倉睇下有仲乜值錢嘢可以變賣, 順便又可以補一補貨.

日式火鍋

又因為 變形金剛 意見多多, 攪到我八點幾先收得工... 正一"雞絲粉皮"! 女友已經心儀咗"吉野家"個日式火鍋一段時間, 既然都無乜事幹, 就今晚去試啦! 味道都免強 okay, 不過牛肉太少喇!

扮專業, 講癈話

一返工 STARBUCKS 就請飲咖啡請食餅，仲以為有個好開始?! 開行 turbo 無停過，目標時間六點鐘收工... 正當一切 on schedule，點知一封 send 錯比我嘅 email，令到我白白浪費成粒鐘。搵資料唔係最耐，聽 金魚 扮專業講癈話先最花時間! 玩到最後要成七點幾先走得，朝早杯咖啡仲未飲完，真係有啲灰!

百利一遊

已經開咗兩晚 OT, 今晚以為有曙光. 點知臨收工有單要知會 變形金剛, 一等就等咗佢兩粒鐘.... 我頂!!! 最後落到街都成八點, 想陪女友去嘅地方都趕唔切, 唯有過百利行一陣, 好彩都有啲嘢啱睇咋!

人在江湖

外國分公司有"鑊"四圍搵人"頂", 攪到班高層神經質, 份份 job 都驗屍咁驗, 辛苦嘅當然係我地呢啲有身份無地位嘅員工. 八點幾未走得, 索性同隔離部門 八卦公 出去食個飯先. 食完飯叫女友先走, 我返上去再戰江湖, 目標係: 今日做夜啲, 聽日唔 OT!

我要早收工

本星期個 target 係六點收工，可惜第一日就滑鐵盧。上一季嘅手尾拖拖拉拉死唔斷氣，呢頭做完又加多個新version，玩咩?! 一千個唔願意都唔走得，只好陪女友食完晚飯，自己再返上公司... 妖!

奄尖二人組

星期日慣常要運動吓, 點知今日中計, 明明話打三粒鐘, 去到先知有一個鐘蒸發咗, 等我仲懶禮讓特登遲啲到...haha, 正傻仔! 尋日翻箱倒篋都搵唔到件恤衫, 所以食完 tea 捉埋 闊少 齊齊去睇衫, 三個人行咗兩個目標商場都無功而回, 唯有放 闊少 先走, 我同女友兩個繼續向太子進發. 行咗幾粒鐘都只得一間舖頭睇啱, 問一問果款重要無現貨... 無計啦, 可能我地真係太奄尖喇, 唯有度身訂造囉!

繼續生日飯局

話說女友今朝一早要到薄扶林，點知坐著架飛車攪到唔係好舒服，所以今日個 schedule 有啲亂。下晝趁住女友晌旁邊小睡休息嘅時候，開行 turbo 搵我件陳年恤衫，可惜最後都無功而回。夜晚過 LCC，完咗聚會之後會合 大編輯 同 雞肥，一行四人去旺角"拾下拾下"。雖然前後食咗幾粒鐘兼要趕尾班車，但完完全全清晒枱上面嘅食物，大成功呀!

董事長 生日快樂!

十一月排住隊生日，今日輪到 董事長，全家總動員到太子警察會食晚飯慶祝! 可惜公司有人(?)阻頭阻勢，攪到我同女友遲大到... 好彩有 卓言仔 成晚陪住爺爺玩，又不斷四圍走同講唔咸唔淡嘅 BB 話，哄得爺爺好開心，真係遲多兩個鐘都無問題呀!

Happy Birthday to my LOVE!

Happy Birthday to you!
Happy Birthday to you!!
Happy Birthday to my ~ Love!
Happy Birthday to you!!!

我勁愛你 - 何韻詩

作曲：R. Berggrensson
填詞：黃偉文 編曲／監製：英師傅

齊齊來談情　直到破產
齊齊來談情　直到每一科也是零雞蛋
由晨早衝到晚
仍然不怕捱殘　仍然相當夠撐

齊齊來談情　易過劈板
齊齊來談情　就算有傷風也突然好翻
忘形得反了眼　全場衝上圍欄
用大聲公叫喊

而你有時拿著武器
奇在我仍然勁愛你　奇在我從來未知死
博愛到底　心地好過迪士尼

#你愛我　我愛你　你愛我　我也要愛你
你笑我變態也要愛你
即使低低地　都這麼愛你
你愛我　我愛你　你怕了我　我也要愛你

齊齊來談情　直到你驚
齊齊來談情　直到我聲帶也突然失聲
誰人都想愛上　情人裝滿球場
仍然申請領養　

而你有時拿著你武器
奇在我仍然勁愛上你　奇在我從來未知死
(難怪我仍然勁愛上你 就算你行為十分抵死)
博愛到底　心地好過迪士尼

Repeat #

恭喜恭喜, 張氏有喜!

Lunch 出席咗一個 HR 攪嘅政治飯 meeting，前後玩咗兩粒鐘，真浪費時間! 夜晚輪到同 tennis team 慶祝，book 咗九龍城"泰之味"。今日多咗兩位(三位?)特別嘉賓 張氏夫婦，原來已經"忠"胎暗結，出嚟公佈喜訊，恭喜恭喜! 我地一如往時成班人坐埋一齊就嘈喧巴閉，希望無嚇親 BB 啦。

梳乎厘 = 生日蛋糕

生日飯一浪接一浪，lunch 有同事請食韓國菜，碗"海鮮麵"十分好味道呀。到夜晚就係失蹤已久嘅 肥蟹，識得自動浦頭都算佢有心啦。加埋女友三個人去咗尖咀 太平館，'瑞士雞翼'、'瑞士汁干炒牛河'、'焗梳乎厘'等招牌菜通通上枱。個'焗梳乎厘'成個蛋糕咁大，食完真係要運動吓。先行落佐敦送女友搭車，之後兩條友仔沿路行落旺角。去到信和 肥蟹 睇中隻手錶，咁啱我又識個 sales 喎，最後平咗成千蚊，今晚餐飯抵請啦!

伯母 請食飯

原本 伯母 今日放假約咗女友同我夜晚去"拾吓拾吓"食火鍋慶祝生日, 可惜 細妹 臨時唔得閒, 最後三個人改咗去"食為先". 無去一排感覺有啲生陌生, 侍應又換咗一半, 不過食物水準尚算 keep 得住. 今次由 伯母 請食飯, 一次過預祝埋女友生日, 多謝晒!

返來喇~

兩日一夜嘅"溫泉+碉樓"之旅圓滿結束, 各位比少少時間我 update 返啲細節, 過兩日再 click 入嚟睇啦!

快樂生辰, 離港旅行！

一年一度生日大晒，今明兩日會同愛人雙雙離港慶祝，各位忠實讀者請耐心等待 JimmyPlayground 更新啦! Thank you~ XDDD~

後記: 多謝晒各位朋友呢幾日透過 MSN, SMS, Email, Facebook... etc. 嘅生日祝福 ! Thx a lot!

大碗米線

今日隻狗又亂吠，不過本少爺心情大好，時運高當聽唔到! 由於聽朝趕早船，女友決定到婆婆屋企過夜方便集合。心血來潮走去深水步食米線，叫咗碗"招牌過橋米線"勁大碗，要我燃燒起荒癈已久嘅小宇宙先成功 KO 到呀!

The 3D Nightmare Before Christmas

The movie's protagonist is Jack Skellington, the pumpkin king of the holiday town of Halloween. Jack is the role model for much of the cities population. The only problem is that Jack has been around for ages, parked in a town where every single year builds up for a conventional holiday, Halloween. Later on that vary night, Jack wonders off into a nearby woods and stumbles upon an area surrounded with magical doors leading to specific holiday worlds. Jack, blooming with curiosity, enters Christmas town: a joyful, happy place with snow, glitter, children singing, and colorful lights decorating the village in its entirety. Jack is mystified by the glamorous atmosphere, and rushes home to tell the Town of Halloween about his adventures.

*Watching at Element