Seven & Eleven

肥蟹 中山工幹返港約晚飯, 相差唔夠十分鐘, 大編輯 又打電話約晚飯... 可惜一個七點一個十點時間唔啱, 唔係佢兩個可以順便見過面. 最後七點先同 肥蟹 先食個快飯, 之後返公司繼續博殺. 到咗十一點準備叫車走時, 大編輯 又打嚟話收得工喎! OK, 橫豎都係坐的士, 即管陪佢飲多杯奶茶先返屋企啦!

Juno Live Music Show

因為 SK 做嘉賓嘅關係, 今晚原本有免費飛睇 Juno 音樂會. 可惜排山倒海嘅工作, 根本就行唔開...(#^&%*)! 好彩 SK 只係唱咗半首歌, 去唔到聽都唔算大損失. 放工返到屋企, 朋友仔已經將一批私家相 upload 上網站, 如果想睇好有型嘅 SK, click HERE!

雙糧月

終於等到十二月, 一個出雙糧嘅月份! 記得好友話份人工已經包括咗受氣, 希望今個月順順利利, 啲氣唔駛受雙份啦!

一年一會

好耐無試過賴床唔願起身, 但係今朝就拖拖拉拉到成十二點, 攪到滾水淥腳咁換衫去打波. 臨行前收到 message 要幫手買飛, 球場唔夠人又行唔開, 點算? 好彩 Ocean 同 大佬 抽到時間去買, 麻煩晒! 食完 tea 買定燒餅接女友, 之後齊齊陪 史狄女 去買滑鼠. 夜晚女友要去數碼港飲喜酒, 送佢過海之後幫佢攞個運動袋返公司, 再落旺角搵 艾域 食飯. 呢餐飯都巴閉, 時間一改再改, 差不多約咗一年先成事!

葛福臨佈道大會

女友個伯爺响外國返咗香港探親, 由於時間緊迫, 只可以相約飲個午茶. 尋日放咗個"半天假", 結果就係今日飲完茶要返公司 OT! 極速攪掂啲手尾, 準時七點趕過大球場參加"葛福臨佈道大會". 出乎意料咁多人, 去到 CWB 地鐵站已經有廣播話大球場爆滿, 叫大家轉到馬場! 排隊入到馬場要坐草地, 對於我地呢啲唔識打坐嘅人確係為難, 唯有全程不斷轉換坐姿以防腳痺!

半天假

公司每年都會有一日"半天假"活動, 旨在聯絡各同事感情, 全個部門嘅員工都一定要參與. 之前已經試過 BBQ 同 碌LING, 今年就 book 咗酒店食"高級下午茶". Lunch 過後依時集合, 玩咗一兩個無聊 game 就浩浩蕩蕩出發去酒店, 前後玩多兩粒鐘左右就散水. 難得早收工, 今次堅決唔返公司, 一於同女友去拍拖行街街! 夜晚返咗過尖咀"映月樓"飲我表妹嘅喜酒, 仲要無厘頭比人捉咗去坐主家席, 攪到我同女友成晚都坐得唔係好自在!

"忠B"面世

恭喜張氏, 話咁快"忠B"今日出世喇! 為免我地呢班哥哥姐姐(uncle/antie)嘅嘈音影響你聽覺發展, 遲啲先嚟探你啦!

梅艷芳紀念活動

「今夜只因您 ' 07」悼念晚會
地點 ：藝穗會天台 - 中環下亞厘畢道2號天台
(要上兩層樓梯，請各位留意)
日期：2007年12月30日(星期日)
時間 ：7:00 pm
費用 ：免費開放予公眾人士參加，送花請於4:30 pm後

我不會唱歌 - 關淑怡

作曲/詞：林明陽

你就是空氣　讓我能呼吸　
像四季　自在交替
我願自己是暖暖的毛衣　
可以給你　遮風和擋雨
你若是天際　我就有雙翼　
我願意　永不棲息
我是一個關不上的抽屜　
你若願意　放下你的秘密

我不管白晝或黑夜物換星移　
老的不能言語還要一起
冬天的花朵不是奇蹟有愛就可以

我不管流淚或歡喜都是勇氣　
讓生命的樓梯通往甜蜜
我不會唱歌若是我　
失去(了)你　(失去你)

天空又為我們下起雨　
我靠在屬於我的雙臂　
為了你我什麼都放棄　
除了愛你

Live Earth CD/DVD

As announced by Warner Bros, they will be released an internationally Live Earth CD/DVD today. While the CD includes Madonna's "Hey You", the dvd features her "La Isla Bonita" performance with Gogol Bordello, get your video preview here!

搖頭擺尾

趁星期日叉叉電, 訓個飽先起身去打波. 食完 tea 去接女友, 响旺角行咗陣就同佢齊齊返屋企, 因為要幫手做咕哩. 食個快飯, 穿梭兩間寵物店, 買完貓沙再買貓糧, 即時多咗幾十磅上身. 為免運動量超標, 最後都係坐的士返女友屋企. Donald 同 小白 feel 到有嘢食, 一見我地就搖晒頭擺晒尾, 懶可愛咁~ XDD

週末節目

訓醒覺就趕過去 LCC 上最尾一堂, 完咗就慢慢過太子一間出名"波羅油"嘅茶餐廳食 lunch. 之後就係最唔想嘅節目---返公司 OT! 星期六無狗吠又真係做得快手啲喎, 晚飯一於買飯盒, 爭取時間做到幾多得幾多!

感冒+腸胃炎

硬頂咗幾日, 個肚都好似洗衣機咁, 都係見見醫生 uncle 穩陣啲. 五點幾開完個會, 打個電話掛號之後就飛落旺角. 好多病人呀, 等咗成個鐘先輪到我. Check 完晒無大礙, 主要都係感冒引起腸胃炎, 怕且都要忍下口食幾日清淡嘢喇!

約晚飯=食宵夜

又要 OT, 晚飯時間堅持出去透透氣. 正當與同事 CC 咀咒班高層咒到慶高彩烈嘅時候, 大編輯 打嚟約食飯... too late 啦! 可惜我根本無咁早走得, 叫佢唔怕夜就改宵夜喇, 佢又 ok 喎, 最後見面時間已經差不多十二點!

兒童禮物包

臨近聖誕, 公司發起咗一個慈善活動. 所有參加者要準備一份禮物包, 對象係 5-10 歲嘅小朋友. 禮物包內容係不少於五件適合兒童嘅物品, 收集後透過慈善團體轉贈有需要嘅小朋友. 我準備咗三份, 每份內容都有少少唔同, 隨便抽出一套影咗張相留念.

原形畢露

放咗一日假, 都知今日會有排忙. 最煩係 變形金剛 竟然將一個好趕嘅 job hold 住唔放, 點都要等我返去 approve, 所以一早坐低就一大堆電話問長問短忙到一頭煙. Settle 咗之後個 vendor 問我點解係都要等我覆, 問得好, 我點知呀?! 可能有人(?)平時得把口話有跟我地啲 job, 到真係有事時就發覺自己乜都唔知, 怕有鑊氣掛?!

靚人靚衫靚景

今日請咗假, 全心全意做一個專業 model! 有好嘢當然係同女友拍住上啦, 一於嚟個靚人靚衫靚景嘅絕佳組合! 上兩次化妝都因為拍廣告, 啲感覺好唔舒服, 但係今次又 okay 喎(事後女友同我講佢留意到全部係用名牌化妝品). 天公造美, 原本天陰陰, 但係當大家化好妝襯好衫之後太陽伯伯就返出嚟, 成 team 人即時醒晒正式開波. 經驗所得一般都要成八粒鐘, 所以一早預咗玩足朝九晚五. 笑呀笑影呀影, 間場時問助手哥哥戰況如何, 佢話覺得大家都交足功課, 應該有得早收(真係咁好?). 最後又真係唔駛四點鐘就攪掂晒, 攝影師仲續個握手話合作愉快, 勁! 拍攝中途都有好笑嘢, 例如女友周身郁無時停, 攝影師叫要佢乖啲. 而我唔笑個樣 cool 過攏似殺手, 微笑時又有幾分奸人占, 要勞煩攝影師不停講笑話引我發放燦爛嘅笑容~ Cheer!

抖足精神

由於聽日要做 model, 打波時格外小心, 唔係有乜差池啲錢就泡湯. 食完 tea 接埋女友, 平時四圍走, 今日竟然因為怕唔夠休息, 唔知去邊度好喎?! Okay, 咁就留响旺角行個轉算喇. 行完街食完麵就送女友去坐車, 早啲返屋企抖足精神, 聽日影返輯靚相!

"世界文明瑰寶"展覽

今朝陪女友去洗牙, 我當然順便洗埋, 計一計原來自己成十幾年無去過牙醫度洗牙喇! 之後就過尖咀睇"世界文明瑰寶"展覽, 展品來自"大英博物館", 即係當年英國佬四圍搶劫嘅賊贓! 有啲公元前嘅展品真係幾鬼斧神工, 極奇精美. 相反公元後因為有極權國家打壓文明, 技術明顯地停留甚至退化! 睇完落太子攞衫, 竟然做錯款呀?! 個師傅話我要果款咁誇, 上次度身時以為聽錯... 所以做咗件個花無咁勁... 好彩間舖頭仲有唯一一件同款嘅樣板而我又啱身, 就攞住呢件頂檔先啦! 時間尚早, 飛上倉睇下有仲乜值錢嘢可以變賣, 順便又可以補一補貨.

日式火鍋

又因為 變形金剛 意見多多, 攪到我八點幾先收得工... 正一"雞絲粉皮"! 女友已經心儀咗"吉野家"個日式火鍋一段時間, 既然都無乜事幹, 就今晚去試啦! 味道都免強 okay, 不過牛肉太少喇!

扮專業, 講癈話

一返工 STARBUCKS 就請飲咖啡請食餅，仲以為有個好開始?! 開行 turbo 無停過，目標時間六點鐘收工... 正當一切 on schedule，點知一封 send 錯比我嘅 email，令到我白白浪費成粒鐘。搵資料唔係最耐，聽 金魚 扮專業講癈話先最花時間! 玩到最後要成七點幾先走得，朝早杯咖啡仲未飲完，真係有啲灰!

百利一遊

已經開咗兩晚 OT, 今晚以為有曙光. 點知臨收工有單要知會 變形金剛, 一等就等咗佢兩粒鐘.... 我頂!!! 最後落到街都成八點, 想陪女友去嘅地方都趕唔切, 唯有過百利行一陣, 好彩都有啲嘢啱睇咋!

人在江湖

外國分公司有"鑊"四圍搵人"頂", 攪到班高層神經質, 份份 job 都驗屍咁驗, 辛苦嘅當然係我地呢啲有身份無地位嘅員工. 八點幾未走得, 索性同隔離部門 八卦公 出去食個飯先. 食完飯叫女友先走, 我返上去再戰江湖, 目標係: 今日做夜啲, 聽日唔 OT!

我要早收工

本星期個 target 係六點收工，可惜第一日就滑鐵盧。上一季嘅手尾拖拖拉拉死唔斷氣，呢頭做完又加多個新version，玩咩?! 一千個唔願意都唔走得，只好陪女友食完晚飯，自己再返上公司... 妖!

奄尖二人組

星期日慣常要運動吓, 點知今日中計, 明明話打三粒鐘, 去到先知有一個鐘蒸發咗, 等我仲懶禮讓特登遲啲到...haha, 正傻仔! 尋日翻箱倒篋都搵唔到件恤衫, 所以食完 tea 捉埋 闊少 齊齊去睇衫, 三個人行咗兩個目標商場都無功而回, 唯有放 闊少 先走, 我同女友兩個繼續向太子進發. 行咗幾粒鐘都只得一間舖頭睇啱, 問一問果款重要無現貨... 無計啦, 可能我地真係太奄尖喇, 唯有度身訂造囉!

繼續生日飯局

話說女友今朝一早要到薄扶林，點知坐著架飛車攪到唔係好舒服，所以今日個 schedule 有啲亂。下晝趁住女友晌旁邊小睡休息嘅時候，開行 turbo 搵我件陳年恤衫，可惜最後都無功而回。夜晚過 LCC，完咗聚會之後會合 大編輯 同 雞肥，一行四人去旺角"拾下拾下"。雖然前後食咗幾粒鐘兼要趕尾班車，但完完全全清晒枱上面嘅食物，大成功呀!

董事長 生日快樂!

十一月排住隊生日，今日輪到 董事長，全家總動員到太子警察會食晚飯慶祝! 可惜公司有人(?)阻頭阻勢，攪到我同女友遲大到... 好彩有 卓言仔 成晚陪住爺爺玩，又不斷四圍走同講唔咸唔淡嘅 BB 話，哄得爺爺好開心，真係遲多兩個鐘都無問題呀!

Happy Birthday to my LOVE!

Happy Birthday to you!
Happy Birthday to you!!
Happy Birthday to my ~ Love!
Happy Birthday to you!!!

我勁愛你 - 何韻詩

作曲：R. Berggrensson
填詞：黃偉文 編曲／監製：英師傅

齊齊來談情　直到破產
齊齊來談情　直到每一科也是零雞蛋
由晨早衝到晚
仍然不怕捱殘　仍然相當夠撐

齊齊來談情　易過劈板
齊齊來談情　就算有傷風也突然好翻
忘形得反了眼　全場衝上圍欄
用大聲公叫喊

而你有時拿著武器
奇在我仍然勁愛你　奇在我從來未知死
博愛到底　心地好過迪士尼

#你愛我　我愛你　你愛我　我也要愛你
你笑我變態也要愛你
即使低低地　都這麼愛你
你愛我　我愛你　你怕了我　我也要愛你

齊齊來談情　直到你驚
齊齊來談情　直到我聲帶也突然失聲
誰人都想愛上　情人裝滿球場
仍然申請領養　

而你有時拿著你武器
奇在我仍然勁愛上你　奇在我從來未知死
(難怪我仍然勁愛上你 就算你行為十分抵死)
博愛到底　心地好過迪士尼

Repeat #

恭喜恭喜, 張氏有喜!

Lunch 出席咗一個 HR 攪嘅政治飯 meeting，前後玩咗兩粒鐘，真浪費時間! 夜晚輪到同 tennis team 慶祝，book 咗九龍城"泰之味"。今日多咗兩位(三位?)特別嘉賓 張氏夫婦，原來已經"忠"胎暗結，出嚟公佈喜訊，恭喜恭喜! 我地一如往時成班人坐埋一齊就嘈喧巴閉，希望無嚇親 BB 啦。

梳乎厘 = 生日蛋糕

生日飯一浪接一浪，lunch 有同事請食韓國菜，碗"海鮮麵"十分好味道呀。到夜晚就係失蹤已久嘅 肥蟹，識得自動浦頭都算佢有心啦。加埋女友三個人去咗尖咀 太平館，'瑞士雞翼'、'瑞士汁干炒牛河'、'焗梳乎厘'等招牌菜通通上枱。個'焗梳乎厘'成個蛋糕咁大，食完真係要運動吓。先行落佐敦送女友搭車，之後兩條友仔沿路行落旺角。去到信和 肥蟹 睇中隻手錶，咁啱我又識個 sales 喎，最後平咗成千蚊，今晚餐飯抵請啦!

伯母 請食飯

原本 伯母 今日放假約咗女友同我夜晚去"拾吓拾吓"食火鍋慶祝生日, 可惜 細妹 臨時唔得閒, 最後三個人改咗去"食為先". 無去一排感覺有啲生陌生, 侍應又換咗一半, 不過食物水準尚算 keep 得住. 今次由 伯母 請食飯, 一次過預祝埋女友生日, 多謝晒!

返來喇~

兩日一夜嘅"溫泉+碉樓"之旅圓滿結束, 各位比少少時間我 update 返啲細節, 過兩日再 click 入嚟睇啦!

快樂生辰, 離港旅行！

一年一度生日大晒，今明兩日會同愛人雙雙離港慶祝，各位忠實讀者請耐心等待 JimmyPlayground 更新啦! Thank you~ XDDD~

後記: 多謝晒各位朋友呢幾日透過 MSN, SMS, Email, Facebook... etc. 嘅生日祝福 ! Thx a lot!

大碗米線

今日隻狗又亂吠，不過本少爺心情大好，時運高當聽唔到! 由於聽朝趕早船，女友決定到婆婆屋企過夜方便集合。心血來潮走去深水步食米線，叫咗碗"招牌過橋米線"勁大碗，要我燃燒起荒癈已久嘅小宇宙先成功 KO 到呀!

The 3D Nightmare Before Christmas

The movie's protagonist is Jack Skellington, the pumpkin king of the holiday town of Halloween. Jack is the role model for much of the cities population. The only problem is that Jack has been around for ages, parked in a town where every single year builds up for a conventional holiday, Halloween. Later on that vary night, Jack wonders off into a nearby woods and stumbles upon an area surrounded with magical doors leading to specific holiday worlds. Jack, blooming with curiosity, enters Christmas town: a joyful, happy place with snow, glitter, children singing, and colorful lights decorating the village in its entirety. Jack is mystified by the glamorous atmosphere, and rushes home to tell the Town of Halloween about his adventures.

*Watching at Element

Happy Halloween

Happy Halloween to all of you!

小花 回家

小花 已經離開咗兩個幾月，見今日早放工就趕去寵物醫院接返佢 (啲骨灰)。食完飯沿途行返屋企都 feel 得女友唔多妥，終於一入門口佢忍唔住喊咗出嚟! 此時此刻我可以做嘅就只係變成一個人型攬枕+毛巾啦...。

沙田火鍋

今日輪到女友要上大陸印刷廠睇色，前前後後都成大半日，OK 之後有廠車直接送佢返香港。既然係咁，一於繼續沙田啦! 原先個目的地係 food court, 可惜去到一半就比其他食物吸引住... 就係"美心"嘅 Shabu shabu 日式火鍋喇! 唔係呃你真係幾抵食架，份量都唔少架，一般人可以兩個人 share 一個餐，有圖為證!

西灣河之行

下晝打完波食完 tea 之後，過咗西灣河探女友個師姐，佢仲借咗靚靚花球比女友。飯局期間，早早已成為經理嘅師姐對近期公司暗黑政治比咗少少意見，明白明白, thanks!

揀心水靚衫

終於明白點解女仔買衫十居其九都要試身，因為一件衫睇到幾靚著上身都唔一定靚，平平無奇嘅都可以著得你好 charm 好有型。今日女友試咗好多件衫之後，最啱心水嘅竟然係一件比較 colourful、一件平時佢唔會揀嘅衫。Anyways，只要著得好睇就得啦，right?

新城市 food court

今日又要上 China office 開會，同往時一樣只得我同司機兩個，變相又成為咗我嘅專車。上晝主要留晌自己 office，下晝就抽咗個幾鐘頭落印刷廠，一切順利準時五點半坐公司車返香港。七點鐘已經到咗沙田新城市會合女友，終於可以慢慢行下大商場。行到西田發覺人山人海，原來有部份 food court 剛剛裝修好重開，多咗幾間新食店喎! 啲食物都好似幾吸引，下次過嚟幫襯下先。

放工趕上倉

因為有客留咗隻值成五百蚊嘅公仔，所以一放工就趕上倉攞貨。上得去梗係順便又摷下其他貨影定啲相比客睇啦，補完貨時間唔上唔落，又唔想去太遠，最後決定行過荃灣當做下運動。

史狄女 生日飯局

話咁快又一年，聽日又係 史狄女 牛一喇。正日留返比佢同 田田 二人世界，我地就早一日慶祝啦! 由於佢十月尾我十一月頭，住年都會一次過慶祝，不過 闊少 同 Ah E 差不多要年年包底大出血，所以今年決定分返開攪。地點係尖咀"鹿嗚春"，間嘢真係幾鬼旺，唔訂位的話怕且要十點後先有位。呢班人一坐埋都會變蝗蟲，當"片皮鴨"、"糖醋魚"、"雞絲粉皮"、"蒸餃"、"官保雞丁".... 逐一被 KO 之後, 又係時候 order 甜品。樣樣佢地都想食，最後一次過叫晒"高力豆沙"、"香蕉拔絲" 同 "豆沙鍋餅"，真係見到都飽晒!

公園夜行

好耐無試過入夜行公園，今晚心血來潮上"九公"行咗個轉... 嘩! 原來成八點都仲人山人海，男女老幼乜人都有，真熱鬧!

女人愛甜品

七點收工趕到黃埔睇制作公司嘅 sample，段 3D 片頭比意料中好喎! 不過都未睇齊 sample，遲啲可能要再跟進。開餐時間又到，咁近 Ah E 即刻 call 埋佢過嚟一齊食啦。三條友左揀右揀之後去咗食麻辣米線，因為兩位女士要留肚食甜品。下一站"芝麻綠豆"，我當然食黑中極品"芝麻糊"，今次身痕加咗"蕃薯"，女友就要"合桃糊+芝麻糊"，Ah E 就要咗每日限量嘅"乜乜橙凍(?)"，不過佢話味道麻麻地!

玩具生意難做

今日打完波食 tea 時收到 史狄女 留比我嘅"3D怪誕城場刊"，thank you! 之後 闊少 陪我行咗一陣玩具舖，只係無行幾個星期又執咗幾間喇，呢門生意呢個時勢都好難做。女友做完 gym join 返我，跟住去咗買碟，佢買咗 小萱新 EP 我買咗"飛鷹俠" DVD，一人一樣唔駛爭。時候差不多就齊齊返屋企食飯，大大條石斑等緊我地。

要錢唔要貸

尋日放咗一日假，攪到硬係記錯今日係星期日。陪 董事長夫婦 飲完茶都成三點，跟手抽住一大袋貨上個 friend 舖頭補貨，呢幾個月前前後後都賣咗一個唔錯嘅數目，keep 住唔好比佢停, 要錢唔要貸呀! 之後係女友嘅天下，買完護膚飲品再過太子攞鞋。夜晚女友要去飲親戚滿月酒，送完佢坐車之後就 join 炸彈人夫婦 食飯。好耐無傾咁長時間計，眼見佢地食上海菜時飲"酸辣湯"，之後又去食雪糕... 話我長氣都係果句，大肚婆都係要小心飲食好喎!

慢條斯理的一天

難得有假期，一於放慢個節奏回下氣。訓醒覺執下屋做下家務，再 check 下啲網上生意。之後約埋女友去"紅樹林"嘆返個下午茶，叉夠電就上倉點貸。影下相做下記錄，唔覺唔覺就幾粒鐘，收工過荃灣行街街兼食晚飯。食得茶餐廳多，今晚決定食其他嘢，最後去咗食"油渣麵"同"煎釀三寶"。

免費試玩

今晚同女友 book 咗朗豪坊間 PureFitness 試玩，仲捉埋 大編輯 一齊去。女友一向都有做開 gym，所以換完衫之後佢就自己顧自己。大編輯 同我就慢慢行晒兩層樓，各款跑步機呀、滑雪機呀、健身單車呀... 樣樣玩下。玩咗大約兩粒鐘，臨走之前再焗埋個桑拿，Good! 最後當然無 join 到啦，雖然環境真係唔錯，要成七百蚊個月都 OK，可惜我地一個星期最多只嚟到一兩次，咁咪覺得貴囉。玩完之後一行三人就過咗去"南豐"開餐，仲傾到要趕尾班車添。

3D 怪誕城之夜

月頭已經收到風香港會上呢套 3D 版嘅"怪誕城之夜"，最後打聽到會晌 Elements 呢個新場上影。記者 friend 第一時間諗起我呢個 NBC fans，先幾日打嚟話可能有首影場嘅飛比我，但係今日都仲未有聲氣，情況都唔樂觀喇! 不過無所謂啦，反正都想同女友一齊睇，遲啲自己買飛睇都一樣啫。電影網站：www.disney.com.hk/nightmare3D

Woo~woo~woo

公司隻狗間唔時就亂咁吠，真係想打電話去"愛護動物協會"或者叫"漁農署"搵人嚟捉走隻畜生! @%&$#-+*!

Volvo 144 老爺車

收到朋友仔 email，早前佢爸爸連同珍藏嘅老爺車接受訪問。話說朋友仔結婚當日已經見過實物，但對車毫無認識嘅我只係覺得架車幾靚喎... 睇過報導先知架車嘅來頭，估唔到佢年紀仲大過我，早知幫佢做兄弟時乘機坐下架古董車啦! 想睇報導嘅 Click Here!

西貢食海鮮

今日行程緊密，打完 tennis 換好衫，先去"仙桃源"食tea。之後陪 Ah E 買鞋，再陪 路路 睇球拍。跟住趕去接女友，兼且陪佢食咗兩個 Halloween Doughnuts。下一站就係到朗豪坊入邊一間健身室參觀，環境正架，不過會費好貴囉。因為約咗幾個 伯母 嘅朋友一齊慶祝佢生日，所以最後一站係趕入西貢食海鮮。成年無入過西貢，原來已經完全唔同晒樣，有好幾間大排檔已經變咗大酒家!

懷舊冰室

訓醒覺都十一點，約定女友先到又一城食下午茶，之後再過 LCC 上堂。見時間剛剛好，接住再 join 埋聚會先走。七點幾完咗就慢慢行過太子。途中 炸彈人夫婦 打嚟約晚飯，可惜時間夾唔到我就話下次先。去到太子路過一間舊式冰室，幾十年前嘅格局，咁今晚就懷舊一下啦。食到一半 炸彈人夫婦 再打嚟，原來剛剛到咗太子... 既然咁有誠意，就一於齊齊食糖水啦! 唔覺唔覺都有一段時間無見，再過多三個月 炸彈仔 就出世，大肚婆日日行四五層樓梯，自己上落要小心啲喇!

伯母 生日快樂

今日係女友媽媽嘅生日，任由主角揸主意去邊處食飯慶祝，最後 伯母 揀咗"粗菜館"。原先諗住一家齊人先開始，可惜女友妹妹遲大到，只好邊食邊等，而家啲小朋友真係無時間觀念。食完正餐意猶未盡，齊齊出發去食甜品!

扑搥買鞋

前前後後已經睇咗好幾對鞋，始終覺得呢一對比較合心意，同女友一致決定扑搥買咗佢。收工落旺角買完鞋，就齊齊去食我地喜愛嘅"興隆車仔麵"，之後再行影音舖買咗隻"小萱演唱會"DVD。

小型歌迷聚會

今日係十月十日，即是 梅姐 44 歲冥壽。今年無參加歌迷會嘅紀念活動，轉為幾個歌迷舉行咗一個小型私人聚會，地點係 karaoke，貪佢有得食有得玩有得睇有得唱吖嘛! 齊人開始就係 梅姐 嘅天下，快歌慢歌中版歌一首接一首，仲有人唱歌兼且伴舞，十個"勁"啦! 三個鐘頭好快過，電腦自動 cut 歌，出奇地埋尾兩句歌詞成為全晚嘅總結..."將今晚的一刻，送給我!"。究竟係巧合中嘅巧合，定係 梅姐 感受到我地嘅心意呢?!


由歌迷一手包辦曲詞唱嘅紀念CD
(麻煩晒李生李太幫我購買~)

梅姐 祝妳生日快樂!

有折茶餐廳

一放工就陪女友返屋企，因為要等人送狗糧. 行到一半收到電話送貨時間要改夜啲，okay，咁就晌車站附近食咗飯先啦. 去到間唔中會幫襯嘅小菜茶餐廳，落完單之後我地發現寫咗個"特"字，總數平咗幾蚊. 埋單時"裝"下人地啲單只係平得一蚊，可能啲伙計都認得我地，所以平多啲啦，嘻嘻!

海旁夜景

今晚輪到女友加班，一個人到尖咀海旁等佢收工，無聊間攞部 DC 出嚟試吓機，用幾個唔同嘅 mode 影咗一輯夜景相。時間剛剛好，影完相佢就到，perfect!

空氣愈來愈差

香港空氣真係愈來愈差，做戶外運動時就好易感受到。今日打波時 Ah E 就明顯覺得條氣唔順，唔舒服要坐埋一邊，而其他人都自動自覺打一陣抖一陣。食完 tea 散隊，見差唔多時候要買定對鞋襯衫，所以同女友行街街 shopping 去。大家都有搵到心水款，但花多眼亂，一於過兩日無新發現就 KO 佢地!

生有限，愛無限

牛屋

又係要 OT 嘅日子，收工同女友行到佐敦見到呢間經常路過嘅"牛屋"，一於今晚食好少少啦，辛苦搵來志在食嘛! 坐低睇到個價錢又唔係太貴，女友要咗個牛柳，我要咗個駝鳥+豬排，味道比意料中好呀，埋單兩個人都只係百幾蚊。

Shopping Day

女友差唔多時候要買定對鞋襯衫, 唔理三七廿一, 六點幾即閃. 女人買鞋都唔簡單, 個踭高啲低啲都會唔舒服. 好彩由旺角一直掃到落太子, 終於都比佢搵到一對啱心水啫!

網球隊飯局

因為近排各有各忙，tennis team 經常唔齊人，所以 闊少 主動攪返個飯局聯誼下。左諗右諗都唔知去邊度食，最後 Ah E 竟然同 闊少 心有靈犀咁揀咗旺角"常悅"食齋，扑槌唔駛再諗啦! 間舖頭食物水準好飄忽... 總結味道還可以啦，加上價錢唔貴，都可以去多次嘅!

失而復得

話說上星期我唔小心响櫃員機襟完錢唔記得攞，有晒心理準備一去無回頭，不過今日收到銀行通知係部櫃員機食咗，遲啲會比返我呀，Yeah!

R2D2 好返喇

公眾假期又係叉電嘅好日子，所以訓到十一點幾先起身。話說 R2D2 病情一直反覆，見今日時間比較充裕，打個電話同 電腦醫生 掛個號覆個診，成部 R2D2 抱去電腦醫院。做完身體檢查斷定條根(ram)有事，即時做返個開腦手術醫下條根，既然病人要留院觀察，我同女友就快手快腳上倉補一補貨。夜晚約咗 董事長夫婦 食任食火鍋兼睇煙花(晌電視)。食飽飽之後就接返 R2D2，即場試佢一試，食咗補品果然唔同晒，又快又勁喎!

電視城一遊

夜晚入咗電視城睇 SK 做評判嘅 "TVB8全球華人新秀歌唱大賽"，廣播道同清水灣嘅 TVB 都去過，將軍澳係第一次。現場所見都覺到個肥仔比較穩定應該贏，總算無做馬。一早預咗 SK 會唱"眾生花"，但係佢竟然同 譚校長 合唱"唱一首好歌"就真係有啲意外，十個"正"呀! 相對同場幾個歌手對 fans 嘅態度, SK 明顯比較隨和友善，連女友都忍唔住開口讚， 覺得現實同傳媒口中嘅 SK 真係好唔同。當然啦，我可以公開咁話"鍾意"嘅一定係好嘢~ 梅姐啦~ SK 啦~ 仲有"妳"啦~(各位讀者辛苦晒...) 哈哈哈!

梅艷芳成長路紀念展覽會

十月六日在尖沙咀星光大道有一個關於 香港，關於 梅艷芳 的展覽會開幕。整個展覽由零到完成，在沒有任何機構 backup 之下，直至成功籌集資金及得到讚助商支持，這群歌迷的毅力真的了不起！有時間的話，請大家支持一下這群有心人。

展覽會日期：
梅艷芳成長之路：
十月六日 至 二十日
梅艷芳珍貴影集：
十月六日 至 十一月十五日

Mega Box 一遊

日日做到無停手，今日決定要早走! 七點鐘，女友從大陸工幹回歸，先上公司搵埋我，跟手就一程車過咗 Mega Box。第一次到 Mega Box，整體地方比預期中細，人流亦都比意料中少。留連最耐係家居用品店"Spotlight"，特別係 DIY 美術用品部門。行咗個幾鐘之後，又係時候醫肚。睇 floor plan 見到有好多食店，今次我地到咗十樓嘅"Mos Burger"同"八番拉麵"開餐，兩間味道都唔錯架，可以一試!

櫃員機事件簿

今晚發生一件從無諗過嘅事, 就係我竟然晌櫃員機襟完錢唔記得攞... 話說襟錢期間, 一直同女友傾緊計, 咁襟完錢就收起提款卡, 同時間我地又討論緊櫃員機旁邊一張海報... 應該就係呢一刻出事! 咁我又幾時發現自己無攞錢呢? 就係食完飯找數, 搵極銀包都無一百蚊紙嘅時候喇... 好彩都仲有少少錢晌身勉強夠找數啫!

鴨寮街做節

哈哈~ 女友好聽話，真係訓個飽唔止十二個鐘。講咗幾次想上"忠僕號"睇書，趁住假期時間充裕啲就 go 啦。食完個 tea 去到碼頭，見到架船多人到呢...! 去到隊尾計一計時間，隨時要排大半個鐘，上到去人太多又睇唔到書，最後決定擇日重賽。夜晚約咗女友另一批親戚做節，地點係鴨寮街附近一間幾十年歷史嘅舊式酒家，一圍枱成十八個人都唔駛千三蚊，勁平呀!

返屋企做節

中秋正日約咗幾個同事 lunch 時間飲茶當做節。而下晝原先有得早收四點，不過都無乜特別嘢攪，所以最後都無早走。夜晚就準時八點返到屋企做節，一如已往咁豐富，未食到湯圓女友已經開始投降。飽暖思床褥，決定今晚唔夜浦，等女友可以返屋企訓個夠，起碼十二個鐘先得!

中秋節快樂

巧遇雜種

中秋節前夕，變形金剛 一句有急事就閃咗去假後先返。嘩! 無人阻頭阻勢，重唔開行引擎務求要準時收工咩。夜晚約咗女友親戚做節食飯，七點幾趕到油麻地。食到一半，竟然撞到 雜種寶寶 嘅 prok & chop，重要坐正對面枱，呢個香港真係細!

十室九空商場

又一次無風無雨又無波打，真無癮! 返上樓仲要比 董事長 串，話無落雨點解都唔打...(世伯，唔通我自己一個打晒咩!)。隊友們，你地啲熱情去咗邊呀? 多咗幾粒鐘做乜好，講都無人信，我竟然唔放心返咗公司跟 job 呀... 世界變喇?! 夜晚同女友到旺角行街，上咗一個用藝員開舖為號召嘅商場，幾層樓加埋都只係得小貓三數隻，十室九空都幾恐怖!

告別"麗音王"

屋企部"麗音王"用咗十幾年, 終於都要告老還鄉。約咗 董事長夫婦 兩點幾去買電視，去到第一間電器舖已經有心水，但係個 sales 技巧太差影響購買慾，都係 join 埋女友食返個 tea 開個家庭會議先。跟住倆個拍拖拖過又一城間大分店再睇多次，呢邊個 sales 有問有答似樣好多，最後亦都交易成功, 買咗一部 LG 26" LCD TV。大出血之後趕過浸大聽音樂會，聽完就過咗廟街食"豬骨粥"。 味道真係唔錯架，如果唔怕廟街龍蛇混雜，可以一試。

天下老闆一樣...

又係上 china office 嘅日子，全程公司車只得司機同我... 嘻嘻~幾時升咗職有自己專車都唔知?! 上到去用 wed-mail 做嘢，點知慢過蝸牛，去到成五點幾都未攪掂晒，局住要跟公司車返香港 office 埋尾~頂! 回途仲要大塞車，發呆中收到 蘋果電腦 電話約食飯。都有一段時間無見，一於同女友齊齊出席。席間離唔開工作話題，經過兩小時嘅一面倒討論，結論就係"天下烏鴉一樣黑, 天下老闆一樣西"喇!

政治午餐

連續兩個星期嘅大會開得七七八八，美國班同事開亦始準備回歸，新上任嘅 大眼經理 終於可以趁食晏時間認識下我地組同事。唔計隻變形金剛變成"鞋擦"型態有啲反胃，呢餐飯尚算食得開心。夜晚八點幾 大編輯 打嚟約食晚飯，原來佢下星期到日本工幹成十日(玩就真!)，諗住見個面。哈哈~咁遲先打嚟當然食咗飯，最後改為一行三人收工宵夜囉!

繼續變形

話口未完，今日唔知邊個踩親狗尾! 一對一開會時都仲好地地，但幾個鐘頭之後又無端端變形晌度亂咁吠，出 email 四圍辣人，唔通佢更年期?! 好喇，其中一封辣著我，佢又 cc 晒比佢上一級嘅，真係答又唔係唔答又唔係! 最後係...... "答咗"!

變形金剛 - 禽獸系戰士

大公司人事變動頻繁，職位日新月異，明升暗降絕不出奇! 今日就同咗第二個部門嘅過氣主管食晏，傾落先知佢表面調升到一個新部門，實則被削權。當佢知道我上家佢舊戰友而家進化咗做"變形金剛-禽獸系戰士"都好無奈，認為佢可能餓權太耐所以失控。仲提醒兩位小朋友佢始終係上家，唔知佢幾時係人係狗，小心唔好踩到條狗尾! OK，收到 madam!

大傻 - 楊千嬅

大傻　唱: 楊千嬅　
作詞: 林夕　作曲: Eric Kwok　

幻想　與他沿路大聲販賣
毛公仔　彷似愛海無崖　被追趕也像情懷
也幻想　與他常為幸福自大
何必想舉債　哪管要吃齋　歲月縱使難捱

傻瓜一點看　我們還有　手仍能拖
夢仍能做　眼仍能看
心仍能開　找到笑的理由　辛苦不算醜

我們還有　嘴仍能親　事仍能做　戲仍能看
歌仍能聽　天涯陪著走
屋雖細有自由　不需不濫擁有

沒錯　奇情從未及茱麗葉
奇蹟怎麼會夠汪明荃　仍可掌快樂大權
我自信　凡事樂在屬於自願
夢想不想遠也很怕氣喘　撲入最高集團

傻瓜一點看　我們還有　手仍能拖（誰都想很富有）
夢仍能做　眼仍能看（誰都不必富有）
心仍能開　找到笑的理由　艱苦不算醜

我們還有　嘴仍能親（誰都想很富有）
事仍能做　戲仍能看（誰都不必富有）
歌仍能聽　天涯陪著走（仍有蜜運同遊）
家雖細有自由

只需少有溫柔　難有便別有　真不想折壽
能有才願有　不想與壓力互鬥　放浪地扮

無需要副修　也交到好友
誰都想很富有　誰都不必富有
仍有蜜運同遊　分享過這地球

5 Mins. Tennis

今日都算黑仔，上到球場就撞到 教練，見有時間大家就傾咗幾分鐘，傾傾吓突然間天陰陰，咁即時停口入場開波啦! 可惜最後都打唔夠五分鐘就落雨，仲落到一發不可收拾，too bad! 避咗十幾分鐘雨都唔似會停，唯有淋住雨上更衣室沖涼換衫。點知半個鐘左右就停晒雨，吹漲!

倉務日

星期六又係叉電嘅時候，同女友訓到成十二點先願起身。擦牙洗面 check email，再坐定定煲咗一連串明珠台嘅"國家地理雜誌"，har 到四點幾先去"吉野家"食全日第一個早/午/茶餐。之後上倉影相點貨，唔覺唔覺就攪到成九點鐘，嗱嗱聲逃離戰場去開餐啦!

Shabu Shabu Night

臨近中秋佳節，今晚有 vendor 請食飯，仲係豪請果種，正! 兩間公司各派出四位代表，一行八人去食 shabu shabu。第二次幫襯"禪八"，水準依然高、服務依然好、價錢依然貴。菜式有: 特選和牛しゃぶしゃぶ、黒豚しゃぶしゃぶ、ずわい蟹しゃぶしゃぶ、刺身盛合せデラックス、壽司盛合せデラックス...等，再加一支兩呎高嘅特大日本清酒"八海山~吟醸酒(新潟)"。埋單幾乎要半個月人工，都有少少唔好意思，真係多謝晒!

愛樂享樂 - 人生可有知己 Live

由於反應良好，今日再下一城，嚟多一首"人生可有知己"。


NOKIA 愛樂享樂 903飛馳中的音樂會

愛樂享樂 - 眾生花 Live

今晚真係失策，原本 forum 可以攞到飛，點知出手慢咗... 早知就 call 爆啲記者 friend 啦! 好彩 forum 班手足都照顧週到，返到屋企已經有精彩片段睇，先嚟"十二金釵 眾生花"~ 去片!


NOKIA 愛樂享樂 903飛馳中的音樂會

高山劇場騙案

董事長夫人 又登台，今次係佢第一次晌高山劇場演唱，開到口邊敢唔去捧場吖...! 同女友八點幾趕到場又未輪到佢唱，坐咗一陣悶到忍唔住跟 董事長 入後台搵佢，等到佢出場先返埋位坐。之前又話好早唱完，又話我地個人到一到就可以走...最後唱完係成十點半，又一次受騙呀!

新 Ｍ 上場

今日新 Ｍ 上場，淨係同 HR 報到，再同佢上級溝通都已經玩咗大半日。直至佢收工為止，我只係同佢講咗一句，就係食 welocme lunch 時嘅自我介紹。

久違了的 King's Park

個場終於開翻喇，始終覺得晌呢度打波環境清幽啲，空氣都好啲。因為女友今日約咗 豬豬，所以我同 tennis team tea 完之後，見時間尚早就去剪髲。夜晚 join 返女友，上公司攞返袋禮物就去食飯喇~

以物易物

最近幾個星期六嘅第一個節目就係"叉電"，儘可能都訓夠八個鐘。下晝同女友各自留晌屋企，佢就同 臭狗當奴 沖涼，我就玩"小掃除"。黃昏先約埋一齊過九龍塘 LCC，完咗聚會就慢慢行過去旺角探班(實情係巡視業務同手飾維修)。路過"7仔"見套新米奇扭蛋幾得意，就諗住扭一次中返款 Chip & Dale 比女友, 點知盲就中咗米奇?! 見旁邊有兩個妹妹仔拎住款我想要嘅松鼠仔眼望望部機，我就問佢想要乜? 佢話要史狄仔... 跟住佢問返我想要乜? 我即時指住佢隻手話要 Chip & Dale，我話不如用米奇交換吖? 佢一句"好呀"我地就成功交易，當然皆大歡喜啦！

女友正式畢業

今日係女友讀咗三年果個藝術課程嘅畢業禮。基於佢認為無必要，所以我都無請假出席。畢業禮晨早九點就開始，完成後女友同班同學仔食晏又食 tea 直落聚舊，全日玩到不亦樂乎。原本約咗 大編輯 晚飯，但臨時應承咗伯母一齊食飯當慶祝，所以押後幾粒鐘變咗食宵夜。

大紅袍 - 何韻詩

大紅袍 　唱: HoCC@goomusic 　
作詞: 陳浩峰@人山人海　作曲: BensonFan@goomusic　

大路留在原路　我不會甘於行大直路
大步從未停步　我喜愛獨自行大大步
大霧攔著前路　還未從末路原地踏步
天高我心更高　我身再小亦上路

無盡世界　任我攀登
難道是自己想得太天真　無畏嗎

不擔心　小小委屈　小小阻折　不見得嚇人
紅袍待我將披起勝利名份
經得起　高高低低起起跌跌　不要緊

沒有腰骨　怎麼披甲上陣　我憑甚麼叫做人

自重還是無用　還是從未被提拔重用
只想過一秒鐘　每一秒鐘盡情地利用
天天進攻進攻　如未曾共用留待備用
自問我身我心　最終榮辱亦與共

沒有腰骨　怎麼披甲上陣　我憑甚麼叫做人　
無畏嗎

變、變、變

呢幾日個 AM 嘅態度變得客客氣氣，硬係覺得唔多對路... 哦! 今日知乜事喇，原來已經請咗個 M，即係佢坐正無望，所以想搏好感爭返啲人心囉。Well，對"聖鬥士"出過嘅招式第二次係唔會再有效，所以佢大可以慳啲喇，慳返嚟買鞋油或者"保露"比佢自己都好呀。

有場又有地

皇天不負有心人，今日終於 book 到開 party 嘅場地，唔駛再擔心無地方攪 funtion，幾乎食唔到 lunch 都係抵嘅! 夜晚收到 大佬 電話講決定咗今年唔參與雙十嘅團體活動，當然得返我一條"冷"我都唔會去。其實大家都十五十六咗好耐，想參與又無一個 support 自己嘅理由，而家有個決定都好，如果可以有返個小組活動就最理想啦。

愛樂享樂 - 903飛馳中的音樂會

喂喂~ 最近有無人要買電話呢？有無諗過會買 Nokia 7500 / 6110 / N95 其中一部？吓，呢幾部有乜咁特別？呀...唔知喎...我剩係知買呢幾個型號會送"NOKIA 愛樂享樂 903飛馳中的音樂會"飛，想搶你地張飛去睇之嘛，有飛嘅快啲聯絡我啦！XDD~

迷你茶餐廳玩具

同上星期剛剛相反，今日由好天變落雨，一個二個仲換晒衫準備出門口，真掃慶！多咗幾粒鐘，又係時候晌屋企執吓嘢，順便整理吓個 blog 寫咗又未出街嘅草稿。收到風黃埔有女友想搵嘅嘢，所以準時五點接埋佢過去行街街，果然係搵到喎！路過一間大型玩具店，發現一盒心儀好耐而市面已經絕跡嘅小玩具"香港茶餐廳"，女友二話不說就攞去比錢。一擊即中，係我最想要嘅"早餐B"，有火煺通粉+腸仔煎蛋。嘻嘻~多謝晒！

生於九月一日

一早起身同女友過咗 LCC 上堂，之後就趕返去陪 董事長夫婦 飲茶。跟手上倉攞貨去朋友舖頭，見到旺角人山人海先醒起仲有兩日就開學。九月一日係開學日之外，亦係我兩位舊同學嘅生日日期。其中神神化化嘅 蔬菜先生 已經失蹤一年有多，最後消息係上大陸攪生意，暫時音訊全無。另一位 玩具狗，講起佢就記起"最佳損友"呢首歌，Wyman 嘅歌詞好中，寫出咗我地嘅關係。由好朋友變陌路人，當中過程同被人出賣嘅感覺確實唔好受。不過時間可以沖淡一切，早兩年晌 MK 見返佢，佢好熱情咁請我上佢屋企食飯，仲即時打比 狗嫂 話有神秘嘉賓上去坐。老朋友聚舊講下近況，交換其他朋友嘅消息，當晚的確係傾得幾開心，最後仲傾到過晒時要坐的士走。但係跌爛咗嘅玩具始終有瑕疵，永遠都唔會變得返做新買嘅時候!

最佳損友 - 陳奕迅

最佳損友　唱: 陳奕迅 　
作詞: 黃偉文　作曲: Eric Kwok　

朋友我當你一秒朋友
朋友我當你一世朋友
奇怪過去再不堪回首
懷緬時時其實還有

朋友你試過將我營救
朋友你試過把我批鬥
無法再與你交心聯手
畢竟難得有個最佳損友

從前共你促膝把酒傾通宵都不夠
我有痛快過你有沒有
很多東西今生只可給你
保守至到永久
別人如何明白透
實實在在踏入過我宇宙
即使相處到有過裂口
命運決定了以後再沒法聚頭
但說過去卻那樣厚

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某

生死之交當天不知罕有
到你變節了至覺未夠
多想一天彼此都不追究
相邀再次喝酒
待葡萄成熟透
但是命運入面每個邂逅
一起走到了某個路口
是敵與是友
各自也沒有自由
位置變了各有隊友

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某
早知解散後各自有際遇作導遊
奇就奇在接受了各自有路走
卻沒人像你讓我眼淚背著流
嚴重似情侶講分手

有沒有
確實也沒有一直躲避的藉口
非甚麼大仇
為何舊知己在最後變不到老友

不知你又有沒有
掛念這舊友
或者自己早就想通透
來年陌生的是昨日最親的某某
總好於那日我沒有沒有遇過某某