Happy Halloween

Happy Halloween to all of you!

小花 回家

小花 已經離開咗兩個幾月，見今日早放工就趕去寵物醫院接返佢 (啲骨灰)。食完飯沿途行返屋企都 feel 得女友唔多妥，終於一入門口佢忍唔住喊咗出嚟! 此時此刻我可以做嘅就只係變成一個人型攬枕+毛巾啦...。

沙田火鍋

今日輪到女友要上大陸印刷廠睇色，前前後後都成大半日，OK 之後有廠車直接送佢返香港。既然係咁，一於繼續沙田啦! 原先個目的地係 food court, 可惜去到一半就比其他食物吸引住... 就係"美心"嘅 Shabu shabu 日式火鍋喇! 唔係呃你真係幾抵食架，份量都唔少架，一般人可以兩個人 share 一個餐，有圖為證!

西灣河之行

下晝打完波食完 tea 之後，過咗西灣河探女友個師姐，佢仲借咗靚靚花球比女友。飯局期間，早早已成為經理嘅師姐對近期公司暗黑政治比咗少少意見，明白明白, thanks!

揀心水靚衫

終於明白點解女仔買衫十居其九都要試身，因為一件衫睇到幾靚著上身都唔一定靚，平平無奇嘅都可以著得你好 charm 好有型。今日女友試咗好多件衫之後，最啱心水嘅竟然係一件比較 colourful、一件平時佢唔會揀嘅衫。Anyways，只要著得好睇就得啦，right?

新城市 food court

今日又要上 China office 開會，同往時一樣只得我同司機兩個，變相又成為咗我嘅專車。上晝主要留晌自己 office，下晝就抽咗個幾鐘頭落印刷廠，一切順利準時五點半坐公司車返香港。七點鐘已經到咗沙田新城市會合女友，終於可以慢慢行下大商場。行到西田發覺人山人海，原來有部份 food court 剛剛裝修好重開，多咗幾間新食店喎! 啲食物都好似幾吸引，下次過嚟幫襯下先。

放工趕上倉

因為有客留咗隻值成五百蚊嘅公仔，所以一放工就趕上倉攞貨。上得去梗係順便又摷下其他貨影定啲相比客睇啦，補完貨時間唔上唔落，又唔想去太遠，最後決定行過荃灣當做下運動。

史狄女 生日飯局

話咁快又一年，聽日又係 史狄女 牛一喇。正日留返比佢同 田田 二人世界，我地就早一日慶祝啦! 由於佢十月尾我十一月頭，住年都會一次過慶祝，不過 闊少 同 Ah E 差不多要年年包底大出血，所以今年決定分返開攪。地點係尖咀"鹿嗚春"，間嘢真係幾鬼旺，唔訂位的話怕且要十點後先有位。呢班人一坐埋都會變蝗蟲，當"片皮鴨"、"糖醋魚"、"雞絲粉皮"、"蒸餃"、"官保雞丁".... 逐一被 KO 之後, 又係時候 order 甜品。樣樣佢地都想食，最後一次過叫晒"高力豆沙"、"香蕉拔絲" 同 "豆沙鍋餅"，真係見到都飽晒!

公園夜行

好耐無試過入夜行公園，今晚心血來潮上"九公"行咗個轉... 嘩! 原來成八點都仲人山人海，男女老幼乜人都有，真熱鬧!

女人愛甜品

七點收工趕到黃埔睇制作公司嘅 sample，段 3D 片頭比意料中好喎! 不過都未睇齊 sample，遲啲可能要再跟進。開餐時間又到，咁近 Ah E 即刻 call 埋佢過嚟一齊食啦。三條友左揀右揀之後去咗食麻辣米線，因為兩位女士要留肚食甜品。下一站"芝麻綠豆"，我當然食黑中極品"芝麻糊"，今次身痕加咗"蕃薯"，女友就要"合桃糊+芝麻糊"，Ah E 就要咗每日限量嘅"乜乜橙凍(?)"，不過佢話味道麻麻地!

玩具生意難做

今日打完波食 tea 時收到 史狄女 留比我嘅"3D怪誕城場刊"，thank you! 之後 闊少 陪我行咗一陣玩具舖，只係無行幾個星期又執咗幾間喇，呢門生意呢個時勢都好難做。女友做完 gym join 返我，跟住去咗買碟，佢買咗 小萱新 EP 我買咗"飛鷹俠" DVD，一人一樣唔駛爭。時候差不多就齊齊返屋企食飯，大大條石斑等緊我地。

要錢唔要貸

尋日放咗一日假，攪到硬係記錯今日係星期日。陪 董事長夫婦 飲完茶都成三點，跟手抽住一大袋貨上個 friend 舖頭補貨，呢幾個月前前後後都賣咗一個唔錯嘅數目，keep 住唔好比佢停, 要錢唔要貸呀! 之後係女友嘅天下，買完護膚飲品再過太子攞鞋。夜晚女友要去飲親戚滿月酒，送完佢坐車之後就 join 炸彈人夫婦 食飯。好耐無傾咁長時間計，眼見佢地食上海菜時飲"酸辣湯"，之後又去食雪糕... 話我長氣都係果句，大肚婆都係要小心飲食好喎!

慢條斯理的一天

難得有假期，一於放慢個節奏回下氣。訓醒覺執下屋做下家務，再 check 下啲網上生意。之後約埋女友去"紅樹林"嘆返個下午茶，叉夠電就上倉點貸。影下相做下記錄，唔覺唔覺就幾粒鐘，收工過荃灣行街街兼食晚飯。食得茶餐廳多，今晚決定食其他嘢，最後去咗食"油渣麵"同"煎釀三寶"。

免費試玩

今晚同女友 book 咗朗豪坊間 PureFitness 試玩，仲捉埋 大編輯 一齊去。女友一向都有做開 gym，所以換完衫之後佢就自己顧自己。大編輯 同我就慢慢行晒兩層樓，各款跑步機呀、滑雪機呀、健身單車呀... 樣樣玩下。玩咗大約兩粒鐘，臨走之前再焗埋個桑拿，Good! 最後當然無 join 到啦，雖然環境真係唔錯，要成七百蚊個月都 OK，可惜我地一個星期最多只嚟到一兩次，咁咪覺得貴囉。玩完之後一行三人就過咗去"南豐"開餐，仲傾到要趕尾班車添。

3D 怪誕城之夜

月頭已經收到風香港會上呢套 3D 版嘅"怪誕城之夜"，最後打聽到會晌 Elements 呢個新場上影。記者 friend 第一時間諗起我呢個 NBC fans，先幾日打嚟話可能有首影場嘅飛比我，但係今日都仲未有聲氣，情況都唔樂觀喇! 不過無所謂啦，反正都想同女友一齊睇，遲啲自己買飛睇都一樣啫。電影網站：www.disney.com.hk/nightmare3D

Woo~woo~woo

公司隻狗間唔時就亂咁吠，真係想打電話去"愛護動物協會"或者叫"漁農署"搵人嚟捉走隻畜生! @%&$#-+*!

Volvo 144 老爺車

收到朋友仔 email，早前佢爸爸連同珍藏嘅老爺車接受訪問。話說朋友仔結婚當日已經見過實物，但對車毫無認識嘅我只係覺得架車幾靚喎... 睇過報導先知架車嘅來頭，估唔到佢年紀仲大過我，早知幫佢做兄弟時乘機坐下架古董車啦! 想睇報導嘅 Click Here!

西貢食海鮮

今日行程緊密，打完 tennis 換好衫，先去"仙桃源"食tea。之後陪 Ah E 買鞋，再陪 路路 睇球拍。跟住趕去接女友，兼且陪佢食咗兩個 Halloween Doughnuts。下一站就係到朗豪坊入邊一間健身室參觀，環境正架，不過會費好貴囉。因為約咗幾個 伯母 嘅朋友一齊慶祝佢生日，所以最後一站係趕入西貢食海鮮。成年無入過西貢，原來已經完全唔同晒樣，有好幾間大排檔已經變咗大酒家!

懷舊冰室

訓醒覺都十一點，約定女友先到又一城食下午茶，之後再過 LCC 上堂。見時間剛剛好，接住再 join 埋聚會先走。七點幾完咗就慢慢行過太子。途中 炸彈人夫婦 打嚟約晚飯，可惜時間夾唔到我就話下次先。去到太子路過一間舊式冰室，幾十年前嘅格局，咁今晚就懷舊一下啦。食到一半 炸彈人夫婦 再打嚟，原來剛剛到咗太子... 既然咁有誠意，就一於齊齊食糖水啦! 唔覺唔覺都有一段時間無見，再過多三個月 炸彈仔 就出世，大肚婆日日行四五層樓梯，自己上落要小心啲喇!

伯母 生日快樂

今日係女友媽媽嘅生日，任由主角揸主意去邊處食飯慶祝，最後 伯母 揀咗"粗菜館"。原先諗住一家齊人先開始，可惜女友妹妹遲大到，只好邊食邊等，而家啲小朋友真係無時間觀念。食完正餐意猶未盡，齊齊出發去食甜品!

扑搥買鞋

前前後後已經睇咗好幾對鞋，始終覺得呢一對比較合心意，同女友一致決定扑搥買咗佢。收工落旺角買完鞋，就齊齊去食我地喜愛嘅"興隆車仔麵"，之後再行影音舖買咗隻"小萱演唱會"DVD。

小型歌迷聚會

今日係十月十日，即是 梅姐 44 歲冥壽。今年無參加歌迷會嘅紀念活動，轉為幾個歌迷舉行咗一個小型私人聚會，地點係 karaoke，貪佢有得食有得玩有得睇有得唱吖嘛! 齊人開始就係 梅姐 嘅天下，快歌慢歌中版歌一首接一首，仲有人唱歌兼且伴舞，十個"勁"啦! 三個鐘頭好快過，電腦自動 cut 歌，出奇地埋尾兩句歌詞成為全晚嘅總結..."將今晚的一刻，送給我!"。究竟係巧合中嘅巧合，定係 梅姐 感受到我地嘅心意呢?!


由歌迷一手包辦曲詞唱嘅紀念CD
(麻煩晒李生李太幫我購買~)

梅姐 祝妳生日快樂!

有折茶餐廳

一放工就陪女友返屋企，因為要等人送狗糧. 行到一半收到電話送貨時間要改夜啲，okay，咁就晌車站附近食咗飯先啦. 去到間唔中會幫襯嘅小菜茶餐廳，落完單之後我地發現寫咗個"特"字，總數平咗幾蚊. 埋單時"裝"下人地啲單只係平得一蚊，可能啲伙計都認得我地，所以平多啲啦，嘻嘻!

海旁夜景

今晚輪到女友加班，一個人到尖咀海旁等佢收工，無聊間攞部 DC 出嚟試吓機，用幾個唔同嘅 mode 影咗一輯夜景相。時間剛剛好，影完相佢就到，perfect!

空氣愈來愈差

香港空氣真係愈來愈差，做戶外運動時就好易感受到。今日打波時 Ah E 就明顯覺得條氣唔順，唔舒服要坐埋一邊，而其他人都自動自覺打一陣抖一陣。食完 tea 散隊，見差唔多時候要買定對鞋襯衫，所以同女友行街街 shopping 去。大家都有搵到心水款，但花多眼亂，一於過兩日無新發現就 KO 佢地!

生有限，愛無限

牛屋

又係要 OT 嘅日子，收工同女友行到佐敦見到呢間經常路過嘅"牛屋"，一於今晚食好少少啦，辛苦搵來志在食嘛! 坐低睇到個價錢又唔係太貴，女友要咗個牛柳，我要咗個駝鳥+豬排，味道比意料中好呀，埋單兩個人都只係百幾蚊。

Shopping Day

女友差唔多時候要買定對鞋襯衫, 唔理三七廿一, 六點幾即閃. 女人買鞋都唔簡單, 個踭高啲低啲都會唔舒服. 好彩由旺角一直掃到落太子, 終於都比佢搵到一對啱心水啫!

網球隊飯局

因為近排各有各忙，tennis team 經常唔齊人，所以 闊少 主動攪返個飯局聯誼下。左諗右諗都唔知去邊度食，最後 Ah E 竟然同 闊少 心有靈犀咁揀咗旺角"常悅"食齋，扑槌唔駛再諗啦! 間舖頭食物水準好飄忽... 總結味道還可以啦，加上價錢唔貴，都可以去多次嘅!

失而復得

話說上星期我唔小心响櫃員機襟完錢唔記得攞，有晒心理準備一去無回頭，不過今日收到銀行通知係部櫃員機食咗，遲啲會比返我呀，Yeah!

R2D2 好返喇

公眾假期又係叉電嘅好日子，所以訓到十一點幾先起身。話說 R2D2 病情一直反覆，見今日時間比較充裕，打個電話同 電腦醫生 掛個號覆個診，成部 R2D2 抱去電腦醫院。做完身體檢查斷定條根(ram)有事，即時做返個開腦手術醫下條根，既然病人要留院觀察，我同女友就快手快腳上倉補一補貨。夜晚約咗 董事長夫婦 食任食火鍋兼睇煙花(晌電視)。食飽飽之後就接返 R2D2，即場試佢一試，食咗補品果然唔同晒，又快又勁喎!

電視城一遊

夜晚入咗電視城睇 SK 做評判嘅 "TVB8全球華人新秀歌唱大賽"，廣播道同清水灣嘅 TVB 都去過，將軍澳係第一次。現場所見都覺到個肥仔比較穩定應該贏，總算無做馬。一早預咗 SK 會唱"眾生花"，但係佢竟然同 譚校長 合唱"唱一首好歌"就真係有啲意外，十個"正"呀! 相對同場幾個歌手對 fans 嘅態度, SK 明顯比較隨和友善，連女友都忍唔住開口讚， 覺得現實同傳媒口中嘅 SK 真係好唔同。當然啦，我可以公開咁話"鍾意"嘅一定係好嘢~ 梅姐啦~ SK 啦~ 仲有"妳"啦~(各位讀者辛苦晒...) 哈哈哈!

梅艷芳成長路紀念展覽會

十月六日在尖沙咀星光大道有一個關於 香港，關於 梅艷芳 的展覽會開幕。整個展覽由零到完成，在沒有任何機構 backup 之下，直至成功籌集資金及得到讚助商支持，這群歌迷的毅力真的了不起！有時間的話，請大家支持一下這群有心人。

展覽會日期：
梅艷芳成長之路：
十月六日 至 二十日
梅艷芳珍貴影集：
十月六日 至 十一月十五日

Mega Box 一遊

日日做到無停手，今日決定要早走! 七點鐘，女友從大陸工幹回歸，先上公司搵埋我，跟手就一程車過咗 Mega Box。第一次到 Mega Box，整體地方比預期中細，人流亦都比意料中少。留連最耐係家居用品店"Spotlight"，特別係 DIY 美術用品部門。行咗個幾鐘之後，又係時候醫肚。睇 floor plan 見到有好多食店，今次我地到咗十樓嘅"Mos Burger"同"八番拉麵"開餐，兩間味道都唔錯架，可以一試!

櫃員機事件簿

今晚發生一件從無諗過嘅事, 就係我竟然晌櫃員機襟完錢唔記得攞... 話說襟錢期間, 一直同女友傾緊計, 咁襟完錢就收起提款卡, 同時間我地又討論緊櫃員機旁邊一張海報... 應該就係呢一刻出事! 咁我又幾時發現自己無攞錢呢? 就係食完飯找數, 搵極銀包都無一百蚊紙嘅時候喇... 好彩都仲有少少錢晌身勉強夠找數啫!

鴨寮街做節

哈哈~ 女友好聽話，真係訓個飽唔止十二個鐘。講咗幾次想上"忠僕號"睇書，趁住假期時間充裕啲就 go 啦。食完個 tea 去到碼頭，見到架船多人到呢...! 去到隊尾計一計時間，隨時要排大半個鐘，上到去人太多又睇唔到書，最後決定擇日重賽。夜晚約咗女友另一批親戚做節，地點係鴨寮街附近一間幾十年歷史嘅舊式酒家，一圍枱成十八個人都唔駛千三蚊，勁平呀!

返屋企做節

中秋正日約咗幾個同事 lunch 時間飲茶當做節。而下晝原先有得早收四點，不過都無乜特別嘢攪，所以最後都無早走。夜晚就準時八點返到屋企做節，一如已往咁豐富，未食到湯圓女友已經開始投降。飽暖思床褥，決定今晚唔夜浦，等女友可以返屋企訓個夠，起碼十二個鐘先得!

中秋節快樂

巧遇雜種

中秋節前夕，變形金剛 一句有急事就閃咗去假後先返。嘩! 無人阻頭阻勢，重唔開行引擎務求要準時收工咩。夜晚約咗女友親戚做節食飯，七點幾趕到油麻地。食到一半，竟然撞到 雜種寶寶 嘅 prok & chop，重要坐正對面枱，呢個香港真係細!

十室九空商場

又一次無風無雨又無波打，真無癮! 返上樓仲要比 董事長 串，話無落雨點解都唔打...(世伯，唔通我自己一個打晒咩!)。隊友們，你地啲熱情去咗邊呀? 多咗幾粒鐘做乜好，講都無人信，我竟然唔放心返咗公司跟 job 呀... 世界變喇?! 夜晚同女友到旺角行街，上咗一個用藝員開舖為號召嘅商場，幾層樓加埋都只係得小貓三數隻，十室九空都幾恐怖!

告別"麗音王"

屋企部"麗音王"用咗十幾年, 終於都要告老還鄉。約咗 董事長夫婦 兩點幾去買電視，去到第一間電器舖已經有心水，但係個 sales 技巧太差影響購買慾，都係 join 埋女友食返個 tea 開個家庭會議先。跟住倆個拍拖拖過又一城間大分店再睇多次，呢邊個 sales 有問有答似樣好多，最後亦都交易成功, 買咗一部 LG 26" LCD TV。大出血之後趕過浸大聽音樂會，聽完就過咗廟街食"豬骨粥"。 味道真係唔錯架，如果唔怕廟街龍蛇混雜，可以一試。

天下老闆一樣...

又係上 china office 嘅日子，全程公司車只得司機同我... 嘻嘻~幾時升咗職有自己專車都唔知?! 上到去用 wed-mail 做嘢，點知慢過蝸牛，去到成五點幾都未攪掂晒，局住要跟公司車返香港 office 埋尾~頂! 回途仲要大塞車，發呆中收到 蘋果電腦 電話約食飯。都有一段時間無見，一於同女友齊齊出席。席間離唔開工作話題，經過兩小時嘅一面倒討論，結論就係"天下烏鴉一樣黑, 天下老闆一樣西"喇!

政治午餐

連續兩個星期嘅大會開得七七八八，美國班同事開亦始準備回歸，新上任嘅 大眼經理 終於可以趁食晏時間認識下我地組同事。唔計隻變形金剛變成"鞋擦"型態有啲反胃，呢餐飯尚算食得開心。夜晚八點幾 大編輯 打嚟約食晚飯，原來佢下星期到日本工幹成十日(玩就真!)，諗住見個面。哈哈~咁遲先打嚟當然食咗飯，最後改為一行三人收工宵夜囉!

繼續變形

話口未完，今日唔知邊個踩親狗尾! 一對一開會時都仲好地地，但幾個鐘頭之後又無端端變形晌度亂咁吠，出 email 四圍辣人，唔通佢更年期?! 好喇，其中一封辣著我，佢又 cc 晒比佢上一級嘅，真係答又唔係唔答又唔係! 最後係...... "答咗"!

變形金剛 - 禽獸系戰士

大公司人事變動頻繁，職位日新月異，明升暗降絕不出奇! 今日就同咗第二個部門嘅過氣主管食晏，傾落先知佢表面調升到一個新部門，實則被削權。當佢知道我上家佢舊戰友而家進化咗做"變形金剛-禽獸系戰士"都好無奈，認為佢可能餓權太耐所以失控。仲提醒兩位小朋友佢始終係上家，唔知佢幾時係人係狗，小心唔好踩到條狗尾! OK，收到 madam!

大傻 - 楊千嬅

大傻　唱: 楊千嬅　
作詞: 林夕　作曲: Eric Kwok　

幻想　與他沿路大聲販賣
毛公仔　彷似愛海無崖　被追趕也像情懷
也幻想　與他常為幸福自大
何必想舉債　哪管要吃齋　歲月縱使難捱

傻瓜一點看　我們還有　手仍能拖
夢仍能做　眼仍能看
心仍能開　找到笑的理由　辛苦不算醜

我們還有　嘴仍能親　事仍能做　戲仍能看
歌仍能聽　天涯陪著走
屋雖細有自由　不需不濫擁有

沒錯　奇情從未及茱麗葉
奇蹟怎麼會夠汪明荃　仍可掌快樂大權
我自信　凡事樂在屬於自願
夢想不想遠也很怕氣喘　撲入最高集團

傻瓜一點看　我們還有　手仍能拖（誰都想很富有）
夢仍能做　眼仍能看（誰都不必富有）
心仍能開　找到笑的理由　艱苦不算醜

我們還有　嘴仍能親（誰都想很富有）
事仍能做　戲仍能看（誰都不必富有）
歌仍能聽　天涯陪著走（仍有蜜運同遊）
家雖細有自由

只需少有溫柔　難有便別有　真不想折壽
能有才願有　不想與壓力互鬥　放浪地扮

無需要副修　也交到好友
誰都想很富有　誰都不必富有
仍有蜜運同遊　分享過這地球

5 Mins. Tennis

今日都算黑仔，上到球場就撞到 教練，見有時間大家就傾咗幾分鐘，傾傾吓突然間天陰陰，咁即時停口入場開波啦! 可惜最後都打唔夠五分鐘就落雨，仲落到一發不可收拾，too bad! 避咗十幾分鐘雨都唔似會停，唯有淋住雨上更衣室沖涼換衫。點知半個鐘左右就停晒雨，吹漲!

倉務日

星期六又係叉電嘅時候，同女友訓到成十二點先願起身。擦牙洗面 check email，再坐定定煲咗一連串明珠台嘅"國家地理雜誌"，har 到四點幾先去"吉野家"食全日第一個早/午/茶餐。之後上倉影相點貨，唔覺唔覺就攪到成九點鐘，嗱嗱聲逃離戰場去開餐啦!

Shabu Shabu Night

臨近中秋佳節，今晚有 vendor 請食飯，仲係豪請果種，正! 兩間公司各派出四位代表，一行八人去食 shabu shabu。第二次幫襯"禪八"，水準依然高、服務依然好、價錢依然貴。菜式有: 特選和牛しゃぶしゃぶ、黒豚しゃぶしゃぶ、ずわい蟹しゃぶしゃぶ、刺身盛合せデラックス、壽司盛合せデラックス...等，再加一支兩呎高嘅特大日本清酒"八海山~吟醸酒(新潟)"。埋單幾乎要半個月人工，都有少少唔好意思，真係多謝晒!

愛樂享樂 - 人生可有知己 Live

由於反應良好，今日再下一城，嚟多一首"人生可有知己"。


NOKIA 愛樂享樂 903飛馳中的音樂會

愛樂享樂 - 眾生花 Live

今晚真係失策，原本 forum 可以攞到飛，點知出手慢咗... 早知就 call 爆啲記者 friend 啦! 好彩 forum 班手足都照顧週到，返到屋企已經有精彩片段睇，先嚟"十二金釵 眾生花"~ 去片!


NOKIA 愛樂享樂 903飛馳中的音樂會

高山劇場騙案

董事長夫人 又登台，今次係佢第一次晌高山劇場演唱，開到口邊敢唔去捧場吖...! 同女友八點幾趕到場又未輪到佢唱，坐咗一陣悶到忍唔住跟 董事長 入後台搵佢，等到佢出場先返埋位坐。之前又話好早唱完，又話我地個人到一到就可以走...最後唱完係成十點半，又一次受騙呀!

新 Ｍ 上場

今日新 Ｍ 上場，淨係同 HR 報到，再同佢上級溝通都已經玩咗大半日。直至佢收工為止，我只係同佢講咗一句，就係食 welocme lunch 時嘅自我介紹。

久違了的 King's Park

個場終於開翻喇，始終覺得晌呢度打波環境清幽啲，空氣都好啲。因為女友今日約咗 豬豬，所以我同 tennis team tea 完之後，見時間尚早就去剪髲。夜晚 join 返女友，上公司攞返袋禮物就去食飯喇~

以物易物

最近幾個星期六嘅第一個節目就係"叉電"，儘可能都訓夠八個鐘。下晝同女友各自留晌屋企，佢就同 臭狗當奴 沖涼，我就玩"小掃除"。黃昏先約埋一齊過九龍塘 LCC，完咗聚會就慢慢行過去旺角探班(實情係巡視業務同手飾維修)。路過"7仔"見套新米奇扭蛋幾得意，就諗住扭一次中返款 Chip & Dale 比女友, 點知盲就中咗米奇?! 見旁邊有兩個妹妹仔拎住款我想要嘅松鼠仔眼望望部機，我就問佢想要乜? 佢話要史狄仔... 跟住佢問返我想要乜? 我即時指住佢隻手話要 Chip & Dale，我話不如用米奇交換吖? 佢一句"好呀"我地就成功交易，當然皆大歡喜啦！

女友正式畢業

今日係女友讀咗三年果個藝術課程嘅畢業禮。基於佢認為無必要，所以我都無請假出席。畢業禮晨早九點就開始，完成後女友同班同學仔食晏又食 tea 直落聚舊，全日玩到不亦樂乎。原本約咗 大編輯 晚飯，但臨時應承咗伯母一齊食飯當慶祝，所以押後幾粒鐘變咗食宵夜。

大紅袍 - 何韻詩

大紅袍 　唱: HoCC@goomusic 　
作詞: 陳浩峰@人山人海　作曲: BensonFan@goomusic　

大路留在原路　我不會甘於行大直路
大步從未停步　我喜愛獨自行大大步
大霧攔著前路　還未從末路原地踏步
天高我心更高　我身再小亦上路

無盡世界　任我攀登
難道是自己想得太天真　無畏嗎

不擔心　小小委屈　小小阻折　不見得嚇人
紅袍待我將披起勝利名份
經得起　高高低低起起跌跌　不要緊

沒有腰骨　怎麼披甲上陣　我憑甚麼叫做人

自重還是無用　還是從未被提拔重用
只想過一秒鐘　每一秒鐘盡情地利用
天天進攻進攻　如未曾共用留待備用
自問我身我心　最終榮辱亦與共

沒有腰骨　怎麼披甲上陣　我憑甚麼叫做人　
無畏嗎

變、變、變

呢幾日個 AM 嘅態度變得客客氣氣，硬係覺得唔多對路... 哦! 今日知乜事喇，原來已經請咗個 M，即係佢坐正無望，所以想搏好感爭返啲人心囉。Well，對"聖鬥士"出過嘅招式第二次係唔會再有效，所以佢大可以慳啲喇，慳返嚟買鞋油或者"保露"比佢自己都好呀。

有場又有地

皇天不負有心人，今日終於 book 到開 party 嘅場地，唔駛再擔心無地方攪 funtion，幾乎食唔到 lunch 都係抵嘅! 夜晚收到 大佬 電話講決定咗今年唔參與雙十嘅團體活動，當然得返我一條"冷"我都唔會去。其實大家都十五十六咗好耐，想參與又無一個 support 自己嘅理由，而家有個決定都好，如果可以有返個小組活動就最理想啦。

愛樂享樂 - 903飛馳中的音樂會

喂喂~ 最近有無人要買電話呢？有無諗過會買 Nokia 7500 / 6110 / N95 其中一部？吓，呢幾部有乜咁特別？呀...唔知喎...我剩係知買呢幾個型號會送"NOKIA 愛樂享樂 903飛馳中的音樂會"飛，想搶你地張飛去睇之嘛，有飛嘅快啲聯絡我啦！XDD~

迷你茶餐廳玩具

同上星期剛剛相反，今日由好天變落雨，一個二個仲換晒衫準備出門口，真掃慶！多咗幾粒鐘，又係時候晌屋企執吓嘢，順便整理吓個 blog 寫咗又未出街嘅草稿。收到風黃埔有女友想搵嘅嘢，所以準時五點接埋佢過去行街街，果然係搵到喎！路過一間大型玩具店，發現一盒心儀好耐而市面已經絕跡嘅小玩具"香港茶餐廳"，女友二話不說就攞去比錢。一擊即中，係我最想要嘅"早餐B"，有火煺通粉+腸仔煎蛋。嘻嘻~多謝晒！

生於九月一日

一早起身同女友過咗 LCC 上堂，之後就趕返去陪 董事長夫婦 飲茶。跟手上倉攞貨去朋友舖頭，見到旺角人山人海先醒起仲有兩日就開學。九月一日係開學日之外，亦係我兩位舊同學嘅生日日期。其中神神化化嘅 蔬菜先生 已經失蹤一年有多，最後消息係上大陸攪生意，暫時音訊全無。另一位 玩具狗，講起佢就記起"最佳損友"呢首歌，Wyman 嘅歌詞好中，寫出咗我地嘅關係。由好朋友變陌路人，當中過程同被人出賣嘅感覺確實唔好受。不過時間可以沖淡一切，早兩年晌 MK 見返佢，佢好熱情咁請我上佢屋企食飯，仲即時打比 狗嫂 話有神秘嘉賓上去坐。老朋友聚舊講下近況，交換其他朋友嘅消息，當晚的確係傾得幾開心，最後仲傾到過晒時要坐的士走。但係跌爛咗嘅玩具始終有瑕疵，永遠都唔會變得返做新買嘅時候!

最佳損友 - 陳奕迅

最佳損友　唱: 陳奕迅 　
作詞: 黃偉文　作曲: Eric Kwok　

朋友我當你一秒朋友
朋友我當你一世朋友
奇怪過去再不堪回首
懷緬時時其實還有

朋友你試過將我營救
朋友你試過把我批鬥
無法再與你交心聯手
畢竟難得有個最佳損友

從前共你促膝把酒傾通宵都不夠
我有痛快過你有沒有
很多東西今生只可給你
保守至到永久
別人如何明白透
實實在在踏入過我宇宙
即使相處到有過裂口
命運決定了以後再沒法聚頭
但說過去卻那樣厚

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某

生死之交當天不知罕有
到你變節了至覺未夠
多想一天彼此都不追究
相邀再次喝酒
待葡萄成熟透
但是命運入面每個邂逅
一起走到了某個路口
是敵與是友
各自也沒有自由
位置變了各有隊友

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某
早知解散後各自有際遇作導遊
奇就奇在接受了各自有路走
卻沒人像你讓我眼淚背著流
嚴重似情侶講分手

有沒有
確實也沒有一直躲避的藉口
非甚麼大仇
為何舊知己在最後變不到老友

不知你又有沒有
掛念這舊友
或者自己早就想通透
來年陌生的是昨日最親的某某
總好於那日我沒有沒有遇過某某

宜家餐廳

女友今日又要上廠睇色, 個 vendor 安排架車晌屋企附近接佢, 咁就唔駛自己叫車上落廠, 安全好多. 我就繼續發揮小宇宙, 以極速完成手頭上嘅 job, 準時八點飛到入沙田搵佢. 今次行 IKEA 果邊, 地方大人又唔多, 行得幾舒服. 路過餐廳見價錢唔算貴, 就決定試一試, 唔駛返新城市廣場同人逼. 味道比意料中好, 有機會可以一試.

又要開 VC

大公司有個唔好處, 就係好多好似好有用但其實浪費緊你時間嘅會要開. 今日又有一個 video conference 要我地八點三返到公司, 最後九點先開始, 成十點半先開完. 起碼有一半以上同事係同我一樣無必要出席嘅, 所以全程除咗"HI & Bye"之外, 都無需要講啲乜. 夜晚女友約咗老友 豬豬 行街睇衫傾密計, 我就晌公司繼續努力, 十點左右先 join 佢地食飯. 問大家一個問題, 你地認為一對戀人女仔比男仔高幾吋, 可唔可以接受呢?

旅遊大使

手頭上堆爛攤子開始受控, 今晚終於可以早收工少少, 同女友過吓二人世界. 過咗佐敦行街街, 行咗一陣就去食粥, 之後再過"松記"食糖水. 去到見到人山人海, 兩位都要等, 真係想掉頭走. 等等吓有對外國遊客慕名而來, 點知店員唔識英文雞同鴨講, 咁我地睇唔過眼就幫句口啦. 跟住個店員好攪笑咁問我地介唔介意安排一齊坐, 坐低咗我地就翻譯啲糖水比對遊客知, 原來啲譯名真係幾奇怪架, 我地自己都忍唔住笑! 之後傾計, 遊客問香港有乜好玩地方介紹? 第一次嚟, 都係介紹佢地上山頂睇吓維港夜景, 行吓赤柱, 浦吓蘭桂芳, 仲有海洋公園... 等等啦! 食飽飽, 臨走時佢地講多謝幫忙, 我幾想學廣告咁答返句: Welcome to Hong Kong!"呀~ XDDD~

晚飯定宵夜?

今晚女友返咗 Art Center 參加謝師宴, 既然夜晚自己一個, 當然爭取時間儘快殺清啲 job, 唔係我遲早晌公司打人. 正心大心細夜晚果餐食唔食之時, 大編輯 打電話嚟約十點後食飯(宵夜). 望望個 schedule, 原來都成兩三個星期無見過, 無計啦, 佢都一樣周身唔得閒. 最後成十一點幾先見到面, 食完都已經十二點幾, 好彩可以坐的士啫!

董事長夫人 生日快樂!

當然要祝妳: 青春常註, 身體健康啦!

杜德偉 中秋動感演唱會

杜德偉/李玟 中秋動感演唱會

Open Sky Theatre
Harrah’s Rincon Casino & Resort, San Diego, California
售票網址: Click Here

9月22日在聖地牙哥舉行售票演唱會，美國聖地牙哥哈樂斯大酒店
9月23日在美國舊金山賭場也有一場，是招待賭客的表演。
美國舊金山 Shore Line Amphitheatre
One Amphitheatre Parkway, Mountain View, California 94043

雨後陽光

十點幾起身, 一如已往執下屋 check 下 email 時發現有生意喎... 但係平日忙成咁, 根本上唔到倉攞件貨, 點好? 諗咗一陣決定打少陣波, 上倉攞件貨先, 錢錢緊要啲! 攞完即時飛車出球場, 行到一半竟然橫風橫雨...唔係咁玩呀?! 冒雨行到球場, 大家都行埋一邊避雨, 一地水氹打唔到啦, 唯有齊齊去茶餐廳坐下啦. 就晌果一個鐘, 忽然又陽光普照喎, 球場即時乾返晒. 見約咗女友未夠鐘, 快快落場打返陣啦! 打完波接埋女友, 全晚都晌旺角太子一帶打滾, 無他嘅, 陪佢搵靚衫嘛!

生日海鮮餐

尋晚 OT 完，返到屋企洗完白白，一訓上床就訓著，醒時已經係十一點幾。約咗女友二點半，接埋佢就過灣仔會展睇展覽，同期又電腦又傢俬又結婚展，攪到會展迫到爆，有贈券都無用，塞咗好耐人先入到去。睇展覽睇到七點鐘，又係時候趕返過尖咀，因為訂咗枱同 董事長夫人 食生日飯。今晚都算齊人，成個董事局成員之外，再加契仔契女契孫，剛剛好一圍。生日飯晌"彩雲軒"食，一早訂定咗一個主角心儀嘅海鮮餐。個餐都好抵食，樣樣都好大碟，最後食唔晒要打包。食物質素同服務都好OK，個總經理又識做，自動加送咗一籠巨大壽包比 董事長夫人添!

夜半大掃除

話說我晌公司都算有頭有面，經常都收到唔同部門各式各樣、大大細細嘅 sample。久而久之攪到晌公司一箱二箱，收入與支出又不相稱，比朋友都比唔切。見今晚做 job 做到心情煩躁，索性玩大掃除發洩吓精力! 經過一粒鐘嘅磁場轉動，掉咗兩大箱呀，正! 各位同事，之前嘅消化晒喇，又係時候比新產品我啦~ XDDD!

自己返香港

今朝一早返咗 China office 開會，點解咁忙都仲上去? 咪又係因為個仆街 AM 囉! 完先諗住上車之後訓下叉下電，點知全車同事都識，雖然大家唔同部門都由上車講到落車 XDD~! Lunch 就同 assign 跟我個同事一齊食，仲要同我爭比錢，我因為唔夠"人仔"爭輸咗! 本來要等到五點半先有公司車，但撞到採購部個同事幫個 VP book 咗架白牌車載埋我，當然即閃自己返香港先啦，最少多兩粒鐘做嘢!

珍惜聚會時'07

News from Anita Mui Int'l Fan Club

Anita 的生日又快到了，歌迷會將舉行聚會，紀念這個重要的日子更加是大家一年一度相聚的日子。 Anita 生日當天中午，我們會在省善真堂拜祭，歡迎大家前來致意。晚上，我們將於酒店舉行一年一度的自助晚餐聚會。(如要送花到酒店，可於下午4時後送到)

日期：2007年10月10日(星期三)
地點：富豪九龍酒店 (尖沙咀麼地道71號)

如欲參加聚會，大家請於以下時間購票。
日期：2007年9月8日及9日(星期六、日)
時間：下午3:00 – 6:00
地點：歌迷會會址 – 香港北角電氣道148號10樓1003室
如有任何查詢, 請聯絡歌迷會.
25562695 / amifc1985@yahoo.com.hk

難得清靜

今日個 AM 死咗去大陸，office 終於樂得清靜! 無狗吠聲固然好，最開心係佢愛將竟然趁佢唔晌度，口出冤言話公司太多嘢做，再係咁落去會頂唔住! 好喇好喇，連親信都有微言，睇你幾時眾叛親離!

某某數簿燃燒中

今朝同隔離部門開會傾貨期，一如我所料個八婆 AM 想置身事外，每次同事要佢覆期都推個波過嚟自己唔答，因為我答咗個期就係我責任，到時做唔到佢都可以卸膊! 好喇，開完會出嚟即時話我乜都唔答，啲期又混亂又安排得唔好... 佢吠完之後我冷冷地答佢一句:「我第一日已經同你講唔夠時間做架?!係你唔理之嘛!」佢即時窒一窒唔識答，跟住繼續吠... 直到佢發現我開始冒煙先收口! 我當時真係嬲到震, 唔係誇張隻手真係"震"架! 真係忍得好辛苦，啲"粗口"幾乎衝口而出! 最後我用咗十分鐘 cool down 我自己，分析比自己聽，如果我開口"小"佢甚至乎"打"佢又如何? 搵過份工唔難，但係就會打亂我嘅 schedule，"西"人四圍都有，比一隻畜生打亂自己嘅 plan 唔值得!

Ah E, Happy Bday!

Happy Birthday to Ah E~ Wish you have a new BF asap la!

生日火鍋

雖然尋晚雷雨交叉，但今日天公造美有波打喎! 近排晌公司每日屈十幾個鐘，終於可以運動舒展吓，唔係遲早晌公司打人。接埋女友之後去食 tea，之後六條友仔過澳海城行街街，夠七點就一程的士飛咗過九龍城同 Ah E "拾吓拾吓"慶祝生日。舖頭名叫"龍城金記"，係女友個舊同學屋企開嘅，啲嘢食唔錯架，已經帶過好多朋友嚟。特別啲配料有蠔仔餃,炸腐皮同墨魚滑，大家有機會不防去試試，要定位可以搵我! XDD~

爆裂珍藏

話說尋晚半夜返到屋企，事長夫人 話書櫃背面發現有污水積，唔知係咪牆身入水? 昏迷八小時之後，訓醒就行埋去睇睇。雖然無發現，但果個角落又真係特別焗喎?! 硬係覺得唔對路，所以爬高睇下個櫃頂...Shit! 原來有幾礶百事可樂爆咗仲激射埋牆邊! 個人當堂醒晒，即時推開個櫃視察災情，不幸中之大幸，因為櫃頂有舖咗層膠，所以儲起咗一部份無繼續流落櫃底。全家上下即時堆開附近嘅嘢 check 下有無被波及，再將個櫃反轉再反轉。女友就幫我攞啲礶去洗，睇下有幾多礶無事要得返。攪咗兩個幾鐘先可以慢慢放返好啲嘢，好彩傷亡唔算好慘重，主要係套"模型神童3四郎"漫畫同少量玩具有可樂味... 最可惜係我走遍日本東京大阪收集到嘅"百事超人"汽水礶大部份報銷，唯有晌放落回收筒之前影返張大合照啦!

舊上司飯局

舊 Manager 唔經唔覺已經離職三個月，今晚就約咗佢食飯。都幾欣賞佢處事手法，唔拖泥帶水又公私分明，所以當時同佢關係都唔錯架! 咁點解會走? 因為佢返咗之前間公司做 Director 囉，職位比呢度好又唔駛留晌呢度受氣，我都閃啦。唔經唔覺兩年內已經轉咗兩個 M，全部都係頂唔順坐房個件 大瘤 而走既，可想而知粒瘤幾難頂吖!

夜半歌聲

公司忙到嘔茄，凌晨返到屋企當然想儘快攪掂就訓覺。點知沖完涼一行出沿室，耳邊即響起"胭脂扣"... 接著"心債"仲有"夕陽之歌"同"赤的衝擊"... 原來係商台節目"有誰共嗚"。今次嘉賓係羅君左，佢晌每首歌與歌之間，講咗一啲因為 梅姐 離開去遠行嘅感受。其中講到，因為佢唔想接受現實，所以當日無親口同 梅姐 講再見，時至今日佢依然好後悔放棄咗道別嘅機會。同時亦提及到因為 梅姐 以身作則，對佢待人處世有乜正面影嚮。

SK, Happy Birthday!

Happy Birthday!

祝妳本月尾嘅 多倫多演唱會 事事順利，今年再唱多啲好歌！

有毒玩具

最近有毒玩具要回收都算一單比較大嘅新聞，仲成為大部份本地報紙嘅頭版。其實早一日國內已經報導，網上亦廣泛流傳。不過我發現到最少有兩份報紙只係搬字過紙，簡體轉繁體，懶到咁都得?! 有朋友問覺唔覺得國內好多嘢有毒? 其實國內一向都有好多問題架啦，不過以前無浮面無人知啫，而家肯正視咪幾好囉! 正版都有問題，鐘意買老翻嘅就要小心喇，尢其係老翻玩具呀!

1/2 Blog

星期一開工就忙到不見天日，寫 Blog 都唔夠時間，日日只寫得一半，各位讀者等等啦。

夢

起身前發緊個夢，一次過夢見好多個自己身邊嘅好朋友一齊聚會。最特別係佢地係我唔同圈子嘅朋友，根本互不相識，而且個個都已經名花/草有主，但又單身附會喎？！中午落雨無波打，女友又去咗做 gym，索性乖乖陪 董事長夫人 飲茶。之後就上倉發掘下有乜值錢嘢，唔覺唔覺就攪到成八點鐘。其實夜晚女友約咗舊同學聚會，但我想比返啲私人空間佢，所以決定唔去，自己返屋企陪 董事長夫婦 食飯。

何謂專業?

女友下晝返咗公司跟 job，我就留晌屋企大掃除，夜晚就約返埋一齊行街街同晚飯。行到太子果邊比一個結婚片段吸引住，即時停步睇睇！唔好誤會，吸引我地睇嘅唔係因為拍得溫馨拍得好靚，而係佢用嘅配樂。畫面上係剛剛接新娘嘅片段，配樂竟然用"That's why you go away"...咁都得？！不如用埋"好心分手"或者"此情只待成追憶"啦？間製作公司都好馬虎啫，咁唔專業都得？最攪笑係個舖名有"專業"兩個字，仲要晌自己門口播段咁嘅片嚟趕客，厲害厲害！

八號風球

晌咁忙嘅日子仲玩打風都幾令人失預算！同 陳永仁 食完 lunch 一上到公司已經收到有機會打八號波，即時打電話比啲 vendor，安排如果打成風的話應該點交收點改個 schedule。天文台又玩嘢喎，臨時早一個鐘掛八號波，到已經出咗車嘅 vendor 嚟又唔係, 返轉頭又唔係？！當然人地大風大雨都堅持送過嚟，我就等埋啲件先走啦。後來聽到收音機話地鐵站迫爆，咪索性繼續留晌公司做嘢唔走住。之後知道到大部份交通工具都仲有得搭，就接埋女友一齊返屋企食飯，食飽飽睇陣電視就落波喇！

二少爺 生日快樂!

卓言仔嘅dadad，又大一歲喇，家陣你有子萬事足啦！不過都要同你講聲生日快樂嘅！ XDD~

開會? No way!

尋日開會開到無晒時間，總唔可以晚晚開 OT 架嘛，所以今日企硬一個會都唔去。女友因為要處理小花件事，向公司請咗一日假，離開動物醫院之後就返屋企。我絕對明白佢需要時間平服心情，所以叫留晌屋企好好休息，見少一日咁多啦。一個人專心工作，臨收工時收到 大編輯 電話，時間剛剛好所以齊齊開餐去，大家都唔駛一條友返屋企煮麵!

小花 2003-2007

晨早越洋會議

今朝晨早六點半就返到公司同美國開 video conference，起初收到 email 時仲以為得幾個人中標要 join，一坐低先至知原來其他部門都有代表，前前後後有成三十個人。差不多兩個鐘頭個會議完結，以為可以鬆一鬆，點知臨時加一個半粒鐘嘅 short meeting。之後十一點半有一個，兩點正又一個... 難道真係請我返嚟開會嘅?! 夜晚爭取時間約咗 闊少 同 阿姨 晌海運睇"變形金剛"，原來套戲成兩個半鐘，睇完成九點幾十點先過"糖潮"開餐。我記得有朋友仔想一齊再睇多次嘅，okay 啦，夾到時間都無問題嘅!

變形金剛(Transformers)

導演: 米高比爾(Michael Bay)
主演: 沙拉保夫(Shia LaBeouf), 美瑾霍絲(Megan Fox)
片種: 科幻劇情

2003年，小獵犬二號火星探測船發射升空，其後太空總署發表聲明指探測船不幸墜毀，但原來當局在肇事前曾成功聯絡探測船，當中一段影片記錄被列為最高機密──一個巨大的人形黑影向探測船展開襲擊，預示人類即將面臨一場前所未見的可怕戰禍！在宇宙中鬥爭多年的兩個外星種族「博派」和「狂派」，他們的戰火已經蔓延至太陽系的地球！雖然正義的「博派」將盡力保衛人類，但勢力更龐大的奸險「狂派」為了戰勝，不惜以人類為攻擊目標！人類被捲進兩股擁有恐怖破壞力的異星軍團鬥爭中，是否只能無助地任由宰割？

*呢套係近年最多朋友相約一齊睇嘅電影，內容同原著有分別，而且咁辛苦搵到"能源方塊"就將佢破壞有啲兒戲，但總算有頭有尾。電腦特技強勁，將來出 DVD 真係要慢鏡睇清楚啲機械人設定，係咪真係格格都咁靚先？總體都 OK 又多笑位，都適合一家大細齊齊睇！我覺得"大黃蜂"搶鏡過"柯柏文"，同埋睇個 ending 應該都會有續集喇！

Heart in Black

Yo~ 因為 雞屎 病咗，今日嘅長途會議暫時取消。唔好話我黑心，真係希望佢病多幾日返唔倒工，咁就無人日日挑戰我嘅 EQ 兼阻乜住我做 job！話時話，少咗煩人擾攘，我今日嘅工作能力最小上升咗 20%！趁自己狀態大勇，一於做夜小小殺多幾份 job 先得！

有波打有禮物收

今日九點幾自動醒咗，但我知道自己唔夠休息，所以迫自己再訓返。罕有地今次成功喎，最後變咗唔知醒，遲咗一個鐘先出到球場。之前落完大雨，天色時晴時陰反而令人打得好舒服。波友 露露 仲送咗“十二金釵-眾生花 CD+DVD”比我，多謝晒！打完波接埋女友一齊食 tea，跟住就上"潮特"探班兼收錢。原先打算上倉補貨，但去到半路收倒 伯母 電話腳痛行唔郁，即時改行程直入女友屋企再去急症室。照過 X-ray 無大礙，落醫院餐廳食完晚飯就坐的士送佢地返屋企。

凌晨三點過關

尋日講到女友成十二點到未返到香港，最終係驗貨驗到凌晨兩點幾, 廠搵專人車過關同返屋企! 雖然女友話間廠全日當佢上賓一樣, 所以先肯留咁夜, 不過一次半次好喇, 下次勢色唔對都係快快閃返嚟好! 今日嘅節目係咩? 咪返公司囉! 下星期要開兩個大會, 一個係同美國開 video conference, 都係早啲準備好個 schedule, 唔怕到時口啞啞!

一班白痴高層

隔離組嘅 界王 last day，聽佢講做得唔開心想轉工好耐，家陣成事，lunch 齊齊去飲茶"慶祝"佢甩難。呢間公司啲高層個腦都有少少問題，成日以為自己"大"公司，咁好福利都 resign 係你嘅損失? 都白痴嘅，晌呢度升一級隨時要等十年，如果明知留晌度無作為都唔走，咁就真係損失喇! 今日透過公司買咗兩張特價戲飛，一早約定女友齊齊睇。點知女友上大陸驗貨嘅過程非常之唔順利，趕唔到返落香港，而時間亦太急轉讓唔到出去。最後問准女友，請咗秘書姐姐代佢去睇。睇完戲返咗公司做埋啲手尾，等到成十二點女友都未返到香港，唯有返屋企繼續等啦!

五星級大鼠(Ratatouille)

導演: 畢貝特(Brad Bird)
粵語配音：鄭中基, 梁漢文, 張柏芝, 盧海鵬
片種: 動畫

為食大鼠 味王(Remy) 天生嘴刁為食，畢生志願是成為五星級大廚。味王 膽粗粗去到美食之都巴黎，「鬼鬼鼠鼠」就係想入廚房煮兩味，結果遇上不懂煮食又論論盡盡的廚房打雜闊條麵(Linguini)，更準備合作大展拳腳，由 味王 使出真功夫，由 闊條麵 出面又「出手」。當然搞到全城一鑊粥，炒起無數笑料！
餐廳的廚房有老鼠出現，俾人知道仲駛做生意？餐廳更加等住查牌兼封舖！究竟一隻人見人怕的老鼠，點樣在「生鼠勿近」的廚房闖出名堂？雞手鴨腳的 闊條麵，又點樣代鼠落廚？出名尖酸刻薄，食肆俾佢踩過等執笠的魔鬼食評家 梵高森，亦已瞄準 味王 所在的餐廳…到底 味王 能否成為真正的五星級大廚，實現這個不可能的夢想？

*一套非常稱職嘅暑期卡通片，故事流暢、劇情有教育意味、動畫出色、老少咸宜，絕對適合一家大細一齊欣賞！配音有驚喜，無咗平時一眾 DJ 配到咁古靈精怪，聽得舒服好多！

A.Mui Live - 壞女孩獨唱戲 (載譽重演)

又要返大陸開會

今朝一早就同 雞屎 返咗大陸開會，呢兩日風頭火勢仲要同一間車成兩粒中，幾驚自己忍唔住手推佢落車。Lunch 時間我唔想見到佢，一早暗中約好幾個同事一齊食，可惜 雞屎 自知無人理，竟然迫大陸 team 同事陪佢一齊食，攪到有帶飯嘅同事個個面有難色，但又唔敢推喎。最後食咗二百幾蚊，佢見班同事左計右計，就自動自覺咁話今餐請大家。回程時我一個箭步坐晌司機隔旁邊個位，可以保持距離兼樂得清靜！