櫃員機事件簿

今晚發生一件從無諗過嘅事, 就係我竟然晌櫃員機襟完錢唔記得攞... 話說襟錢期間, 一直同女友傾緊計, 咁襟完錢就收起提款卡, 同時間我地又討論緊櫃員機旁邊一張海報... 應該就係呢一刻出事! 咁我又幾時發現自己無攞錢呢? 就係食完飯找數, 搵極銀包都無一百蚊紙嘅時候喇... 好彩都仲有少少錢晌身勉強夠找數啫!

鴨寮街做節

哈哈~ 女友好聽話，真係訓個飽唔止十二個鐘。講咗幾次想上"忠僕號"睇書，趁住假期時間充裕啲就 go 啦。食完個 tea 去到碼頭，見到架船多人到呢...! 去到隊尾計一計時間，隨時要排大半個鐘，上到去人太多又睇唔到書，最後決定擇日重賽。夜晚約咗女友另一批親戚做節，地點係鴨寮街附近一間幾十年歷史嘅舊式酒家，一圍枱成十八個人都唔駛千三蚊，勁平呀!

返屋企做節

中秋正日約咗幾個同事 lunch 時間飲茶當做節。而下晝原先有得早收四點，不過都無乜特別嘢攪，所以最後都無早走。夜晚就準時八點返到屋企做節，一如已往咁豐富，未食到湯圓女友已經開始投降。飽暖思床褥，決定今晚唔夜浦，等女友可以返屋企訓個夠，起碼十二個鐘先得!

中秋節快樂

巧遇雜種

中秋節前夕，變形金剛 一句有急事就閃咗去假後先返。嘩! 無人阻頭阻勢，重唔開行引擎務求要準時收工咩。夜晚約咗女友親戚做節食飯，七點幾趕到油麻地。食到一半，竟然撞到 雜種寶寶 嘅 prok & chop，重要坐正對面枱，呢個香港真係細!

十室九空商場

又一次無風無雨又無波打，真無癮! 返上樓仲要比 董事長 串，話無落雨點解都唔打...(世伯，唔通我自己一個打晒咩!)。隊友們，你地啲熱情去咗邊呀? 多咗幾粒鐘做乜好，講都無人信，我竟然唔放心返咗公司跟 job 呀... 世界變喇?! 夜晚同女友到旺角行街，上咗一個用藝員開舖為號召嘅商場，幾層樓加埋都只係得小貓三數隻，十室九空都幾恐怖!

告別"麗音王"

屋企部"麗音王"用咗十幾年, 終於都要告老還鄉。約咗 董事長夫婦 兩點幾去買電視，去到第一間電器舖已經有心水，但係個 sales 技巧太差影響購買慾，都係 join 埋女友食返個 tea 開個家庭會議先。跟住倆個拍拖拖過又一城間大分店再睇多次，呢邊個 sales 有問有答似樣好多，最後亦都交易成功, 買咗一部 LG 26" LCD TV。大出血之後趕過浸大聽音樂會，聽完就過咗廟街食"豬骨粥"。 味道真係唔錯架，如果唔怕廟街龍蛇混雜，可以一試。

天下老闆一樣...

又係上 china office 嘅日子，全程公司車只得司機同我... 嘻嘻~幾時升咗職有自己專車都唔知?! 上到去用 wed-mail 做嘢，點知慢過蝸牛，去到成五點幾都未攪掂晒，局住要跟公司車返香港 office 埋尾~頂! 回途仲要大塞車，發呆中收到 蘋果電腦 電話約食飯。都有一段時間無見，一於同女友齊齊出席。席間離唔開工作話題，經過兩小時嘅一面倒討論，結論就係"天下烏鴉一樣黑, 天下老闆一樣西"喇!

政治午餐

連續兩個星期嘅大會開得七七八八，美國班同事開亦始準備回歸，新上任嘅 大眼經理 終於可以趁食晏時間認識下我地組同事。唔計隻變形金剛變成"鞋擦"型態有啲反胃，呢餐飯尚算食得開心。夜晚八點幾 大編輯 打嚟約食晚飯，原來佢下星期到日本工幹成十日(玩就真!)，諗住見個面。哈哈~咁遲先打嚟當然食咗飯，最後改為一行三人收工宵夜囉!

繼續變形

話口未完，今日唔知邊個踩親狗尾! 一對一開會時都仲好地地，但幾個鐘頭之後又無端端變形晌度亂咁吠，出 email 四圍辣人，唔通佢更年期?! 好喇，其中一封辣著我，佢又 cc 晒比佢上一級嘅，真係答又唔係唔答又唔係! 最後係...... "答咗"!

變形金剛 - 禽獸系戰士

大公司人事變動頻繁，職位日新月異，明升暗降絕不出奇! 今日就同咗第二個部門嘅過氣主管食晏，傾落先知佢表面調升到一個新部門，實則被削權。當佢知道我上家佢舊戰友而家進化咗做"變形金剛-禽獸系戰士"都好無奈，認為佢可能餓權太耐所以失控。仲提醒兩位小朋友佢始終係上家，唔知佢幾時係人係狗，小心唔好踩到條狗尾! OK，收到 madam!

大傻 - 楊千嬅

大傻　唱: 楊千嬅　
作詞: 林夕　作曲: Eric Kwok　

幻想　與他沿路大聲販賣
毛公仔　彷似愛海無崖　被追趕也像情懷
也幻想　與他常為幸福自大
何必想舉債　哪管要吃齋　歲月縱使難捱

傻瓜一點看　我們還有　手仍能拖
夢仍能做　眼仍能看
心仍能開　找到笑的理由　辛苦不算醜

我們還有　嘴仍能親　事仍能做　戲仍能看
歌仍能聽　天涯陪著走
屋雖細有自由　不需不濫擁有

沒錯　奇情從未及茱麗葉
奇蹟怎麼會夠汪明荃　仍可掌快樂大權
我自信　凡事樂在屬於自願
夢想不想遠也很怕氣喘　撲入最高集團

傻瓜一點看　我們還有　手仍能拖（誰都想很富有）
夢仍能做　眼仍能看（誰都不必富有）
心仍能開　找到笑的理由　艱苦不算醜

我們還有　嘴仍能親（誰都想很富有）
事仍能做　戲仍能看（誰都不必富有）
歌仍能聽　天涯陪著走（仍有蜜運同遊）
家雖細有自由

只需少有溫柔　難有便別有　真不想折壽
能有才願有　不想與壓力互鬥　放浪地扮

無需要副修　也交到好友
誰都想很富有　誰都不必富有
仍有蜜運同遊　分享過這地球

5 Mins. Tennis

今日都算黑仔，上到球場就撞到 教練，見有時間大家就傾咗幾分鐘，傾傾吓突然間天陰陰，咁即時停口入場開波啦! 可惜最後都打唔夠五分鐘就落雨，仲落到一發不可收拾，too bad! 避咗十幾分鐘雨都唔似會停，唯有淋住雨上更衣室沖涼換衫。點知半個鐘左右就停晒雨，吹漲!

倉務日

星期六又係叉電嘅時候，同女友訓到成十二點先願起身。擦牙洗面 check email，再坐定定煲咗一連串明珠台嘅"國家地理雜誌"，har 到四點幾先去"吉野家"食全日第一個早/午/茶餐。之後上倉影相點貨，唔覺唔覺就攪到成九點鐘，嗱嗱聲逃離戰場去開餐啦!

Shabu Shabu Night

臨近中秋佳節，今晚有 vendor 請食飯，仲係豪請果種，正! 兩間公司各派出四位代表，一行八人去食 shabu shabu。第二次幫襯"禪八"，水準依然高、服務依然好、價錢依然貴。菜式有: 特選和牛しゃぶしゃぶ、黒豚しゃぶしゃぶ、ずわい蟹しゃぶしゃぶ、刺身盛合せデラックス、壽司盛合せデラックス...等，再加一支兩呎高嘅特大日本清酒"八海山~吟醸酒(新潟)"。埋單幾乎要半個月人工，都有少少唔好意思，真係多謝晒!

愛樂享樂 - 人生可有知己 Live

由於反應良好，今日再下一城，嚟多一首"人生可有知己"。


NOKIA 愛樂享樂 903飛馳中的音樂會

愛樂享樂 - 眾生花 Live

今晚真係失策，原本 forum 可以攞到飛，點知出手慢咗... 早知就 call 爆啲記者 friend 啦! 好彩 forum 班手足都照顧週到，返到屋企已經有精彩片段睇，先嚟"十二金釵 眾生花"~ 去片!


NOKIA 愛樂享樂 903飛馳中的音樂會

高山劇場騙案

董事長夫人 又登台，今次係佢第一次晌高山劇場演唱，開到口邊敢唔去捧場吖...! 同女友八點幾趕到場又未輪到佢唱，坐咗一陣悶到忍唔住跟 董事長 入後台搵佢，等到佢出場先返埋位坐。之前又話好早唱完，又話我地個人到一到就可以走...最後唱完係成十點半，又一次受騙呀!

新 Ｍ 上場

今日新 Ｍ 上場，淨係同 HR 報到，再同佢上級溝通都已經玩咗大半日。直至佢收工為止，我只係同佢講咗一句，就係食 welocme lunch 時嘅自我介紹。

久違了的 King's Park

個場終於開翻喇，始終覺得晌呢度打波環境清幽啲，空氣都好啲。因為女友今日約咗 豬豬，所以我同 tennis team tea 完之後，見時間尚早就去剪髲。夜晚 join 返女友，上公司攞返袋禮物就去食飯喇~

以物易物

最近幾個星期六嘅第一個節目就係"叉電"，儘可能都訓夠八個鐘。下晝同女友各自留晌屋企，佢就同 臭狗當奴 沖涼，我就玩"小掃除"。黃昏先約埋一齊過九龍塘 LCC，完咗聚會就慢慢行過去旺角探班(實情係巡視業務同手飾維修)。路過"7仔"見套新米奇扭蛋幾得意，就諗住扭一次中返款 Chip & Dale 比女友, 點知盲就中咗米奇?! 見旁邊有兩個妹妹仔拎住款我想要嘅松鼠仔眼望望部機，我就問佢想要乜? 佢話要史狄仔... 跟住佢問返我想要乜? 我即時指住佢隻手話要 Chip & Dale，我話不如用米奇交換吖? 佢一句"好呀"我地就成功交易，當然皆大歡喜啦！

女友正式畢業

今日係女友讀咗三年果個藝術課程嘅畢業禮。基於佢認為無必要，所以我都無請假出席。畢業禮晨早九點就開始，完成後女友同班同學仔食晏又食 tea 直落聚舊，全日玩到不亦樂乎。原本約咗 大編輯 晚飯，但臨時應承咗伯母一齊食飯當慶祝，所以押後幾粒鐘變咗食宵夜。

大紅袍 - 何韻詩

大紅袍 　唱: HoCC@goomusic 　
作詞: 陳浩峰@人山人海　作曲: BensonFan@goomusic　

大路留在原路　我不會甘於行大直路
大步從未停步　我喜愛獨自行大大步
大霧攔著前路　還未從末路原地踏步
天高我心更高　我身再小亦上路

無盡世界　任我攀登
難道是自己想得太天真　無畏嗎

不擔心　小小委屈　小小阻折　不見得嚇人
紅袍待我將披起勝利名份
經得起　高高低低起起跌跌　不要緊

沒有腰骨　怎麼披甲上陣　我憑甚麼叫做人

自重還是無用　還是從未被提拔重用
只想過一秒鐘　每一秒鐘盡情地利用
天天進攻進攻　如未曾共用留待備用
自問我身我心　最終榮辱亦與共

沒有腰骨　怎麼披甲上陣　我憑甚麼叫做人　
無畏嗎

變、變、變

呢幾日個 AM 嘅態度變得客客氣氣，硬係覺得唔多對路... 哦! 今日知乜事喇，原來已經請咗個 M，即係佢坐正無望，所以想搏好感爭返啲人心囉。Well，對"聖鬥士"出過嘅招式第二次係唔會再有效，所以佢大可以慳啲喇，慳返嚟買鞋油或者"保露"比佢自己都好呀。

有場又有地

皇天不負有心人，今日終於 book 到開 party 嘅場地，唔駛再擔心無地方攪 funtion，幾乎食唔到 lunch 都係抵嘅! 夜晚收到 大佬 電話講決定咗今年唔參與雙十嘅團體活動，當然得返我一條"冷"我都唔會去。其實大家都十五十六咗好耐，想參與又無一個 support 自己嘅理由，而家有個決定都好，如果可以有返個小組活動就最理想啦。

愛樂享樂 - 903飛馳中的音樂會

喂喂~ 最近有無人要買電話呢？有無諗過會買 Nokia 7500 / 6110 / N95 其中一部？吓，呢幾部有乜咁特別？呀...唔知喎...我剩係知買呢幾個型號會送"NOKIA 愛樂享樂 903飛馳中的音樂會"飛，想搶你地張飛去睇之嘛，有飛嘅快啲聯絡我啦！XDD~

迷你茶餐廳玩具

同上星期剛剛相反，今日由好天變落雨，一個二個仲換晒衫準備出門口，真掃慶！多咗幾粒鐘，又係時候晌屋企執吓嘢，順便整理吓個 blog 寫咗又未出街嘅草稿。收到風黃埔有女友想搵嘅嘢，所以準時五點接埋佢過去行街街，果然係搵到喎！路過一間大型玩具店，發現一盒心儀好耐而市面已經絕跡嘅小玩具"香港茶餐廳"，女友二話不說就攞去比錢。一擊即中，係我最想要嘅"早餐B"，有火煺通粉+腸仔煎蛋。嘻嘻~多謝晒！

生於九月一日

一早起身同女友過咗 LCC 上堂，之後就趕返去陪 董事長夫婦 飲茶。跟手上倉攞貨去朋友舖頭，見到旺角人山人海先醒起仲有兩日就開學。九月一日係開學日之外，亦係我兩位舊同學嘅生日日期。其中神神化化嘅 蔬菜先生 已經失蹤一年有多，最後消息係上大陸攪生意，暫時音訊全無。另一位 玩具狗，講起佢就記起"最佳損友"呢首歌，Wyman 嘅歌詞好中，寫出咗我地嘅關係。由好朋友變陌路人，當中過程同被人出賣嘅感覺確實唔好受。不過時間可以沖淡一切，早兩年晌 MK 見返佢，佢好熱情咁請我上佢屋企食飯，仲即時打比 狗嫂 話有神秘嘉賓上去坐。老朋友聚舊講下近況，交換其他朋友嘅消息，當晚的確係傾得幾開心，最後仲傾到過晒時要坐的士走。但係跌爛咗嘅玩具始終有瑕疵，永遠都唔會變得返做新買嘅時候!

最佳損友 - 陳奕迅

最佳損友　唱: 陳奕迅 　
作詞: 黃偉文　作曲: Eric Kwok　

朋友我當你一秒朋友
朋友我當你一世朋友
奇怪過去再不堪回首
懷緬時時其實還有

朋友你試過將我營救
朋友你試過把我批鬥
無法再與你交心聯手
畢竟難得有個最佳損友

從前共你促膝把酒傾通宵都不夠
我有痛快過你有沒有
很多東西今生只可給你
保守至到永久
別人如何明白透
實實在在踏入過我宇宙
即使相處到有過裂口
命運決定了以後再沒法聚頭
但說過去卻那樣厚

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某

生死之交當天不知罕有
到你變節了至覺未夠
多想一天彼此都不追究
相邀再次喝酒
待葡萄成熟透
但是命運入面每個邂逅
一起走到了某個路口
是敵與是友
各自也沒有自由
位置變了各有隊友

問我有沒有
確實也沒有一直躲避的藉口
非甚麼大仇
為何舊知己在最後變不到老友
不知你是我敵友
已沒法望透
被推著走跟著生活流
來年陌生的是昨日最親的某某
早知解散後各自有際遇作導遊
奇就奇在接受了各自有路走
卻沒人像你讓我眼淚背著流
嚴重似情侶講分手

有沒有
確實也沒有一直躲避的藉口
非甚麼大仇
為何舊知己在最後變不到老友

不知你又有沒有
掛念這舊友
或者自己早就想通透
來年陌生的是昨日最親的某某
總好於那日我沒有沒有遇過某某

宜家餐廳

女友今日又要上廠睇色, 個 vendor 安排架車晌屋企附近接佢, 咁就唔駛自己叫車上落廠, 安全好多. 我就繼續發揮小宇宙, 以極速完成手頭上嘅 job, 準時八點飛到入沙田搵佢. 今次行 IKEA 果邊, 地方大人又唔多, 行得幾舒服. 路過餐廳見價錢唔算貴, 就決定試一試, 唔駛返新城市廣場同人逼. 味道比意料中好, 有機會可以一試.

又要開 VC

大公司有個唔好處, 就係好多好似好有用但其實浪費緊你時間嘅會要開. 今日又有一個 video conference 要我地八點三返到公司, 最後九點先開始, 成十點半先開完. 起碼有一半以上同事係同我一樣無必要出席嘅, 所以全程除咗"HI & Bye"之外, 都無需要講啲乜. 夜晚女友約咗老友 豬豬 行街睇衫傾密計, 我就晌公司繼續努力, 十點左右先 join 佢地食飯. 問大家一個問題, 你地認為一對戀人女仔比男仔高幾吋, 可唔可以接受呢?

旅遊大使

手頭上堆爛攤子開始受控, 今晚終於可以早收工少少, 同女友過吓二人世界. 過咗佐敦行街街, 行咗一陣就去食粥, 之後再過"松記"食糖水. 去到見到人山人海, 兩位都要等, 真係想掉頭走. 等等吓有對外國遊客慕名而來, 點知店員唔識英文雞同鴨講, 咁我地睇唔過眼就幫句口啦. 跟住個店員好攪笑咁問我地介唔介意安排一齊坐, 坐低咗我地就翻譯啲糖水比對遊客知, 原來啲譯名真係幾奇怪架, 我地自己都忍唔住笑! 之後傾計, 遊客問香港有乜好玩地方介紹? 第一次嚟, 都係介紹佢地上山頂睇吓維港夜景, 行吓赤柱, 浦吓蘭桂芳, 仲有海洋公園... 等等啦! 食飽飽, 臨走時佢地講多謝幫忙, 我幾想學廣告咁答返句: Welcome to Hong Kong!"呀~ XDDD~

晚飯定宵夜?

今晚女友返咗 Art Center 參加謝師宴, 既然夜晚自己一個, 當然爭取時間儘快殺清啲 job, 唔係我遲早晌公司打人. 正心大心細夜晚果餐食唔食之時, 大編輯 打電話嚟約十點後食飯(宵夜). 望望個 schedule, 原來都成兩三個星期無見過, 無計啦, 佢都一樣周身唔得閒. 最後成十一點幾先見到面, 食完都已經十二點幾, 好彩可以坐的士啫!

董事長夫人 生日快樂!

當然要祝妳: 青春常註, 身體健康啦!

杜德偉 中秋動感演唱會

杜德偉/李玟 中秋動感演唱會

Open Sky Theatre
Harrah’s Rincon Casino & Resort, San Diego, California
售票網址: Click Here

9月22日在聖地牙哥舉行售票演唱會，美國聖地牙哥哈樂斯大酒店
9月23日在美國舊金山賭場也有一場，是招待賭客的表演。
美國舊金山 Shore Line Amphitheatre
One Amphitheatre Parkway, Mountain View, California 94043

雨後陽光

十點幾起身, 一如已往執下屋 check 下 email 時發現有生意喎... 但係平日忙成咁, 根本上唔到倉攞件貨, 點好? 諗咗一陣決定打少陣波, 上倉攞件貨先, 錢錢緊要啲! 攞完即時飛車出球場, 行到一半竟然橫風橫雨...唔係咁玩呀?! 冒雨行到球場, 大家都行埋一邊避雨, 一地水氹打唔到啦, 唯有齊齊去茶餐廳坐下啦. 就晌果一個鐘, 忽然又陽光普照喎, 球場即時乾返晒. 見約咗女友未夠鐘, 快快落場打返陣啦! 打完波接埋女友, 全晚都晌旺角太子一帶打滾, 無他嘅, 陪佢搵靚衫嘛!

生日海鮮餐

尋晚 OT 完，返到屋企洗完白白，一訓上床就訓著，醒時已經係十一點幾。約咗女友二點半，接埋佢就過灣仔會展睇展覽，同期又電腦又傢俬又結婚展，攪到會展迫到爆，有贈券都無用，塞咗好耐人先入到去。睇展覽睇到七點鐘，又係時候趕返過尖咀，因為訂咗枱同 董事長夫人 食生日飯。今晚都算齊人，成個董事局成員之外，再加契仔契女契孫，剛剛好一圍。生日飯晌"彩雲軒"食，一早訂定咗一個主角心儀嘅海鮮餐。個餐都好抵食，樣樣都好大碟，最後食唔晒要打包。食物質素同服務都好OK，個總經理又識做，自動加送咗一籠巨大壽包比 董事長夫人添!

夜半大掃除

話說我晌公司都算有頭有面，經常都收到唔同部門各式各樣、大大細細嘅 sample。久而久之攪到晌公司一箱二箱，收入與支出又不相稱，比朋友都比唔切。見今晚做 job 做到心情煩躁，索性玩大掃除發洩吓精力! 經過一粒鐘嘅磁場轉動，掉咗兩大箱呀，正! 各位同事，之前嘅消化晒喇，又係時候比新產品我啦~ XDDD!

自己返香港

今朝一早返咗 China office 開會，點解咁忙都仲上去? 咪又係因為個仆街 AM 囉! 完先諗住上車之後訓下叉下電，點知全車同事都識，雖然大家唔同部門都由上車講到落車 XDD~! Lunch 就同 assign 跟我個同事一齊食，仲要同我爭比錢，我因為唔夠"人仔"爭輸咗! 本來要等到五點半先有公司車，但撞到採購部個同事幫個 VP book 咗架白牌車載埋我，當然即閃自己返香港先啦，最少多兩粒鐘做嘢!

珍惜聚會時'07

News from Anita Mui Int'l Fan Club

Anita 的生日又快到了，歌迷會將舉行聚會，紀念這個重要的日子更加是大家一年一度相聚的日子。 Anita 生日當天中午，我們會在省善真堂拜祭，歡迎大家前來致意。晚上，我們將於酒店舉行一年一度的自助晚餐聚會。(如要送花到酒店，可於下午4時後送到)

日期：2007年10月10日(星期三)
地點：富豪九龍酒店 (尖沙咀麼地道71號)

如欲參加聚會，大家請於以下時間購票。
日期：2007年9月8日及9日(星期六、日)
時間：下午3:00 – 6:00
地點：歌迷會會址 – 香港北角電氣道148號10樓1003室
如有任何查詢, 請聯絡歌迷會.
25562695 / amifc1985@yahoo.com.hk

難得清靜

今日個 AM 死咗去大陸，office 終於樂得清靜! 無狗吠聲固然好，最開心係佢愛將竟然趁佢唔晌度，口出冤言話公司太多嘢做，再係咁落去會頂唔住! 好喇好喇，連親信都有微言，睇你幾時眾叛親離!

某某數簿燃燒中

今朝同隔離部門開會傾貨期，一如我所料個八婆 AM 想置身事外，每次同事要佢覆期都推個波過嚟自己唔答，因為我答咗個期就係我責任，到時做唔到佢都可以卸膊! 好喇，開完會出嚟即時話我乜都唔答，啲期又混亂又安排得唔好... 佢吠完之後我冷冷地答佢一句:「我第一日已經同你講唔夠時間做架?!係你唔理之嘛!」佢即時窒一窒唔識答，跟住繼續吠... 直到佢發現我開始冒煙先收口! 我當時真係嬲到震, 唔係誇張隻手真係"震"架! 真係忍得好辛苦，啲"粗口"幾乎衝口而出! 最後我用咗十分鐘 cool down 我自己，分析比自己聽，如果我開口"小"佢甚至乎"打"佢又如何? 搵過份工唔難，但係就會打亂我嘅 schedule，"西"人四圍都有，比一隻畜生打亂自己嘅 plan 唔值得!

Ah E, Happy Bday!

Happy Birthday to Ah E~ Wish you have a new BF asap la!

生日火鍋

雖然尋晚雷雨交叉，但今日天公造美有波打喎! 近排晌公司每日屈十幾個鐘，終於可以運動舒展吓，唔係遲早晌公司打人。接埋女友之後去食 tea，之後六條友仔過澳海城行街街，夠七點就一程的士飛咗過九龍城同 Ah E "拾吓拾吓"慶祝生日。舖頭名叫"龍城金記"，係女友個舊同學屋企開嘅，啲嘢食唔錯架，已經帶過好多朋友嚟。特別啲配料有蠔仔餃,炸腐皮同墨魚滑，大家有機會不防去試試，要定位可以搵我! XDD~

爆裂珍藏

話說尋晚半夜返到屋企，事長夫人 話書櫃背面發現有污水積，唔知係咪牆身入水? 昏迷八小時之後，訓醒就行埋去睇睇。雖然無發現，但果個角落又真係特別焗喎?! 硬係覺得唔對路，所以爬高睇下個櫃頂...Shit! 原來有幾礶百事可樂爆咗仲激射埋牆邊! 個人當堂醒晒，即時推開個櫃視察災情，不幸中之大幸，因為櫃頂有舖咗層膠，所以儲起咗一部份無繼續流落櫃底。全家上下即時堆開附近嘅嘢 check 下有無被波及，再將個櫃反轉再反轉。女友就幫我攞啲礶去洗，睇下有幾多礶無事要得返。攪咗兩個幾鐘先可以慢慢放返好啲嘢，好彩傷亡唔算好慘重，主要係套"模型神童3四郎"漫畫同少量玩具有可樂味... 最可惜係我走遍日本東京大阪收集到嘅"百事超人"汽水礶大部份報銷，唯有晌放落回收筒之前影返張大合照啦!

舊上司飯局

舊 Manager 唔經唔覺已經離職三個月，今晚就約咗佢食飯。都幾欣賞佢處事手法，唔拖泥帶水又公私分明，所以當時同佢關係都唔錯架! 咁點解會走? 因為佢返咗之前間公司做 Director 囉，職位比呢度好又唔駛留晌呢度受氣，我都閃啦。唔經唔覺兩年內已經轉咗兩個 M，全部都係頂唔順坐房個件 大瘤 而走既，可想而知粒瘤幾難頂吖!

夜半歌聲

公司忙到嘔茄，凌晨返到屋企當然想儘快攪掂就訓覺。點知沖完涼一行出沿室，耳邊即響起"胭脂扣"... 接著"心債"仲有"夕陽之歌"同"赤的衝擊"... 原來係商台節目"有誰共嗚"。今次嘉賓係羅君左，佢晌每首歌與歌之間，講咗一啲因為 梅姐 離開去遠行嘅感受。其中講到，因為佢唔想接受現實，所以當日無親口同 梅姐 講再見，時至今日佢依然好後悔放棄咗道別嘅機會。同時亦提及到因為 梅姐 以身作則，對佢待人處世有乜正面影嚮。

SK, Happy Birthday!

Happy Birthday!

祝妳本月尾嘅 多倫多演唱會 事事順利，今年再唱多啲好歌！

有毒玩具

最近有毒玩具要回收都算一單比較大嘅新聞，仲成為大部份本地報紙嘅頭版。其實早一日國內已經報導，網上亦廣泛流傳。不過我發現到最少有兩份報紙只係搬字過紙，簡體轉繁體，懶到咁都得?! 有朋友問覺唔覺得國內好多嘢有毒? 其實國內一向都有好多問題架啦，不過以前無浮面無人知啫，而家肯正視咪幾好囉! 正版都有問題，鐘意買老翻嘅就要小心喇，尢其係老翻玩具呀!

1/2 Blog

星期一開工就忙到不見天日，寫 Blog 都唔夠時間，日日只寫得一半，各位讀者等等啦。

夢

起身前發緊個夢，一次過夢見好多個自己身邊嘅好朋友一齊聚會。最特別係佢地係我唔同圈子嘅朋友，根本互不相識，而且個個都已經名花/草有主，但又單身附會喎？！中午落雨無波打，女友又去咗做 gym，索性乖乖陪 董事長夫人 飲茶。之後就上倉發掘下有乜值錢嘢，唔覺唔覺就攪到成八點鐘。其實夜晚女友約咗舊同學聚會，但我想比返啲私人空間佢，所以決定唔去，自己返屋企陪 董事長夫婦 食飯。

何謂專業?

女友下晝返咗公司跟 job，我就留晌屋企大掃除，夜晚就約返埋一齊行街街同晚飯。行到太子果邊比一個結婚片段吸引住，即時停步睇睇！唔好誤會，吸引我地睇嘅唔係因為拍得溫馨拍得好靚，而係佢用嘅配樂。畫面上係剛剛接新娘嘅片段，配樂竟然用"That's why you go away"...咁都得？！不如用埋"好心分手"或者"此情只待成追憶"啦？間製作公司都好馬虎啫，咁唔專業都得？最攪笑係個舖名有"專業"兩個字，仲要晌自己門口播段咁嘅片嚟趕客，厲害厲害！

八號風球

晌咁忙嘅日子仲玩打風都幾令人失預算！同 陳永仁 食完 lunch 一上到公司已經收到有機會打八號波，即時打電話比啲 vendor，安排如果打成風的話應該點交收點改個 schedule。天文台又玩嘢喎，臨時早一個鐘掛八號波，到已經出咗車嘅 vendor 嚟又唔係, 返轉頭又唔係？！當然人地大風大雨都堅持送過嚟，我就等埋啲件先走啦。後來聽到收音機話地鐵站迫爆，咪索性繼續留晌公司做嘢唔走住。之後知道到大部份交通工具都仲有得搭，就接埋女友一齊返屋企食飯，食飽飽睇陣電視就落波喇！

二少爺 生日快樂!

卓言仔嘅dadad，又大一歲喇，家陣你有子萬事足啦！不過都要同你講聲生日快樂嘅！ XDD~

開會? No way!

尋日開會開到無晒時間，總唔可以晚晚開 OT 架嘛，所以今日企硬一個會都唔去。女友因為要處理小花件事，向公司請咗一日假，離開動物醫院之後就返屋企。我絕對明白佢需要時間平服心情，所以叫留晌屋企好好休息，見少一日咁多啦。一個人專心工作，臨收工時收到 大編輯 電話，時間剛剛好所以齊齊開餐去，大家都唔駛一條友返屋企煮麵!

小花 2003-2007

晨早越洋會議

今朝晨早六點半就返到公司同美國開 video conference，起初收到 email 時仲以為得幾個人中標要 join，一坐低先至知原來其他部門都有代表，前前後後有成三十個人。差不多兩個鐘頭個會議完結，以為可以鬆一鬆，點知臨時加一個半粒鐘嘅 short meeting。之後十一點半有一個，兩點正又一個... 難道真係請我返嚟開會嘅?! 夜晚爭取時間約咗 闊少 同 阿姨 晌海運睇"變形金剛"，原來套戲成兩個半鐘，睇完成九點幾十點先過"糖潮"開餐。我記得有朋友仔想一齊再睇多次嘅，okay 啦，夾到時間都無問題嘅!

變形金剛(Transformers)

導演: 米高比爾(Michael Bay)
主演: 沙拉保夫(Shia LaBeouf), 美瑾霍絲(Megan Fox)
片種: 科幻劇情

2003年，小獵犬二號火星探測船發射升空，其後太空總署發表聲明指探測船不幸墜毀，但原來當局在肇事前曾成功聯絡探測船，當中一段影片記錄被列為最高機密──一個巨大的人形黑影向探測船展開襲擊，預示人類即將面臨一場前所未見的可怕戰禍！在宇宙中鬥爭多年的兩個外星種族「博派」和「狂派」，他們的戰火已經蔓延至太陽系的地球！雖然正義的「博派」將盡力保衛人類，但勢力更龐大的奸險「狂派」為了戰勝，不惜以人類為攻擊目標！人類被捲進兩股擁有恐怖破壞力的異星軍團鬥爭中，是否只能無助地任由宰割？

*呢套係近年最多朋友相約一齊睇嘅電影，內容同原著有分別，而且咁辛苦搵到"能源方塊"就將佢破壞有啲兒戲，但總算有頭有尾。電腦特技強勁，將來出 DVD 真係要慢鏡睇清楚啲機械人設定，係咪真係格格都咁靚先？總體都 OK 又多笑位，都適合一家大細齊齊睇！我覺得"大黃蜂"搶鏡過"柯柏文"，同埋睇個 ending 應該都會有續集喇！

Heart in Black

Yo~ 因為 雞屎 病咗，今日嘅長途會議暫時取消。唔好話我黑心，真係希望佢病多幾日返唔倒工，咁就無人日日挑戰我嘅 EQ 兼阻乜住我做 job！話時話，少咗煩人擾攘，我今日嘅工作能力最小上升咗 20%！趁自己狀態大勇，一於做夜小小殺多幾份 job 先得！

有波打有禮物收

今日九點幾自動醒咗，但我知道自己唔夠休息，所以迫自己再訓返。罕有地今次成功喎，最後變咗唔知醒，遲咗一個鐘先出到球場。之前落完大雨，天色時晴時陰反而令人打得好舒服。波友 露露 仲送咗“十二金釵-眾生花 CD+DVD”比我，多謝晒！打完波接埋女友一齊食 tea，跟住就上"潮特"探班兼收錢。原先打算上倉補貨，但去到半路收倒 伯母 電話腳痛行唔郁，即時改行程直入女友屋企再去急症室。照過 X-ray 無大礙，落醫院餐廳食完晚飯就坐的士送佢地返屋企。

凌晨三點過關

尋日講到女友成十二點到未返到香港，最終係驗貨驗到凌晨兩點幾, 廠搵專人車過關同返屋企! 雖然女友話間廠全日當佢上賓一樣, 所以先肯留咁夜, 不過一次半次好喇, 下次勢色唔對都係快快閃返嚟好! 今日嘅節目係咩? 咪返公司囉! 下星期要開兩個大會, 一個係同美國開 video conference, 都係早啲準備好個 schedule, 唔怕到時口啞啞!

一班白痴高層

隔離組嘅 界王 last day，聽佢講做得唔開心想轉工好耐，家陣成事，lunch 齊齊去飲茶"慶祝"佢甩難。呢間公司啲高層個腦都有少少問題，成日以為自己"大"公司，咁好福利都 resign 係你嘅損失? 都白痴嘅，晌呢度升一級隨時要等十年，如果明知留晌度無作為都唔走，咁就真係損失喇! 今日透過公司買咗兩張特價戲飛，一早約定女友齊齊睇。點知女友上大陸驗貨嘅過程非常之唔順利，趕唔到返落香港，而時間亦太急轉讓唔到出去。最後問准女友，請咗秘書姐姐代佢去睇。睇完戲返咗公司做埋啲手尾，等到成十二點女友都未返到香港，唯有返屋企繼續等啦!

五星級大鼠(Ratatouille)

導演: 畢貝特(Brad Bird)
粵語配音：鄭中基, 梁漢文, 張柏芝, 盧海鵬
片種: 動畫

為食大鼠 味王(Remy) 天生嘴刁為食，畢生志願是成為五星級大廚。味王 膽粗粗去到美食之都巴黎，「鬼鬼鼠鼠」就係想入廚房煮兩味，結果遇上不懂煮食又論論盡盡的廚房打雜闊條麵(Linguini)，更準備合作大展拳腳，由 味王 使出真功夫，由 闊條麵 出面又「出手」。當然搞到全城一鑊粥，炒起無數笑料！
餐廳的廚房有老鼠出現，俾人知道仲駛做生意？餐廳更加等住查牌兼封舖！究竟一隻人見人怕的老鼠，點樣在「生鼠勿近」的廚房闖出名堂？雞手鴨腳的 闊條麵，又點樣代鼠落廚？出名尖酸刻薄，食肆俾佢踩過等執笠的魔鬼食評家 梵高森，亦已瞄準 味王 所在的餐廳…到底 味王 能否成為真正的五星級大廚，實現這個不可能的夢想？

*一套非常稱職嘅暑期卡通片，故事流暢、劇情有教育意味、動畫出色、老少咸宜，絕對適合一家大細一齊欣賞！配音有驚喜，無咗平時一眾 DJ 配到咁古靈精怪，聽得舒服好多！

A.Mui Live - 壞女孩獨唱戲 (載譽重演)

又要返大陸開會

今朝一早就同 雞屎 返咗大陸開會，呢兩日風頭火勢仲要同一間車成兩粒中，幾驚自己忍唔住手推佢落車。Lunch 時間我唔想見到佢，一早暗中約好幾個同事一齊食，可惜 雞屎 自知無人理，竟然迫大陸 team 同事陪佢一齊食，攪到有帶飯嘅同事個個面有難色，但又唔敢推喎。最後食咗二百幾蚊，佢見班同事左計右計，就自動自覺咁話今餐請大家。回程時我一個箭步坐晌司機隔旁邊個位，可以保持距離兼樂得清靜！

BigBrother, Happy Bday!

大佬生日快樂，下星期得閒啲先搵你食飯。

我幾時做咗醫生?

話說我公司有同事 resign 咗, 剩下一個難攤子唔知花落誰家?! 今日開估喇, 咪又係我囉, 小喇叭! 今朝 雞屎 一早叫我入房, 都知無好事, 點知比個 schedule 我睇... 嘩! 一半以上甩晒期, 我原本工作量已經唔少, 再加埋個難攤子, 個期可以點追呢吓?! 所以我即時表明加埋我原本嘅 work load, 係無可能做得到! 佢安撫話唔夠人都無辨法, 唔得都要"頂"(頂乜? 佢個肺呀?)! 我話頂唔頂到有數得計, 你要夾硬比我都無辨法, 我一樣會盡力做, 但只會做到幾多得幾多(當時我應該語氣冰冷兼目露凶光)! 佢明顯預咗我唔會咁順攤, 即時話可以安排將我手頭上嘅 job assign 比第二個同事, 最緊要幫佢救返 behind schedule 嘅 job 先(我幾時做咗醫生?). 講到"救"咁嚴重, 仲要佢扮到咁睇得起我, 真係多謝晒喎!

好、很、忙！

好忙、很忙、好很忙！

"維尼之家"第二回

近幾個月裡面，今日打波時嘅天氣算係最舒服，陽光充沛又唔係太熱。做完運動沖個靚涼食埋個 tea 就去接女友，一齊向"維尼之家"出發。約咗晌地鐵站集合但等唔齊人，因為有一位仁兄未收工，一位去咗揸飛機，枉費我地專誠改日子就佢一個。上到"維尼之家"探完 Ah Pooh 新成員之後，第一個節目就係欣賞主人家嘅結婚相。雖然睇唔慣 大佬 皮光肉滑嘅樣，但講真係影得唔錯架喎，成輯相兩個都好 smart! 跟住就到 "Wii 大戰"，場場都係單對單隻揪，先嚟三場傻瓜網球，之後再碌返幾場齡，埋齋再嚟三 round Boxing 大混亂戰... 最頂癮唔係玩到攰，而係笑到攰! 跟手再坐定定睇埋婚禮 DVD，係由接新娘拍到晚宴嘅精彩片段。原來當日忙住幫手好多嘢都 miss 咗，今次睇返都真係幾好笑! 夜晚訂咗酒樓食飯，一班人嘈喧巴閉坐到唔捨得走，散 band 都已經成十點半喇。多謝主人家嘅熱情款待，有機會再打擾過!

動漫節2007

老實講，動漫展對我已經無乜吸引力，大部份漫畫根本於場外同步發售，迫嚟做乜？上年同今年都有入場，主因都只係有班土砲設計師朋友擺檔，咁當然入場支持吓啦。雖然有 pass 唔駛排隊，但沿路見到人山人海都已經想掉頭走。傾吓計同影咗啲相做 reference，逗留咗大約一粒鐘就閃喇，希望大家都好生意啦!

百味圈

一早過 LCC 上堂，完成之後打算過世紀廣場食 lunch，路過 food counter 時有個售貨員好熱情咁叫我地試飲試食，又真係幾好味喎?! 最後佢成功咗，兩個"百味圈" + 一杯鮮檸特飲，盛惠HK$33。

紅磚牆教堂

收到 vendor 電話要成九點先比到 file，中間有成兩個幾鐘，job 又做到悶，決定用呢段時間行一陣街街。自寫 blog 之後，好多時都會帶部 DC 傍身方便四圍影。今日行到去佐敦，見到間用紅磚做嘅教堂，舊舊地感覺幾靚，見佢中門大開就入咗去參觀。之後晌附近食埋飯就返公司，最後收成十一點幾，重要上倉補貨，好彩的士錢唔駛自己比啫 !

SK@RoadShow.Live

呢幾日晚晚都 OT，難得今晚有兩張 SK 送嘅"RoadShow LIVE 黃家強音樂會"飛，一於唔理咁多七點半即閃! 同女友準時去到"九展"，點知等到成八點九先見主角出場。一連五首歌都未能谷起現場氣氛，又聽唔清楚佢唱乜，感覺有啲悶，直至 SK 出場先令我如夢初醒。佢地先合唱一首"情人"，之後 SK 再 solo 一首重新編曲嘅 rock 版"叛逆漢子"。已經企咗個幾鐘女友有啲惓，而且演場又無預期嘅氣氛，聽完 SK 企多一陣就離場，出返淘大果邊食晚飯。


SK 同家強合唱"情人"

SK 獨唱"叛逆漢子"

「九龍皇帝」駕崩

「九龍皇帝」曾灶財，原名曾財。1921年，曾灶財在廣東肇慶蓮塘村出生，與比他小15歲的妻子文福彩育有4子4女，但兩名女兒及一名兒子已相繼去世，大女及二女分別嫁往英國及荷蘭，其妻兒很多年前已與他分開居住，曾灶財就靠領取援助金過活，獨居於觀塘翠屏。曾灶財16歲來港投靠舅父，之後當建築工人及垃圾站管理員，其間不幸遭巨型垃圾桶壓傷足部，自此不良於行，要拄覑一對拐杖走路。

據稱，曾灶財翻閱過族譜，發覺九龍部分地區如鑽石山墳場等原為其太公所有，之後被香港政府霸佔，自此四出寫「稟」告狀，指摘「英女王搶走我家土地，讓我做不成九龍皇帝」。他由35歲開始，每日用膠袋盛覑幾瓶墨汁及幾支毛筆，「出巡」到港九多處的電箱、燈柱及牆壁留下墨寶，內容以其「帝號」及「曾氏族譜」為主，並以「九龍皇帝」自居，他說曾因此被其中一個兒子怒摑。他因在街上四處塗鴉而被警察「邀請」到差館不下50次，但多是警誡了事，但也曾被罰款500元。而在其作品中常見的名字「冼麗金」，據說是他的初戀情人。

2004年曾灶財因為腳患復發入住聯合醫院，康復出院後，由友人與社工安排入住秀茂坪一間私營老人護理中心。由於雙腳不良於行，他沒再四處寫字；老人院的裝修工人特地給他一塊類似電箱的灰色板，供他繼續寫字。曾灶財成名後，多間外國傳媒包括英國廣播公司爭相慕名採訪。他曾於01年拍攝清潔用品藍威寶廣告，其後社署即按照其所收廣告酬金，從他的綜援金額中扣除。2004年，他的一幅20吋乘29吋作品在拍賣行以5.5萬元成交，是底價5倍，由一名康姓婦人投得。曾灶財得知後反問記者﹕「康熙的後人？」

波衫佬請食晏

今日又有人請食晏，就係隔鄰工程部門嘅 波衫佬，花名由來係因為佢差不多99﹪時間都係著波衫返工。夜晚要等 vendor file 唔可以走得遠，同女友晌公司附近嘅茶餐廳攪掂。食飽飽之後路過"莎莎"，入去打個轉就出事喇，一人一支香水使咗成千蚊，好彩就出糧啫!

公司有同事請辭

公司有同事 resign 咗，攪到我又要開會，又要 follow 自己啲 job，又要 take care 埋佢啲 job，全日忙到嘔茄。Lunch 出去透吓氣，去咗食印度烤肉，都幾好味，不過無帶 DC 無影相。夜晚要 OT 唔想四圍走，同女友兩個食大家樂就算，又快又平吖嘛! 原本 plan 好最遲十一點收工，點知美國班同事遲遲未覆 email，最後要等到成點鐘先收得工，頂!

喜宴

三十幾度高溫，只係企晌球場唔郁唔跑都全身濕透。想沖凍水涼降溫? Sorry, 個水箱一早曬到火燒一樣，邊有凍水你用。換完衫即時飛去茶餐廳，雖然飲住凍檸賓，但係食完碗麵一樣全身濕晒。返到屋企，一入門口已經汗如雨下，索性由頭洗到落腳再換衫去"飲"。之後約埋女友一齊入青衣城，參加一個我由細識到大嘅朋友婚宴。話說大我幾年嘅主角 Ming 一家同我一家係世交，幾兄弟姊妹真係一出世識到而家。佢嘅媽媽亦即是我 契媽，細個時我經常都上佢地屋企過夜架。不過近十年八年生活圈子唔同，除咗契媽，其他都好少見面喇。今晚大家聚首一堂，完全無好耐無見嘅感覺，個個都開開心心，熱門話題當然係下一餐喜酒輪到邊個啦。在此再一次恭喜一對新人：
百年好合、年生貴子!

Bobo 199X-2007

Bobo 係一隻好有靈性嘅相思雀，陪伴咗我屋企人已經十年有多，係我地家庭嘅一份子。其實近幾星期見到佢嘅舉動比平時差已經開始擔心，加上尋晚見 Bobo 腳震震同叫唔出聲就心知不妙。跟住我全家上下一直留意住，每隔十數分鐘就睇吓佢同佢傾計。半夜一點，我地嘗試蓋上雀仔布等佢訓覺，但係佢不斷發出微弱嘅慘叫聲，直至我打開塊布先肯停。我望住佢叫佢乖乖地訓，同佢講見到佢咁辛苦我地會好心痛，佢似明非明咁呆呆企晌籠邊望住我。我臨訓前再次睇下佢已經蓋好咗雀仔布，好靜咁企晌籠入面無再叫。到今朝，一起身就即時去睇佢，只見佢唔出聲企晌籠中間發呆。原來佢一直忍住最後一口氣，直至我全家上下都醒晒同睇過佢之後，先肯慢慢放軟身訓低。我地放佢晌個紙盒仔上面，一面摸住佢同佢傾計，十分鐘左右就走咗喇！之後我地將佢埋葬咗晌屋企附近，一棵我地時常路過大樹下面，咁以後每次路過時都可以記起 Bobo。

基本上，Bobo 係似一隻狗仔多過雀仔 — 每次我夜咗返屋企，由開門佢就會不停叫直至我去睇吓同摸吓佢為止；一般雀仔會好怕人打開籠門伸隻手入去，但係 Bobo 唔怕之餘，仲會鬆起全身嘅毛，叫你幫佢掃毛。年青力壯時，仲會跳上你手背拍翼表示開心；佢已經唔止一次因唔同理由晌雀籠飛咗出嚟，但最後都自己乖乖咁跳返入籠；而每次我晌佢附近又唔理佢時，佢就會不停大叫啦、用咀不停啄個籠啦、掟雀粟啦、潑水啦...等等，務求要你啋吓佢摸吓佢。要走嘅始終於要走，但我會永遠記得呢一隻不一樣嘅相思雀！

下一站日本？

難得朋友仔 陳永仁 調咗晌附近跟工程兩個星期，今日就到時間即時約食 lunch。以前見面主要話題都係玩具，但係我發覺近幾次都講多咗旅遊喎，尢其是日本。喂~我都無錢無假，唔好再引我喇吓！女友上咗 China 開會要七點幾返到香港，原先以為我等佢啦，點知臨時要 OT 唔走得，最後要佢等到成八點幾。晌尖咀行一陣就搵地方開飯，行到佐敦附近，唔覺意又搵到間食物同價錢都 OK 嘅餐廳。

八掛公請食飯

今日都無乜特別事發生，不過有人請食 lunch。事實上我都唔記得點解隔鄰部門嘅 八掛公 要請食飯架，只係知道前前後後約咗大半個月今日終於成事。夜晚女友要 OT，我一個約咗 大編輯 落旺角開飯兼攞返條手鏈。佢最近公司有人事變動，雖然未算好大件事，但都有少少頭痕，怕且要花一段時間處理喇。朋友仔加油呀！

A.Mui Live - 獨唱.戲

春 天 實 驗 劇 團
Spring-Time Experimental Theatre

故事意念：

一個天皇巨星，總離不開她的台上風光、台下滄桑，牽涉人物眾多、事件紛陳，不挑一個角度去將材料好好篩選，實在不行。更難的是要結合她的首本名曲，用歌曲來說故事。但轉念一想，為什麼要這麼循規蹈矩地說故事呢？反正焦點都落在女主角身上吧，何不就只寫她一個，從她的內心出發，由她的角度去展現她身邊的這一切呢？於是一個本應是架構宏大的長篇題材，如今以一個小劇場獨腳戲的形式展現於觀眾眼前──因為這次創作的著眼點不在於交代複雜的情節和人物，而著重於主角的內心世界，她的看法和感受──於是台上眼見的演員和角色，只有一位，就是我們的女主角！而小劇場內與觀眾的近距離接觸，大大增進了角色與觀眾的互動交流，令觀眾更易於感受到她的所思所想。

劇中將現場演繹廿多首 梅艷芳 的經典金曲──其中一半是作為台詞，道盡女人心事和唱出歌者的心路歷程；另一半則著重舞台表演，將經典台風重現觀眾眼前，展現歌者的百變本色和各階段的事業里程碑。這批歌曲編織出歌者由童年至今的各個層面：滄桑歌女、佻皮鬼馬、純情初哥、豪情壯志、壞女孩、妖冶狂放、情路寂寞、冷艷高貴、悲壯哀悼、洗盡鉛華……台上台下，歌者都是個感性複雜的個體，正好透過這些多元化的選曲去表現出來！

劇中以近似意識流的形式重塑 Anita 的人生點滴，她一邊與觀眾交談一邊回憶段段往事，由此墮進不同的情緒氛圍，時而高興時而感慨，更會重演某些片段。為了突出 Anita 各段落的不同心情，舞台上把她豐盛閃耀的一生濃縮成春夏秋冬四季，四個截然不同的 Anita 以不同的感覺，跟觀眾一同見證生老病死的人生旅程。

監製：高志森 藝術總監：杜國威
編劇：蔡妙雪 導演：蘇雅儀 演員：馬沛詩
地點：灣仔藝術中心- 麥高利小劇場 票價：$150
演期：2007年7 月25日- 28 日 (夜場8 pm) , 及28 日(日場3 pm)
門票現正於城市電腦售票網公開發售
留座及查詢熱線：2734 9009
信用卡購票熱線：2111 5999
節目查詢：2793 1123 / http://www.blogger.com/www.springtime.com.hk
網上購票：http://www.blogger.com/www.urbtix.hk

漢堡包晚餐

隨住 08 年產品開始投產，要 OT 嘅日子又逐漸迫近。今晚就要成十一點先收得工，既然要 OT，索性去遠少少試新嘢。圖中所見係"Freshness Burger"，味道其實唔錯，價錢中等啦。不過可能新開關係，座位頗為混亂，企晌櫃位又唔知應該向邊面排隊。最幣係啲員工"拾拾下"，又唔清楚啲食品種類，邊啲 coupon 用得又唔知，order 少少嘢都攪咗我幾分鐘!

當年今日

1982 年第一屆新秀歌唱大賽

第一屆新秀歌唱大賽中 梅艷芳 憑《風的季節》一曲，獲得比賽冠軍。當年 梅姐 以一身閃鑠鑠的歌衫搶盡風頭，加上一把沉厚獨特的聲線及精湛歌藝，把一眾評判傾倒。據資料所得，梅姐 當年的得分差不多爆燈，可謂一嗚驚人。多年後 黃霑 曾公開表示，比賽當晚，他認為無可能一個新人是完美的才硬扣一分，可想而知當晚 梅姐 的表現有多厲害!

當年參賽的歌衫，因為對 "梅艷芳" 及 "新秀" 有著同樣巨大的意義，所以一直保留在無線電視公司內，梅姐 亦沒有意思索回。幸然，皇天都對 梅姐 尚且不薄，話說第十五屆新秀歌唱大賽中，冠軍得主可獲這這套戰衣，而當年的冠軍便是 梅姐 現在的愛徒 - 何韻詩。作為 梅姐 的忠實歌迷，HoCC 當然喜上眉梢，其後更將這套極富紀念價值的歌衫送回給師父 梅姐 保管。

1982年吹起的"風"

基於呢個比賽片段已經睇過無數次，對於當年自己有無晌電視機前面睇住 梅姐 攞獎，記憶好混亂，真係答你地唔到。不過只要睇一次，就已經可以肯定廿五年前呢位"新人"，當晚嘅表現已經比大部份現今樂壇中人好上千萬倍。

網上論壇遊記

隨住近年生活習慣改變，已經好少晌啲新聞組或網上論壇打滾留連。今日因為要搵資料嘅關係，又再一次晌某網上論壇反覆閱讀成粒鐘。不過都無白費心機，幫自己慳咗一大筆冤枉錢之餘，亦都睇到好多其他有用嘅資料。忽然記起好友曾經同我講過，只要能夠好好利用的話，其實網絡世界係一個寶庫，只不過係大部份人都浪費咗啫!

七月份歌迷會聚會

今日出席咗記念 梅姐 入行廿五週年嘅歌迷會聚會，成個聚會約有一百五十多個會員參加，每位入場歌迷都會收到一份紀念品。聚會一點鐘開始，先嚟一個下午茶自助餐，跟住食飽飽就排排坐，一齊欣賞經過精心剪輯嘅片段，當中有網上可以搵到嘅，亦都有由 committee 私人珍藏嘅絕密片段。約四點左右聚會完結，捉住大佬兩夫婦，join 埋女友一行四人飲杯嘢傾咗一陣密計。之後同女友上百利行咗個轉，再到灣仔浦咗一陣，食埋晚飯就乖乖返屋企喇!

中學同學飯局

下晝同女友過咗灣仔睇 show，仲試咗兩件靚衫，可惜太貴無買到。其實女友真係著得幾好睇架，但係一條裙折扣咗都要成四千蚊，我地啲窮等人家又邊捨得買吖。晌個 show 攪攪震無幫襯，到七點左右就閃返過葵芳果邊同中學同學 尹氏夫婦 食晚飯。都成半年無見，四條友雞啄唔斷咁傾到成十一點幾，坐到間餐廳埋數先捨得走。

又去荃灣食粥

Lunch 約咗舊同事 蘇生，佢都幾攪笑，離開我間公司之後轉咗幾次工，最後都係去返尖咀區，宿命。收工就上咗倉點貨，攪掂晒又去咗荃灣食粥。今次試埋個即蒸腸粉同燒賣，味道都唔錯，不過加埋兩碗粥同炒米就幾乎食唔晒。

三千年前 - 十二金釵 featuring 李香琴/關淑怡

三千年前　唱: 關淑怡　獨白: 李香琴　
作詞: 陳慧　作曲: 陳輝陽　

再見! 唔好怪我第一句就同你講再見,
因為我真係專程黎同你道別嘅...

你唔講野, 剩係聽我講野,
果陣時個世界好安靜, 無而家咁嘈,
襯得我特別吱喳, 特別開心
我記得, 同你去睇日落,
你會係我耳仔邊講野, 你講得好細聲,
其實我一啲都聽唔清楚架,
不過... 我好鍾意聽你咁樣同我講野
以後... 再無人咁樣同我講野喇!
因為你話俾我知... 你要走喇!
忽然間... 經過左好多年啦... 我再無睇過日落

趁熄滅前　還可一見
蠟成了灰　沾污了我的臉
眾生萬年　淚海悲天
浪漫擱淺　舊歡不見

我記得, 你同我去過嘅每一度地方,
果啲地方, 通通留係我心裡面,
我唔會講... 我老喇,
我只係會講... 我係度太耐, 時間耐左,
難免知道人總會慢慢咁將過去淡忘,
又會睇住d野, 無聲無色咁樣消失!
我點解要走?!
我先兩日, 唔知諗緊乜野,
無端端走左去睇日落...
個日落, 就同我記得陪住你睇果個樣一樣,
不過... 就算我點樣裝出若無其事,
我都無辦法唔承認, 我失去嘅野實在太多啦!

趁熄滅前　還可一見
蠟成了灰　沾污了我的臉
眾生萬年　淚海悲天
浪漫擱淺　舊歡不見

我要走喇!
如果你記得返我係邊個?
我知道, 你一定會好唔捨得我,
仲會好掛住我架!!

再見!

家長日

哈哈哈~ 今日家長日呀! 唔好誤會住，唔係相方家長見面，只係女友同我晌同一日裡面都見過對方家長啫! 話說今日董事長放假，難得佢想過尖咀行街街喎，咁近我就當然要陪佢飲餐茶啦。晌得尖咀飲茶都知出事，炒兩碟飯加幾個點心，四個人就要二百幾埋單。回程時諗起伯母下晝都係放假，咁我又唔可以長期霸咗人個女架嘛，咪約佢食餐夜晚飯囉。點知仲大鑊過晏晝，去咗間謀人寺飯店，三個人叫咗一個蒸飯兩個小菜，埋單竟然要成三百大洋，呢間嘢啲茶介都收得好貴啫!

又返咗屋企食飯

今日收到一首叫「三千年前」嘅歌，係〈十二金釵 眾生花〉第二首派台歌，由 SK 和唱、李香琴獨白，呢個組合都幾出人意表。電台開始有得聽，充滿哀怨中樂 feel，遲啲有歌詞再 post 上嚟。今晚又同女友返咗屋企食飯呀，計下條數，其實每個星期搵日返去食都好，省唔少喎!

公司問答比賽

因為美國 office 仲放緊假，零八年嘅新 job 又未到，成個上晝比較清閒。下晝就代表自己部門參加公司嘅問答比賽，都答中幾題架，基本上係比"HR"玩晒，唔駛食蛋已經有個交代。十幾個部門各派三個代表，再加上啦啦隊就成八十幾人，總結就係又嘈又混亂。夜晚約咗女友個舊同事晌好多年無到過嘅"新樂酒店"食飯，佢仲帶咗晌澳門影嘅結婚相比我地睇，都影得唔錯架，不過影咗成二萬幾蚊囉，恐佈! ~XDDD

曬到又黑又白

大好假期，訓得果六個鐘就自己醒咗，真羨慕啲訓八個十個鐘都唔識醒嘅人! 既然早咗起身，執下嘢上陣網先換衫去打波。烈日當空之下大戰粒幾鐘，換衫時發現自己個身同頭手腳已經唔同國藉，又黑又白。女友做完 Gym 就會合我地食下午茶，嘻哈一輪之後就慢步過太子買貓糧。女友個表弟放暑假晌外國返嚟，夜晚約咗兩圍親戚晌 APM "家傳滬曉"食飯，一食又兩粒鐘。送埋女友同伯母去坐車，返到屋企又十一點半喇!

N 咁多個"之後"

今日行程緊密，一早起身過咗九龍塘 LCC。之後過葵芳同 董事長、董事長夫人 飲茶。再之後就上倉點貨同影相。再之之後就到太子 MTR 同個客交收。再之之之後就攞一大堆貨到"潮特"個 friend 舖頭寄賣。再之之之之後陪女友去買"草本精華"。再之之之之之後已經九點幾肚仔餓，要搵地方開飯。再之之之之之之後就送女友去坐車喇!

專車上深圳開會

今朝一早就坐公司車上深圳 office 開會，出奇地司機以外只得我一個, 專車一樣~ XDD。十點幾到步，入咗 main towner 之後行成十幾分鐘先搵到要去嘅部門，打完招呼就入房開會。之前明明話一對一，點知最後成 team 入晒嚟，攪到我都有少少緊張添。第一次 hold 晒成個 meeting，仲一講就講咗兩粒鐘，口都乾埋。China 班同事知我第一次單拖上深圳 office, 好比面咁成 team 一齊請我食 lunch, 我就要咗個燒味四寶飯。下晝就 free 少少，可以個別同事傾下計講下 job，仲可以四圍參觀下，五點幾就坐公司車返 HK office。七點幾返到香港, 接埋女友放工就去食飯。今晚食米線，間舖頭叫"麻酸辣"已經食過好幾次，又平又抵食，圖中所見總數都唔駛八十蚊，大家有機會可以去試試。

另一個朋友的近況

原本今日要上深圳 office 開會，但係要開會用嘅資料未齊，改咗聽朝上去即日來回。Lunch 就約咗 水警哥哥，佢抽到隻新股市值升咗一倍，所以專誠嚟請我地食飯，真好人! 下晝同大半年無見面嘅 插畫倫 傾咗個電話，難得佢最近有空閒, 要搵 freelancer 嘅快快 call 佢啦! 搬咗竇咁耐都未上過去，係時候上佢工作室參觀吓喇。七點幾收工，同女友落太子行個轉，左睇右睇唔覺唔覺就行到成十點鐘，嗱嗱聲搵地方開餐，食完送女友去坐車都成十一點喇!

清清淡淡住家飯

女友聲帶雖然好得七七八八，但係"流感"高峰期，都係睇多次醫生清晒啲病毒好。醫生 Uncle 星期三只開上晝，唯有同護仕妹妹講低，趁食晏飛過去旺角，點知上到去人山人海，前前後後坐咗成粒鐘先攪掂。睇完即時趕返公司，飯都食唔切，為免太張揚，到三點幾 tea time 先叫外賣醫肚。見今日工事唔算忙，早啲收工夜晚返屋企食飯。回歸前，董事長夫人 明明話女友要食清淡啲，點知開飯時一枱都係餸，又話"清淡"嘅?!

五個朋友的近況

今日晌無預料之下，分別同五個已經一段時間無見嘅朋友講過電話，真係邪。叮噹 剛剛發現自己將為人父，去完台灣 trip 之後要搵屋搬，提醒兩位準父母一句，粗身大細，你地要考慮下點安置兩隻巨大愛犬呀。汪洋 網上副業交投淡靜，好在份正職仲頂得住。大債仔 繼續惡運纏身，以而家嘅還錢能力同速度，睇怕爭我嘅錢要還足一世?! 占士波 事務繁忙，打算兩年後買樓兼結婚，正在努力賺錢中。肥蟹 終日大陸香港兩邊走，就快變成半個大陸人，不如晌上面搵返個另一半啦。話是話，你餐飯已經約咗半年，駛唔駛改到出年先食呢?

烈日、彩虹、暴雨

由於尋日臨時取消打波，大家見今日 book 到場就補打返。天氣勁好，雖然曬但完全唔焗，不過打個零鐘個人已經紅晒似燒豬。打完波去食 lunch，知道可以接小花出院，但係夜晚約咗 DLS 班波友仔聯誼，時間唔夠兩邊都去，點算? 最後當然又做飛機師啦，寵物醫院到女友屋企要成十幾二十分鐘路程，小花咁重一個人點拎喎，班波友仔好明白事理既。女友唔知我會放人飛機而去搵佢，無明確咁講清楚自己位置。所以我一落車就要用 Flashman 嘅速度，行晒成個舊區，終於十五分鐘後比我晌街搵到佢，不過我已經變咗個 Waterman! 搵間茶餐廳坐低抖一抖食返個 tea，唔夠五分鐘就狂風暴兩，如果我地行緊返屋企就大鑊喇，真好彩! 其實我趕車途中仲係風和日麗架，仲比我影到條靚靚彩虹添。

"七一"放假做啲乜?

"七一"放假做啲乜? 我都唔係好識答，總知全日都唔 on schedule 囉! 訓醒明明無落兩，但又變咗無波打; 曾經講過話去遊行，但女友訓醒都兩點，趕唔切過海 join; 以為要去接小花出院啦，點知醫院一拖再拖, 又接唔成; 決定上倉執嘢喇，最後又無程程入咗天水圍食飯喎! 不過成家人到齊晒，仲可以齊齊望住個大銀幕睇烟花，都 okay 啦! 但係呢個政府都頗為無能，回歸十年又有乜好慶祝?!