教堂飯局

今日本來臨時有波打，準備好晒出門口佢又落大雨喎，吹漲! 由於女友只係好返七成，所以下晝迫佢留晌屋企，唔準出街。夜晚就陪咗佢返教會，仲第一次晌教堂後座裡面食晚飯，感覺新奇。完晒聚會都成十點幾，同佢出太子食埋宵夜，行多一陣就送佢去搭車喇!

幽默感 - 何韻詩

幽默感　唱: 何韻詩　
作詞: 黃偉文　作曲: hocc@goomusic　

在最壞最壞那日　遇最壞最壞那事
是它讓生命不用壞到底
在最悶最悶那刻　陪最悶最悶那位
是這段配樂　托起一切　還未領略　絕招的真諦
現在就來具體...

在假日裡沒節目　電腦又發現中毒
換衣服出外　身段又發福
下雨避進郵政局　又見舊愛人殺出
而你頭髮上有餅乾碎
霉運繼續來　若果不反對　現在是時候哭
或另尋下台路　不哭

當你步行在那漫天槍炮下
當你昨日抱著的跟了他
當你造型受到大眾的責罵
即管講笑話　就劃圓稜角吧　
讓事情漫畫化　矛盾地笑一下

在最壞最壞那日　遇最壞最壞那事
像失業之日　車又撞了燈　
在最悶最悶那刻　陪最悶最悶那位
連那人也嫌你不吸引
危難拍著門　若果躲不了　就迎著極殘酷一生
自行落調味品

當你步行在那漫天槍炮下
當你昨日抱著的跟了他
當你造型受到大眾的責罵
急於找撮沙　往上爬　就劃圓稜角吧
讓事情漫畫化　矛盾地笑一下　會自嘲嗎

為何為何運程極差　問為何運程極差
實在條問題　問得都算肉麻
自豪地承認它　在台上談論它　用遺憾提煉出搞笑吧
情願怕它　還是笑它

當你運程壞到箭咀都向下　可以借力製造一批笑話
起碼別人願意話你風趣吧　捐出安慰　加送熱茶
當你被評力作在水準以下　當你背著各路資產養家
當你未籌大志就已衰老吧　不必找撮沙　往上爬

能學成諧趣吧　能學成滑稽嗎
惆悵未算可怕　用笑著笑走它
別自尋煩惱吧　讓事情漫畫化　來蓋著那傷疤

遲到大王

今日公司風平浪靜, 再無死貓四圍飛。女友身體都好返好多，不過把聲仲係好弱，講嘢好細聲。夜晚女友想靜靜地一個 review 下啲 job，咁我自己就約咗 大編輯 食飯。佢一如已往咁遲到，仲要遲大半個鐘！朋友仔，一次半次因工作遲到係原因，每次都咁樣就係藉口。朋友見面係應該開開心心，你嚟到見我等到黑口黑面，你自己都無癮啦，係咪？唔該快快改好呢個陋習啦！尋晚坐低開飯都成十點，係食雲南米線，賣相味道都 OK。話時話，食完飯都未比錢添... 唔比喇，今餐罰你請啦！

君子報仇十年未晚

尋日單嘢餘波未了, 個 PK 女上司係都咬住我女友唔放, 一早又捉佢入老細房食死貓。食完呢個"早餐"之後, 女友乜都食唔落, 早餐唔食藥唔食, 一直鬱到 lunch time, 終於忍唔住喊咗出嚟! 我提醒佢自己嘅身體係最重要, 唔需要為啲人渣勞氣, 最後出盡九牛二虎之力先可以令佢破涕為笑! 可能真係諗通咗, 下晝時佢身體已經好返好多, 不過聲帶仲係發緊炎, 講唔到嘢。其實個 PK 一而再、再而三咁恰我女友, 我嘅"卓羅"已經運行全身, 真係好想濕個 PK 一濟... 不過, 君子報仇十年未晚, 當下最緊要做好自己先, 他日形勢比人強嘅時候, 再揸住佢本數簿慢慢燒都唔遲!

講不出聲...Remix

女友聲帶發炎兼仲有少少發燒, 完全講唔到嘢, 但係同我一樣咁硬頸嘅佢堅持要返工, 只不過最後咪換來一肚氣! 話說佢個 PK 上司唔體諒佢病之餘仲要口臭臭, 明示暗示佢咋病博同情。開會時仲趁佢"有口難言", 一隻隻死貓飛埋去! 平日聽唔到嘅投訴, 甚麼遲到早退、OT 的士錢太多、病假太多...等等, 一次過上晒枱! 最慘係女友講唔到嘢想自辯都唔得, 硬食啦! 開完會出嚟佢愈諗愈唔忿氣, 終於谷到喊, 嚇到啲同事們不知所措! 女友愈嬲就愈唔舒服, 所以放工捉咗佢去睇醫生, 陪佢食埋粥之後就送佢屋企, 要佢乖乖早啲休息。尋日就我比人煽, 今日就佢比人屈, 唔通我地要去打小人?!

交叉感染

呵呵~ 今日輪到女友發高燒無返工, 要留晌屋企訓足一日, 情侶果然會交叉感染! 自己晌公司又上一課,"同事"就只係同事, 唔係三分親, 扮到同你幾 friend 都唔係朋友, 真係唔係乜都講得架, 要上位時乜都背返出嚟呀! 發覺自已真係未夠道行, 要經一事長一智喇! 一支公唔想約人, 收工就買個飯盒上倉食, 順便又執下嘢去賣, 等錢駛嘛, 努力努力!

繼續家居探訪

今日起身仲係覺得未回復十足狀態, 眼見烈日當空, 都係唔去打波休息下, 費事出事喇。夜晚繼續家居探訪, 今次過咗西灣河, 去女友嘅"師姐"屋企。話說女友畫咗一幅畫賀師姐新婚之喜, 點知兩位都係忙人, 一拖再拖就拖到今日由我速遞上去, 順便探下佢地嘅新居同 BB!

病仲食火鍋?

訓醒一覺果然好返好多, 但係約咗女友有事要辦, 所以晨早十點就出咗門口。橫豎順路, 預多少少時間, 入咗"省善"探一探 梅姐 先再接女友。可能交差感染, 今日到女友有啲唔舒服, 辦完事出一出太子睇完中醫, 之後就上返屋企叉一叉電。夜晚上咗未來印刷大王何生屋企, 由於何氏係"無飯夫婦", 所以佢地使出絕招"百搭火鍋"招呼兩位病人, 今次係忌廉湯底。病仲食火鍋? 無問題架, 飲多啲水, 食少啲肉同食慢啲囉, 吹凍晒先放入口就無咁熱氣架喇!

講不出聲...

講不出聲... 唔係講緊關菊英, 係我今日後半段嘅表現。話說今朝起身退晒燒兼精神亦亦, 無理由咋病唔返工架。頭兩個鐘都仲好地地, 之後嘅能源就不斷下降。尢其是把聲, 每講一個電話就性感一倍... 終於臨近放工, 已經沙到聽完都唔知我講乜?! 最幣今晚係"大一同學聚會", 已經年幾無攪喇, 唯有頂硬上出席, 最多唔講咁多嘢啫!

燒、燒、燒

哈哈~ 真係病呀, 仲要發燒到 101 度。記憶中最少十年八年未試過發燒喇, 完全唔記得成身發滾嘅感覺。四點幾早走去睇醫生, 醫生 uncle 話一般"流感"啫, 乖乖訓覺好嘅就 okay。返到屋企只係五點幾。見到好多朋友仔 online 呀, 不過唔 chat 啦, 沖個涼就食藥訓覺喇!

喉痛 = 吽病？

出事喇... 今朝起身有少少喉痛, 唔通吽病! 今日早午晚三餐都已經儘量清淡啲, 希望訓醒聽日無事啦!

端午節目係...

雖然今日風和日麗加上係端午節, 不過我地嘅節目唔係睇賽龍舟同食粽, 而係上倉玩點貨。其實平日經常唔夠訓, 所以假期專登唔叫醒女友, 由佢訓到日上三竿, 佢訓醒之後就買埋下午茶上倉幫手。左搬右執, 影下相 mark 下貨, 話咁快就天光變天黑, 執到八點幾就收手去荃灣食飯喇! 假期要清清腸胃, 今晚就食粥。呢間粥舖味道唔錯, 仲要開通宵, 但個價錢又好街坊喎!? 圖中所見加埋都只係四十一蚊咋!

美國手信速遞

同事 車人 晌美國總公司工幹咗一個月, 今日終於回歸喇! 聞說每個週末都四處遊山玩水, 咁手信當然不能少啦! 我就收到一架專誠晌美國 Disneyland 買嘅 StarWars "白兵"車仔做手信, 幾型仔架! 佢仲幫我美國個 partner 帶咗兩份禮物比我, 一份係"藍莓朱古力豆", 另一份係"特選咖啡粉", 真係麻煩晒! XDD~ 夜晚女友約咗好耐無見既 保險顧問 食飯(宵夜?), 傾吓計之餘, 順便 review 吓大家份單都好!

左走走右走走

今年父親節食飯走兩場。第一場就全家總動員陪 董事長 飲茶, 順便公佈個好消息比大家聽。第二場就同女友家人及部份親戚晚飯。其實中間仲有段過場, 就係我打咗一粒鐘網球, 女友就去咗做 gym。都幾趕架, 不過無計, 兩個都鍾意做運動。左走走右走走, 唔覺唔覺就成日喇!

Happy Father's Day!

祝願所有父親永遠都幸福快樂 !

巨星誕生廿五週年紀念活動

為紀念廿五年前, 一顆永恆閃亮巨星於香港"利舞臺"誕生, "梅艷芳國際歌迷會"將舉辦一個茶聚, 讓各位一同重溫 梅姐 多年來的經典片段, 歡迎大家參加!

日期：2007 年 7 月 15 日 (星期日)
時間：1：00 － 4：00 pm
地點：富豪九龍酒店
費用：(會員) HK$ 150/(非會員) HK$ 180

有興趣參加聚會的朋友，請在以下時間攜同會員證到歌迷會購票：
購票日期：2007 年 6 月 16 日及 17 日(星期六、日)
時間：下午 2：00 至 5：00
地點：香港北角電氣道 148 號 10 樓 1003 室

如有任何查詢，請隨時聯絡 - 電話：25562695　傳真：28901991

愈來愈孤寒

由於 08 年嘅 item 開始"湧"埋嚟, 今晚少不免要 OT 一陣。但係 Friday night 無理由咁悶架嘛, 所以差不多九點鐘就"閃", 同女友落旺角行街街。原本大家都有 CD 想買架, 但去到信和拎到上手, 計下一買就要用幾百蚊, 最後兩個都縮沙無買到喎... hehe~我地愈來愈孤寒喇! 之後去咗"美而廉"食飯, 玩吓懷舊嘛! 佢地價錢加咗啲呀, 不過食物份量多咗, 杯餐飲都大杯咗喎! 要晌旺角生存, 加價又在所難免嘅, 佢對面間"金牌"都做唔住執咗喇。

購物快閃黨

Tennis team 收到一張 Nike shop 30% off Coupon 但聽日就到期, 所以我地今晚玩要快閃。都話快閃, 當然打算十五分鐘買完就散 band, 點知 史狄女 遲到, 等齊人都已經半個鐘。今期 Nike 啲款麻麻地, 大家都無乜心水, 有折都無用。而最大聲要買鞋嘅 闊少 又無嚟, 最後得 田田 同佢個朋友買咗一對鞋兩件 tee, 大家就各自閃喇!

R2D2 想點呢？

留院觀察幾日, 醫生話無再病發, 所以今晚帶咗 R2D2 返屋企... 不過 R2D2 玩嘢呀, 留院好地地, 返到屋企又扭計呀! 咁 R2D2 你想點先? 醫生話過再見就要做開刀手術架, 如果 R2D2 再唔乖乖的話, 下次見醫生就要開腦架喇!

全日凶(下午編)

話說七點半我同女友準時趕到餐廳, 仲搵定位等大佬阿嫂。雖然因為座位迫同冷氣機滴水而前後轉咗三次枱, 但係成餐飯都食得開開心心, 睇吓相睇吓 catalog, 嘻嘻哈哈就兩個幾鐘。但係 title 叫得"全日凶"又邊有咁順利呢! 返到公司, 樓下相熟嘅保安哥哥提我一點鐘會斷電維修, 我仲答佢一定唔會過十二點走! 點知上到去一開機就發覺上唔到 server, 原來個公司個 system 自動 update 緊, send 唔到 email, print 唔到嘢之餘, 連電話都打唔到! 最後咪唯有打定啲 email 唔熄機走, 等個 system okay 時 auto send 囉! 第二朝仲要早啲返公司跟返添呀。點解個 title 叫"全日凶"呢? 因為我搭的士返屋企嘅時候諗起 梅姐 呢首歌囉, 雖然無首歌寫到咁黑, 但都貼題啦, 尤其係首歌最尾一段寫明天會更好吖嘛!


全日凶
作曲:蔡一智 / 填詞:黃偉文 / 編曲:梁基爵

弊呀弊　為甚麼今天充滿了阻滯
跌到谷底　你說得出的各種壞事亦到齊
沒辦法更幣　同時亦是說沒法創新低
昂然地進入人生的谷底
前行就發現明日一切漸漸美麗
(節錄)

全日凶(中午編)

差不多十一點左右, 隱約聽到以下對話: "喂, 係! 哦.... 好呀, 佢... 唔算太忙... 應該無問題! 好好好...", 跟住個 AM 就話老細叫我入房。入到去個 Director 笑一笑, 之後同我講: "平時見你對啲 Hip Hop 呀 Graffiti 呀都幾有認識, 有啲嘢要你幫幫手... 公司下星期參加咗龍舟比賽, 想要個 logo 印晌隊衫上面, easy job 啦... 不過記得要將公司個名融入個 design 喎, 唔急架, 今日收工前比到廠就得..."(吓, 咁都仲唔叫急?!)。返埋位即刻重設自己嘅 job schedule, 儘量將最急嘅食晏前攪掂! 但又邊有咁順利, 最後有臨時會要開, 又有 vendor 無端端上咗嚟... 總之成四點先開到波! Draft 咗個同事都覺得 okay 嘅攞入房, 個 feedback 係:"幾靚喎, 不過好似抽象咗啲, 公司名唔夠明顯喎... 不如咁咁咁...(佢自己手起筆落), 個 idea 係咪幾好? 咁靠你再執靚佢喇!"。行出房已經五點幾, 我又約咗大佬七點半食飯喎, 唯有開行 turbo 啦。最後雖然係趕得切交稿同食飯, 但係飯後要返公司跟埋手尾囉!

全日凶(上午編)

今朝一早就幾乎同個小巴司機開拖! 話說我排第一個位, 一架從任何角度睇都係滿座嘅小巴駛埋站, 高速急停晌我面前唔夠一尺打開門(我已經暗"小"個司機), 咁我退後一步望吓有無位, 望左一陣先見有條粉賜一個人霸兩個位。OK, 咁上車啦, 正當我踏上車第一步嘅時候, 依稀聽到個司機講咗句"妖!坐唔坐架?!", 跟手關門夾住我一隻腳開車(?!), 我自然反應咁一拳打落車身同叫咗一聲"小你呀!", 個司機聽到"彭"一聲先發覺, 即時停車開門... 正當一眾街坊以為停車即係有戲睇嘅時候, 個司機係出奇地踩油九秒九駛離現場喎! 其實我後面有成二三十人排緊隊, 就算我唔上車, 佢都唔應該開車啦, 所以我聽到後面有人一齊"小"個司機囉。最後我亦因為等下一班車遲到咗三分鐘... 頂!

R2D2 留院觀察中

下晝同腦科醫生通過電話, R2D2 仲未好返要繼續留院觀察, 仲可能要換零件添呀! 唔知聽日帶得佢返屋企未呢?

繼續週日下雨天

話說尋日雨中帶晴, 仲以為今日打波有望, 點知下晝橫風橫雨, 唯有乖乖晌屋企執吓嘢啦。女友就自己去咗做 gym, 約定五點鐘等我去接佢。雖然無波打, 但因為 611 係 田田 生日, 所以 tennis team 一樣有飯局。原先係揸車入西貢食, 不過天雨路滑, 最後由壽星仔發板, 改咗去麗東酒店嘅"桃苑海鮮酒家", 仲食魚翅撈飯添。

無事出街小破財

今日下晝帶咗 R2D2 去睇腦科醫生, 跟手就上倉影相同補貨, 順便等女友買下午茶上嚟 join 我。夜晚陪佢返咗教會, 之後見時間尚早, 出咗太子行街街兼晚飯。成日話無事出街小破財, 今日我地就買咗幾件 tee 同一個背包喇! 原本仲會買多啲架, 好彩唔夠 cash 晌身先停到手咋 ~ XDD

放工嘅節目係...

今日忽然好多會要開, office hour 無晒時間做嘢, 結果就係好多 job 嘅 schedule 都延遲咗, 放工嘅節目又係 OT 啦~ #_#

Shirley Kwan Live in Toronto 2007

Being Shirley on Stage Live in Toronto 2007

CASINO RAMA, Orillia, ON
Sun, Aug 26, 2007 08:00 PM

Ticket on sale @ Tue, 06/05/07 12:00 PM--->Click HERE!
CA $48.00 - CA $268.00

返屋企開飯

董事長夫人 已經問咗幾次幾時同女友返屋企開飯, 眼見近幾日嘅 job 都晌控制之內, 一於就今晚返啦! 雖然只得四個人, 但係啲餸就十分豐富, 有蒸水蛋, 豉汁炆南瓜, 煎黃花魚, 梅菜蒸豬肉, 蠔油炆雞亦, 清炒菜心同埋花旗參雞湯。

《加勒比海盜：魔盜王終極之戰》

導演: Gore Verbinski
主演: 周潤發, Johnny Depp, Orlando Bloom, Keira Knightley
片種: 動作冒險

承續上一集，魔盜王積克被海魔吞噬，伊莎和維廉在土著女祭司黛瑪處得知原來他被鬼船長囚禁。為救積克船長，二人便跟隨保沙船長遠赴東方海洋，求助於臭名遠播的中國海盜嘯風船長，並聯手與東印度貿易公司展開生死決戰。另一方面，由於心臟被東印度貿易公司操控，鬼船長與他的鬼船橫掃七海，誓要將各海盜趕盡殺絕！大海盜時代面臨終結，在自由的大海上，魔盜王一眾與鬼船長的終極之戰一觸即發！

*今集最想睇當然係 發哥, 不過個角色所限, 可以發揮嘅地方唔多。套戲成兩個半鐘有多, 真係坐到腰骨都直埋。今集多咗悶場, 部份情節又好混亂, 總體而言係比預期中差嘅。完場時記得聽晒首歌仔先離場, 因為仲會有一段隱藏嘅 final ending。

六四事件18周年

咁就十八年, 究竟當年死咗幾多個好漢? 究竟事件幾時可以平反呢? 記得當年 梅姐 都好支持"民運", 佢唱"血染的風采"時慷慨激昂嘅歌聲, 晌十八年後嘅今日依然感動, 依然震撼! 各位朋友仔, 當年今日你晌又邊處? 你又有無為歷史出過一分力呢?

生日K派對

今日下晝烈日當空, 打一個鐘 tennis 之後, 已經變半隻燒豬兼全身濕晒! 最後我地決定比平時早十分鐘收手, 衝入更衣室由頭洗到落腳降一降溫。食完 tea 同 闊少 行咗一陣玩具舖, 之後就接埋女友返落尖咀CEO。好耐好耐無唱K喇, 所以襯住 大編輯 生日, 攪返個生日K派對! 大編輯正日係"六四", 由於太易記, 想扮唔記得都有啲難啦。因為要趕尾班車, 迫住十二點就要散 band, 唔係班友仔唱天光都仲得呀!

灣仔睇展覽

今日晌會展行咗幾粒鐘, 攞咗好多資料參考呀!

又有新同事

今日又有一個新同事報到, 加埋呢個我地 team 就算齊人, 希望多個同事分擔吓大家嘅工作量, 唔駛再成日 OT 啦! 我地對啲新同事好好架, 專登推咗約會同佢食 lunch, 話時話都無人叫收錢, 今餐係咪即係老細請呢?!