如何免費到 海洋公園 慶祝生日

為慶祝香港 海洋公園 30年的大日子，市民由即日起至2008年1月10日期間，只要於正日生日當天蒞臨海洋公園，即可於海洋公園售票處換取即日日間入場票乙張，免費暢遊海洋公園。 此優惠不能轉贈他人或與公園其他優惠同時使用。進場前須出示香港永久性居民身分證、香港居民身分證或香港出生證明書以作核實。以上優惠於特別日子或節日均適用，而於2月29日生日的市民可在2月28日或3月1日享用此優惠！

明明(Ming Ming)

導演: 區雪兒
主演: 周迅, 吳彥祖, 楊祐寧, 張信哲
片種: 愛情

俠女 明明 向來敢愛敢做，當遇上浪子 阿D 即擦出火花。阿D開出五百萬便與她遠走哈爾濱雙宿雙悽之條件，明明二話不說，打劫地下組織頭目 貓哥，並將他的神秘木盒一併奪走。貓哥怒火中燒，下令手下 老鼠 捉拿明明，更要將盒子原封不動拿回。就在逃跑的一刻，明明在中環鬧市遇上古惑仔 阿土 及與自己長得一模一樣的少女 NANA。明明把贓款嫁禍NANA，自己則保留盒子成功脫身。幸好NANA遇上阿土，暗戀明明的阿土將二人錯認，兩人便開始其亡命之旅。明明和NANA分頭趕至，阿D卻於上海神秘失蹤，只留下謎樣的電話留言。阿土眼見NANA情歸別處不是味兒，但仍甘願為身邊的心上人赴湯蹈火。追查下知道了阿D是為了解脫自己噩夢才遠走上海...

*今晚睇咗呢一套好多人話唔明嘅"明明"。個故事係差啲, 不過成套戲拍得好有風格, 拍攝手法配樂剪接都唔錯。其實最唔明係點解會叫"俠女"? 明明只係一個任意妄為嘅打女, 究竟係"俠"晌邊度呢?!

情人... 盡在不言中

情人　唱: 杜德偉　
作詞: 于光中　作曲: 林健華

Girl 每當我開始沉默的時候妳比我更難過　好像你的錯
Girl 每當我夢想未來的時候妳興奮的感受　比我還要多
輕柔　像陣微風　吹過　我的心中
一切　都會不同　透過了　妳的眼

情人　愛卻更多　虛情假意的話不說
只用一顆真心　默默愛我　最珍貴的感動　盡在不言中
情人　愛卻更多　開始就要愛到最後
於是妳我　真心　越來越濃　最珍貴的感動　藏在我心中

Girl 我不是故意對你冷落大部份的時候　我不夠溫柔
Girl 我強烈感到時間不夠想牽著妳的手　對抗寂寞
輕柔　像陣微風　讓我　從容不迫
一切　都會不同　有了妳在身邊

我唯一的情人　愛卻更多　虛情假意的話不說
只用一顆真心　默默愛我　最珍貴的感動　盡在不言中

燒錄光碟的知識

空片的種類其實不像一般人說的, 只有金片、水藍片、白金片、藍片這幾種, 其實那只是肉眼看到的部分, 每一家工廠所用的染料(也就是原料)都多少有點不同, 不過大致上是這四種, 我們就這四種一一來做說明:

1/金片: 這是四種片子中最早期的產品, 也是最貴的, 但是貴並不一定就好, 貴的原因是它含有金的成份，所以它貴, 它的優點是保存性是四種片子中最高的, 聽說可以到100年(我不知道，誰能活到那麼久?), 缺點是貴、對燒錄機的雷射功率要求高。
2/ 藍片: 這種片子特點是便宜, 也是它的優點, 最大的缺點就是保存性差, 對燒錄機的雷射功率要求比金片還高。
3/ 白金片: 和水藍片一樣是比較後期的產品, 優點是保存性高、可抗紫外線、價錢合理、對燒錄機的雷射功率要求低, 要真的挑缺點的話那只能說它對燒錄機的雷射功率要求比水藍片要高一點了。
4/ 水藍片: 和白金片一樣是比較後期的產品, 優點是價錢合理、對燒錄機的雷射功率要求為四種片子低中最低的, 燒錄出來的片子反射率最好, 要真的挑缺點的話那只能說它保存性比白金片差一點了。

Orientation Program

今日要出席公司嘅 Employee Orientation Program, 成個下晝都唔晌 office。一次過聽晒全間公司嘅發展歷史同目標, 僱員享有嘅福利同義務....等等。前前後後聽咗成三個幾四個鐘, 真係聽到頭昏腦脹! 完晒個 program 差唔多六點, 返到自己位再跟一陣 job 已經成七點半喇!

試西裝 做新衫

哈哈~ 可能呢幾個月做少咗運動, 我覺得最近好似有輕微發福呀.... 頂! 好彩, 尋晚攞返之前幾年訂做果套西裝嚟試都仲啱身, 大佬 結婚果晚唔怕無西裝著! 呢套西裝我只係著過一次, 不過我尊重呢位好朋友嘅大日子, 所以今晚去 阿火 舖頭訂做咗一件新嘅恤衫當日著。做完新衫之後, 就約咗 李氏夫婦 同一個外國返嘅舊同學食晚飯, 開開心心咁傾到十點幾就散 band 各自歸家喇。

香港迪士尼開生日會

尋日係 卓言仔 嘅生日, 佢 Dadad 出手好豪咁請晒兩家人去香港迪士尼開生日會! 我地兩家人晌 Disnay's Hollywood Hotel 訂咗兩間房, 但據聞呢邊既自助餐無咁好, 所以夜晚就 book 咗晌另一邊嘅 Hong Kong Disneyland Hotel 食自助餐。迪士尼都好識做, 一上房已經預備咗生日禮物, 係一個用布做嘅生日蛋糕同一張生日卡。晌房坐咗一陣, 就同啲小朋友轉車過 HK Disneyland Hotel 果邊玩。趁啲小朋友晌大草坪玩到顛, 我同女友就拍住拖邊行邊影相, 行晒成間酒店。自助餐六點鐘開始, 一入到去已經見到米奇, 布魯圖, 高菲三隻嘢四圍行, 四圍攪啲客人。收得四百幾蚊一位, 當然要食返夠本啦, 而食物水準又確實唔差喎。到咗幾不多七點鐘, 米奇就親自捧住一個生日蛋糕同壽星仔賀壽, 再送上一張有 米奇, 米妮, 布魯圖, 高菲 簽名嘅 Birthday Card! (未完待續)

Happy Birthday to 卓言仔

卓言仔 生日快樂!

伯伯祝你:
健健康康, 肥肥白白; 精精靈靈, 古古惑惑 !

囍月 Cheerful Cafe

今晚應邀出席一個梅迷聚會, 聽吓幾位有心人想晌今年籌辦嘅紀念活動, 一齊討論比吓意見。基本上整體意念唔錯, 但係涉及嘅財力人力物力巨大, 要實行真係唔容易, 希望快啲搵到讚助商啦! 今次聚會嘅 Cafe 都有啲特別, 係由幾個梅迷合資經營, 所以 梅姐 嘅海報同音樂自然少不了! 有興趣嘅梅迷有時間就上去支持吓啦!


囍月 Cheerful Cafe
香港 銅鑼灣 利園山道13-15號 三樓

兄弟團飯局

今晚輪到兄弟團集合, 約咗晌銅鑼灣"泉章居"傾吓五月嘅搶親大計。為咗還我一個清白, 證明平日遲到與我無關, 我準時到步之餘仲開定茶攞定位添。坐咗十五分鐘左右就人齊, 呢班朋友又幾準時喎。朝延不用餓兵, 只得六個人但係叫咗個八人餐, 一於食飽飽先慢慢傾! 其中一個兄弟, 大家聽對方個名就聽過好多次, 但一直未見過面。咁我以為今次係第一次見啦, 點知佢一見我就同我打招呼(?), 原來以前晌"潮特"見過架喇, 不過當時我唔知大佬有呢個朋友, 咪無印象囉! 除咗我, 幾個兄弟本身已經識, 所以好快就傾到嘈喧巴閉。最後嘅結論係乜? 咪就係到時一切執生, 以幫大佬成功迎娶阿嫂為目標囉! XDDD~

奇異的海洋生物(三)

這只先前不爲人所知的紅色生物稱爲"達磨鱿魚", 是從大西洋中脊北部八萬多深海生物中脫穎而出的。 "全球海洋生物人口普查"小組將漁網投入深達三公裏的海底後共捕獲五十多種類型不同鱿魚。這種新型生物個頭非常矮小, 眼睛半透明, 觸須處有大量吸管。這種生物的嘴部形狀表明它是一種咀嚼能力極強的生物。

梅姐入行廿五週年紀念

2007年係 梅姐 入行廿五週年嘅紀念日子, 尋晚收到一個 fans 朋友嘅電話, 問我有無興趣同時間, 幫手去籌辦紀念活動? 有關 梅姐 喎, 當然無問題啦! 雖然仲係好初步嘅構思, 但身為 fans, 只要時間許可的話, 幫幫手又有何難?! 已經約定時間見面詳談, 期待中。

奇異的海洋生物(二)

"全球海洋生物人口普查"小組在澳大利亞東北部的珊瑚海意外發現了"侏羅紀蝦"。當捕捉到這種蝦時, 研究人員感到很驚訝, 因爲它們屬於本應在五千萬年前本滅絕的生物種類。這種蝦生活在海底四百米深處, 研究人員將其稱爲"活化石"。

抵食下午茶

今日下晝同女友陪董事長, 董事長夫人晌荃灣飲下午茶, 四個人前後叫咗十幾樣嘢都只係HK$106, 真係幾平! 之後同女友去行"十蚊店", 個舖位都成間超級市場咁大架, 乜嘢種類嘅貨都有啲, 隨時可以行成粒鐘。你有心機慢慢搵的話, 有啲產品真係幾抵架, 我臨走時都放低咗七十個大洋!

奇異的海洋生物(一)

這種蟹被稱爲"雪人蟹", 完全沒有視覺功能, 身上布滿了黃色的細菌群落。它不屬于此前任何生物分類, 被研究人員在太平洋河床發現。這種蟹生活距南太平洋複活節島一千五百公里附近的深海。一些研究人員爲, 細菌群落可以幫助"雪人蟹"對付那些來自火山噴發口的有毒液體。

"姊妹"小皮鞋

尋晚阿嫂約咗女友同班姊妹第一次見面, 傾吓接新娘果日嘅詳情。基本上女友要準備嘅都齊晒, 係爭對鞋。見今日早放工, 就陪女友四圍再睇睇啦。 哈哈~ 搵咗幾個星期, 今晚終於買到一對啱心水可以晌果日著嘅小皮鞋喇。加埋呢對鞋, 全套姊妹裝就攪掂晒, 唔駛再四圍行喇! Yes!

豪華午餐 Shabu-Shabu

話說上回展覽會期間雖然做到昏天暗地, 但係就得到唔錯嘅 feedback, 總公司為咗慰勞我地 team, 專誠叫美國同事帶獎金比我地食餐好, 咁就當然唔駛客氣啦! 因為要就晒成 team, 所以決定食 lunch, 亦即係唔去得遠。諗起公司附近有幢大廈成日經過, 水牌上有幾間唔同專題嘅日本料理, 就提議一試! 我地選咗間食 Shabu-shabu 嘅, 環境唔錯之餘, 價錢亦比意料中平。我要咗一個"和牛火鍋定食"(和牛即係日本牛肉, 通常唔註明嘅只會係美國牛肉), 女友就要咗個"雜錦刺身飯"。雖然我晌日本已經食過好幾次牛肉火鍋, 但用"紙"做個大鍋都係第一次! 好喇, 昆布湯水滾之後, 跟住嘅前菜, 蒸蛋, 沙律, 雜菜同手打烏冬陸續上場, 最後先排到主角"和牛"。一見啲牛肉就知係好嘢, 又新鮮色澤又靚, 雖然只得六片, 但其實每一片都好大件, 牛味十足勁好味道!

鼓聲響起

今日忙到傻, 八點半返到公司都未坐低, 就比班鬼叫咗去開會。跟住左行行右行行, 成十一點先可以返埋位坐一坐低。但係坐咗唔夠五分鐘就聽到啲怪聲... 原來係個肚打鼓呀 @,@... 嗱嗱聲搵嘢食啦!

Welcome lunch

放完個長假, 又要開始再搏殺。今日美國又有一 team 同事到咗, 香港又有一個新同事返工, 所以食咗一餐 welcome lunch。雖然係政治飯, 不過美國班同事好 nice, 呢餐飯又由公司比, 所以個個都食得好開心。

"維尼之家"

今日係復活節假期 -部屋三部曲- 嘅最後一站"維尼之家", 亦即是我 大佬 新居。由大門口開始, 無論主人房, 客房, 大廳, 廚房, 浴室, 總之全屋每個角落都有 Winnie the Pooh 嘅影子。主人房裡面有一隻勁大約三呎高嘅 Pooh 公仔, 客房床上面又有成廿幾三十隻 Pooh 公仔。再加上大大細細, 各式各樣嘅 Pooh 擺設同用品, 隨時過千件! 今次上去"維尼之家", 一來係新居入伙到賀, 二來就係送貨, 因為早前應承咗會送一部內置 160GB Harddisk 嘅 DVD 錄影機做新婚/屋賀禮。話時話, 連我自己屋企都未換 DVD 錄影機呀! XDDD~

"祖祖動物園"

今日係部屋之旅第二站, "祖祖動物園" - 一間五百多呎嘅屋, 有一位 園長, 兩隻狗, 兩隻貓, 一隻兔仔, 一隻倉鼠(可能仲有一家小強)。每次 園長 返到屋企一開門, 眾"仔女"一擁而上, 真係企都企唔穩。基本上 園長 一踏入家門就唔會得閒, 餵佢地食嘢同執臭臭已經可以玩上一粒鐘。而且 園長 亦唔可能放大假, 因為無人有能耐攪得掂呢班"仔女"之餘, 園長 唔見佢地一日都會訓唔安坐唔落。我地照住 園長 嘅指示, 坐咗一程長途巴士, 晌一個非常大陸 feel 嘅站落車。村姑 look 嘅 園長 帶我地去咗間地到茶餐廳食晏同餵蚊(?!) 之後, 就正式進入動物園。去得動物園, 一半以上話題就係研究吓養動物, 睇吓動物台同動物書, 唔覺唔覺咁就幾粒鐘。到咗晚飯時間, 園長 仲搖身一變賽車手, 逢人過人逢車過車, 飛車出去屯門食大排檔添。

帶小花去覆診

今日帶 小花 去覆診, 獸醫話情況雖然穩定, 但一覺得 小花 有些少唔對路就要即時再睇醫生, 唔係手尾長喎。返到女友屋企, 齊齊幫 小花 抺乾淨個身再慢慢餵佢食嘢。唔覺唔覺已經攪到八點幾, 夜晚晚費事成家人四圍行, 所以就留晌女友屋企一齊叫薄餅外賣!

"闊少玩具屋"

話說上咗去 闊少 屋企玩, 亦即係展開咗我今個復活節嘅 - 部屋三部曲 - 第一站就係"闊少玩具屋"。呢間屋差不多每個角落都有玩具, 基本上有齊市面上各式各樣嘅遊戲機, 再加上大量 CD, 影碟, 漫畫, 真係可以隨時做一星期隱蔽青年都唔會悶! 重災區當然就係佢間房啦, 明顯已經用盡每寸空間, 藏品仲數以萬計(價錢)添。大家上到去又確實幾忙, 有人打機, 有人上網, 有人睇漫畫, 有人睇畫集, 仲有人試西裝添! 但係得三四個鐘咁少, 根本唔夠時間用。所以呢, 大家好無奈咁將自己想睇, 想玩, 想要嘅嘢, 一一準備好, 臨走時跟身帶走囉! 其實間屋已經唔夠位用, 大家都係用心良苦為主人家好啫! XDDD~

婚禮司儀

尋日收到新任務, 大佬 想我晌婚禮幫手做司儀。哈哈~ 既然得到佢同阿嫂嘅賞識, 當然應承啦! 今日一早就入咗將軍澳見下個拍檔女司儀, 同傾一傾當晚要注意嘅地方。之後趕返出 King's 打咗大半個鐘頭 tennis, 洗完白白之後就去接女友。跟住同成班網球組員去食 tea, 食完就上咗 闊少 屋企玩喇。

接小花出院

今日晌動物醫院接返 小花, 獸醫話如果發現佢再唔食嘢或者無臭臭就要即刻覆診。返到屋企, 女友好有心機咁幫佢抺身同餵約, 仲開咗罐新糧比佢食, 攪到 小白 同 當奴 吃晒醋, 晌身邊團團轉, 真係比佢兩隻嘢煩死! XD~

"香港原創"黑店事件簿

話說我打算送部DVD機賀 大佬 新婚之喜, 之前已經有共識支持"本地創作", 價錢同型號都決定晒。好喇, 見聽日就放復活節假, 間舖頭晌公司附近又有分店, 咪趁食 lunch 時到所謂嘅"陳列室"買啦! 上到去已經覺得奇奇怪怪, 一間上樓嘅"陳列室"得果一百呎左右, 仲有一大班人晌間舖中間用張枱開會(?!), 一見我地就鳥獸四散。之後我發現到我部 target 就叫佢攞比我睇. 有個女店員A 即時話呢款已經停產, 唔會有貨。跟手後面個老男店員插咀話月尾有新款, 叫我唔好買住, 一係遲啲再嚟過。
本人問: 兩部有乜分別?
老男店員: 加咗"高清"系統, 其他一樣, 乜都有啦!
本人問: 價錢呢?
老男店員: 貴六百蚊左右啫, 低呀!
本人答: 咁唔係咁好, 我同朋友講咗買呢款... (豫疑緊)
女店員A: 呀, 原來仲有兩部喎! (豫疑期間, sales 插口, 指向櫃頂)
女店員B: 你係咪要先, 係就賣埋比你, 寄咗返倉就無喇!
本人答: 咁幾多錢? (我同女友考慮期間佢地已經開定盒)
女店員A: $2199
本人答: 我晌旺角分店睇到時係$2099喎。
老男店員: 唔係, 電腦都係打$2199呀, 好低架喇...(女店員A已經開盒)
老女店員: 旺角無架喇, 最後呢兩部!(後面有個老女人叫過嚟)
女店員B: 簽咭定現金?(開始摧我比錢)
本人答: 呢度都係寫住$2099(我拎起個價錢牌比佢地睇)
女店員A: 呢部唔一樣架, 你睇下個顏色!(指向另一部機)
本人答: 個名牌係呢部喎, 個 item 名係一樣架喎!
女店員A: 唔係唔係, 信我啦, 唔一樣架!(有少少唔識答我)
老女店員: 無架喇, 你去睇下囉, 返轉頭呢兩部都無埋添呀!(開始凶我)
女店員A: 幫你包起佢啦!(即時收盒)
本人話: 但係價錢唔啱喎!(轉身行開)
老男店員: 你地點做嘢架, 打錯價錢!(扮傻)
老女店員: 呀, 收起埋呢兩部, 唔好賣喇! (大聲晦氣講)
本人: (轉頭啤佢一眼, 無出聲拖女友走)
女店員A: 先生, 返轉頭就無架喇! (博最後機會)
本人: (身上面嘅"卓羅"開始冒煙, 拖女友入電梯, 閃!)

沿途諗起個老女人嘅惡劣態度就愈諗愈慶, 決定運用我對傳媒嘅影響力一洩心頭之憤! 點知 大編輯 話呢間嘢個名一向都臭, 投訴都無謂, 叫朋友唔好買佢地啲貨緊要啲。又係喎, 上網搵一搵已經見到好多人晌不同嘅影音留言版勁插呢間黑店。黑店叫乜名? 將"A+C+L"三個字母加埋佢啦! 間黑店仲 sell 自己"香港原創", 影衰晒香港呀!

小花病咗呀

今日女友隻愛貓 小花 有病入咗動物醫院, 仲要留院幾日。好彩放工前收到電話話病情轉好, 唔駛開刀咋! 其實寵物生病好難即時發覺, 通常都要病咗一段時間, 有好明顯徵狀先察覺到!

出爐蛋撻

尋日係正式晌公司以新身份開工嘅第一日, 為求皆大歡喜, 主動買咗四打出爐蛋撻請同事食。無睇錯, 係四打! 原來我個部門, 唔經唔覺已經有成四十人喇。要咁多個蛋撻當然係叫外賣啦, 送到上公司都仲係熱辣辣架... 諗返起都好味道!

"Momentum" Opening

趕下場係乜? 咪就係趕去我女友有份參展嘅 art show opening 囉! 四點幾上到去, 等咗一陣就開始喇。因為今次個場地比較隔泄, 嚟嘅外人唔係好多, 招呼都好輕鬆, 之後坐到六點幾就先行告退。因為女友要買鞋襯姊妹衫, 所以我地跟手就落咗 CWB 行街街。行行復行行, 鞋就睇唔啱喇, 但係搵到個幾啱嘅手袋, 總算有收穫。查實女友都只係第一次幫朋友做姊妹, 所以對有關嘅事物都有啲緊張, 阿嫂記得睇住佢呀!

Big Bother Big Day!

今日係大佬過大禮嘅大日子, 雖然唔多夠訓, 但為咗撐兄弟, 十點鐘就起咗身 stand by! 紅色專車十一點左右到步, 人齊正式出發! 成朝跟住大佬四圍走收集物資, 先知道過大禮要準備嘅嘢絕對唔可以睇少, 事前無 plan 過都幾大鑊(喂, 二少! 上次幫你都唔覺你有咁多嘢準備嘅?)。大佬邊做邊教, 怕到我時乜都唔識喎... 查實... 到時我都唔會放過佢啦~XDDD! 今日太陽伯伯好比面呀, 陽光普照, 我地冒住被曬燶嘅機會, 晌烈日當空之下準備好晒就上未來阿嫂屋企送禮, 見到世伯同伯母當然要恭喜一番, 坐低一陣都未見靚靚阿嫂, 一問之下先知原來習俗係唔會見面住。我地乖乖咁坐多一陣拎埋回禮就撤退, 之後同大佬食埋個 lunch(即係我嘅早餐) 就趕下場喇!