開工大吉!

好, 放完假喇, 係時候收拾心情, 開工大吉! Gogogo~

"撞"藝展展品 -「灰雪」系列

收到風今期 "HK MAGAZINE" (No.667) 有介紹今次個展覽, 仲刊登咗我女友嘅作品。夜晚同佢屋企人食完飯即刻去搵, 點知去到派發地點已經無晒! 唯有送佢一家人去搭車, 之後以閃電俠嘅步行速度行晒成個旺角區, 哈哈哈, 終於比我搵到啦! 查實呢套作品系列名為「灰雪」, 靈感同名稱來自一隻陪咗我女友一家生活十六年嘅老貓, 確係筆筆有感情!

初七"人日"食生日飯

尋日下晝"撞"藝展開幕, 女友早兩個鐘已經到場幫手打點。到步即問佢食咗嘢未, 一如所料掛住做乜都未食, 即刻捉佢出去食tea啦! 搵咗間懷舊裝修嘅餐室, 夠平夠地到。女友要"菜肉雲吞米+奶茶", 我要個"腿蛋回窩肉麵+檸茶", 埋單都只係四十蚊。今次展場偏遠人流唔多, 我見唔駛幫手就晌"牛棚"四圍睇四圍影, 期間撞到 張達明 排戲, 佢路過都有入場支持吓, 睇完之後簽個名攞塊餅就返去繼續排戲。初七係"人日", 夜晚約齊全家人晌 警察俱樂部 食餐生日飯。見女友招呼人企到腳都軟, 一於飛的過去啦, 點知間酒樓勁旺, 訂咗位都要等成大半個鐘, 獨市生意真係好做啲嘅! 新年菜牌打開主要都係餐, 一個餐滿足你所有新年願望, 有雞有魚有肉有菜仲有壽包添!

"撞"藝展 /"Collision" Art Exhibition 正式開騷

今日已經正式開 show!

"撞"藝展 / "Collision" Art Exhibition

聽日年初七就開 show 喇, 有時間就嚟參觀吓啦!

地點: 1a 空間 - 香港土瓜灣馬頭角道63號牛棚藝術村14號

開幕日: 2007-02-24 星期六, 17:00

夢裡共醉

自從 梅姐 去咗遊埠之後都好少夢到佢。之前兩次夢到 阿姐 都係啲公開場合, 夢中忽然發現佢同我排排坐, 有微笑無對話... 之後一次上咗台表演, 另一次就上咗台演講之類, 但內容 detail 永遠記唔起。今次一樣, 醒咗之後就開始慢慢唔記得內容, 只係記得大家有講有笑咁傾計... 仲做咗一樣我通常生日會見到佢先會做嘅事... (知情人士唔好抦我, 唔該!)

電影: 門徒(Protege)

導演: 爾冬陞
主演: 劉德華, 吳彥祖, 古天樂, 袁詠儀, 張靜初
片種: 劇情

卧底“阿力”用了八年時間，從一名小拆家混到壟斷海洛英市場的“莊家”身旁，負責處理出貨及運輸工作。多年以來，他全心全意要搜集一條完整販毒線的全部資料，可是行事小心的莊家從沒透露過貨倉、製毒工場的位置；甚至其他同事的面貌，阿力都從未見過。幸而莊家有退休之意,想將生意交給阿力接管,漸漸向阿力道出經營的秘密。阿力越接近莊家的真相，越感到迷失，活在兩個極端世界中間，他與吸毒者“阿芬”投入了一段互相慰藉、各取所需的感情。但是每當他看見阿芬臂上的針孔時,心中感到更沉痛的震撼。莊家帶阿力到金三角,在軍閥、毒販和罌粟的圍繞下，對阿作出接棒前的最後試探。一場鬥智的過程，令阿力獲得莊家的絕對信任。莊家舉家移民，在離境時被探員拘捕。莊家竟自殺以截斷警方的偵查線索。阿力繼承了莊家位置，一邊當毒販、一邊繼續追蹤販毒線的源頭，他已經分不清自己的真正身份…

*近期唯一一套可以吸引我入場嘅港產片, 慶幸睇完之後都無浪費我嘅時間同金錢。演員導演劇本交足功課, 片尾一句「究竟是空虛可怕，抑或是毒品可怕？」... 唔, 我覺得空虛唔係最可怕, 最可怕應該係一個錯誤嘅決定! 賣毒品造毒品嘅人固然有問題, 但係食同唔食最後都係由你自己決定, 你決定咗要食要有一時之快, 就要對自己負責!

電影: 翻生侏羅館(Night At The Museum)

導演: 桑勒菲(Shawn Levy)
主演: 賓史迪拿(Ben Stiller), 羅賓威廉斯(Robin Williams)　
片種: 喜劇

《翻生侏羅館》，一套老幼咸宜的新年電影。戲是天方夜譚式故事，因為一塊古埃及金碑帖之法力，一到晚上便令全博物館的展品活起來，待業中的雙失中年拉利(Ben Stiller)應徵做夜班管理員，接替三名年老退休夜班管理員。晚上來臨，瘋狂博物館便如戰爭嘉年華會，拉利 應接不暇身陷險境。 一班三吋釘模型有古羅馬士兵，西部拓荒歷史人物，相隔二千年，本性相同就是愛開拓彊土，終日見面就是打生打死；美國內戰兄弟士兵亦是一活過來便打個不亦樂乎；總統蠟像羅斯福(Robin Williams)心儀印地安女名人腊像；能言之古文明之迷的復活島巨石像；愛追骨頭遊戲的暴龍骨骼；英俊埃及木乃伊王子；缺乏父愛的蒙古王；一班鑽木取火愛食滅火器泡泡的原始人。很多人類的偉大人物和相關進化動物或已絕種動物模型就是在博物館中走來走去。 再來個三件受金碑帖法力影響，一到晚上便精力充沛的老管理員回來偷金碑和物品，主要想保持青春活力的生活，只自私自利想獨佔，正是人類之自私諷刺。其實賦予一切的就是金碑帖，沒有了所有都不會活起來，大家最後就是合力去奪回，和平大團圓晚晚繼續開派對。 沈重的喻意在嬉笑怒罵間，不說教，影片做到了。

自然博物館中一切就是曾居住在地球上的，但是互相殺戮和破壞，完全不珍惜賦予一切的地球資源，沒有了這個什麼活動力都沒有了，但人類迄今仍舊打生打死打足幾千年，貪婪仍舊，動物一隻隻慢慢步和成博物館標本，人類在破壞賜予一切活力的珍貴金碑。我們在犯戒，需要覺醒便是當大家面臨地球出現危機的時候，那今天25度的二月天氣不已正是了嗎？ 地球出問題，活不下去，這套影片就是叫我們和下一代正視和溫習歷史，了解我們的祖先，珍惜地球這寶地。



http://www.nightatthemuseum.com

行花市送狗迎豬!

年三十晚同董事長, 董事長夫人食完團年飯之後, 就上咗"潮特"探吓班老友! 傾咗一陣就聽到佢地話今年尾會再加租, 幾萬蚊租一個二百呎都無嘅舖位, 個市又唔好, 都真係好難頂落去... 唔通要賣埋白粉咩?! 希望佢地頂得住啦! 之後見未夠十二點, 即刻同女友過"花墟"行花市, 熱熱鬧鬧咁過新年. 不出所料勁多人呀, 排成十幾分鐘先入到去, 雖然係迫啲, 不過氣氛唔錯, 要趁熱鬧迫吓都無所謂啦!

金豬獻瑞, 迎豬接福!

恭祝大家
肥肥白白, 身體健康!
財源滾滾, 豬籠入水!!

眾生花 - 十二金釵 featuring 關淑怡

眾生花　唱:關淑怡　曲:陳輝陽　詞:林夕

蓮花色似空　為純白貞忠
恨吻著風　一顫動　睡蓮被染紅
曇花　一秒鐘　任蝴蝶簇擁
為記念過客那陣痛　到下世重逢
眾生相碰　夢到劇終　黛玉之痛　化作落紅

如水仙最懂　自憐在水中
惹蜜蜂　香暗動　被緣份播弄
誰惜花也懂　蜜糖為播種
歲月叫花瓣放鬆　轉眼不再紅
眾生相碰　憑美豔填補蒼穹　十方起哄　红顏不易種

*估唔到晌送狗迎豬之前, 會聽到 SK 嘅新歌!

點解「洗邋遢」要晌年廿八？

話說港澳地區流行「年廿八洗邋遢，若然不洗豈會發？」嘅講法，所以年廿八「洗邋遢」係取其諧音「易發」。年廿八應該點樣去「洗邋遢」，就係除咗大掃除之外重要自身潔淨，包括沖涼、洗頭及理髮等！據聞只要晌過年前做好自身同家居嘅清潔，就可以消災去病，大吉大利。而年廿九同年三十，一般都會用作一家大小食團年飯之用！

China Coast Bar & Gill

Regal Airport Hotel

9 Cheong Tat Road, Hong Kong International Airport,

Chek Lap Kok, Hong Kong.

Tel: (852) 2286 8888

情人節的燭光晚餐

My Valentine's Set Menu is coming...

祝大家情人節快樂!

最近趕 job 趕到昏天暗地, 所有二月 item 都要新年假前準備好! 今日情人節前夕, 鐵定唔會OT, 要同我女友去食餐好嘅, 一於直落慶祝到 214, YEAH!
晌度祝各位未搵到另一半嘅朋友聽日都心想事成!
已有另一半嘅朋友聽日就甜甜蜜蜜, 情人節快樂!

"撞"藝展 / "Collision" Art Exhibition

日期: 2007-02-24(16:00) 至 2007-02-28(17:00)
開放時間: 下午二時至八時, 星期一休息
地點: 1a 空間 - 香港土瓜灣馬頭角道63號牛棚藝術村14號

參展:
Coco Tsui, Kirsty Chau, Rosita Chung, Ann Lo,
Joanne Sin, Tam Ka Wing, Chan Lai Kuen, YY, Laurence.

開幕日: 2007-02-24 星期六, 17:00

*各位朋友, 有時間就嚟支持吓我女友啦!

是日 Annual Dinner

今晚係公司嘅 Annual Dinner, 晌港島區連開六十多席, 全場人山人海! 通常呢啲大聚會特別多嘢睇架, 邊個係高層淫魔咸豬手, 邊個低胸露背想搏出位, 邊個人見人閃最不受歡迎... 等等, 通通一目了然! 想知自己人緣好唔好亦都唔難, 如果多過兩個唔同部門或以上嘅同事搵你影相傾返幾句, 人緣差極有限! 當然亦都有啲同事有到無到都無人知, 全晚齋坐連聲都無出過一句, 中咗獎都無人分享! 今晚食物水準又係出奇地差... 花枝片硬過膠片, 魚翅咸過老火菜乾湯, 連燒雞都似擦紙膠, 全晚唯一係個甜品好食少少! 因為成晚都有人唱歌跳舞, 好嘈好嘈, 嘈到傾計都要大大聲, 走嘅時候聲都沙埋!

二零零六年度占美樂園金曲榜

所有排名不分左右前後中間... 唔一定係零六年嘅新歌, 但一定係我晌零六期間聽得最多嘅歌! (票數尚在點算中... 歌曲隨時會更改... XDDD)

1/ 圓滿 - 何韻詩
2/ 愛得太遲 - 古巨基
3/ 最佳損友 - 陳亦迅
4/ 關於我 - 關淑怡
5/ 火鳳凰之舞 - 梅艷芳
6/ 夜半敲門 - 何韻詩
7/ 張開眼睛 - 劉德華
8/ True Colors - Cindi Lauper
9/ Don't Tell Me - Madonna
10/ 帶我去跳舞 - 關淑怡

「新奇士 」sticker 的意義

有人買了兩個「新奇士 4012」回家，覺得很甜，但又有人說「新奇士 3108」才更好吃。看來對於很多人來說，還是不太明白這個 sticker 的意義呢！在北美地區生產的新鮮農作物，包括水果和蔬菜，都會貼上一個叫做 PLU code 的貼紙，PLU 即是 Price-Look-Up，故名思義是給零售商看價錢用的，人客拿著這個水果去收銀員櫃檯付款時，輸入這個數字，就知到價錢、重量等資料。就橙來說，就已經有幾十種了。以橙為例，一般香港可以買到的是 4012 和 3108 這兩種。3108 其實是指 Medium Valencia，Medium 是中等大小，一箱大概是 72 至 88 個左右，Valencia 是有核的橙，適合做橙汁。4012 是 Large Navel，Large 是大橙，一箱大概不多於 56個，Navel 是無核的橙，適合去皮吃。至於那一個比較甜，還是要看你運氣啦。此外，PLU code 還有另一個作用，如果這個數字是4個位數，則代表這個農作物是用傳統的種植方法。如果這個數字是5個位數，而且是「9」開頭的話，則是以有機耕種方式去種植。如果是5個位數，而是「8」開頭的話，則是經過基因改做的農作物呢！

HoCC & Madonna

今日買咗"HoCC Live in Unity 2006"CD 同"Madonna The Confession Tour" DVD, 過幾日聽/睇完寫返個 review 呀吓~

豬軟骨上海麵

細細個開始就鍾意食豬軟骨, 當時最易食到既就係阿媽煲湯時既排骨湯渣. 跟住唔知幾時開始, 街上面就多咗好多舖頭有得食, 最常見就係帶點茄汁味既豬軟骨撈麵. 既然叫得豬軟骨, 晌肉上邊無軟骨真係唔係好掂, 但偏偏市面上最少有一半食店既豬軟骨麵永遠多肉少軟骨, 甚至似排骨多啲... 咁我不如食排骨麵就得啦, 駛鬼叫豬軟骨麵咩?! 但係最近晌葵涌廣場食過一間又唔錯喎, 豬軟骨配上海麵, 湯有少少胡椒味再用個砂鍋仔上, 三十蚊連餐飲, 抵食!

安息吧!

女友嘅嫲嫲今日(2/2)離開咗呢個世界, 嫲嫲已經一百零五歲喇, 而家去咗佢心目中既樂土, 希望嫲嫲晌果邊繼續幸福快樂!

我係占美機長

今晚唔係好開心, 因為放咗一班朋友飛機... 呢班機唔止係飛得密... 仲要係循環線... 飛完再飛... 自己都覺得唔好意思! 但係人大咗做事要分輕重, 既然有更重要既事做就要有取捨! 不過我應承你地, 總會就得到時間再約過嘅... 循環線飛機都要停站加加油架, 係咪?!